Ezikẹẹrị 19 - IWE ỌNỊNỊ

Ahẹ Ayodu

¹ Ezikẹẹrị ka, ẹkụhị ọnya, Ẹnẹyịmavara ộ kà a yị ọnị ka, ọnị ọ̀ maanị jị ahẹ ayodu ọnọnị yị ezi ohinọyị Isirẹrị ẹẹva ka,

² Ọnyị awụ ana ma wụ vị ana sị mẹ anka idu ọnẹẹ avọọ.

³ Ộ pa ozi anị ọnya, dị ọ́ kọ ọ á mẹmẹẹ zube nị; dị ozi anị ọnọọ kụkụ aa za ọzaa rị nị.

⁴ Anẹkụra ana vọ ệ wụ́ ịrẹyị anị, dị é be e dị ẹ za a tụ ịnị ụsị nị. Ẹnịnị ệ tụ obo, di e tura a na ngụ Ijipiti nị.

⁵ Ọnyị anị ô rẹ ka avaba ịsị ọnị aa tụra eyi ẹ́ yị va vị mẹ, ọnịrị ka ịsị ọnị ee zi eyi ô ta, dị ọ sị ozi anị ọsa dị ọ rẹ pa a nị. Ọnọọ ọ sị vịra, di ê chire ọza angwa nị.

⁶ Ịjị ozi anị ọnọnị ta hụ, dị ọnịrị idu ana vọ ê bè uyee zị nị, ộ kọsẹ a mẹmẹ zube, dị ọnị rẹ kụkụ aa za ọzaa rị nị.

⁷ Ộ gara ịzị isoja nịnị ee seree ha, dị ọ gara ẹkụra ẹnịnị ha ẹtẹẹtẹrẹ nị. Ụmẹ tụra ụmẹ ọnị ô nowu kẹnẹ, dị ayị aa hụrẹ avaba aza ene hi ịnị ẹkụra ịnẹ.

⁸ Dị avaba anẹkụra ana vọ vaa va eyirazị kà a nị Ẹnịnị ệ hụrị aha irenyi-irenyi vẹ, dị ẹ và ịrẹpa zi ọ, dị ẹ sị za a nị.

⁹ Ẹnịnị ệ sị arị tụra a na tụ ịnị abọ, dị ẹ sị ọ ne tu ohinọyị Ịbabịrọnị nị. Â jị ọ ẹngwa tụ ịzọọ, agụvị avọọ, dị ọza ẹ̀ yị vana wụ ọ owu ịrẹsụ ataba ene hi Isirẹrị nị.

¹⁰ Ọnyị awụ vị ana sị mẹẹ anka ọchị ịvayịnị ene e chire tụ ụtọ okuha avọọ, ka ee re enyi hú ẹtẹẹrẹ, dị ọchị ịvayịnị nyị avị ẹtẹẹtẹrẹ, dị ọ́ rẹ nyayịnẹ tụ ẹtụtụ nị.

¹¹ Avọ ọchị ịvayịnị ọnọnị ệ katẹngụ. Ệ bụrụ pooro, ẹ́ wụra mẹ okutẹ ohinọyị. Ọchị ịvayịnị ọnọnị ộ hụ pooro, aa vaa sị ịrẹsụ naa kà eguhi. Avaba aza ê re ịzị ọ́ gọdọ na za ọnịrị ọ́ mẹmẹ nyị avị.

¹² Ama aza anaa kụ ayịị hi ọ, ê hu ọnịrị ẹpa, dị é ne e nyẹtẹ nị. Ahị anaaa tụ́ hụrị eyi ọnị ọyị zịị vẹ, ộ mẹ̀ ka ẹtụtụ anị ẹ̀ wụ. Â na avọ anị haa, dị ẹ wụ nị. Ịjị ẹ sị wụ, dị á rị wa ịra nị.

¹³ Booro aanị, ịnị ẹtẹ ana wụ, dị ẹ̀ yị nyị enyi ịnị ụnọmị, e kuku chire e tụ nị.

¹⁴ Â jị ịra da akamava ọchị ịvayịnị ọnọnị, dị ịra ọnọọ rị avaba avọ anị ọnịrị ẹtụtụ anịị ịra nị. Avọ anị ẹ́ yị ma vana katẹngụ. Ẹ́ yị ma vana wụra mẹ okutẹ ohinọyị. Ahẹ ayodu ọnọọ yị, dị a vanaa jịị jị ọ pooro nị.