Ẹtore 2 - IWE ỌNỊNỊ

Ụtụ ana a tụ́ hi Anẹhwẹsọsị nịnị

¹ (Ọza oni mi re ka): Chẹrẹ iwe tụ́ hi anggẹẹrị ana sị eyi pe ịragụ Ohomorihi ana yà Ẹhwẹsọsị ka: Ọza ana kụ́ ụzọmị ịhịmba tụ́ ịnị ụvọ anị dị aa zị ụsẹ ịnị akakana ịzị aā sị ozotupaa tụ́ ịhịmba ana a sị igooru mẹ avọọ, ọ tụ́ mị ụtụ ọnọnị nị:

² Mâ yẹ ịsị ụụ̄ mẹ; mâ yẹ ụ mẹmẹ mẹ̀ ụkọrọ ẹtẹẹtẹrẹ. Ma rẹ yẹ isuuru ọnị ụ nyị. Mâ yẹ ka wẹ yị dọ ịrẹyị aza edivi. Ma rẹ yẹ ka aza ana ka ẹnị vị ezirẹma Ijeesu, wa raà zama wa re; wa sị yẹ ka onireche ẹ vị nị.

³ Wâ nyị isuuru, wâ sị ẹngụ dọ ụya agụvị amị, ama wẹ yị zẹẹ ka ò du wu eyi nịnị.

⁴ Ama â nyị ịsa ọnya ọnị ụ wẹ yị mẹ ẹtẹẹrẹ nịnị. We yi kuku sì ịrẹyị amị nịnị anka ịyẹẹyẹ.

⁵ Tamayị ịzị ụ yà nyeeyi nịnị. Ro ịnẹ varẹma, dị ụ waa mẹ ịsị ụụ̄ vịdịị mẹ nịnị! We yi ro ịnẹ varẹma nịnị, m maa vẹ dị mị va sị aha ozotupa awụ nịnị hụrẹ aha anị nị.

⁶ Ịsị ụ mẹ ẹtẹẹrẹ ịnị anị nịnị yị: Wâ nyị ịhyẹrẹ ịsa ana Aninikorati nịnị aa mẹ, anka ẹ́mị mẹ̀ rẹ nyị ịhyẹrẹ anị.

⁷ Ọza ana àa nyị ụtọ, ọ̀ sị ụtọ pe ịsa ọnị ụhwẹ Ohomorihi aa kà a yị anịragụ Ohomorihi! Ọza ana àa nyị ehuna, mị vaa sị ọdaa yọ ka ọ̀ rị ẹtụtụ ọchị ana aā mẹ ka ọza ọ̀ yàra pooro zịna-zịna, ana yà ịnị Aha Ọyịza ịdị Ohomorihi.

Ụtụ ana a tụ́ hi ịragụ Ịsịmụna

⁸ Ọza oni mi re ka, “Chẹrẹ iwe tụ́ hi anggẹẹrị ana sị eyi pe ịragụ Ohomorihi ana yà Ịsịmụna ka: Ọza ana vị ọnịpaapa ọnịrị ọdịrẹma, ene sú dị ọ rẹ varẹma yàra, ọ tụ́ ụtụ ọnọnị nị.

⁹ Mâ yẹ ụya ọnị waa rị ọnịrị osiye oni u wee re; ama àa ka à na kà, wá nyị ịsa nịnị. Mâ yẹ ịrẹyị odivi ana aza ana ka ẹnị vị Aniju aa kà. Ama ẹnịnị ẹ yị vị Aniju, ezirẹma Echu ẹ̀ vị nị.

¹⁰ Asị u hí angwa ọnyọọnyị ịnị ụya ọnị ụ waa vaa rị! Re, Echu vaa zama wụ nịnịị re, dị ọ kụ́ aza ẹnyị awụ nịnị ne hi ịnị ẹngwa. Ụ vaa rị ụya nịnịị mẹ̀ ẹkụhị ẹẹwụ. Sị sị ayị yị mị nịnị pooro, wàa daka ee sú nịnị! Mị vaa sị ọgụụ wụ nịnị, ọnị ọ vị ka mị vaa mẹ ka wa yàra nịnị pooro zịna-zịna ị́dị Ohomorihi.

¹¹ Ọza ana àa nyị ụtọ, ọ̀ sị ụtọ pe ịrẹyị ọnị Ụhwẹ Ohomorihi aa kà a yị anịragụ Ohomorihi! Ọza ana àa nyị ehuna, e mē vene sú ụpẹ ọhụva.”

Ụtụ ana a tụ́ hi Anipagamu

¹² Ọza oni mi re ka, Chẹrẹ iwe tụ́ hi anggẹẹrị ana sị eyi pe ịragụ Ohomorihi ana yà Ipagamụmị ka: Ọza ana sị ụhwọ onyeyẹva ana rẹ rị ụvọ, ọ tụ́ ụtụ ọnọnị nị:

¹³ Ọnị ộ yẹ ịzị ụ ra nịnị, ịzọọ Échu sị aga ohinọyị anị yàatụ nị. Wâ nyị ịzẹyịza hi ọnị nịnị; wẹ yị kà ka wẹ yị kụkụ sị ayị tụra ọnị nịnị ịnị ụmẹ ana a daka sị wụ ọnọrụ ana aā hị́ Antipasi, ana a wụ agụvị ka ọ́ nyị ịzẹyịza hi ọnị. Ịzị Echu sị mẹ eehi anị ịdị awụ nịnị a yà wụ ọọ nị.

