Ẹtore 20 - IWE ỌNỊNỊ

Ohinọyị oni Ohomorihi nyị ka ọ̀ dọ há ọnịrị aza anị vaa mẹ ohinọyịị mẹ ịrayị akahị

¹ Mê re anggẹẹrị ọnya aanị ene ee chíi hụrẹ ẹbẹẹba vẹ. Ộ nyị ụkọkọrọ ọbọbọ ọnọọ rị ụvọ ọnịrị ẹba ọbanyị ọnya aanị.

² Dị ọ za uye odivi, ana vị ẹwụ ịyẹẹyẹ ọnọọ ana vị Echu ọnịrị Isitani, dị ọ za a, dị ọ sụ́ ọọ tịtẹ mẹ ịrayị akahị (1,000) nị.

³ Ô ne e ngụ ịnị ọbọbọ ọnọọ, di o chire e, dị ọ sị ịsa vá a nị, ka asị o kuku re oze vene anẹhẹ nịnị pooro dị ịrayị akahị ọnọọ ọ̀ gụ nị. Ịrayị ọnọọ ọ̀ọ sị gụ, â nyị ka à hụrẹ ẹ ụvọ yị ụmẹ chee.

⁴ Di mi re aga ohinọyị ẹnyị ọnịrị aza ana yaayịtẹ ịnị anị nị. Â sị ọda yị wa ka ẹ̀ mẹ̀ ọkarẹyị. Me re re ụhwẹ aza ana vịdị jị ịrẹsụ agụvị ka ệ kà ịrẹyị ịzẹyịza oni Ijeesu sị zụ̀ ọnịrị agụvị ịrẹyị Ohomorihi. Ẹnịnị ẹ́ yị rẹ hẹkẹ uye ịnị avị ọnọọ ọnịrị ori anị; ẹnịnị ẹ́ yị rẹ dọ apọtẹrẹwa tụ́ ini ibe ẹnịnị, à vị ịnị ụvọ ẹnịnị. Ẹnịnị ẹ́ sị yára booro aanị, dị ẹnịrị ohinọyị oni Ohomorihi nyị ka ọ̀ dọ yị há dudu mẹ ohinọyị mẹ ịrayị akahị nị.

⁵ Oku ana vọ nịnị ẹ́ yị ha va yára pooro dị ịrayị akahị ọnọọ gụ. Ọnọọ ọ vị ịpaapa ana a ha oku nịnị hụụnị isu nị.

⁶ Ọnịpaapa ẹnẹẹ ana a vịdị vavọọ ha hụụnị isu vị Óhomorihi, ẹ rẹ vaa dàa jẹ. Ẹngụ aza ẹnẹẹ e mè vene kuku sú ụpẹ ọhụva. Ohirẹsụ irehi Ohomorihi ẹ vaa vịị yị Ohomorihi ọnịrị ohinọyị ọnị ọ ka ọ̀ dọ yị há nị. Dị ẹnịrị ọọ dudu mẹ ohinọyị mẹ ịrayị akahị.

A mẹmẹ nyị ehuna Echu

⁷ Ịjị ịrayị akahị (1,000) ọnọọ ọ̀ọ sị gụ, dị a va ngwara Echu hụụnị ẹngwa anị jịnẹ vẹ.

⁸ Dị ọ jịnẹ, di o nee vene anẹkụra ene hi avaba ẹhẹ, ọnọọ vị ka Ịgọọgị ọnịrị Ịmagọgị. Dị ọ kụ́ wa gụ ka ẹ̀ na kụ̀ ịrẹkụ, ẹnịnị ệ rụrụ anka aarẹ ene hi ụtọ oku avọọ.

⁹ Dị ẹ gara hi avaba ẹhẹ, dị ẹ kara ịzị aza Ohomorihi kụ́ gụ hi ọnịrị ẹkụra oni o sì ịrẹyị anị nị. Dị ịra hụụ ịda Ohomorihi ẹbẹẹba chí vẹ, dị ọ wụ̀ wa và ha nị.

¹⁰ Dị a za Echu ene vene wa, di e ne e ngụ ini adagu ịra ana a sị ohuru tụ́ ịnị anị nị. Ịzọọ uye ịnị avị ọnọọ ọnịrị ọnịsẹ ireche hi nị. Dị aa sị ụyaa rị wa ọọdụ ọnịrị ịrahụ pooro zịna-zịna.

Ọkarẹyị ọdịrẹma

¹¹ Mée re aga ohinọyị ọnya aanị. Ọ́ọ banyị ẹtẹẹtẹrẹ, dị ọ vị ọvwọọvụ nị. Dị ọza ịnya yaayịtẹ ịnị anị nị. Dị ẹtẹ ọnịrị ẹbẹẹba ee zwee hụrẹ ọvịdị anị, dị ọza ò yi kuku re wa nị.

¹² Di mi re oku nịnị nị, ezweyi ọnịrị azọkụ, dị ẹ jẹẹ ọvịdị Ohomorihi nị. Áa hụ̀ iwe ẹnyị, dị a rẹ hụ̀ iwe ọsa nị, ana vị iwe aza ana yàra pooro zịna-zịna. Dị a hị́ ka ịsa anaa chẹrẹ tụ́ ini iwe ọnọọ, aa sịị mẹ̀ ọkarẹyị oku nịnị nị anka ịsa ọnị ọzọza mẹ.

¹³ Dị òkū kụ́ oku ene sú hi ịnị anị vẹ nị. Di iswọọza ọnịrị eku ẹnị rẹ hụrẹ oku ẹnịnị ụvọ nị. Dị a mẹ̀ ọkarẹyị yị ọzọza anka ịsa ọnị ọ mẹ nị.

¹⁴ Dị a za iswọọza ọnịrị eku, di e ne wa ngụ ini adagu ịra ọnọọ nị. Ọnọọ ọ vị isu ụpẹ ọhụva nị.

¹⁵ Ọza tụra ọza ọnị ọza ọyị re ka áa chẹrẹ ịrẹha anị tụ́ ini iwe aza ana yàra pooro zịna-zịna, dị a sị ọọ, di ee nee ngụ ini adagu ịra ọnọọ.