Ezikẹẹrị 23 - IWE ỌNỊNỊ

Ẹyịnyara Anẹẹ ẹẹva

¹ Ezikẹẹrị ka, ẹkụhị ọnya, Ẹnẹyịmavara ộ kà a yị ọnị ka,

² Ozi-ọza, anẹẹ ẹẹva, ọnyị ẹnịnị vị ọnya.

³ Ụmẹ ẹnị ẹ ra ẹtẹ Ijipiti, ozweyi ẹ́ vị dị a sị wa hụ nị; dị ẹnịnị kụkụ aa sẹ̀ ịrẹka nị.

⁴ Ịrẹha ana vị ọzọkụ ọ rị Ohora nị, dị ịrẹha ana vị ozweyi rị Ohoriba nị. (Ohora vị ana jẹẹ yị Anịsamarịya nịnị, dị Ohoriba ọnị jẹẹ yị Anijerusarẹmị nịnị nị.) Ẹnẹyịmavara kà ọnị ộ nyị wa, dị ẹnịnị ma ezi yị ọnị nị.

⁵ Ọ kà, dị ọnị daka yị nyị Ohora aanị, vị́ ọ nyayịnẹ à yịị sẹ̀ ịrẹka nị. Onyeehi anị nịnị ana vị Anasiriya vị ọnị ọ́ nyayịnẹ aa yịị dụụ zị.

⁶ Onyeehi anị ẹnẹnị vị isoja nịnị ẹnịrị aza ọkụmị-ọkụmị ana nyị udi ya. Ẹnịnị vị ezwọọmụha ọyịza-ọyịza ana wụra re.

⁷ Ọnịrị avaba ọdọvịdị isoja Asiriya ẹẹ sẹ̀ ịrẹka nị. Ịrẹkọyịsẹ ọnọọ ọ sị ọ naa mẹ ori Anasiriya nịnị, ọnị ọ sị me ẹngụ anị ọsọọsa nị.

⁸ Ẹ́ yị hụụnị ịrẹkọyịsẹ ọnị o nyima anị Ijipiti. Ọ mẹ hụrẹ vị ozweyi ọnịrị ọnọrụ nịnị â sụ̀, dị ẹyaa kụ ụvọ sìsi ọ ẹngụ anka ọsẹrẹka avọọ nị.

⁹ Avọọ ọnị Ẹnẹyịmavara ộ hụrẹ ẹ ụvọ yị onyeehi Anasiriya nịnị ọnị ọ vavọọ aa dụ gògògò avọọ.

¹⁰ Ẹnịnị ệ tụ ọ ahwaahụ, dị ẹ ku ezi anị anọrụ ọnịrị anẹẹ nị. Dị ẹnịnị si ụ̀hwọ̀ wụ̀ ọnị ụvọta nị. Ireyi ene tu ọ aanị vị ọnị avaba anyẹnẹẹ ana vọ kụkụ aa kà avaba aha.

¹¹ Ọyịnyara anị Ohoriba ộ maanị re e ama vị ọ da ụvọ tụ ịnị ụvọ ịnị ịrẹkọyịsẹ huni Ohora nị.

¹² Ọnị nyẹmba vị anaa du aza ọkụmị-ọkụmị Anasiriya gògògò ẹnị Ịgọvọnọ nịnị, ọdọvịdị Isoja nịnị ẹnịrị ezwọọmụha ọyịza-ọyịza Anasiriya vị ọnị aa dụụ zị.

¹³ Ọnị ô re ka Ohoriba nyẹmba vị ọsẹrẹka hangụ-hangụ. Ọnyọọnya ẹnị ẹyịva vị nị.

¹⁴ Ama Ohoriba ô dà tụ ịnị ịrẹkọyịsẹ anị; ô re Anẹkụra ana aa hị́ Anikaridi ana a sị enyi ovivi và uhwoto ẹnịnị tụ ịnị ugene.

¹⁵ Ẹnịnị vị ana jị obo sụ ọtẹ, dị ẹ jị ubobo daara-daara nị. Avaba ẹnịnị vị ana sị mẹẹ anka ọdọvịdị isoja Anibabironi nịnị ana hụrị ẹtẹ Anikaridi nị.

