Ẹtore 15 - IWE ỌNỊNỊ

Anggẹẹrị ịhịmba beri ụyọrị ịhịmba

¹ Me re re apọtẹrẹwa ọsa ẹbẹẹba, ộ banyị dị o re hí ọza irenu nị. Â nyị Anggẹẹrị ịhịmba ana vaa sị ụyọrị ịhịmba ọdịrẹmaa rị anẹhẹ. Ohomorihi ọ̀ọ maanị raà sị ụyọrị ịhịmba ẹnẹnị rị anẹhẹ, ayị anị vee hunẹnẹ.

² Mê re ịsa ẹnyị aanị anka enyi ana sị mẹẹ anka ore avọọ, dị a sị ịra vá hura a nị. Me re re aza ana sị uye ịnị avị ọnọọ ọnịrị ori anị huna beri ịnọmba ịrẹha anị. Ẹnịnị jẹẹ ụtọ oku ene enyi anị sị mẹẹ anka ore avọọ, dị ẹ sị igita oni Ohomorihi sị yị wa rị ụvọ nị.

³ Dị ẹyaa jị ahẹ Imosiisi, ozi ahụ Ohomorihi, ọnịrị ahẹ Ozi Atẹmẹ ọnọọ, dị ẹ ka: Ananyị yị, Ohomorihi Ochẹtẹngụ, ụkọrọ awụ ộ banyị, di o re hí ọza irenu nị. Ẹwa vị ohinọyị anẹhẹ nị, oze awụ vị ịzẹyịza, ẹ yị nyị ireche ịnị anị.

⁴ Ananyị yị, ẹnẹ ka oni o yi vee hí angwa awụ, dị ọnị ọ̀ ga ịrẹha awụ? Ẹwụ ịnya kẹnẹ ẹ̀ yị nyị ẹngụ anị nị. Avaba anẹhẹ vaa vẹ dị ẹ va và ku ẹtẹ ọvịdị awụ, agụvị ka avaba aza ẹ sị ụkọrọ ịzẹyịza awụ re.

⁵ Ịrẹma ọnọọ, dị mị kana eyi, di mi re ka â na Irehi Ohomorihi ẹ́bẹẹba beri ajẹngụ Ohomorihi ana yà ịnị anị hi ẹtẹ nị, ịzọọ a sị ịsa ana sị oto Ohomorihi zụ̀ tụ́ nị.

⁶ Dị anggẹẹrị ịhịmba ẹnẹẹ jịnẹ hụụnị irehi Ohomorihi ọnọọ vẹ beri ụyọrị ịhịmba ẹnẹẹ nị. Ẹnya ọvwọọvụ sẹnẹ-sẹnẹ aanị e chire nị, dị ẹ sị ịbanụ igooru sụ́ ịrachị nị.

⁷ Dị ọnya ịnị ịsa ẹẹna ẹnẹẹ ana nyị ụhwẹ aanị sị ịchacha igooru ịhịmba, dị ọ sị yị anggẹẹrị ẹnẹẹ nị. Ịchacha ẹnẹẹ vị ohihi ọyịkụ Ohomorihi ana yára pooro zịna-zịna.

⁸ Igirima Ohomorihi ọnịrị ụbanyị anị ộ mẹ̀ ka areyi ọ̀ vị ohihi Irehi Ohomorihi ọnọọ. Ẹ yị nyị ọza ana zụ ngụ ọọ, pooro dị ụyọrị ịhịmba ana anggẹẹrị ịhịmba ẹnẹẹ sị rị ụvọ ta.