Ezikẹẹrị 14 - IWE ỌNỊNỊ

Ohomorihi e yi sì ịrẹyị ori ọ̀yị hẹkẹ

¹ Ezikẹẹrị ka, ẹkụhị ọnya, ẹnị ọdọvịdị Anisirẹrị nịnị ệ kụ ẹngụ ve tu ọnị ka ọnị ọ̀ kà a yị ẹnị ịsị Ẹnẹyịmavara ee sì.

² Dị Ẹnẹyịmavara kà a yị ọnị ka:

³ Ozi-ọza, aza ẹnẹnị vị ana kụ ịrẹyị ori ẹnịnị hi ịnị ayị, dị ọ mẹ ka ẹnịnị ẹẹ mẹ̀ ebira odivi nị. Vị́ ẹnịnị wéé roo ka ọnị vee tu ẹnị ohi ịrẹyị nị?

⁴ Ọ kà ọnị ọ̀ kà a yị wa booro aanị ịsị ọnị Ẹnẹyịmavara Ananyị ụkata hu aa kà: Ka, Anisirẹrị ọnyọọnyị anaaa sị ịrẹyị ori tu ịnị ayị, dị aa mẹ̀ ebira odivi, òo ve tu ọnịsẹ ka ọ̀ kà ịrẹyịị yị ọnị, ọnị Ẹnẹyịmavara ụvọta o vee tu ọ ohi nị, ọnị vee tu ọ ohi anka ịrẹyị ori ọnị ọ ku hi ịnị ayị gigirigi.

⁵ Avaba ori ẹnẹẹ ẹ sị Anisirẹrị nịnị tụra hụrị ọnị ẹngụ, ama ọnị ee sì ka ọnị ọ̀ sị ohi yị wa, dị ọnị ò si tura wa va ka ẹngụ anị vẹ.

⁶ Ọ kà ọnị ọ̀ kà a yị Anisirẹrị nịnị booro aanị ịsị ọnị Ẹnẹyịmavara Ananyị ụkata hu aa kà ka: Và hụụhị ori anaa nyị ọza ịhyẹrẹ aanị, ka enyisi ọ vị nị.

⁷ Ụmẹ tụra ụmẹ ọnị Anisirẹrị ọnyọọnyị, à vị anẹkụra ọsa ana ra ịnị akakana Anisirẹrị nịnị ọ̀ọ và hụụ ịrẹma anị naa mẹ ori dị ọ vavẹ ve tu ọnịsẹ ka ọ̀ kà ịsẹẹ yị ọnị nị, ọnị Ẹnẹyịmavara ọ̀ vaa sị ohii yọ nị.

⁸ Ọnị vaa và eyi ịrazịị kà ọza ọnọọ; ọnị vaa mẹ̀ ẹ ịsị avaba aza vee ré kọsẹ, dị ọnị wụ ọ hụụnị akakana aza anị, dị wa yẹ nịnị ka ọnị ọ vị Ẹnẹyịmavara nị.

⁹ Àa nyị ọnịsẹ ene e vene dị o tụ́ ohi ẹnẹ ẹ̀ yị vị ịzẹyịza nị, ọnị Ẹnẹyịmavara o vene e nị. Ọnị vee vu ọnịsẹ ọnọọ ẹtẹ hụụnị akakana aza anị Anisirẹrị nịnị.

¹⁰ Ọnịsẹ ọnọọ ọnịrị ọza ana va họ̀ ọ use ịrẹyị vị ana vaa rị ụya ọnyọọnya.

¹¹ Ọnị vavọọ vaa mẹ wa, agụvị asị Anisirẹrị nịnị rẹ kụkụ va hụụ ịrẹma anị, naa mẹ̀ ebira odivi ene ee du wa ẹngụ. Ẹnẹyịmavara Ananyị ụkata hu ka aza anị a vọrọ ka ẹnịnị ẹ̀ vị, dị ọnị vị Ohomorihi ẹnịnị nị.