¹⁶ Ó me yi re wa kẹnẹ, ẹngụ anị ẹ́ yị rẹ kụkụ dọ ọ, dị ọ tu azaa ne tu wa ẹtẹ Anikaridi nị.

¹⁷ Dị Anibabironi nịnị vẹ, dị e vee pè e mẹ nị. Ẹnịnị ê pè e mẹ pooro, dị ẹ mẹ̀ ẹ ọsọọsa nị. Ịrẹyị ẹnịnị vị ene vene du ọnị nyẹmba eyi.

¹⁸ Ịrẹkọyịsẹ anị vị anaa sẹ̀ chapaa, dị ọzọza re ahwaahụ anị. Ịrẹyị anị ô du ọnị eyi anka ịrẹyị ọyịnyara anị me du ọnị eyi.

¹⁹ Ama vị Ohoriba yị dụ ụvọ tụ ịnị ụvọ ịnị ịrẹkọyịsẹ hu avọọ nị. Ịrẹka ọyịsẹ anaa sẹ̀ ọ́ mẹ hụrẹ vị ozweyi ịnị ẹtẹ Ijipiti aa yịị sẹ̀ nị.

²⁰ Ijipiti ịzọọ ọ yaa du onyeehi zị gògògò nị, onyeehi anị ẹnẹẹ vị ọnị ẹngụ ọnọrụ ẹnịnị sị mẹẹ anka ẹngụ ọnọrụ ịkẹrịkẹtẹ avọọ, dị enyi ẹngụ ẹnịnị sị mẹẹ anka enyi ẹngụ umaata avọọ nị.

²¹ Ohoriba, ụ kụkụ è yii si ka wa sẹ̀ ịrẹka anka ịjị ọnị ụ vị ozweyi ịnị ẹtẹ Ijipiti? Anijipiti vị anaa sị ụvọ za wụ ịrẹva ịzọọ ịjọnọọ, dị ẹ sị wụ hụ.

Ọkarẹyị ọnị Ohomorihi mẹ yị Ohoriba

²² Booro aanị ẹwụ Ohoriba, Ẹnẹyịmavara Ananyị ụkata hu ka ọnị aa kà a yị wụ ka, ụ ka ịrẹyị onyeehi awụ nịnị ọ sị wụ tụ ahẹ, ama ọnị vaa tụ wa ịrẹyị tu wu, dị ẹyaa kụ́ ayị hi wu. Ẹnịnị vaa taa kara wụ nịnị eyi ụvọnị-ụvọnị.

²³ Ọ kà, ọnị vaa kụ avaba Anibabironi ẹnịrị Anikaridi nịnị vẹ, ọnị vaa kụ azaa hụrị ẹtẹ Ipekodi, Isowa ọnịrị Ikowa, dị ọnị rẹ kụ avaba Anasiriya nịnị. Ọnị vaa kụ aza ọkụmị-ọkụmị ọnịrị ẹnị ọga isoja, beri avaba ọdọvịdị ọkọọka ẹnịrị aza ana nyị udi ẹbanyị-ẹbanyịị gụ.

²⁴ Ẹnịnị vaa kwẹẹtẹ tu wu nịnị hụrị eyi ẹbẹẹba. Ẹ̀ẹ yaa vẹ dị ẹ kụ isoja tatarata beri ụkẹkẹ-ịrẹkụ ọnịrị umoto ịrẹkụ za. Ẹnịnị va kụ ogonto rị ụvọ, dị ẹ sị amu enyusẹ-enyusẹ ku, dị ẹ ta kara wụ nịnị, Ẹnẹyịmavara kà ọnị vaa hụrẹ ụvọ yị wa, dị ẹnịnị sị ọda ẹkụra ẹnịnị mẹ̀ ọkarẹyị yị wụ nịnị.

²⁵ Ka ọnị aa kụ ayịị hi wu nịnị, ọnị vaa navọ wa ka ẹ̀ sị ọyịkụ mẹ wụ nịnị o me zee wa eyi. Ẹnịnị vaa yẹrẹ wụ nịnị aahị ọnịrị ụtọọ vàa ha, dị ẹ wụ ezi ewu nịnị va ha. Ịzẹyịza, ẹnịnị vaa ku ezi anọrụ ọnịrị anẹẹ awụ nịnị, dị ẹ rị wa ịra ireyi-ireyi.

