Ezikẹẹrị 27 - IWE ỌNỊNỊ

Ahẹ izoku ana a jị yị Anitaya nịnị.

¹ Ezikẹẹrị ka ẹkụhị ọnya, Ẹnẹyịmavara ộ ka ẹ yị ọnị ka,

² Ozi-ọza, ọnị ọ̀ hụ̀ agụvị Anitaya nịnị jị òrèrè daare.

³ Anitaya nịnị vị ana ra ụtenyi dị eē pe avaba aza ana ra ụtenyi sẹ ohu nị. Ọ kà ọnị ọ̀ kà a yị wa ịsị ọnị Ẹnẹyịmavara Anahwọ aa kà ka: Ẹwụ nịnị Anitaya, wee woo zị nịnị ka u me zoza nịnị, waa gụ nịnị bẹẹ.

⁴ Ụ ka vị ụ sị mẹẹ nịnị anka ẹpa ọbanyị ana ra ini òkū nị. Aza ana a mẹ ẹpa awụ nịnị vị ana mẹẹ zoza, dị ọ gụ chịmị-chịmị.

⁵ Ọchị ana aā hị́ ịvayịnị ene hi ẹtẹ Iseniya a sị mẹ ẹpa awụ nịnị nị. Dị ẹ sị ọchị Isida hụrị ẹtẹ Ịrẹbanọnị dị e hi ọ jẹẹ ịnị anị nị.

⁶ Ọchị ana aā hị́ ooki ẹ́ dà hụrị ẹtẹ Ịbasanị ẹnẹ ẹ sị mẹ ọchị ọnị waa sị họ̀ ẹpa nịnị nị. Eteesu ẹpa awụ nịnị vị ana a sị ọchị ene hi ụtenyi ịzị aā hị́ Ịsayịpụrọsị mẹ, dị a tụ ịsị ọvwọọvụ ku ọ ịnẹ nị.

⁷ Ịta Anijipiti ọyịza-ọyịza ana a mẹ̀ ụkọrọ hi, aa gana ku ẹpa awụ nịnị nị. Aza èe re e hụrị aha ẹnẹẹnẹ kẹnẹ aa yẹ ẹ nị. Ịta Anịsayịpụrọsị ene zoza kere-kere a sị jị ozokete ẹpa awụ nịnị nị. Enyi anị vị achẹrẹ ódodo

⁸ Anisidoni ọnịrị Anaavadi nịnị aa sị ẹpa a wụ nịnị zị nị. Aza awụ nịnị ana yara mẹ̀ ụkọrọ ẹtẹẹrẹ aa mẹ̀ ụkọrọ ịnị ẹpa awụ nịnị nị.

⁹ Aza ana kọsẹ ụkọrọ ẹtẹẹtẹrẹ hụrị ẹtẹ Ịgẹba ẹ vị ikahunta ana mẹ̀ ụkọrọ ịnị ẹpa awụ nịnị. Avaba aza ana aa ngụ ẹpaa jịnẹ vị anaā haa vẹ ịdị awụ nịnị vaa sẹ̀ ohu.

¹⁰ Â nyị ẹkụra ana aā hị́ Ipesiya, Iridiya ọnịrị Aniribiya. Isoja anẹkụra ẹnẹnị hi ịnị isoja awụ nịnị. Ẹnịnị vị ana kụ ogonto ẹnịnị ọnịrị amu enyusẹ-enyusẹ ẹnịnị gẹ ẹngụ hi ịzị ụ kụ isoja awụ nịnị hi. Ẹnị ẹ mẹ ka wa nyị ụbanyị nịnị nị.

¹¹ Isoja Anavadi nịnị ẹnịrị Anihẹrẹkị nịnị ee sere ọvọ awụ nịnị nị. Dị Isoja Anigamadi nịnị ẹnị ee sere irehi ọgọdọ ịzị oserẹtẹ awụ nịnịị̄ hi nị. Ogonto ẹnịnị vị ọnị ẹẹ̄ kụụ gẹ ịnị ọvọ awụ nịnị. Ẹnị ẹ̀ mẹ ka wa vavọọ zoza nịnị nị.

