Ezikẹẹrị 16 - IWE ỌNỊNỊ

Anijerusarẹmị nịnị vị ozi ene e hèe

¹ Ẹkụhị ọnya, Ezikẹẹrị ka Ẹnẹyịmavara ộ rẹ kà a yị ọnị ka.

² Ozi-ọza, ọnị ọ̀ sị zụ̀ Anijerusarẹmị nịnị avaba ịsị eenyisi ẹnẹ ẹyaa mẹ, dị ọnị ọ̀ kà a yị wa ka.

³ Ada awụ nịnị vị anẹkụra anaā hị́ Anamọrị, dị ọnyị awụ nịnị vị Anihiti nị. Ama ẹtẹ Ikanaani ẹ́ yà ma awụ nị.

⁴ Ụmẹ ana a sị ma wụ nịnị, ọza ẹ̀ yị jị ụvị awụ nị; ọza ẹ̀ yị hụ wụ enyi, ọza ẹ̀ yị dà ịsa sisi wu ẹngụ, dị à hyakụ va sị ịta pàrà wu ẹngụ bẹẹ.

⁵ Ẹ́ yị nyị ọza ana vayị awụ ka, ọnị aa mẹ ịsị ẹnẹnị ọnyọọnyị yị wụ. Ama vị e ne wu ta nị, agụvị ka ịhị ana ma wụ nịnị vị waa nyị ọza ịhyẹrẹ nị.

⁶ Ọ kà ọnị maa pàrà wụ hu, dị ọnị ré ka wee rimanya ịnị anya awụ nị. Anya-anya ụ yị vị̀ dị ọnị ka ọnị ẹ yị vaa zẹẹ ka we sú nị.

⁷ Ọnị ộ mẹ̀ ka wa hụ anka ịsị ozoza ene e chire tụ ịnị aarẹ avọọ nị. Waa hụ, dị ụ kụkụ tịtẹ gagaràgà anka ozwoorihi avọọ nị. Ịrẹva o si hi wu ịrachị kakaràkà, dị ẹyị awụ ta gọdọ nị, ama ahwaahụụ ụ yịị vị nị.

⁸ Ọ kà ọnị mẹ rẹ vanaa paraahu dị ọnị ré wụ, ọnị ô ré ka wa sị hụụ ọ họ̀ ịrẹyị. Ọnị ộ chire wu awuru ka we si ku ahwaahụ awụ, dị ọnị ka ọnị oo sì ịrẹyị awụ nị. Ẹnẹyịmavara Ananyị ụkata hu ka, ịzẹyịza, ọnị ộ kà a ka ọnị vaa nyị wụ, dị ụ kụkụ sị vara áanị.

⁹ Ọnị ộ hụ wụ enyi, dị ọnị nyịna anya awụ kwooze nị. Dị ọnị rẹ dị angwẹ orivi sisi wụ ẹngụ nị.

¹⁰ Ọnị ô chire wu awuru ana mẹ̀ ụkọrọ hi, dị ọnị kụ adava ana a sị ịtụmpaha ene zoza hu mẹ hi wu ahụ nị. Ọnị ộ jị wụ ubobo ọyịza-ọyịza, dị ọnị và ọtịịza ana a sị isiriki mẹ ku wu ẹngụ nị.

¹¹ Ọnị ộ kụ ịsụvọ ọnịrị ịsọbẹ dị ọnị sị mẹ wụ ọvị nị.

¹² Ọnị ộ sị ochirigege chire wu aahị, ọnị ộ kụ ịsụtọ hi wu ụtọ, dị ọnị kú wu amu ohinọyị gẹgẹrẹgẹ nị.

¹³ Avọọ ọnị mẹ sị igooru ọnịrị isuu mẹ wụ ọvị nị. Ẹnya ọnị ụụ̄ kụụ hị́ ẹngụ vị ana a sị ịta ọyịza-ọyịza ọnịrị ịta isiriki jị dị a mẹ̀ ụkọrọ hi wa. Ayị ene zoza ọnịrị ẹhụ beri angwẹ orivi a sịị̄ mẹ ịsọyịrị awụ nị. Wee zoza pooro, wa kụkụ sị vara ose ohinọyị.

¹⁴ Ẹnẹyịmavara Ananyị ụkata hu ka, waa ta ngụrẹyị yị avaba anẹkụra ana vọ agụvị uzoza awụ, ọnị ọ vavọọ mẹ wụ ọyịza-ọyịza nị.