²⁶ Ẹnịnị vaa wụ̀ nịnị ịta ọnịrị ẹnya ọvị awụ nịnị.

²⁷ Avọọ ọnị mẹ vaa dụ wụ nịnị hụụnị ịrẹkọyịsẹ ọnị ụ nyima anị hụrị Ijipiti nịnị nị. Wẹ́ yị ma vana si eyi nọ ịnị ịrẹyị ori nịnị à vị ka we kuku ro ịrẹyị Ijipiti nịnị.

²⁸ Ẹnẹyịmavara Ananyị ụkata hu ka, ọnị vaa hụrẹ ẹwụ nịnị ụvọọ yị aza ọnị wè yi sì ịrẹyị anị, dị ịrẹyị ẹnịnị si du wu eyi nịnị.

²⁹ Ka ẹnịnị ẹnị é yi re sì ịrẹyị ẹwụ nịnị, avaba ịsị ọnị waa mẹ̀ ụkọrọ anịị vẹ nịnị, vị ọnị ẹ́ vaa kụ. Ẹnịnị vaa tụ wụ ahwaahụ chapaa anka ọsẹrẹka avọọ. Ịrẹkọyịsẹ awụ nịnị ọ kụ ọsọnị tu wu nịnị nị

³⁰ agụvị ka ẹwụrị anẹkụra ọsa nịnị ệ sẹ̀ ịrẹka, wa raa sị ori ẹnịnị du ẹngụ awụ ẹngụ.

³¹ Ẹwụrị onyeyiza awụ ọ zị ụsẹ ọnyọọnya nị, agụvị avọọ, ụya ọnyọọnya ọnị raa sịị rị ẹwụrị ọ nị.

³² Ụ vaa sị ako ụyọrị onyeyiza awụụ hú enyi. Ako ọnọọ ọọ nyịnẹ, dị ọ gana nị. Aza vee nyị wu unyi, dị ẹyaa mẹ wụ isiya agụvị ka ụya ana ya ịnị ako ọnọọ ọọ dẹngụ.

³³ Ụya ọnị ụ vaa rị ọnịrị ayodu ene vee tu wu vị ana vaa mẹrị ẹwụ anka eche avọọ. Ụyọrị ana yà ịnị ako ọnọọ vee chire wu angwa dị ọọ tụ wụ osusu. Ako onyeyiza awụ Isamariya ọ vị ọnọọ nị.

³⁴ Ẹnẹyịmavara Ananyị ụkata hu ka, ọnị ọ sị ọ ka ka, ụ vee hú enyi ụya ọnọọ dị ako anị wụ. Ako ọnọọ vị ọnị ụ vaa chaka rugu-rugu, dị ụ sị ẹjịjị anị na ịrẹva awụ.

³⁵ Avọọ, Ẹnẹyịmavara Ananyị ụkata hu ka, agụvị ka wê hí ayị anị, waa varẹma ka ọnị, ụ vaa rị ụya ịsị ọnị ụ vavọọ aa dụ gògògò avọọ, dị ụ rị ụya ịrẹkọyịsẹ awụ.

Ọkarẹyị ọnị Ohomorihi mẹ yị Ẹyịnyara ẹyịva ẹnẹnị

³⁶ Ezikẹẹrị ka Ẹnẹyịmavara ộ kà a yị ọnị ka, ozi-ọza, ọnị óó tenyi ẹngụ ka ọnị aa mẹ̀ ọkarẹyị yị Ohora ọnịrị Ohoriba? Ọnị òo tenyi ẹngụ, ọnị ọ̀ kà a yị wa ịsị edivi ẹnẹ ẹ mẹ ana vị enyisi.

³⁷ Ẹnịnị ệ sẹ̀ ịrẹka, ẹ́ sị ọza wụ̀, ọza yà ịnị ụvọ ẹnịnị. Ẹnịrị ori ẹnịnị ẹ sẹ̀ ịrẹka nị, dị ẹnịnị sị ezi ẹnẹ ma yị ọnị, dị ẹ sị mẹ̀ ịsọvọ yị wa ka ẹ sị mẹ ịsọyịrị nị.

