Ezikẹẹrị 21 - IWE ỌNỊNỊ

Ụhwọza ọnị Ẹnẹyịmavara vaa sị mẹ̀ ọkarẹyị

¹ Ezikẹẹrị ka, ẹkụhị ọnya, Ẹnẹyịmavara ộ kà a yị ọnị ka:

² Ozi-ọza, ọnị ọ̀ và eyi ka Ijerusarẹmị, dị ọnị ò tụ ọ ohuvọ. Ọ kà ọnị ọ̀ tụ ịzị ẹ yaa mẹ ahẹkẹ ohuvọ; dị ọnị ọ̀ kà ẹtẹ Isirẹrị ọnọ ka

³ Ọnị, Ẹnẹyịmavara ọ́ sị vara ọnịvị awụ nịnị o, ọnị vaa tụ̀ ụhwọza anị, dị ọnị wụ̀ avaba awụ nịnị ha, hi ọza ọyịza, hi ọza odivi awụ nịnị.

⁴ Ọnị vaa tụ̀ ụhwọọ tu ọza ịnya-ọza ịnya awụ nịnị hụrị eyi ẹbẹẹba na ngụ eyi ụvẹtẹ.

⁵ Avaba aza vaa yẹ ka ọnị, Ẹnẹyịmavara ọ́ sị ụhwọ anị tụ̀, ọnị ẹ́ yị ma vana vàa ngụ apara.

⁶ Ẹnẹyịmavara kà, ozi ọza, ọnị oo rimanya anka vị ayị anị ee du agụvị ụyọrị nị. Ọ kà ọnị ọ̀ vavọọ rimanya ịzị avaba aza nyẹngụ re ọnị.

⁷ Ẹnẹyịmavara Ananyị yị ụkata hu ka, ẹ̀ẹ họ̀ ọnị ka sị ẹ vẹ, dị ọnị ee rimanya? Ọnị ọ̀ kà a ka agụvị enube ịrẹyị anaa vẹ yọ nị. Ịjị ọọ vẹ, angwa vee hí wa ẹtẹẹtẹrẹ; ụvọ ẹnịnị vee súu za wa ẹngụ; ayị vaa hụrẹ wa ịnẹ, dị ẹngụ ẹnịnị sụ̀ ẹgahị, dị idunku ẹnịnị aa bànyị pápàpà. Ụmẹ ọnọọ o si tu, ọnị yị.

⁸ Ezikẹẹrị ka Ẹnẹyịmavara ộ rẹ kà a yị ọnị ka,

⁹ Ozi-ọza, ọnị ọ̀ kà ụtụ ọnọnị ọnị ọnị Ẹnẹyịmavara tụ́ yị Anisirẹrị nịnị ka: Ịrẹkụ ọ vẹ. Asị ụhwọ ne; á raa da ịsa sisi ọ.

¹⁰ A sị ọ ne, a sị ịsa da sisi ọ ka ọọ zá nyanga-nyanga, dị à sị na wụ̀ aza va ha. Ịrẹyị unyi ọsọnị wáá vị booro aanị nị? Ọ ka ọnị ộ kà aza anị ọnọ, ọnị ộ sị ụya rị wa, ama, ẹnịnị ẹ́ yị hị́ ọ ịrẹyị.

¹¹ Asị ụhwọ ne tịtẹ booro aanị, asị ịsa da sisi ọ. Asị ọ tenyi tịtẹ yị ọza ana vaa sị naa wụ̀ aza.

¹² Ọ kà, ọnị ozi-ọza oo du ayị, dị ọnị aa jị òrèrè agụvị ka aza anị Anisirẹrị nịnị ọnịrị ọdọvịdị ẹnịnị ee ne ụhwọ ọnọnị aanị nị. Va ụvọ ku ịrẹsụ, waa jị òrèrè agụvị ka avaba ẹnịnị a vaa wụ̀ nị.

