Ẹtore 17 - IWE ỌNỊNỊ

Ọsẹrẹka Ọbanyị ọnọọ

¹ Ọnya ịnị anggẹẹrị ịhịmba ana nyị ịchacha ịhịmba ẹnẹẹ, o ve tù mi, dị ọ ka, “Vẹ ịzẹnị, ka maa sịị zụ̀ wụ, a mẹmẹ vaa sị ụyaa rị ọsẹrẹka ọbanyị ọnọọ ana yà ịrẹsụ okuha ọrụrụ-ọrụrụ.

² Ohinọyị anẹhẹ nịnị e reè pee sẹ̀ ịrẹka; ọ raà mẹ ka anẹhẹ è hú enyi ịrẹkọyịsẹ anị, dị ọ̀ọ mẹrị wa anka eche avọọ.”

³ Ụhwẹ Ọnịnị ọ́ọ dọ avaba ayị amị, dị anggẹẹrị ọnọọ sị mị nọ ịnị ụnọmị nị. Di mi re ọnẹẹ ọnya aanị ana yaayịtẹ ị́rẹsụ uye ovivi ọnya aanị nị. Dị a chẹrẹ ịrẹha edivi-edivi hi ọọ avaba ẹngụ nị. Uye ọnọọ ọ́ọ nyị ịrẹsụ ịhịmba, dị ọ nyị ọpanyị ẹẹwụ nị.

⁴ Dị ọnẹẹ ọnọọ hara ịta ovivi-ovivi hi ẹngụ, dị ọ hara igooru ọnịrị ọmọ beri uweyi hi ẹngụ nị. Ọ́ọ sị ako igooru ọnya rị ụvọ. Ako ọnọọ vị ohihi yị ebira odivi irenyi-renyi, ebira ịdọtị ọnịrị ịrẹkọyịsẹ.

⁵ Dị a chẹrẹ ịrẹha ọnya tụ́ ini ibe anị oni iruvo anị nyịnẹ ka, “Ịbabịrọnị ọbanyị, ọnyị ọsẹrẹka nịnị ọnịrị ohiku aza ene ee du ẹhẹ.”

⁶ Dị mi re ka, ọnẹẹ ọnọọ mè hú anya aza Ohomorihi ọnịrị anya aza anaa wụ agụvị ka ẹ́ẹ nyị ịzẹyịza hi Ijeesu, dị ọ kụkụ aa mẹrị ọọ nị. M mè ree, óo hí mi irenu ẹtẹẹtẹrẹ.

⁷ Dị anggẹẹrị ọnọọ kà a mị ka, “Sị ẹ vẹ di ee hí wu irenu?” Mị vaa kà a wụ́ ịrẹyị ọnẹẹ ọnọọ oni iruvo anị nyịnẹ, ọnịrị uye ene chema a, ana nyị ịrẹsụ ịhịmba dị ọ nyị ọpanyị ẹẹwụ.

⁸ Uye oni u re avọọ, ọ́ọ vịdị yàra, ama ọyị kụkụ yàra booro aanị. Ọ vaa jịnẹẹ hụụnị ọbọbọọ vẹ, dị ọ nọ ịzị ọ vaa yàa vu ẹtẹ. Aza ene hi ẹhẹ ọnị ọza ọ̀yị chẹrẹ ịrẹha ẹnịnị dị a va yẹ ka aa mẹ ẹhẹẹ tụ́ iwe aza ana yàra pooro zịna-zịna, èeyee re uye ọnọọ, o vee hí wa irenu. Uye ọnọọ ọ́ọ vịdị yàra, ọyị kụkụ yàra booro aanị, ọ rẹ vanaa sị ẹngụụ tụ́ ẹhẹ.

⁹ Ọsọnị ọ́ọ dọ ka ọza ọ̀ nyị ịrẹyọyẹ. Ịrẹsụ ịhịmba ẹnẹẹ ẹ́ẹ jẹẹ yị ataba ịhịmba ọnị ọnẹẹ ọnọọ yaayịtẹ ịrẹsụ anị.

¹⁰ Ọ rẹ jẹẹ yị ohinọyị ịhịmba. Ẹẹhị ẹnịnị ẹ sị hyẹdụ, ọnyara aa yịị mẹ ohinọyị, ọnyara ọnị ọọ̀yị vẹ. Ọ̀ọ vẹ, ụmẹ chee ọ vaa mẹ nị.

¹¹ Uye ana vịdị yàra, dị ọ̀yị kụkụ yàra aanị, ọnị ọ vị ohinọyị ọhụhịnta, dị ọ rẹ vị ọnya ịnị ịhịmba ẹnẹẹ nị. Aa nọ ịzị ọ vaa yàa vu ẹtẹ.

¹² “Ọpanyị ẹẹwụ oni u re avọọ vị ana jẹẹ yị ohinọyị ẹẹwụ, ana ahịka eè yi nyima ịjọva. Ama a vaa sị ọdaa yị wa ka è pe uye ọnọọ mẹ ịjọva mẹ agogo ọnya kẹnẹ.

¹³ Ẹnị ẹẹwụ ẹnẹẹ vị ana nyị ariro ọnya, dị ẹ sị ụkata ọnịrị ọda ẹnịnị yị uye ọnọọ nị.

¹⁴ Ẹnịnị vee pe Ozi Atẹmẹ ọnọọ kụ̀ ịrẹkụ, ama Ozi Atẹmẹ ọnọọ ọnịrị aza ọnị ọ hị́, dị ọ nyị wa dị ẹ rẹ nyị ịzẹyịza hi ọọ, vaa nyị ehuna ẹnịnị, agụvị ka ọnị ọ nyị avaba aza nị; ọnị ọ vị Ohinọyị avaba ohinọyị nịnị nị.”

¹⁵ Dị anggẹẹrị ọnọọ rẹ kà a mị ka okuha oni mi re avọọ ọnị ọsẹrẹka ọnọọ yaayịtẹ ịrẹsụ anị vị ana jẹẹ yị ẹkụra nịnị ọnịrị aza nịnị ne beri aza irenyi-irenyi ana aa kà ẹkụra irenyi-renyi.

¹⁶ Uye ovivi ọnịrị ọpanyị ẹẹwụ ị́rẹsụ ọnị u re avọọ, vaa nyị ịhyẹrẹ ọsẹrẹka ọnọọ. Ẹ vaa dọ ọ avaba ịsị ọ nyị, dị ẹ tụ́ ọọ ahwaahụ. Ẹ vaa rị ụpẹngụ anị, dị ẹ rị ọọ ịra.

¹⁷ Ohomorihi ọ raà sị tụ́ wa ayị ka ẹ̀ mẹ̀ ịsa ọnị ọnị vịdị sị eto anị mẹ tịtẹ. Ẹ rẹ vaa dọ ka ẹnị ẹ̀ sị ịjọva ẹnịnị yị uye ọnọọ, pooro dị ịrẹyị Ohomorihi ọ̀ sẹ.

¹⁸ Ọnẹẹ oni u re avọọ, ọ vị ana jẹẹ yị ẹkụra ọbanyị ọnọọ ana aa mẹ ịjọvaa tụra ohinọyị anẹhẹ nịnị.