³⁸ Ẹ́ yị vị ọnọọ kẹnẹ ẹ́ mẹ; ẹnịnị ê dụ Irehi ahẹkẹ anịị ẹngụ; ẹnịnị ẹ́ yị sị ụbanyị yị ẹkụhị ọnị nyị ka ọ̀ vị ẹkụhị ụhwọtụ yị ọnị.

³⁹ Ịhị ẹnẹ ẹ na wụ̀ ọnị ezi mẹ̀ ịsọvọ yị ori ẹnịnị gẹdẹ-gẹdẹ, ịhị ọnọọ ọnyọọnya ẹnịnị vẹ ịnị Irehi ahẹkẹ anị dị ẹ́ va mẹ̀ kẹnẹ-kẹnẹ nị. Ịsị ệ mẹ̀ ịnị Irehi anị yị.

⁴⁰ Ẹnịnị ệ tụ na hị́ aza hụrị aha ẹnẹẹnẹ ka ẹ̀ vẹ. Ịjị aza ẹnẹẹ vẹ, Ohora ọnịrị Ohoriba ệ mẹ ọvị, ệ kụ ịsa sisi eyi, dị ẹ ku uweyi hi ọbẹ ọnịrị ụvọ nị.

⁴¹ Ẹnịnị ệ yaatụ ịnị aga ọgọdọ ana sị itevuru tu ọvịdị anị. Itevuru ọnọọ vị ana a kụ ịsị ozoza-ozoza hi ịnị anị. Dị ẹ hyakụ kụ eturare ọnịrị angwẹ orivi ana a sị va yị ọnị tụ ọ bẹẹ nị.

⁴² Â wụ́ ọkọnị aza ịrẹyị, ọkọnị aza ẹnẹnị vị anọrụ ana kụ hụụnị ụnọmị vẹ. Ẹnịnị ệ kụ ịsụvọ hi anyẹnẹẹ ẹnẹnịị ụvọ, dị e ku wa amu ohinọyị ene zoza ẹtẹẹtẹrẹ ku wa ịrẹsụ nị.

⁴³ Ẹnẹyịmavara kà, dị ọnị kà a yị ẹngụ anị ka, ọnẹẹ ọnị ịrẹkọyịsẹ si du ha, aza ẹnẹnị ree pee sẹ̀ ịrẹka aanị nọ.

⁴⁴ Ọnọrụ ẹnẹnị ệ sẹ̀ ịrẹka ịjị ẹnyị, ịjị ọsa. Avọọ ẹ maa nọ ịdị Ohora ọnịrị Ohoriba naa sẹ̀ ịrẹka nị.

⁴⁵ Ama aza ọyịza vaa jị ịvịị yị wa ka ẹnịnị ệ sẹ̀ ịrẹka, ệ rẹ wụ̀ aza, agụvị ka ẹnịnị ệ sẹ̀ ịrẹka ọnịrị ka ọza ọ raa dà gẹ wa ụvọ.

⁴⁶ Ẹnẹyịmavara Ananyị ụkata hu ka, à hàrà aza vẹ ene vee chire anẹẹ ẹnẹnị angwa, dị ẹnịnị ẹ̀ sị ụkata dọ wa ịsị ẹ nyị.

⁴⁷ Jẹẹ ọkọnị aza ẹnẹẹ ẹ̀ kụ̀ wa ịrẹta, dị ẹ̀ tụ̀ ụhwọ tu wa. Jẹẹ ẹ wụ ezi ẹnịnị, dị ẹ̀ rị irehi ẹnịnị ịra.

⁴⁸ Avọọ ọnị mẹ vaa mẹ za ịrẹkọyịsẹ jẹẹ ịnị ẹtẹ ẹnịnị (Anisirẹrị) nị. Ọnọọ vaa kà anyẹnẹẹ ana vọ ọnọ ka asị ẹ́ hama wa.

⁴⁹ Ẹnẹyịmavara kà, ẹwụ nịnị ẹyịnyara ẹyịva ẹnẹnị, ọnị vaa sị ụyaa rị wụ nịnị agụvị ịrẹkọyịsẹ awụ nịnị, ọnịrị agụvị ka waa mẹ ori nịnị. Ịjọnọọ, ụ vaa yẹ nịnị ka ọnị ọ vị Ẹnẹyịmavara Ananyị ụkata hu nị.