Ezikẹẹrị 10 - IWE ỌNỊNỊ

Aa rị Ijerusarẹmị ịra

¹ Ezikẹẹrị ka, ọnị ộ kana eyi, dị ọnị re ịsị ẹ si mẹẹ utu avọọ ẹbẹẹba anggẹẹrị ana a hí Ikerubi nịnị ẹnẹẹ nị. Ọnị ô re ịsị ẹ sị mẹ anka aga ohinọyị ana a sị ịrẹta akàaka ana aā hị́ ịsahwaya mẹ ẹbẹẹba ẹnịnị.

² Ọ kà Ohomorihi ộ kà a yị ọza ana kụ ẹnya ọvwọọvụ hi ẹngụ ịjọọ ka, ọ̀ nọ ịnị akakana ịsị e vene ahụ ụkẹkẹ ana yà akẹtẹ icherubi nịnị ẹnẹnị, dị ọ̀ na nyị akịna rị ụvọ hụụ ịzọọ. Ọ kà ọ̀ọ sị akịna nyị, dị ọ̀ na gara a hi Ijerusarẹmị. Di oni re e ọ́ maa na nị.

³ Icherubi ẹnẹnị vị ana jẹẹ eyi ụvẹtẹ Irehi Ohomorihi dị ọza ọnọọ na ngụ ịzọọ, dị eguhi vana dà ve ku ohweje ana a mẹ tụ ịnị ịnẹ Irehi Ohomorihi nị.

⁴ Ẹnẹyịmavara ộ kwẹẹtẹ ịnị ụbanyị anị na jẹẹ enoze irehi anị. Di eguhi vana chaka ku irehi ọnọọ nị. Ụbanyị Ẹnẹyịmavara ộ mẹ̀ ka ohweje irehi Ohomorihi ọọ zẹtẹ.

⁵ Aza ene hi ịnị ohweje ana á dà tụ ẹhẹ ệ wụ avaka ikerubi ẹnẹnị maa sụ́ ịrẹyị. Vị ịsị anaa sụ́ ịrẹyị sị mẹẹ anka Ohomorihi àa kà ịrẹyị avọọ nị.

⁶ Ẹnẹyịmavara mẹ kà a yị ọza ana kụ́ ẹnya ọvwọọvụ hi ẹngụ aanị ka ọ̀ na nyị ịra hụụnị akakana ịsị ẹ mẹẹ anka ahụ ụkẹkẹ ana yà akẹtẹ Icherubi nịnị ẹnẹnị, dị ọza ọnọọ na, dị ọ́ na jẹẹ akaha ịsị ẹ sị mẹẹ ahụ ụkẹkẹ ẹnẹẹ ọnya nị.

⁷ Ọnyara ịnị Icherubi ẹnẹnị ộ jị ụvọ ngụ ịra ana yà ịnị akakana ẹnịnị, dị ọ́ nyị akịna, dị ọ́ vàa hi ọza ana kụ ẹnya ọvwọọvụ hi ẹngụ aanị ụvọ nị. Ọ sị ọ dọ, dị ọ́ hụụ ịzọọ nị.

⁸ Ezikẹẹrị ka ọnị ô re ka Icherubi ẹnẹnị ọzọza ộ nyị ịsị ẹ sị mẹẹ ụvọ ọza avọọ tụ iruvo avaka ẹnịnị.

⁹ Ọnị ô re re ịsị ẹ sị mẹẹ ahụ ụkẹkẹ avọọ ẹẹna. Icherubi ọzọza vị ana nyị ikonyi ikonya. Ịsị ẹ sị mẹẹ ahụ ụkẹkẹ aanị vị anaa za nyanga-nyanga anị ka ịrẹta ọkatarihi avọọ.

¹⁰ Ẹnịnị vị ene vene ẹngụ, dị ọ́ sị mẹẹ anka vị a sị ahụ ụkẹkẹ ẹnyị chire ọsa ịnẹ, ẹvẹnẹ-ẹvẹnẹ nị.

