Ezikẹẹrị 1 - IWE ỌNỊNỊ

Etore ịpaapa Ezikẹẹrị

¹ Â nyị ọnọrụ ọnya aanị, ana aā hị́ Ezikẹẹrị; ozi ọnọrụ na aā hị́ Ibuzi ọ vị̀ nị, dị ọ vị ohirẹsụ irehi Ohomorihi nị. Ezikẹẹrị ka, ịnị ẹkụhị ọhụhị ịnị ụhwẹ ọhụna ọnị ọnị gụ ịrayị ohurẹẹwụ, ọnịrị Aniju ana vọ ana a za ọrịhị ve hi Ịbabịrọnị mẹ ra hi ụtọ irehu ana aā hị́ Icheba, â nyị ẹtẹ ọnị Ohomorihi sị zụ ọnị.

² Ana tụ ọ ịrayị ọhụhị ana a za ohinọyị Ijehoyakini ọrịhị va ngụ ẹtẹ Ịbabịrọnị ọnị vavọọ re ẹtẹ nị.

³ Ezikẹẹrị ka Ẹnẹyịmavara ộ kà ịrẹyị yị ọnị ụtọ irehu Icheba ịnị ẹtẹ Ịbabịrọnị ịzọọ; dị ọ sị ụkata anị yị ọnị nị.

Ẹtẹ ọnị Ezikẹẹrị re

⁴ Ezikẹẹrị ka, ọnị mẹ kụ̀rà eyi tụ ẹba, dị ọnị re ka opomi ộ tụ́ hụrị eyi ẹbẹẹba aa vẹ nị. Ọnị ô re re ka eguhi ộ da dụmẹ, dị ịnyaanya aa rị ịnị anị nị. Dị ẹbẹẹba aa zẹtẹ kara eguhi ọnọọ nị. Oni ô re ịsị ẹ sị mẹẹ anka enyusẹ ọkatarihi anaa za nyoonyo avọọ ịnị akakana ịra anaa rị aanị.

⁵ Ọ kà ọnị ô re ịsa ẹẹna ana aa tụ́ ụhwẹ, ịnị akakana opomi ọnọọ; vị ẹ sị mẹẹ anka ọza avọọ nị.

⁶ Ama, ikonyi ikonya ẹnịnị vị ana nyị eyirẹsụ ẹẹna ọnịrị avaka ẹẹna.

⁷ Ahụ ẹnịnị ệ vọrọ, dị ẹ́ nyị ẹtụpa anka ẹtụpa ozi imaaru avọọ nị. Ẹnịnị ệ zẹtẹ anka enyusẹ ọkatarihi ene è yị ku ụrẹ avọọ.

⁸ Ẹnịnị mẹ nyị eyirẹsụ ọnịrị avaka ẹnẹẹna, dị ẹ rẹ nyị ụvọ ọza ikonyi ikonya tụ iruvo avaka ọnyọọnya nị.

⁹ Ịsa ana a tụ́ ụhwẹ aanị vị ana gana avaka ẹnịnị dị ẹ sị kanyị avaka ẹngụ akaha-akaha. Eyi ẹnị ẹẹ ka ẹnị aa nọ kẹnẹ, dị ẹẹ vavọọ aa na, ẹ́ yị nyị ka ẹnịnị ẹ̀ vara eyi.

¹⁰ Ịsị eyirẹsụ ẹnịnị vene yị: ikonyikonyara ẹnịnị vị ana nyị eyirẹsụ ọza tụ ọvịdị; dị ẹ́ nyị eyirẹsụ idu tụ eyi ụvọrị nị. Ệ nyị eyirẹsụ ụnọ tụ eyi-ụvọha, dị ẹ́ nyị eyirẹsụ ukokoro tụ ịrẹma nị.

¹¹ Ịsa ẹnẹnị ikonyikonyara ệ kụ̀rà avaka ẹnịnị ẹvẹẹva tụ ẹba, dị ọ̀ kanyị avaka ịsị ọsa ana yà akaha ẹnịnị. Dị ọzọza pá avaka ẹnịnị ẹvẹẹva ana vọ za ẹngụ anị nị.

¹² Ịsa ẹnẹnị ikonyi ikonya vị ana va eyi ka oze eyi ẹyịna, agụvị ịzị avaba ẹnịnị ẹẹ ka ẹnị aa nọ kẹnẹ, ẹ̀ zụụ na, dị asị a nyị ka ẹnịnị ẹ̀ vara eyi.

¹³ Ezikẹẹrị ka ọnị ô re ịsị ẹ sị mẹẹ anka ịra akịna à vị ozotupa anaa zẹtẹ chanyị-chanyị avọọ ịnị akakana ịsa ẹyịna anaa tụ ụhwẹ aanị. Ịra ọnọnị vị anaa zị ụsẹẹ vaa chi vahịrẹ ngụ ịnị akakana ịsa anaa tụ́ ụhwẹ aanịị zị, dị aa rị ịnyaanya veeve nị.

¹⁴ Ịsa ẹnẹnị anaa tụ́ ụhwẹ aanị nyẹmba vị enee zwè vee-vee ngwọ zị anka ịnyanya aaa rị avọọ.

