Ẹtore 4 - IWE ỌNỊNỊ

A mẹmẹ vaa hẹkẹ Ohomorihi ẹ́bẹẹba

¹ Ịjị ẹnẹẹ ta, dị mị rẹ kana eyi nị. Di mi re oze ana a na hi ẹtẹ ẹ́bẹẹba nị. Dị ọngwẹ ana sụ́ ịrẹyị anka ọpanyị avọọ, ana vịdị kà ịrẹyịị mị ịpaapa, raa kà ịrẹyịị mị nị. Dị ọ ka: Hịrẹ vẹ ịzẹnị, dị ma sị zụ̀ wụ ịsị a hị́ ka ịzẹyịza, ẹ vaa mẹ ị́rẹma ụhwọọ!

² Dị Ụhwẹ Ọnịnị wụsẹ dọ avaba ayị amị nị. Â nyị aga ohinọyị ọnya ẹ́bẹẹba ịzọọ, dị ọza ịnya yaayịtẹ ịnị aga ohinọyị ọnọọ nị.

³ Ọza ana yaayịtẹ ịzọọ vị ene eyi anị aa za nyanga-nyanga anka ịrẹta nyoo-nyoo ẹnyị aanị ana aā hị́ ịjasịpa ọnịrị Ịkanẹrịyanị avọọ. Dị ọgaazị ana achẹrẹ anị sị mẹẹ ịrẹta angẹrẹ ana aā hị́ emeradi, kara aga ohinọyị ọnọọ nị.

⁴ A rẹ nyị aga ohinọyị ohurẹẹna ana kara aga ohinọyị ọnọọ. Azọkụ ohurẹẹna ẹnyị aanị ệ yaayịtẹ ịnị ẹnịnị, dị e chire awuru ọvwọọvụ, dị e re kú ọkẹkẹrẹkụ ana sị igooru mẹ nị.

⁵ Dị ịnyanya aa rị vee-vee, dị ịsa aa sụ́ ịrẹyị, dị apaana ihinẹba aa háa hụụnị aga ohinọyị ọnọọ vẹ nị. Dị ozotupa ịhịmba aa zẹtẹ ọvịdị aga ohinọyị nị. Ozotupa ịhịmba ẹnẹẹ vị Ụhwẹ Ohomorihi ịhịmba.

⁶ A rẹ nyị oku ọnya aanị ọ́vịdị aga ọnọọ; vị ọ sị mẹẹ anka ore avọọ nị, ô nyeeyi ẹtẹẹtẹrẹ. A rẹ nyị ịsa ẹẹna ẹnyị aanị ana nyị ụhwẹ, ana jẹẹ kara aga ohinọyị ọnọọ. Ịrẹma ẹnịnị ọnịrị ọvịdị ẹnịnị vị eyi-eyi.

⁷ Ịsa ịpaapa ịnị ịsa ana nyị ụhwẹ aanị vị ana sị mẹẹ anka idu avọọ, ọhụva vị ana sị mẹẹ anka ozi imaaru; dị ọhụta nyị eyirẹsụ ọza nị; Dị ọhụna ọnị sị mẹẹ anka ọkasịmẹ ene ee hira avọọ nị.

⁸ Ịsa ẹẹna ana nyị ụhwẹ ẹnẹẹ, ọnya-ọnya ộ nyị avaka ịhịnọnyị. Dị ẹhẹẹhẹ ẹnịnị ọnịrị ịnịnẹ ẹnịnị vị eyi-eyi nị. Ọọdụ ọnịrị ịrahụ, ẹnịnị e yị tụ́ ụhwọ́, dị ẹyaa jị ahẹ ka Ọnịnị, Ọnịnị, Ọnịnị, Ananyịwa Ohomorihi Ochẹtẹngụ vị nị. Ẹ yị nyị ẹngụ awụ, Ọnị ọ yà ịzọọ hụrị ụmọrụmọ dị a va yẹ ka aa mẹ ẹhẹ nị; ọnị ọ yà ịzọọ booro aanị nị, ọ rẹ vaa vaa vẹ ịnị ẹhẹ ọnọnị.

⁹ Ụmẹ tụra ụmẹ ọnị ịsa ẹẹna ana nyị ụhwẹ aanị ẹ̀ẹ yaa sị igirima ọnịrị ụbanyị beri avọọ yị ọza ana yara pooro zịna-zịna ana yaayịtẹ ịnị aga ohinọyị ọnọọ,

¹⁰ dị azọkụ ohurẹẹna ẹnẹẹ và ku ẹtẹ ọvịdị ọza ana yaayịtẹ ịnị aga ohinọyị ọnọọ ana yára pooro zịna-zịna, dị ẹyaa hẹkẹ ẹ. Dị ẹ hụ̀ ọkẹkẹrẹkụ ẹnịnị tụ́ ọvịdị aga ohinọyị, dị ẹ ka:

¹¹ Ananyị yị, ẹwa vị Ohomorihi ayị nị. Ẹwa nyị ụkata nị. Ẹwụ a vọrọ ka avaba aza ẹ̀ẹ sị igirima ọnịrị ụbanyịị yị nị. Ẹwa tụ́ avaba ịsa nị. Agụvị ka wâ vavọọ sì ọ, ụ tụ́ wa, dị ẹ yà ịzọọ nị.