Ẹtore 22 - IWE ỌNỊNỊ

¹ Anggẹẹrị ọnọọ mẹ raà sị ẹkụra ọwọọwa ọnọọ zụ mị, ộ sị irehu ene enyi anịị mẹ ka ọza ọ̀ yàra zịna-zịna, zụ̀ mị; ô nyeeyi, aa noko-noko aanị. Di ee sìi hụụnị aga Ohomorihi ohinọyị ọnịrị aga Ozi Atẹmẹ nị.

² Enyi ọnọọ vị ene ee sìi vàa tụra ụpatẹsị ịzọọ. Â nyị ọchị ana aa mẹ ka ọza ọ̀ yàra ana jẹẹ akaha irehu ọnọnị eyi ẹnyị, eyi ọsa. Ụpẹ ẹwụrẹva ộ tụ́ ẹtụtụ ịnị ịrayị nị. Ọnị ọ vị ka ụpẹ ọnya-ọnya ộ tụ́ ụhụụhwẹ nị. Avị anị vị ana a sịị mẹ anẹhẹ nịnị ụkụ.

³ Ẹ yị nyị ịsa oni Ohomorihi si chi hi ene vee re ịzọọ. Aga Ohomorihi ohinọyị ọnịrị Ozi Atẹmẹ ẹ vaa yà ịzọọ nị. Dị ezi ahị anị aa hẹkẹ ẹ.

⁴ Ẹnịnị vee re eyi anị, dị a chẹrẹ ịrẹha anị tụ́ ini ibe ẹnịnị.

⁵ Ẹtẹ o yi vee hozi ịzọọ pooro, ẹ yị nyị ịsị ẹ vaa sị ozotupa, à vị ọyịị̄ mẹ. Ohomorihi ọ vaa vị ẹtohweyi yị wa nị. Ẹnịnị vị ana vaa mẹ ohinọyị pooro zịna-zịna.

Ijeesu aa vaa vẹ

⁶ Dị anggẹẹrị ọnọọ kà a mị ka, “Ịrẹyị ẹnẹnị vị ịzẹyịza, ẹ yị nyị ireche ịnị anị. Ohomorihi Ananyị yị ana sị Ụhwẹ Ọnịnị anị yị ọnịsẹ nịnị ọ tụ́ anggẹẹrị anị ka ọ̀ sị va zụ̀ ezi ahụ anị ịsa ana aa vaa mẹ aanị nị.”

⁷ Di Ijeesu ka, “Re, maa aa vẹ ịsọọnị-ịsọọnị. Ọza ana àa saasa ịsẹ ana a kà tụ́ ini iwe ọnọnị, vaa daa jẹ.”

⁸ Ẹmị Ịjọọnụ, mê re ịrẹyị ẹnẹnị, dị mị rẹ wụ́ ọọ nị. Ịjị mi re e, dị mị rẹ wụ́ ọọ, mâ và ku ẹtẹ ọvịdị anggẹẹrị ana sị ịsa ẹnẹnị zụ̀ mị ka ma hẹkẹ ẹ.

⁹ Ama dị ọ kà a yị mị ka asị mị vavọọ mẹ nị. Ọ kà, “Ẹmị rẹ vị ozi ahụ anka ẹwụ, ne beri ọnịsẹ nịnị ọnịrị avaba aza anaa saasa ịsa ana a kà tụ́ ini iwe ọnọnị. Ohomorihi kẹnẹ a vọrọ ka ya hẹkẹ nị.”

¹⁰ Dị ọ kà a mị ka, “Àsị u sị ịsa kú ịrẹyị ịsẹ ana a kà tụ́ ini iwe ọnọnị, agụvị ka ụmẹ ọ sị gụrị ẹtẹ.