¹⁴ Ama ịsa chee ọnị ụ wẹ̀ yị mẹ ẹtẹẹrẹ nịnị yị: Aza ẹnyị ịnị awụ nịnị ịzọọ aa saasa ịsị Ịbaraamị vịdị sị zụ̀ aza. Ịbaraamị ộ vịdị sị zụ̀ Ịbarakị ka ọ̀ mẹ ezi Anisirẹrị nịnị mẹ ịvị ini oze ka ộ mẹ̀ ka ẹ̀ rị ịsa ana a sị mẹ̀ ịsọvọ hi ori, dị ẹ̀ rẹẹ sẹ̀ ịrẹka.

¹⁵ A rẹ nyị aza awụ nịnị ana aa saasa ịsa Aninikorati nịnị sị zụ̀ aza.

¹⁶ Ro ịnẹ varẹma nịnị, ka à yị vị avọọ, ọ yị jẹẹ dị ma vẹ ịdị awụ nịnị, dị ma sị ụhwọ ana yà amị irenu beri aza ẹnẹẹ kụ́ ịrẹkụ.

¹⁷ Ọza ana àa nyị ụtọ, ọ̀ sị ụtọ pe ịrẹyị ọnị Ụhwẹ Ohomorihi aa kà a yị anịragụ Ohomorihi! Ọza ana àa nyị ehuna, ọnị vaa sị ịmana oni Ohomorihi sị tẹ̀, dị ọnị sị yọ ka ọọ rị ọọ. Ọnị rẹ vaa sị ịrẹta ọvwọọvụụ yọ; â chẹrẹ ịrẹha ọwọọwa tụ́ ịnị ịrẹta ọnọọ, ana ahịka ẹ yị nyị ọza ana zụ yẹ ẹ, ẹ̀ yị vị ọza ana nyị ọọ kẹnẹ.

Ụtụ ana a tụ́ hi Anitiyatira

¹⁸ Ọza oni mi re ka, “Chẹrẹ iwe tụ́ hi anggẹẹrị ana sị eyi pe ịragụ Ohomorihi ana yà Itiyatira ka: Ozi Ohomorihi oni eyi anị aa za nyanga-nyanga anka ịra, dị ahụ anị aa za nyoo-nyoo anka enyusẹ, ọ tụ́ ụtụ ọnọnị nị:

¹⁹ Ọ kà Ọnị ộ yẹ ịsị ụ mẹ nịnị; Ọnị ộ yẹ, u meme sì ịrẹyị ọza nịnị. Ọnị ọ rẹ yẹ, ụ mẹmẹ sị ayị tụra ọnị nịnị, ọnịrị ụ mẹmẹ aa gụ́ aza ụvọ nịnị. Ọnị ọ rẹ yẹ, ụ mẹmẹ nyị isuuru nịnị. Ọnị ộ yẹ ka waa mẹẹ huna ọpa ọnị ụ vịdị aa mẹ nịnị.

²⁰ Ama â nyị ịsa ọnya ọnị ụ wẹ̀ yị mẹ ẹtẹẹrẹ nịnị: Wâ dọ yị ọnẹẹ ọnọọ ana aā hị́ Ijezebẹrị ana ka ọnịsẹ ọnị vị nị. Ama aa zụ̀ ezi ahụ anị ịsa, ee vene wa naa sẹ̀ ịrẹka, ẹ rẹ yaa rị ịsa ana a sị mẹ̀ ịsọvọ hi ori.

²¹ Ọnị ô sị oze yọ ka ò ro ịnẹ varẹma hụụnị ịrẹkọyịsẹ anị, ama ọ yị dọ ka oni ò ro ịnẹ varẹma.

²² Ọ kà, Ọnị vaa za a tụ́ aha ọyịsụ ịzị ọnịrị aza ọnị ọnịrị aa sẹ̀ ịrẹka, vaa yaa rị ụya ẹtẹẹtẹrẹ, ẹ̀ yị vị o ro ịnẹ varẹma hụụnị ebira ẹnịnị.

²³ Ọnị vaa wụ̀ aza ana aa saasa a, dị avaba anịragụ Ohomorihi ẹ̀ yẹ ka ẹmaa yẹ ariro aza ọnịrị ịsa ana ayị anị sì nị. Mị vaa sị ọgụ ụkọrọ awụ nịnịị yị wụ nịnị.

²⁴ Ẹwụ nịnị ana vọ ene hi Itiyatira, wẹẹ̀ yị saasa ịsa odivi ọnị ọnẹẹ ọnọọ aa sịị zụ̀ aza nịnị. Wẹẹ̀ yị jị ụvọ ngụ ịrẹyị Echu ana nyịnẹ. Mẹ yị vaa da ẹnya ọsaa tụra wụ nịnị.

²⁵ Ama ịsị ụ wàa nyị, sị ụvọ geri-geri pooro dị ma vẹ.

²⁶ Ọ kà, Ọza ana àa nyị ehuna, dọ ọ sị ụvọ za ụkọrọ anị ne tù ịrẹsụ nị, ọnị vaa mẹ ka ẹ̀ nyị ọda tụ́ ịrẹsụ anẹhẹ,

²⁷ anka Áda anị mẹ̀ sị ụkata yị ọnị. Ọ vaa sị okutẹ enyusẹ mẹ ịjọvaa tụra wa. Dị aa chaka wa, a mẹ̀ẹ chaka ụnọkọ rugu-rugu avọọ.

²⁸ Ọnị rẹ vaa sị ụzọmị ẹnẹnẹ anaā zẹtẹẹ yị wa.

²⁹ Ọza ana àa nyị ụtọ, ọ̀ sị ụtọ pe ịrẹyị ọnị Ụhwẹ Ohomorihi aa kà a yị anịragụ Ohomorihi!”