Ezikẹẹrị 24 - IWE ỌNỊNỊ

Ụnọkọ ana a sịị̄ mẹ̀ ịsa.

¹ Ezikẹẹrị ka, ịnị ẹkụhị ẹẹwụ, ịnị ụhwẹ ẹẹwụ, ịnị ịrayị ọhụhịịna ana a za ẹnị ọrịhị ve hi Ịbabịrọnị Ẹnẹyịmavara ộ kà a yị ọnị ka:

² Ozi-ọza, ọnị ọ̀ chẹrẹ ẹkụhị ọnọnị tịtẹ, agụvị ka ẹkụhị ọnọnị gẹdẹ-gẹdẹ ohinọyị Ịbabịrọnị si nyima ee gu ịrẹkụ tu Ijerusarẹmị nị.

³ Ọ kà ọnị ò che ụhịrẹyị ọnọnị yị aza anị ẹnẹẹ yị ma wụ́ ịrẹyị ọza aanị. Ọnị Ẹnẹyịmavara ọ ka ọnị ò che ụhịrẹyị ọnọnị yi wa nị ka, Ẹnịnị ẹ̀ sị ụnọkọ hii ịra, dị ẹnịnị ẹ̀ dà enyi hi ọ, ohihi.

⁴ Ẹnịnị ẹ̀ tọ̀ uye ozoza-ozoza hi ọ, ụvọ ọnịrị usi uye. Ẹnịnị ẹ̀ rẹ tọ̀ọ ịpa ana nyị ẹchụkụ hi ịnị ụnọkọ ọnọọ.

⁵ Uye ẹnẹ ẹ vaa sị ọ̀ vị uye atẹmẹ ene zoza hu kere-kere. Ẹnịnị è che ọkụ hi iruvo ụnọkọ ọnọọ ẹtẹẹtẹrẹ. Navọ enyi anị ọ̀ há; dị à hụ ẹchụkụ ọnịrị uye ẹnẹẹ.

⁶ Ịsị Ẹnẹyịmavara Ananyị ụkata hu aa kà yị: Ẹkụra ọwọza nịnị ọnọnị, ọ sị da! Vị́ ọ sị mẹẹ anka ụnọkọ enyusẹ ene kurẹ dị ọza ẹ̀ yị hárá avọọ nị. Â tụ̀ uye ikonyi ikonya hụụnị anị pooro, uye ộ ta.

⁷ Â wụ̀ aza ịnị ẹkụra Ijerusarẹmị, ọza ẹ̀ yị jị wa hi ini eteesu dị a zụ ku ezi ku ọ. Ịrẹsụ ịda a jị wa hi nị.

⁸ Ẹnẹyịmavara kà ọnị ộ navọ ọnọọ tụ ịzọọ ka asị ọ tẹ̀. Anya ọnọọ yà ịzọọ aa kà a ka ọnị sị ọyịkụ-ọyịkụ họ̀ oponu ịrẹyị ẹnịnị.

⁹ Ẹnẹyịmavara Ananyị ụkata hu ka: Ẹkụra ọwọza nịnị ọnọnị ọ sị da! Ọnị ụvọta vaa kụ ọkụụ gụ agụvị ẹnịnị.

¹⁰ Ọ kà wa kụ ọkụ vẹ hu avọọ nịnị! Hu ahị hi ịra ọnọọ nịnị! Chịnẹ uye ọnọọ nịnị! Và enyi uye anị ha nịnị, dị wa rị ẹchụkụ anịị ịra nịnị.

¹¹ Booro aanị, ọ ka, à varẹma sị ụnọkọ enyusẹ ọnọọ osusu hí akịna. Navọ dị oo ví ọ́ọọ mẹ ngụra, dị avaba ịdọtị ene kurẹ zaa ẹ̀ hụ̀ và ha.

¹² Ẹnẹyịmavara kà ọnị ộ sị vụrị pooro ka ọnị hara ịdọtị ene kurẹ zaa ha, avaba anị yị vị osusu, ị́dọtị ene kurẹ za a mẹ rata, ịra ẹ́ yị hyakụ zụ hụ ọ ha.

¹³ Ẹwụ nịnị Anijerusarẹmị, ebira ịrẹkọyịsẹ awụ nịnị ọ raa mẹ ka asị ụ kụkụ nị nịnị. Ọnị ộ sị vụrị ka ọnị ọ̀ dụ wụ hụụnị anị nịnị, ama vị waa yịị mẹẹ nịnị nị. Wẹ́ yị vaa hụụnị ịrẹkọyịsẹ nịnị ẹ̀ yị vị ọ̀ọ raa sị ọyịkụ anị zụ̀ wụ nịnị ẹtẹẹtẹrẹ.

¹⁴ Ọnị Ẹnẹyịmavara Ananyị ụkata hu ọ sị ịrẹyị anị ka, o si tu ka ọnị ọ̀ mẹ ịsị ọnị ka ọnị aa mẹ, ọnị ẹ́ yị va sị eyi hụụnị ebira odivi ọnị ụ mẹ nịnị; ọnị ẹ́ yị vaa vayị awụ nịnị. Ọnị vaa sị avaba ụya ịsị ọnị ụ mẹẹ rị wụ nịnị.