Anijerusarẹmị nịnị vị aza ọnị ụhị ẹ̀ yị ma nyị

¹⁵ Ama waa hụ̀ agụvị uzoza awụ ọnịrị agụvị ka waa ngụrẹyị dị ụ kụkụ aa sẹ̀ ịrẹkaa zị nị.

¹⁶ Ịta awụ ẹnyị vị ọnị ụ sị mẹ ịzị ụ yaa mẹ ahẹkẹ nịnị ọvị anka ọsẹrẹka avọọ. Avaba ọza ụ kụkụ sị ẹngụ awụụ yị nị.

¹⁷ Ọ kà igooru ọnịrị isuu ọnị ọnị sị wụ vị ọnị ụ sị, dị ụ sị mẹ ịsị e vene ọnọrụ jẹẹ, dị waa hẹkẹ wa.

¹⁸ Awuru ana a mẹ̀ ụkọrọ hi ọnị ọnị sị yị wụ vị ọnị ụ sị chire sì e vene ọza ọnị u mẹ jẹẹ, dị waa sị angwẹ orivi ọnịrị eturare ọnị ọnị sị yị wụụ mẹ ịsọvọọ yị wa nị.

¹⁹ Ẹnẹyịmavara kà ịsọyịrị ọnị ọnị sị yị wụ, ayị ọyịza-ọyịza, angwẹ orivi ọnịrị ẹhụ vị ọnị waa sịị mẹ ịsọvọọ yị ori ka ẹ vayị awụ.

²⁰ Dị ụ rẹ sị ezi ọnị ụ ma yị ọnị naa mẹ ịsọvọọ yị ori ẹnẹnị nị. Aanịka ọsọnị é yi si divi ẹnẹmẹhị ana sị zụ̀ ka wẹ yị sị ayị tụra ọnị.

²¹ Wẹ̀ yị daka yaanị sị ezi anị na mẹ̀ ịsọvọ yị ori nịnị?

²² Ẹnẹyịmavara kà, avaba ụmẹ ọnị ụ sị aa sẹ̀ ịrẹka, dị waa mẹ ịsị eenyisi zị, wẹ́ yị daba tamayị ịjị ọnị vị ozweyi, ọnị wáá tụ ahwaahụụ zịị?

²³ Ẹnẹyịmavara kà, ẹwụ nịnị Anijerusarẹmị ọ sị da. Wa sị da nịnị. Waa maanị raa mẹ̀ ebira odivi-odivi nịnị,

²⁴ dị ụ na dà ịzị a yaa mẹ orii hi utoze-utoze, dị waa sẹ̀ ịrẹka ịzọọ nịnị nị.

²⁵ Wa raa kụ uzoza awụ nịnị sisi ẹtẹ. Waa sị ẹngụ awụ nịnị yị ọza anaa para hu kẹnẹ, dị waa dà ụvọ tụ ịnị ụvọ eyinị-eyinị ịnị ịrẹkọyịsẹ nị.

²⁶ Ẹwụrị ọnọhụva awụ nịnị, Anijipiti nịnị, ene eyi anị ẹ̀ yị ma hụrẹ, ê dudu sẹ̀ ịrẹka, dị ụ mẹ ka ọnị ọọ kụ ayị nịnị nị.

²⁷ Ọ kà, ọnị o ree tenyi ẹngụ ọ̀ yị sị ụya rị wụ nịnị booro aanị, ọnị vaa dọ wụ ize ọnị ọnị vịdị mẹ yị wụ nịnị. Ọnị ọ raa hụrẹ wụ nịnị ụvọ yị Anihwirisiti nịnị. Ẹnịnị é yị sì ịrẹyị awụ nịnị, dị ebira kẹnẹ-kẹnẹ ọnị waa mẹ nịnị aa nyị wa ịhyẹrẹ nị.

²⁸ Ka aza ana vọ ẹnẹ ẹwụrị aa sẹ̀ ịrẹka ẹ́ yị hụ wụ, dị u ree zwèe ka Anasiriya nịnị na nị. Ẹwụrị wa dudu aa sẹ̀ ịrẹka ama ẹ́ yị hụ wụ.