Ịrẹyị Inowa, Ịdanịyẹrị ọnịrị Ijoovu

¹² Ẹkụhị ọnya, Ezikẹẹrị ka, Ẹnẹyịmavara ộ kà a yị ọnị ka:

¹³ Ozi-ọza, ẹkụra ọyịvụrụ ọ̀ọ mẹ̀ ebira odivi hi ọnị, dị ẹnịnị ẹ̀ yị sị ayị tụra ọnị nị, ọnị vee gù wa oze ịsọyịrị. Ọnị vaa mẹ ka ụngwẹ ọ̀ kụ̀ wa, dị ọnị wụ̀ aza ọnịrị ịsụpa nịnị va ha.

¹⁴ Ọ kà aza ẹnị ẹẹta ẹnẹnị ẹ̀ẹ daka ya ịnị ẹkụra ọnọọ; Inowa, Ịdanịyẹrị ọnịrị Ijoovu, Ẹnẹyịmavara kà, ẹngụ ẹnịnị kẹnẹ ẹ va zụụ sị ebira ọyịza ẹnịnị dọ ọ ha nị.

¹⁵ Ọnị ọ̀ọ va tụ uye odivi na ngụ ẹkụra ọnọọ ka ẹẹ wụ̀ azaa ha, dị ẹkụra ọnọọ ta divi, dị ẹ̀ yị nyị ọza ana kụkụ aa zị avọọ paraahu nị.

¹⁶ Ọ̀ọ daka vị ka aza ẹnị ẹẹta ẹnẹnị yà ịzọọ, àa vị ọnị Ẹnẹyịmavara Ananyị ụkata hu, ọ yị vị Ohomorihi ana yara nị, ẹnịnị ẹ yị vaa zụụ dọ ezi ẹnịnịị há. Ẹngụ ẹnịnị kẹnẹ ẹ́ vaa dọ ọ ha nị.

¹⁷ Ọnị ọ̀ọ va mẹ ka à kụ́ ịrẹkụ na ngụ ẹkụra ọnọọ, dị a wụ̀ aza ọnịrị ịsụpa nịnị va ha nị,

¹⁸ ọ̀ọ daka vị ka aza ẹnị ẹyịta ẹnẹẹ yà ịzọọ, àa yị vị ọnị Ẹnẹyịmavara ọ̀ vị Ohomorihi ana yara nị, ẹnịnị ẹ yị va zụụ dọ ezi ẹnịnịị ha. Ẹngụ ẹnịnị kẹnẹ ẹ́ vaa dọ ọ ha nị.

¹⁹ Ẹnẹyịmavara kà, ọnị va mẹ ka ụkụ ọọ za anẹkụra ọnọọ, dị ọnị sị ọyịkụ-ọyịkụ aa wụ̀ aza ọnịrị ịsụpa nịnịị ha nị.

²⁰ Inowa, Ịdanịyẹrị ọnịrị Ijoovu ẹ̀ẹ daka Yà ịzọọ, àa yị vị ọnị Ẹnẹyịmavara ọ vị Ohomorihi ana yara nị, ẹnịnị ẹ́ yị va zụụ dọ ezi ẹnịnịị ha. Ẹngụ ẹnịnị kẹnẹ ẹ́ va zụụ sị ebira ọyịza ẹnịnịị dọ ọ ha nị.

²¹ Ẹnẹyịmavara Ananyị ụkata hu ka, ọnị vaa zị oze ẹẹna ene divi hu kere-kere ọnị ọnị zị sị ụya rị ọza, dị ọnị sị ụya rị Ijerusarẹmị, oze ẹẹna ẹnẹẹ ẹ vị ịrẹkụ, ụngwẹ ọbanyị, uye edivi ọnịrị ụkụ nị. Dị ọnị sị wụ̀ aza ẹnịrị ịsụpa nịnị và ha.

²² Àa nyị ọza ana vẹtẹ ịzọọ, dị ezi anị ha nị, ẹ̀ẹ yaa vẹ u re wa, dị we re ịzị e divi na za. Ụ vaa dọ ka, a mẹ vọrọ ka ọnị ọ̀ sị ụya rị Ijerusarẹmị gẹdẹ-gẹdẹ, ọnị sị rị wa avọọ nị.

²³ Ẹnẹyịmavara kà ụ vaa yẹ ka aa nyị ịsị ẹ vị iruvo ọnị ọnị sịị mẹ avaba ịrẹyị.