Ẹtore 10 - IWE ỌNỊNỊ

Anggẹẹrị ọnya ộ sị iwe oweyi ọnya vẹ

¹ Me re re anggẹẹrị ọbanyị ọsa ene ee chii hụrẹ ẹbẹẹba vẹ. Eguhi o si kú ẹngụ, dị ọgaazị jị karaa ịrẹsụ nị. Eyirẹsụ anị vị ana a sị mẹẹ anka ọyị avọọ, dị ahụ anị yà anka ịra nị.

² Ộ nyị iwe oweyi ọnya aanị rị ụvọ ọnị ọ hụ̀ tịtẹ. Ộ sị ahị ụvọrị tụ́ ini òkū, dị ọ sị ahụ ụvọha anị tụ́ ini eteesu nị.

³ Di o nowu zẹtẹ anka idu òo rere ee nowu avọọ nị. Ịjị o si owu na, dị apaana ihinẹba sụ́ ịrẹyị ụpẹ ịhịmba tụ́ ọọ ohi nị.

⁴ Ịjị apaana ihinẹba vavọọ sụ́ ịrẹyị ụpẹ ịhịmba, dị mị ka maa chẹrẹ ịsị ọ kà nị. Dị mị wụ́ ọngwẹ ọnya hụrẹ ẹbẹẹba vẹ, dị ọ ka: Asị mị chẹrẹ ịsị ọnị apaana ihinẹba ọnọọ kà ụpẹ ịhịmba avọọ, ama ma sị ọ tẹ nị.

⁵ Dị anggẹẹrị oni mi re ana jẹẹ ini òkū ọnịrị eteesu aanị, tana ụvọ nọ ẹbẹẹba nị.

⁶ Ộ sị Ohomorihi ana yára pooro zịna-zịna, ana mẹ ẹbẹẹba ọnịrị avaba ịsị e hi ịnị anị, dị ọ rẹ mẹ ẹhẹ ọnịrị avaba ịsị e hi ịnị anị, dị ọ rẹ mẹ oku ọnịrị avaba ịsị e hi ịnị anị hị́ eku ka ọza ọ yị kụkụ vaa za a kù nị.

⁷ Ọ kà anggẹẹrị ọhụhịmba ọ̀ọ sị ọpanyị anị hú, Ohomorihi vaa mẹ̀ ịsa ana nyịnẹ ọnị ọ vịdị mẹ eto anị tịtẹ, anka ọ mẹ̀ vịdị kà a zụ ọnịsẹ nịnị ana vị ezi ahụ anị.

⁸ Dị mị rẹ wụ ọngwẹ ana vịdị kà ịrẹyịị mị hụrẹ ẹbẹẹba vẹ, dị ọ rẹ ka: Ma na sị iwe oweyi ana a hụ̀ tịtẹ, ana yà ịnị ụvọ anggẹẹrị ana jẹẹ ini òkū ọnịrị eteesu nị.

⁹ Dị mị nọ ịdị anggẹẹrị ọnọọ, dị mị ka ọ̀ sị iwe oweyi ọnọọ mị nị. Dị ọ ma sị ọọ dị ma rị ọọ nị. Ọ kà ọ vaa mẹ ka ịnị amị ọ̀ nyịrẹyị ama o vee hine ini irenu amị anka ẹhụ avọọ.

¹⁰ Dị mị sị iwe oweyi ọnọọ hụụnị ụvọ anggẹẹrị ọnọọ, dị mị rị ọọ nị. Ô hine anka ẹhụ avọọ ini irenu amị. Ama m mẹ̀ yị mụnẹ ẹ kẹnẹ, dị ọ kụkụ aa nyịrẹyị ịnị ịnẹ amị nị.

¹¹ Dị ọ ka, â nyị ka ma rẹẹ kà ịsẹẹ yị aza ọrụrụ-ọrụrụ ọnịrị anẹkụra ọrụrụ-ọrụrụ ana aa kà ẹkụra irenyi-irenyi, beri ohinọyị nịnị nị.