²⁹ Ẹwụrị Anibabironi nịnị anaa sẹ ohu ẹtẹẹtẹrẹ ê dudu sẹ̀ ịrẹka, ama ẹ́ yị hụ wụ.

³⁰ Ẹnẹyịmavara Ananyị ụkata hu ka, ẹwụ ọsẹrẹka ọnị ụhị ẹ̀ yị ma nyị, wee re avaba ịsa ọnị ụ mẹ.

³¹ Utoze-utoze vị ọnị ụ da ịzị aa mẹ orii hi, di waa sẹ̀ ịrẹkaa ngụ ịzọọ zị nị. Ama wẹ́ yị sẹ̀ ịrẹka ka wa sị nyị ẹkẹhị anka ọsẹrẹka ana vọ.

³² Vị́ ụ sị mẹẹ anka ọnyẹnẹẹ ana vọrọ ka ò sì ịrẹyị ọva anị ama dị ọ́ naa sẹ̀ ịrẹka ịdị ọza ẹnẹsa nị.

³³ Ọsẹrẹka vị anaā dọ utosi ara anị, ama ẹwụ aa sị ịsa chire anọrụ irenu hụrẹ avaba aha ka e vee pe wụ sụ̀ wu nị.

³⁴ Ịrẹka ọyịsẹ awụ vị irenyi. Ọza ẹ́ yị sị ụkata za wụ sẹ̀ ịrẹka. Wẹ́ yị dọ ẹkẹhị. Ẹwụ ee sị́ aza ana aa vị ịdị awụ ụta nị. Hịịn, awụ ọnọnị ọ́ sị vị irenyi de.

Ọkarẹyị ọnị Ohomorihi mẹ yị Anijerusarẹmị

³⁵ Avọọ, ẹwụ Ijerusarẹmị, ọsẹrẹka odivi ọnọnị, wụ́ ịrẹyị ọnị Ẹnẹyịmavara aa ka.

³⁶ Ẹnẹyịmavara Ananyị ụkata hu ka, wâ ngwa ịta awụ anka ọsẹrẹka avọọ, dị ụ sị ẹngụ awụ yị aza ọnị ụ sì ịrẹyị anị nị. Wâ rẹ sị ẹngụ awụ yị avaba ori ẹnẹnị anaa nyị ọza ịhyẹrẹ aanị, dị ụ wụ ezi ewu, ọnị ụ sị mẹ̀ ịsọvọ yị ori ẹnẹnị nị,

³⁷ ịrẹyị ọnọnị, ọnị vaa kụ aza ẹnẹ ẹwụrị vịdịị sẹ̀ ịrẹkaa gụ, hi ọnị ụ sì ịrẹyị anị ọnịrị ọnị wee kuku sì ịrẹyị anị. Ọnị vaa tụ́ wụ ahwaahụ, dị ẹnịnị è ré ahwaahụ awụ.

³⁸ Ọnị vaa sị ụyaa rị wụ agụvị ka waa sẹ̀ ịrẹka, ọnịrị agụvị ka waa wụ̀ ọza. Ọnị vaa sị ọyịkụ-ọyịkụụ sị ụyaa rị wụ, dị ọnị wụ.

³⁹ Ọnị vaa sị wụ́ chire aza ẹnẹẹ ụvụ, dị ẹnịnị wú avaba ịzị ụ yaa sẹ̀ ịrẹka, di waa mẹ ori nịnịị ha. Ẹnịnị vaa dọ wụ ịta awụ nịnị ọnịrị ẹnya ọvị awụ nịnị, dị ẹẹ tụ́ wụ nịnị ahwaahụ saka-saka.

⁴⁰ Ẹnịnị vaa tụ ọkọnị aza ịrẹyị ka ẹẹ kụ̀ wụ ịnị ịrẹta, dị ẹnịnị sị ụhwọ che wu nịnị và hi ẹtẹ piri-piri.

⁴¹ Ẹnịnị vaa rị irehi awụ nịnị ịra, dị ẹ navọ ka anyẹnẹẹ ọrụrụ-ọrụrụ è ré ụ maa rị ụya nịnị. Ẹnẹyịmavara kà ọnị vaa mẹ ka wa hụụnị ịrẹka ọ̀yị sẹ nịnị, dị ọnị mẹ ka a sị ụ rẹ kụkụ mẹ aza ẹnẹ ẹwụrị aa sẹ̀ ịrẹka nịnị ẹyịza.

