Ẹtore 9 - IWE ỌNỊNỊ1 Anggẹẹrị ọhụhị ô hú ọpanyị anị. Di mi re ka ụzọmị ọnya ộ jị hụrẹ ẹbẹẹba va nya ẹtẹ ẹhẹ nị. Dị a sị ụkọkọrọ ọbọbọọ yọ nị. 2 Dị ọ na oze ọbọbọ ọnọọ, dị areyi dà va jịnẹ hụụnị anị anka areyi ọrịra ọbanyị avọọ nị. Dị areyi ana dà jịnẹ hụụnị ọbọbọ ọnọọ mine ọyị ọnịrị eguhi tịtẹ kẹnẹ nị. 3 Dị akụvarịva nịnị jịnẹ hụụnị areyi ọnọọ hi ẹhẹ nị. Dị a sị ụkata yị wa anka iku ene hi ịnị ẹhẹ avọọ nị. 4 A ka asị ẹ kanyị avị ene hi ẹhẹ, asị ẹ kanyị ịsa ohwoohu ọnyọọnyị, dị asị ẹ rẹ kanyị ọchị ọnyọọnyị! A ka ẹnịnị èe che aza ẹnẹ ẹ̀ yị nyị apọtẹrẹwa Ohomorihi tụ́ ini ibe ẹnịnị. 5 A rẹ ka asị ẹ wụ̀ aza ẹnẹẹ, ama ẹ̀ yịị sị ụyaa rị wa pooro mẹ ụhwẹ ẹẹhị. Èe che ọza, dị aa zị ọza anka iku òo rere che ọza avọọ. 6 Aza vee sì isu ụmẹ ọnọọ di e yi re e; aza vaa vá ụva ka ẹnị è sú, ama isu vee zwee kanaa yị wa. 7 Akụvarịva ẹnẹẹ vị ana sị mẹẹ anka umaata ene e tenyi tịtẹ ka à sị na kụ̀ ịrẹkụ avọọ. Ệ nyị ịsa ẹnyị aanị tụ́ ịrẹsụ ana sị mẹẹ anka ọkẹkẹrẹkụ ana a sị igooru mẹ avọọ. Eyirẹsụ ẹnịnị vị ana rẹ sị mẹẹ anka eyirẹsụ ọza avọọ. 8 Ẹyị ẹnịnị vị ana sị mẹẹ anka ẹyị ọnyẹnẹẹ avọọ, dị anyị ẹnịnị yà anka anyị idu avọọ nị. 9 Ệ sị ịsa ẹnyị aanị ku ịrachị ana sị mẹẹ anka awuru enyusẹ-enyusẹ avọọ, avaka ẹnịnị vị ana aa sụ́ ịrẹyị anka ụkẹkẹ ọrụrụ ọnị umaata aa sịị zị ana aā sịị nọ ịrẹkụ avọọ. 10 Ệ nyị omu véné omu iku, dị ẹ nyị ịsị e siī che ọzaa tụ́ ịnị anị nị. Â sị ụkata yị wa ka èe che ọza, ọ̀ zị ọọ mẹ ụhwẹ ẹẹhị. 11 Ẹnịnị ệ nyị ohinọyị ọnya. Ohinọyị ọnọọ ọ vị anggẹẹrị ana sị eyi pe ọbọbọ ọnọọ nị. Ịrẹha anị ịnị ẹkụra Anihiburu ọ rị Abadoni nị. Anẹkụra Igiriki ẹnị vị anaā hị́ ọọ Aporiyọnị (ọnị ọ vị ka odusaha). 12 Ụyọrị odivi ịpaapa ọ sị mẹ para hu. Ọ sị vị ụyọrị odivi ẹẹva ana aa vẹ ịrẹma anị. 13 Anggẹẹrị ọhụhịnọnyị ô hú ọpanyị anị. Dị mị wụ́ ọngwẹ ọnya hụrẹ eyi ẹyịna ụta igooru ene e hi tụ́ ọvịdị Ohomorihi nị. 14 Dị ọ kà a yị anggẹẹrị ọhụhịnọnyị ana nyị ọpanyị aanị, dị ọ ka: Ọ̀ ngwara anggẹẹrị ẹẹna ana a sụ́ tụ́ ini òkū ọbanyị Iyuhwireti nị! 15 Dị a ngwara anggẹẹrị ẹẹna ẹnẹẹ nị. Agụvị ụmẹ ọnọnị ịnị ẹkụhị ọnọnị, ọnịrị ịnị ụhwẹ ọnọnị beri ịrayị gẹdẹ-gẹdẹ ọnọnị e tenyi wa tịtẹ ka ẹ̀ va wụ achẹta anẹhẹ nị. 16 Â kà a mị ịrịka isoja nịnị onumaata ẹnẹẹ. Ẹnịnị vị akawụ-akawụ oze ẹchẹhị (200,000,000). 17 Ịnị ẹtẹ oni mi re, aanị úmaata ọnịrị aza ana tụra wa mẹ̀ yà nị: Awuru enyusẹ-enyusẹ ẹnẹ nyị vị ene ee vi anka ịra avọọ. Ẹnyị vị onivuru anka eguhi, dị ẹnyị vị odozeyirị nị. Ịrẹsụ umaata ẹnẹẹ vị ana sị mẹẹ anka ịrẹsụ idu avọọ. Dị ịra ọnịrị areyi beri agụ ohuru aa hụụnị irenu ẹnịnịị vẹ nị. 18 Ụyọrị odivi ẹẹta ana wụ achẹta anẹhẹ yị: Ịra ọnịrị areyi beri agụ ohuru ana hụụnị irenu umaata ẹnẹẹ jịnẹ vẹ. 19 Ụkata umaata ẹnẹẹ vị ana yà ịnị irenu ẹnịnị ọnịrị omu ẹnịnị. Omu ẹnịnị vị ana yà anka ẹwụ ana nyị ịrẹsụ avọọ. Ẹnị éyee sii che ọza nị. 20 Aza ana vọ ọnị ụyọrị ẹẹta ẹnẹẹ ẹ̀ yị wụ, e yi yi ro ịnẹ varẹma hụụnị ịsa ẹnẹ ẹ yaa mẹ. Ẹyaa yị hẹkẹ ụhwẹ echu nịnị ọnịrị ori ana a sị igooru ọnịrị enyusẹ irenyi-irenyi ọnịrị ịrẹta beri ọchị mẹ. Ịsa ẹnẹẹ ẹnị e yi zụ re ẹtẹ, ẹ yị zụ wụ́ ịrẹyị, ẹ yị rẹ zụ zị ụsẹ. 21 E yi ro ịnẹ varẹma ka asị ẹnị rẹ̀ kụkụ wụ̀ ọza, dị asị ẹnị rẹ̀ mẹ ẹbẹ, dị asị ẹnị rẹ̀ sẹ̀ ịrẹka, à vị ka dị à sị ẹnị rè kuku yi oyi. |
Ebira First Bible © Bible Society of Nigeria, 2014.
Bible Society of Nigeria