¹⁵ Ọnị mee re ịsa anaa tụ́ ụhwẹ aanị, ọnị ô re ịsị ẹ́ sị mẹẹ anka ahụ ụkẹkẹ avọọ ẹẹna akaha ẹnịnị, dị ẹ kanyị eteesu nị. Ikonyikonya ọ yà akaha ọzọza nị.

¹⁶ Ọ kà, ịsị ẹ sị mẹẹ ahụ ụkẹkẹ avọọ aanị vị anaa za nyoonyo anka ịrẹta ọkatarihi avọọ. Dị ikonyi ikonya nyị ịsị ẹ sị mẹẹ ahụ ụkẹkẹ ọsa ana jị ọ ẹvẹnẹ-ẹvẹnẹ nị.

¹⁷ Avọọ, ẹ yị nyị eyi ọnị ịsị ẹ sị mẹẹ anka ụkẹkẹ aanịị ẹ̀ yị zụ nọ.

¹⁸ Enyusẹ ịsị ẹ sị mẹẹ ahụ ụkẹkẹ aanị ẹyịna vị ana sị ẹngụ-ẹngụ vị eyi-eyi.

¹⁹ Ụmẹ tụra ụmẹ ọnị ịsa anaa tụ́ ụhwẹ aanị aa zị ụsẹ, dị ahụ ụkẹkẹ ẹnẹnị aa dị waa na; ẹnịnị ẹ̀ẹ rẹ va kwẹẹtẹ hụụnị eteesu, dị ahụ ụkẹkẹ ẹnẹnị ẹnị rẹ kwẹẹtẹ saasa wa.

²⁰ Ịzị ụhwẹ (ụkata) ộ sị wa zị kẹnẹ, ẹnịnịị̄ nọ nị, dị ahụ ụkẹkẹ ẹnẹnị vavọọ aa dụ wa; agụvị ka ịsa aa tụ ụhwẹ ẹnẹnị ẹ nyị ọda ẹnịnị nị.

²¹ Avọọ, ụmẹtụrụmẹ ọnị ịsa anaa tụ ụhwẹ aanị ẹẹ zị ụsẹ, ẹ̀ẹ jẹ, ẹ̀ẹ va kwẹẹtẹ nị ịnị ahị, dị ahụ ụkẹkẹ ẹnẹnị rẹ vavọọ mẹ ịsị ẹ́ mẹ gẹdẹ-gẹdẹ, agụvị ka ịsa aa tụ́ ụhwẹ aanị ẹ nyị ọda ẹnịnị nị.

²² Â nyị ịsị a gana tụ akẹbẹẹba ịrẹsụ ịsa anaa tụ ụhwẹ ẹnẹnị. Ịsa ọnọọ vị ana sị mẹẹ eguhi avọọ, dị aa zẹtẹ kokoko anka ore avọọ nị.

²³ Dị ịsa anaa tụ ụhwẹ ẹnẹnị jẹẹ iruvo anị nị, dị ọzọza gana avaka anị ẹvẹẹva vàka ana gụrị ọ na, dị ẹ sị avaka ẹnịnị ẹvẹẹva kú ẹngụ ẹnịnị nị.

²⁴ Ezikẹẹrị ka, ẹnịnị mee hira, ọnị ộ wụ́ avaka ẹnịnị maa sụrẹyị anka okuha ọbanyị ee sì avọọ; dị aa sụrẹyị anka isoja nịnị mẹẹ kụ ịrẹka avọọ nị. Ẹyaa sụrẹyị anka ọngwẹ Ohomorihi Ochẹtẹẹngụ avọọ. Ịjị ẹnịnị ẹ̀ yị kuku hira, dị ẹ kara avaka ẹnịnị.

²⁵ Ama â yị nyị ịsa aa sụrẹyị hụụnị ịsa ana a gana kụ akẹbẹẹba ịrẹsụ ẹnịnị aanị.

²⁶ Â nyị aga ohinọyị ana yà akẹbẹẹba ịsị a gana aanị, dị á nyị ịsị ẹ sị mẹ anka ọza avọọ ana yaatụ ịnị anị nị. Aga ohinọyị ọnọọ vị ana a sị ịrẹta ana aā hị́ ịsahwaya mẹ,

²⁷ Ezikẹẹrị ka, ọnị ộ re ẹhwị ọtẹ ịsị ana yaatụ ịnị aga ohinọyị ọnọnị aanị và hịrẹ; dị â zẹtẹ anka enyusẹ ọkatarihi ana yà ịnị akakana ịra avọọ nị. Dị ẹhwị ọtẹ anị va chi sị mẹẹ anka ịra anaa za avọọ, dị aa zẹtẹ ẹtẹẹtẹrẹ nị.

²⁸ Ọ kà ịra anaa zẹtẹẹ kara a aanị vị ana sị mẹẹ anka ọgaazị ana hụrẹ ụmẹ orihi avọọ. Etohweyi chanyị-chanyị ọnọnị vị anaa sịị zụ ka Ẹnẹyịmavara yà ịzọọ. Ezikẹẹrị ka ọnị me re e, ọnị ô và eyi ku ẹtẹ, dị ọnị wụ́ ọngwẹ ọza anaa kà ịrẹyịị yị ọnị nị.