¹³ Ẹnẹyịmavara kà vị ọnị aa zama aza anị re nị. Ẹnịnị è yi ro ịnẹ varẹma, vị avaba ịsị ẹnẹnị ee tù wa nị.

¹⁴ Ọ kà booro aanị, ọnị ozi-ọza ọ̀ ka ịsẹ yị Anisirẹrị nịnị. Ọnị ọ̀ kụ̀rà ụvọ, dị è mí ụhwọ ọnọnị ụpẹ ẹẹva à vị ụpẹ ẹẹta. Ụhwọ ọnọnị vị ana a vaa sị wụ̀ azaa ha ẹtẹẹtẹrẹ.

¹⁵ Ayị aza anị ẹ sị sụ enyi. Ẹ kụkụ aa vangga ọnị aa sị ụhwọ anaa za nyoonyo anka ịnyanya avọọ chire wa angwa. A sị ọ tenyi ka à sị wụ̀ aza.

¹⁶ Eyi enee mí ụhwọ ọnọnị zị kẹnẹ, ọọ tọ̀ ọza ụnava ngọtọ-ngọtọ.

¹⁷ Ọnị Ẹnẹyịmavara kà, ọnị rẹ vaa kụ̀rà ụvọ anị, dị ọnị ọ̀ mẹ ọyịkụ anị ta.

Ụhwọ ohinọyị Ịbabịrọnị

¹⁸ Ezikẹẹrị ka Ẹnẹyịmavara ộ rẹ kà a yị ọnị ka,

¹⁹ Ozi-ọza, ọnị tọ̀ oze ẹẹva ịrẹwa, ọnị ohinọyị Ịbabịrọnị vaa kụ́ ịrẹkụụ vàa tụra vaa ngụ Isirẹrị. Oze ẹyịva ọnọọ vị ana vaa hụrị ẹkụra ọnya, ọ ka ọnị ọ̀ sị asịyẹ jẹẹ ịzị oze ọnọọ ya ha ẹẹva.

²⁰ Ọnyara vaa zụ̀ ohinọyị Ịbabịrọnị oze naa ngụ ẹkụra Anaamọnị, ana ya ẹtẹ Ịraba. Dị ọ sa na ngụ Ijerusarẹmị, ẹtẹ Ijuda.

²¹ Ohinọyị Ịbabịrọnị ộ jẹẹ oze ahẹva ịzị asịyẹ jẹẹ. Ê sị ka ọnị ọ̀ yẹ oze ana vọrọ ka ọnị ọ̀ zị. Ô henyi ọpa anị re; ộ họ̀ ori anị nịnị usirẹyị, dị ó tu ụpẹ ọnya dị aa zama ayị uye ana a sị mẹ ịsọvọọ re nị.

²² Â nyị ọpa ana va eyi ka Ijerusarẹmị, dị ohinọyị Ịbabịrọnị ọnọnị sị ụvọrị ngwọ ọ nị. Ọpa ọnọọ ọ kà a yị ọ ka ọọ nọ Ijerusarẹmị dị ò ne tò ẹnya ịrẹkụ anị hi ẹtẹ nị, òo tu ịzọọ, ò nowu ịrẹkụ, dị ò tò ẹnya ịrẹkụ anị va eyi ka ozovwoovu ọbanyị ana a zịị̄ ngụ ịnị ẹkụra. Ọ̀ kụ ezi gụ, dị ọ̀ nẹba ẹtẹẹtẹrẹ, dị ọ̀ tụra ịsa na hịrẹ ọvọ Ijerusarẹmị.

²³ Anijerusarẹmị nịnị ẹ́ yị vaa dọ ịrẹyị ọnọnị vị ịzẹyịza, agụvị eku ẹnẹ ẹ́ vịdị sị hị́ yị ẹngụ. Ama Ẹnẹyịmavara aa tama wa ayị ebira odivi ẹnẹ ẹ́ mẹ, ụvị di a zụ za wa.