⁴² Ịjọnọọ, ayị anị vee hunẹnẹ, dị ọnị ẹ́ yị kụkụ kụ ayị. Ọnị ẹ́ yị kụkụ vaa kụ ayị, ọnị ẹ́ ma rẹ vana hụvị awụ nịnị kụ ụhị.

⁴³ Ọ kà ayị ô hí wu nịnị avaba ebira ọnị ọnị mẹ hi wu nịnị ụmẹ ọnị ụ vị ozweyi, dị ụ mẹ ka ọnị ọọ kụ ayị nịnị agụvị ebira ẹnẹnị ọnị waa mẹ nịnị nị. Ẹnẹyịmavara Ananyị ụkata hu ka, sị ẹ vẹ, dị ụ rẹ kụkụ sẹ̀ ịrẹka ọ̀yị sẹ vaka ebira edivi ana vọ ọnị waa mẹ nịnị kẹ?

⁴⁴ Ẹnẹyịmavara kà, ẹwụ nịnị Anijerusarẹmị, aza enee che ụhịrẹyị vaa maanị sị ịrẹyị awụ nịnịị che ụhịrẹyị ka, ọnyị ọnịrị ozi vị ọnyọọnya.

⁴⁵ Ozi ọnẹẹ ọnyị awụ ụ vị̀ ịzẹyịza nị. Ọnyị awụ é yi sì ịrẹyị ọva anị ọnịrị ezi anị. Ẹyịnyara obobooro ẹwụrị onyeyiza awụ enee sì ịrẹyị ọva anị ọnịrị ezi anị vị nị. Ọnyị awụ nịnị vị Anihiti, dị ada awụ nịnị vị Anaamori nị.

⁴⁶ Ẹtẹ Isamariya beri ẹkụra oweyi-oweyi ene hi ịnị anị ọ vị onyeyiza awụ ana vị ọzọkụ nị. Eyi ẹbẹẹba awụ ọ́ ya nị. Isodọmị ọnịrị ẹkụra oweyi-oweyi ene hi ịnị anị ọ vị ọhụva awụ ana vị ozweyi nị. Eyi ụvẹtẹ awụ ọnị yà nị.

⁴⁷ Ụ ka ebira ẹnịnị ẹ́ yị hụ wụ ọ̀yị saasa, dị waa hama waa mẹ ịsị eenyisi ẹnẹ ẹyaa mẹ nị. Éyiye, ụmẹ chee ọnị ụ nyị, ebira kẹnẹ-kẹnẹ ọnị waa mẹ ọ sị huna ẹẹnịnị ịnị avaba oze tụra oze.

⁴⁸ Ẹnẹyịmavara Ananyị ụkata hu ka, àa vị ọnị ọ yị vị Ohomorihi ana yara nị, ọhụva awụ Isodọmị ọnịrị ẹkụra oweyi-oweyi ene hi ịzọọ ẹ́ yị mẹ ọpa ebira odivi ọnị ẹwụ Ijerusarẹmị ọnịrị ẹkụra awụ nịnị mẹ̀.

⁴⁹ Ẹnẹyịmavara kà, ịvị ọnị Isodọmị rị yị: Ẹnịrị ezi ẹnịnị ẹẹ sị ẹngụụ tụ ẹba agụvị ka ẹnịnị ệ nyị ịsọyịrị gwẹtẹ ẹnẹ ẹyaa rị, ọnịrị ka ẹhẹ ộ rọ̀ wa ẹngụ, ẹnịnị ẹ yị nyị ẹngụkata. Ama ẹnịnị ẹ́ yị gụ onosiye nịnị ọnịrị aza ẹnẹ ẹhẹ ẹ̀ yị mẹ yị ụvọ.

⁵⁰ Ayị ẹnịnị ộ katẹngụ, dị ẹyaa sị ẹngụụ tụ ẹba nị. Ẹnịnị ệ mẹ ịsị ọnị ọnị ẹ̀ yị sì ịrẹyị anị, agụvị avọọ dị ọnị vu wa ẹtẹ nị. Waa vavọọ yẹ nịnị.