¹² Ẹwụrị anẹkụra ana aā hị́ Isipeni aa sẹ ohu gẹ nị. Ệ sị isiriva ọnịrị enyusẹ irenyi-irenyi vaa hị̀ ogu ozoza-ozoza ọnị ụ nyị va gwẹtẹ hụụnị ụvọ awụ nịnị.

¹³ Ẹwụrị anẹkụra ana aā hị́ Igiriisi, Itubari ọnịrị Ịmẹsẹkị re dudu aa sẹ ohu nịnị. Dị ẹyaa kụ ọrịhị nịnị ọnịrị enyusẹ ọkatarihi vee si ụta ịsị ẹnẹ ẹyaa hị̀ hụụnị ụvọ awụ nịnị nị.

¹⁴ Anẹkụra ana aā hị́ Ịbẹtị-Itogama vị anaa kụ umaata ana a sịị̄ mẹ̀ ụkọrọ, umaata ana a sịị̄ kụ ịrẹkụ ọnịrị ụnọ vee sí ụta ịsị ene ẹyaa hị̀ hụụ ịdị awụ nịnị.

¹⁵ Anẹkụra ana aā hị́ Irodesi ọnịrị aza ọrụrụ-ọrụrụ ene hi ụtenyi vị ene vee pe ewu nịnịị hị́ ịsa. Dị ahịka ẹhọ̀mị ọdọba eyee sii sí wu nịnị ụta nị.

¹⁶ Anẹkụra ana aā hị́ isiriya (Aramị) aa vẹ ịdị awụ nịnị vaa hị́ ịsa ọrụrụ-ọrụrụ ọnị ụ nyị nịnị. Dị ahịka ịrẹta ọkatarihi, ịta ana achẹrẹ ódodo, ịta ana a mẹ̀ ụkọrọ hi, ịta ọvụ ene zoza, ọmọ, ọnịrị isuu eyee sii sí wu ụta nịnị nị.

¹⁷ Anijuda ẹnịrị Anisirẹrị nịnị ee pe wu nịnị sẹ ohu. Ịsọyịrị, ẹhụ, angwẹ orivi, ọnịrị ahọ̀nọ ẹ sị vaa hị́ ịsa ịdị awụ nịnị nị.

¹⁸ Anẹkụra ana aā hị́ Ịdamasịkọsị aa vẹ ịdị awụ nịnị vaa hị́ ịsa ọrọgọdọ ọnị ụ nyị va hi ẹtẹ nịnị. Eche ana a mẹ ẹtẹ Iheriboni ọnịrị owu anị ịzị aā hị́ Isaha ẹ sị vaa hị́ ịsa ịdị awụ nịnị nị.

¹⁹ Anịdanị ẹnịrị Anigiriki nịnị ene hi ịzị aā hị́ Uzari ệ va hị́ ịsị waa ná nịnị. Enyusẹ ọnịrị ịsẹpẹ ẹ si vaa hị́ ịsa nị.

²⁰ Â nyị ẹkụra ana aā hị́ Idedanị. Anịzọọ vị anaā kụ ịta ana aā tụ́ụ ku ịsụpa ịrẹma vaa hị́ ịsa awụ nịnị.

²¹ Anarebiya nịnị ẹnịrị ẹnị ohinọyị ẹtẹ Ikeda nịnị vị anaā kụ ezi atẹmẹ, atẹmẹ, ẹnịrị ẹvụ vee pe wu nịnịị hị́ ịsa.

²² Osohu Aniseba ẹnịrị Aniraama nịnị ệ kụ ịsẹpẹ ọyịza-ọyịza ọnịrị ịrẹta ọkatarihi irenyi-irenyi beri igooru va hị́ ịsa ịdị awụ nịnị.

²³ Anẹkụra ana aā hị́ Ịharanị, Ikane ọnịrị Edẹnị vị ọnị ẹwụrịị sẹ ohu nịnị. Ẹnị osohu Aniseba, Anasụrị ọnịrị Anikimadi vị enee pè wu nịnịị sẹ ohu.