²⁴ Avọọ ọnị Ẹnẹyịmavara Ananyị ụkata hu aa kà a ka, asị ịsa hụ hụụnị ebira odivi awụ nịnị. Avaba aza ệ yẹ ụ mẹmẹ rị ịvị nịnị. Ebira odivi awụ nịnị vị anaa sị ẹngụụ zụ, ịnị avaba ịsị waa mẹ nịnị. Ọnị ọọ jị ịvị wụ nịnị. Ọnị vaa sị ụ nịnị chire ọnịvị awụ nịnịị ụvọ.

²⁵ Ẹwụ ọza ọhịmị anaa mẹ ohinọyị yị Anisirẹrị nịnị aanị, ụmẹ o si tu ka wa rị ụya awụ ana vọ.

²⁶ Ẹnẹyịmavara Ananyị ụkata hu ka, wa ngwa ubobo awụ, dị wa hụ̀ amu ohinọyị awụ. Ịsavị-ịsavị ọ sị vara booro aanị. A vaa sị ọkụmịị rị ohinọyị, dị aa kà ọnụkata chi.

²⁷ Evu-ẹtẹ! Evu-ẹtẹ aa vẹ nịnị o! Ẹnẹyịmavara kà ọnị aa jị Ijerusarẹmị eburu. Ama ọnị ẹ́ yị vaa mẹẹ, ẹ̀ yị vị ịjị ọza ọnị ọnị nyị ka ọ̀ va sị ụya rị ọ ọ̀ọ vẹ. Ọ̀ọ vẹ, dị ọnị sị Ijerusarẹmị chire e ụvọ.

Ohomorihi ộ tụ ụtụ hi Anaamọnị nịnị

²⁸ Ezikẹẹrị ka Ẹnẹyịmavara ộ kà a yị ọnị ka, ozi-ọza, ọnị ọọ kà ịsẹ. Ọnị ọ̀ nọọ yị Anaamọnị nịnị anaa kụ Anisirẹrị nịnị ụhụ aanị, ịsị ọnị ọnị Ẹnẹyịmavara Ananyị ụkata hu aa kà. Ọ kà, ọnị ọ̀ kà a yị wa ka, asị ụhwọ tụ̀ a vaa wụ̀ aza. Asị ọ ne, dị a da ịsa sisi ọ ka ọọ za nyoonyo anka ịnyanya avọọ nị.

²⁹ Ọ kà ẹtẹ ọnị wee ré nịnị vị apẹ. Ịsẹ ọnị waa kà nịnị vị ireche osusu. Ọza ọhịmị ụ vị nịnị nị. Wee divi nịnị. Ama ụmẹ awụ nịnị aa vẹ, ọnị ụ vaa rị ụya awụ nịnị ọdịrẹma. A vaa sị ụhwọọ tụra awụ nịnị ọrọkọ.

³⁰ Ẹnẹyịmavara kà, à và ụhwọ ọnọọ ngụ apara, Ọ kà, ẹkụra awụ nịnị gẹdẹ-gẹdẹ, ịzị a ma wu nịnị tụ ọnị vaa yaa mẹ̀ ọkarẹyị yị wụ nịnị.

³¹ Ọnị vaa sị ọyịkụ anịị zụ̀ wụ nịnị, dị ẹngụ awụ nịnị kà ịra anka èe rere ká ịra ku ọza avọọ. Ọnị vaa hụrẹ ụ nịnị ụvọ yị aza edivi, ana yara sị ụya rị aza obooro-obooro.

³² Ọnịvị awụ nịnị vaa jị wụ nịnị hi ẹtẹ ịnị ẹkụra awụ nịnị, dị a rị wụ nịnị ịra ọza ẹ́ yị ma vana tamayị awụ nịnị. Avọọ Ẹnẹyịmavara mẹ kà nị.