Ẹtore 6 - IWE ỌNỊNỊOzi Atẹmẹ ộ hụ̀ ịsa ịhịnọnyị ana a sị vá iwe 1 Mê re, Ózi Atẹmẹ ọnọọ mẹ̀ hụ̀ ọnya ịnị ịsa ịhịmba ana a sị vá iwe ọnọọ. Dị mị wụ́ ka ọnya ịnị ịsa ẹẹna ẹnẹẹ ana nyị ụhwẹ avọọ, ô nowu nị. Ọngwẹ anị ộ banyị anka apaana ihinẹba avọọ. Dị ọ ka: Vẹ! 2 Dị mị kana eyi, di mi re ka umaata ọvwọọvụ ọnya nị. Ọza ana tụra umaata ọnọọ, ộ sị ọkịta rị ụvọ, dị a sị ọkẹkẹrẹkụ yọ nị. Dị ọ jịnẹ tụ́ ẹhẹ anka ọza anaā nyị ehuna ịrẹkụ avọọ ka ọnị ọ̀ na nyị ehuna ịrẹkụ nị. 3 Dị Ozi Atẹmẹ ọnọnị ọ rẹ hụ̀ ịsa ọhụva ana a sị vá iwe ọnọọ nị. Dị mị rẹ wụ́ ka ọhụva ịnị ịsa ẹẹna ẹnẹẹ ana nyị ụhwẹ ka: Vẹ! nị. 4 Dị umaata ovivi ọnya ọnị rẹ jịnẹ tụ́ ẹhẹ nị. Â sị ụkata yị ọza ana tụra a ka ọ̀ kụ́ ịrẹkụ hi ịnị ẹhẹ, dị aza ẹẹ wụ ẹngụ nị. Â sị ụhwọ ọnyaa yọ. 5 Ịjị Ozi Atẹmẹ rẹ hụ̀ ịsa ọhụta ana a sị vá iwe ọnọọ, dị mị rẹ wụ ọhụta ịsa ẹẹna ẹnẹẹ ana nyị ụhwẹ avọọ, dị ọ ka: vẹ. Dị mị kana eyi, di mi re umaata ojooji ọnya nị. Ọza ana rẹ tụra ọnọọ, ộ nyị ịngọ onyeyẹva rị ụvọ. 6 Dị mị wụ́ ịrẹyị ẹnyị aanị anka ọngwẹ avọọ ịnị akakana ịsa ẹẹna ẹnẹẹ ana nyị ụhwẹ nị. Dị ọ ka: Akụ ẹnya ọnya vị Ịnayịra ẹẹva, apaapa ẹnya ẹẹta rẹ vị Ịnayịra ẹẹva. Asị ụ zẹẹ ka angwẹ ọnịrị eche ẹ̀ zwọ! 7 Di Ozi Atẹmẹ ọnọọ rẹ hụ̀ ịsa ọhụna ana a sị vá iwe ọnọọ nị. Dị mị wụ́ ka ọhụna ịnị ịsa ẹẹna ẹnẹẹ ana nyị ụhwẹ ka: Vẹ! nị. 8 Dị mị kana eyi, di mi re umaata ọnya ana achẹrẹ anị sị mẹẹ anka areyi avọọ nị. Ịrẹha ọza ana tụra a ọ rị Iswọọza nị. Di ẹkụra aa dụ ọ ịrẹma nị. Â sị ọda yị wa tụ́ ịrẹsụ achena anẹhẹ ka ẹ̀ sị ịrẹkụ ọnịrị ụngwẹ beri ụkụ ọnịrị uye edivi ene hi ẹhẹ, dị ẹ̀ sị wụ̀ wa nị. 9 Ọ mẹ̀ rẹ hụ̀ ịsa ọhụhị ana a sị vá iwe ọnọọ, di mi re ụhwẹ aza ana vịdị sị wụ agụvị ịrẹyị Ohomorihi ẹnẹ ẹ dọ wụ dị ẹ rẹ yaa kà a e mè hi iruvo ụta nị. 10 Di e yee nowu booboro, dị ẹ ka: Ananyị yị ana vị ọnịrẹyịzẹyịza dị ẹ̀ yị nyị ẹngụ anị, ịhị ọ vaa mẹ̀ ọkarẹyị yị anẹhẹ di ò sí wa atọ ọyịwụ̀ ẹnẹ ẹ wụ̀ ẹnị? 11 Dị a sị awuru ọvwọọvụ yị ọzịnya-ọzịnya ẹnịnị nị. Dị a ka ẹnịnị ẹ̀yịị tụ́ ụhwọ́ chee da, pooro dị anda ẹnịnị ẹnẹ ẹnịrịị vị ezi ahụ, dị à wụ̀ wa ta, anka a mẹ̀ rẹ wụ ẹnị nị. 12 Di mi re re, ọ mẹ̀ hụ̀ ịsa ọhụhịnọnyị ana a sị vá iwe ọnọọ nị. Dị ẹtẹ henyi jigi-jigi, dị ọyị kuku ee mine anka ịta ojooji avọọ nị. Dị ụhwẹ ọnị ee ví pooo anka anya avọọ nị. 13 Dị ụzọmị nịnị hụrẹ hụrị ẹbẹẹba va nya ẹtẹ ẹhẹ nị, anka ẹ́tụtụ ana aa tụ́ụ vẹ mẹ̀ẹ sụ̀, ahị ọbanyị òo henyi ọọ avọọ nị. 14 Dị ẹbẹẹba kara kwooze, anka èe rere kara iwe kwooze avọọ nị. Dị ataba nịnị ẹnịrị ẹtẹ ene enyi kara, hụrẹ aha ẹnịnị nị. 15 Di ohinọyị nịnị ẹnịrị azẹbanyị beri ọnyẹkẹhị nịnị ẹnịrị ọga ịrẹkụ nịnị beri aza ana nyị ụkata, beri avaba ọrịhị ẹnịrị ezi kụ́ ẹngụ ẹnịnị na tẹ̀ ịnị ụtẹha ọnịrị ịnị anaha ịrẹta ene hi ịnị ataba nị. 16 Dị ẹ kà a yị ịrẹta beri ataba ka è wú za ẹnị, dị ẹ̀ sị ẹnị tẹ̀, dị asị ọza ana yaayịtẹ ịnị aga ohinọyị ọnọọ re ẹnị, dị asị Ozi Atẹmẹ ọnọọ rẹ kụ́ ayị hi ẹnị nị. 17 Ệ kà avọọ, agụvị ka ẹkụhị ọbanyị ana aa sịị kụ́ ayị, o si tù; ẹnẹ va zụụ jẹẹ? |
Ebira First Bible © Bible Society of Nigeria, 2014.
Bible Society of Nigeria