¹¹ Ịjị Icherubi ẹnẹnị ẹ̀ẹ ka ẹnị aa zị use, ẹnịnị ẹ́ zụ zị oze ọnyọọnya; dị ẹ́ yi nyị ka ẹ̀ vareyi. Eyi ẹnẹ ẹ̀ẹ ka ẹnị aa nọ kẹnẹ, dị avaba ẹnịnị vavọọ aa na, ẹ́ yị nyị ka ẹnịnị ẹ̀ vara eyi.

¹² Avaba ọchẹngụ ẹnịnị, ịrẹma, ụvọ ọnịrị avaka ẹnịnị vị eyi-eyi ene ee si re ẹtẹ. Avọọ ahụ ụkẹkẹ ẹnịnị mẹ rẹ nyị eyi kara ẹngụ nị.

¹³ Ezikẹẹrị ka ọnị ộ wụ ka â hị́ ahụ ịkẹkẹ ẹnẹnị o jesi ọza viri-viri.

¹⁴ Icherubi ẹnẹnị ọzọza vị ana nyị eyirẹsụ ẹnẹẹna. Ệ nyị eyirẹsụ Icherubi, eyirẹsụ ọza, eyirẹsụ idu ọnịrị eyirẹsụ ukokoro.

¹⁵ Dị Icherubi ẹnẹnị hira vahịrẹ nị. Ẹnịnị ẹ vị ịsa anaa yara ọnị ọnị vịdị re ụtọ Irehu ịchẹẹba nị.

¹⁶ Ịjị Icherubi ẹnẹnị ẹ̀ẹ zị ụsẹ, dị ịsị ẹ sị mẹẹ ahụ ụkẹkẹ aanị aa dụ wa akaha-akaha. Ịjị ẹnịnị ẹ̀ẹ kụ̀rà avaka ka ẹnị è hira tụ ẹba dị ịsị ẹ sị mẹẹ ahụ ụkẹkẹ aanị vavọọ yịị yà akaha ẹnịnị.

¹⁷ Ịjị Icherubi ẹnịnị ẹ̀ẹ jẹẹ, dị ẹnị rẹ vavọọ jẹẹ sii. Ịjị ẹnịnị ẹ̀ẹ hira tụ ẹba, dị ịsị ẹ sị mẹẹ ahụ ụkẹkẹ aanị re hira saasa wa; agụvị ka ụkata icherubi ẹnẹnị aa sị waa zị nị.

¹⁸ Dị ẹtohweyi anaa zaa kara Ẹnẹyịmavara rẹ hụrị enoze irehi Ohomorihi, dị ọ na ya ẹbẹẹba icherubi ẹnẹnị nị.

¹⁹ Ezikẹẹrị ka avọọ ọnị mee yii re wa, dị icherubi ẹnẹnị hira hụrị ẹtẹ nị. Ahụ ụkẹkẹ ẹnịnị ẹnẹnị vị ana rẹ saasa wa. Ẹnịnị ệ jẹẹ chẹẹ oze ọbanyị ana a zịị ngụ ịnị Irehi Ohomorihi eyi ọnị ọyị zịị hụrẹẹ vẹ, dị ẹtohweyi anaa za kara Ohomorihi Anisirẹrị vavọọ yà ẹbẹẹba ẹnịnị nị.

²⁰ Ẹsẹnị ẹ vị ịsa anaa yara ọnị re akẹtẹ Ohomorihi Anisirẹrị ụtọ irehu ịchẹẹba nị. Dị ọnị yẹ ka Icherubi ẹnịnị vị nị.

²¹ Ikonyi kọnyara ẹnịnị vị ana nyị eyirẹsụ ọnịrị avaka ẹnẹẹna, dị ẹnịnị nyị ịsị e vene ụvọ ọza tụ iruvo avaka ẹnịnị nị.

²² Eyirẹsụ ẹnịnị ọnịrị eyirẹsụ ọnị vịdị re ụtọ irehu Icheba vị ọnyọọnya. Icherubi ọzọza vị ana vavọọ aa nọ ịzị o va eyi ka.