¹¹ Ọza ana àaa mẹ̀ ịsa odivi, ọ̀ yịị mẹ̀ ẹ na! Ọza ana àaa mẹ̀ ebira ịdọtị, ọ̀ yịị mẹ ịdọtị anịị na! Ọza ana àaa mẹ̀ ebira Óhomorihi, ọ̀ yịị mẹ̀ ẹ na!”

¹² Di Ijeesu ka, Re, ọnị aa vẹ ịsọọnị-ịsọọnị. Ọgụ anị yàrị ọnị ka ọnị ọ̀ va sị yị ọzọza, anka ụkọrọ ọzọza mẹ̀ yà.

¹³ Ọnị ọ vị Arịhwa ọnịrị Omega nị, ọnị ọ vị ka ọnịpaapa ọnịrị ọdịrẹma, ọdọvịdị ọnịrị ọdịrẹma.

¹⁴ Aza ana àa nyịna ịta ẹnịnị nị, agụvị à zụ sị oze yị ẹnị ka ẹnị ẹ̀ zụ rị ẹtụtụ ọchị anaā mẹ ka ọza ọ̀ yàra pooro zịna-zịna, dị ẹnị ẹ̀ rẹ zụ zị oze ịnị ẹkụra ọnọọ ngụ eehi, vaa daa jẹ.

¹⁵ Eyi ẹhẹ ẹ́ngụ aza ẹnẹnị vee hi nị: aza edivi nịnị ọnịrị ẹnẹbẹ nịnị beri ọsẹrẹka nịnị ọnịrị ọwọza nịnị ne beri aza ana aa hẹkẹ ori, ọnịrị aza ene sì ịrẹyị ireche, di e re yee cheeche.

¹⁶ Ọ kà, Ọnị Ijeesu ọ tụ́ anggẹẹrị anị ka ọ̀ kà ịsa ẹnẹnịị wụ nịnị ịnị ịragụ Ohomorihi nị. Ọnị ọ chị hụụnị ovwoovu Idevidi vẹ nị. Ọnị ọ vị ụzọmị ana aa zẹtẹ ẹnẹnẹ nị.

¹⁷ Ụhwẹ Ohomorihi ọnịrị ose Ozi Atẹmẹ ọnọọ ka: wa vẹ! Ọza ana àa wụ́ ịrẹyị ẹnẹnị, ọ̀ kà a ka: Wa vẹ! Ọza ene enyi àa kụ̀, ọ̀ vẹ! Ọza ene èe sì, ọ̀ va dọ enyi anaā mẹ ka ọza ọ̀ yàra pooro zịna-zịna, di ò hú ọọ ọọhẹ!

Ịrẹyị ọdịrẹma

¹⁸ Ẹmị Ịjọọnụ, mee hú avaba aza ana aa wụ́ ịsẹ ana a kà tụ́ ini iwe ọnọnị ụvọ ẹtẹẹtẹrẹ; ọza ana àa da tụ́ ịnị ịrẹyị ẹnẹnị, Ohomorihi vaa dà tụ́ ịnị ụyọrị ana achẹrẹ tụ́ ini iwe ọnọnịị yọ.

¹⁹ Ọza ana àa sị hụụnị ịrẹyị ịsẹ ana a chẹrẹ tụ́ ini iwe ọnọnị, Ohomorihi vaa sị áanịị kwooze hụụnị ịnị ọchị anaā mẹ ka ọza ọ̀ yàra pooro zịna-zịna, dị ọ rẹ sị áanị kwooze hụụnị ẹkụra Ohomorihi ọnọọ ana a chẹrẹ tụ́ ini iwe ọnọnị.

²⁰ Ọza ana dọ ivenu tụ́ ịnị ịrẹyị ọnọnị ka: Ịzẹyịza, ọnị aa vẹ ịsọọnị-ịsọọnị! Aamị; avọọ yịị yọ! Wa vẹ, Ijeesu Ananyị yị!

²¹ Ijeesu Ananyị yị ọ̀ mẹ ọyịza yị avaba awụ nịnị!