Ose Ezikẹẹrị ô sú.

¹⁵ Ezikẹẹrị ka ẹkụhị ọnya, Ẹnẹyịmavara ộ kà a yị ọnị ka,

¹⁶ Ozi-ọza ọnị vee mí ịsa ụpọnya, dị ọnị sị wụ̀ ọza ọnị ọnị sị̀ ịrẹyị anị hu kere-kere. Ẹnẹyịmavara kà ọnị ọ̀ọ sị ọ wụ, asị ọnị Ezikẹẹrị kụ ịrẹka, asị ọnị jị òrèrè; asị ọnị hyakụ ka ẹgọ o.

¹⁷ Ọ kà ọnị ọọ hà iduma kẹnẹ, ama asị ọnị zẹẹ ka ọza ọ̀ wụ ọ. Asị ọnị hụ vị avọọ hụ ịrẹsụ anị ha, dị asị ọnị sị ahụ osusu ngwọọ zịịzị. Ọ kà asị ọnị va ịsa ku eyi, dị asị ọnị rị ịsa ana aā rị ọza aa zị ẹngụ oku.

¹⁸ Ezikẹẹrị ka ẹnẹnẹ ịhị ọnọọ dị ọnịrị aza aa kà ịrẹyị nị. Oruva anị kẹnẹ, dị ose anị wusu nị. Eyinẹhẹ anị, dị ọnị mẹ, á mẹ ka ọnị ọ̀ mẹ nị.

¹⁹ Anisirẹrị nịnị ê ve tu ọnị, dị ẹ ka, ọnị ọ̀ kà a yị ẹnị, yere ana vị ẹnịnị ịnị ịrẹyị ọnọnị ana mẹ ka ọnị ọ̀ maanị mẹ̀ ebira?

²⁰ Dị ọnị va kà a yị wa ka Ẹnẹyịmavara ộ kà a yị ọnị ka

²¹ Ọnị ọ̀ ka ụtụ ọnọnị yị Anisirẹrị nịnị ka ẹwụ nịnị Anisirẹrị vị enee wuu zị ka aa nyị ụkata ịnị irehi Ohomorihi nịnị. Uū sì ka wa vẹ ịnị Irehi Ohomorihi nịnị. Ama ọnị Ẹnẹyịmavara vaa mẹ Irehi anị ọnọọ ọsọọsa. Ezweyi-ezweyi awụ nịnị ana vọ hi Ijerusarẹmị vị ana a vaa kụ ịrẹkụ vaa wụ̀.

²² Ezikẹẹrị ka ịsị ọnị mẹ aanị, ẹnịnị ẹnị rẹ vaa mẹ nị. Wẹ́ yị vaa và ịtaa ku eyi nịnị, à vị ka wa rị ịsa anaā rị ọza aa zị ẹngụ oku nịnị.

²³ Wẹ́ yị vaa hụ ịsaa hụụnị ịrẹsụ nịnị, à vị ka waa sị ahụ osusuu ngwọọ zịịzị nịị. Asị ụ zị ẹngụ nịnị, dị a sị ụ jị òrèrè nịnị. Ụ vaa rị ụya nịnị agụvị ebira odivi awụ nịnị, dị wee rimanya zụ ẹngụ nịnị.

²⁴ Ezikẹẹrị ka ọnị vaa vị apọtẹrẹwaa yị wa ịjị ọnọọ. Ẹnịnị vaa mẹ avaba ịsị ọnị mẹ aanị. Ẹnẹyịmavara kà ịjị avaba ịsị ọnọnị ọ̀ọ sị mẹ ẹnịnị vaa yẹ ka ọnị ọ̀ vị Ẹnẹyịmavara Ananyị ụkata hu nị.

²⁵ Ẹnẹyịmavara kà, ozi-ọza, ọnị vaa kụ Irehi anị ana vị aha ụkata Anisirẹrị nịnị aanị kwooze hụụ ịdị ẹnịnị. Irehi anị vị ẹnẹ ẹyaa sịị me eyi, dị ọ vị ayohine ẹnịnị. Ẹnịnị ê sì ka ẹnị ẹẹ vẹ́ ịnị anị, dị ẹnị ee re e. Ọnị rẹ vaa kụ ezi ọnọrụ ọnịrị anẹẹ ẹnịnị kwooze.

²⁶ Ọ kà ịhị ọnị ọ̀ọ vavọọ mẹ, ọza ana vụrị ha hụụnị ẹngụkata ọnọọ vaa vẹ vaa kà a yị ọnị Ezikẹẹrị.

²⁷ Ịhị ọnọọ gẹdẹ-gẹdẹ, ọnị vaa sị ụkata yị ọnị dị ọnị ha irenu aa kà ịrẹyị. Ọnị vee pe ọza ọnọọ kà ịrẹyị. Aanị ọ́nị mẹ vaa vị apọtẹrẹwaa yị ezi Anisirẹrị nịnị nị. Ẹnịnị vaa yẹ ka ọnị ọ vị Ẹnẹyịmavara.