⁵¹ Anịsamarịya ẹ́ yị mẹ achẹva ebira odivi ọnị ụ mẹ nịnị. Ebira ọnị ụ mẹ nịnị ọ́ nyị ọza ịhyẹrẹ hu avaba ịsị ẹ mẹ da nị. Ebira kẹnẹ-kẹnẹ ọnị waa mẹ nịnị, ọ́ kụkụ raa mẹ ka ee re ka ẹyịnyara awụ nịnị aa mẹ̀ ịsa ana vọrọọ, ọza oo ré ẹwụ nịnị ẹyịva nị.

⁵² Booro aanị, tenyi ẹngụ wa sị ẹngụ dọ ụhị ana a vaa mẹẹ nyị wụ. Ebira odivi awụ o huna oonyeyiza awụ nịnị nị. Ebira odivi awụ ọ kụkụ raà mẹ ka ee ré ka onyeyiza awụ nịnị aa mẹ̀ ịsa ana vọrọọ hu wu nị. Tenyi ẹngụ wa sị ẹngụ dọ ụhị ana vaa nyị wụ, agụvị ka wa raà mẹ ka ee ré ka ẹ́ yị nyị ịsị onyeyiza awụ.

Ohomorihi vanaa mẹ ka ò zé yị Isodọmị ọnịrị Isamariya

⁵³ Ẹnẹyịmavara ộ kà a yị Ijerusarẹmị ka, ọnị vanaa mẹ ka ò zé yị Isodọmị ọnịrị Isamariya beri ẹkụra oweyi-oweyi ene hi ịzọọ. Ọnị rẹ vanaa mẹ ka ò zé yị Ijerusarẹmị bẹẹ.

⁵⁴ Ọ kà ụhị ẹngụ awụ vaa nyị wụ, dị waa yẹ ka onyeyiza awụ nịnị ẹyaa mẹ ẹtẹẹrẹ hu wu nị.

⁵⁵ O venee zée yị wa, dị o re zee yị ẹwụrị ẹkụra oweyi-oweyi ọnị ụ nyị.

⁵⁶ Aanị ka ẹ́ vị ụ mẹ Isodọmị isiya ụmọ ọnị wee sii wùu zị,

⁵⁷ dị ebira odivi awụ va sị wu iruvo tụ ẹhẹ? Ẹwụrị ọ ọ́ sị vị ọnyọọnya booro aanị. Vị Anedomi nịnị, Anihwirisiti nịnị ọnịrị anẹkụra ana vọ kara wụ, ene e yi sì ịrẹyị awụ, kụkụ aa mẹ wụ isiya booro aanị nị.

⁵⁸ Ẹnẹyịmavara kà, waa rị ụya ịrẹka ọ̀ yị sẹ awụ ọnịrị ịsị ẹẹ̄ nyị ọza ịhyẹrẹ ọnị ụ raa mẹ.

Ịzẹzẹ ana á vaa saasa pooro

⁵⁹ Ẹnẹyịmavara kà, ọnị va mẹ wụ ịsị ene rere wu gẹdẹ-gẹdẹ, agụvị ka wâ sị ahụ jịnẹ eku ọnị ụ hị́, wẹ́ yị mẹ ịsị ụ kà a ka ụ vaa mẹ.

⁶⁰ Ama ọnị vaa mẹ ịsị ọnị ọnị kà a ka ọnị vaa mẹẹ yị wụ ụmẹ ọnị ụ vị ozweyi, dị ọnị hị́ eku yị wụ ọnị ọnị ẹ̀ yị vaa và ịnị anị pooro.

⁶¹ Ịjị ẹyịnyara awụ ana vị ọzọkụ ọnịrị ana vị ozweyi ẹẹ zị vàka awụ vẹ, ụ vaa tamayị avaba ebira ọnị ụ vịdị mẹ, dị ụhị aa nyị wụ. Ọnị vaa mẹ ka ẹnịnị ẹ̀ yị vịdị vavọọ kà a tụ ịnị ịsị ọnị hị́ eku anị yị wụ.

⁶² Ọnịrị ẹwụ vaa zẹẹ oto ọwọọwaa yị ẹngụ. Ụ vaa yẹ ka ọnị ọ vị Ẹnẹyịmavara nị.

⁶³ Ẹnẹyịmavara kà, ọnị vaa vagu avaba ebira odivi ọnị ụ mẹ yị wụ, ama ụ vaa tamayị ẹnịnị dị ụhị nyị wụ pooro ne tu ka wẹ́ yị va zụ ha irenuu kà ịrẹyị.