²⁴ Ẹnịnịị̄ vẹ ịnị ohu awụ nịnị vaa ná ịta ẹbanyị-ẹbanyị, ịta onivuru, ịta ana a mẹ̀ ụkọrọ hi, ọnịrị ịta ana aā tụ́ụ ku eteesu irehi. Ẹ rẹẹ na obo ana a ta vẹchị-vẹchị dị e kuru ọ ẹtẹẹtẹrẹ.

²⁵ Ẹpa ana banyị hu kere-kere aa sịị kụ ịsị ohu awụ nịnị nị. Vị́ ụ sị mẹẹ nịnị anka ẹpa ana ya ịnị oku, dị a kụ ẹnya ọrata-ọrata hi ohihi avọọ nị.

²⁶ Ịjị aza anaa sị ẹpa awụ nịnịị zị raà sị wụ nịnị na ngụ ịnị akakana oku, dị ahị tụ́ hụrị eyi ọnị ọyị zịị hụrẹẹ vẹ, dị ọ va gara wụ nịnị và ha ịzọọ nị.

²⁷ Ịjị ahị vavọọ gara ẹpa awụ nịnị ha, avaba ịsị ohu awụ nịnị ana vị ogu awụ nịnị, avaba aza ana ngụ ẹpa awụ nịnị aa jịnẹ, Ikahunta nịnị enee tenyi ẹpa awụ nịnị, ẹnịrị ẹnị osohu nịnị, beri avaba isoja ene hi ịnị ẹpa ọnọọ vị ene vú ẹtẹ.

²⁸ Ịjị aa mụnẹ aza ene hi ịnị ẹpa, dị eyee nowu, ụtọ irehu vi enee henyi jigi-jigi.

²⁹ Avaba aza anaa sị ẹpaa zị, vị ene vee zwee hụụnị ẹpa ẹnịnị. Avaba aza anaa mẹ̀ ụkọrọ ịnị enyi ẹnịrị aza ene hi ịnị ẹpa vá naa jẹẹ ụtọ irehu.

³⁰ Avaba ẹnịnị vaa jị òrèrè ọngwọọngụ agụvị awụ nịnị, dị ẹ kụ ezi ku ịrẹsụ, dị eyee muna ẹtẹ ẹ maa jị òrèrè.

³¹ Ẹ vaa hụ agụvị awụ nịnị dị ẹ kụ́ ịrẹsụ ẹnịnị hworo-hworo, dị ẹ kụ ịta kẹnẹ-kẹnẹ hi ẹngụ. Ẹnịrị ayodu ọ vaa vị ẹẹẹ maa jị òrèrè nị.

³² Ẹnịnị àaa zị ẹngụ, dị ẹyaa jị òrèrè awụ nịnị nị, ẹ vaa jị ahẹ ka; Ye re ẹkụra ana a maanị vu hi ịnị akakana enyi da anka Ịtaya?

³³ Waa maanị sị ẹpa kụ ịsị ohu awụ nịnị aa jịnẹ kẹnẹ, avaba ịsị anẹkụra ana vọ ee sì o si tu wa ụvọ. Ogu ọnị ụ nyị va gwẹtẹ nịnị ọ mẹ ka ohinọyị nịnị ẹ̀ vara opisa nị.

³⁴ Booro aanị asị ụ gara va ha ịnị oku, we si chì na ngụ iruvo enyi. Ẹwụ rị ogu awụ beri avaba aza anaa mẹ̀ ụkọrọ yị wụ o si vu hi enyi.

³⁵ Ịsị ene tu wu nịnị aanị ộ za avaba aza ana ra hi ụtenyi zizi. Ohinọyị ẹnịnị vị ana nyayịnẹ hụrẹ ayịnẹ, dị eyirẹsụ ẹnịnị ta vara angwa mee hí wa.

³⁶ Osohu anẹkụra ana vọ nịnị vị ene venee nohi e me re wu. Ẹ ka awụ ộ ta, pooro zịna-zịna, angwa ee hi ẹnị ka asị ẹngụ ịrẹyị awụ ọnọnị ve tu ẹnị o.