Ẹsịta 4 - IWE ỌNỊNỊ

Imodekaya ộ hị́ Ẹsịta ka ọ̀ mẹ ọgụvọ

¹ Imodekaya ọ sị yẹ avaba ịsa ana a mẹ. Ịrẹyị ọnọọ ọ zị ọ ẹngụ pooro, dị ọ za awuru anị dị ọ na a, dị ọ kụ́ atịtọ kú ịrẹsụ nị, di a tụ́ orere booro-booro ngụ ịnị ẹkụra zịịzị nị.

² Imodekaya mẹ̀ tù oze ovwoovu ana ngụ idi ohinọyị, dị ọ jẹẹ ẹhẹ nị. Ọ yị ngụ eehi agụvị ka ọza ọ yị zẹẹ ka ọza ana vavọọ kụ́ ẹnya ọ̀ ngụ ịda ohinọyị.

³ Di avaba ezi Anisirẹrị ene hi ịnị ẹtẹ ịzị ọda ọnọnị za và ẹngụ hi ẹtẹẹtẹrẹ nị. Di e yi ka ẹnị ẹ yị rị ịsa nị, dị ẹ yaa jị òrèrè ẹtẹẹtẹrẹ nị. Di aza ọrụrụ-ọrụrụ ẹnịnị kụ̀ ẹnya ana sị zụ ka ẹ yaa zị ẹngụ, dị ẹ hụtẹtẹ hi ini eteesu nị.

⁴ Ezi ahụ Ẹsịta ana vị anẹẹ ọnịrị anọrụ mẹ̀ vavọọ re Imodekaya, dị ẹ na kà a yi Ẹsịta nị. Ẹsịta mẹ wụ́ ịrẹyị ọnọọ, ẹngụ anị ộ sụ ẹgahị. Dị ọ si awuru tụ́ nā yị Imodekaya nị. Dị ọ tụ́ ka à kà a yọ ka ọ̀ ngwa awuru ayodu ọnọọ tịtẹ nị. Ama di Imodekaya yi nị.

⁵ Dị Ẹsịta tụ́ hị́ ozi ahụ anị ọnọrụ ọnị ọnị ụvọtaa tụ́ ụtụ nị. Ozi ahụ anị ọnọọ ọ rị Ihataki nị. Dị Ẹsịta tụ́ ọ ka ọ̀ na họ̀ Imodekaya ka ò me re dị ayị anị vavọọ du?

⁶ Ịzẹyịza, di Ihataki ne tu Imodekaya ịnị orere ọvịdị oze ọbanyị idi ohinọyị nị.

⁷ Di Imodekaya za avaba ịsa ana na ịrịka hi ẹtẹ zụ̀ ọ nị. Dị ọ hyakụ kà a yọ ẹ̀hụ ẹkẹhị ọnị Ịhamanị wo oto ka ọnị vee síi yi ohinọyị àa raà wụ̀ avaba Aniju va ha nị.

⁸ Ọda ana a ka à sí wụ̀ Anisirẹrị aanị vị ana a chẹrẹ hi ịnị iwe ana sị nọ̀ ọ. Ọda ọnọọ vi ana a mẹ̀ ịnị ẹkụra Isusa. Di Imodekaya sị ọnya ini iwe ọnọọ yi Ihataki, ka ọ̀ sị na zụ̀ Ẹsịta, dị ọ kà a yị ọ ịrẹyị mẹmẹ yá nị. Dị ọ̀ kà a yi Ẹsịta ka ọ̀ navọ ọ̀ ngụ ne tù ohinọyị dị ọ̀ da ịpẹ yọ ka ọ̀ vayị aza anị nị.

⁹ Ịzẹyịza di Ihataki na kà ụtụ Imodekaya yị Ẹsịta nị.

¹⁰ Dị Ẹsịta varẹma tụ́ ọ hi Imodekaya ka

¹¹ â nyị ọda ana a mẹ ka ọza tụra ọza ọnị Ohinọyị ẹ yị tụ hị́, dị ọ ngụ ohweje ana ya ịnị ịnẹ ne re ohinọyị, a wụ̀ ọ. Anajuwe Ohinọyị nịnị ọnịrị avaba aza ene hi ịnị ẹtẹ ọnọọ ẹẹ yẹ ọda ọnọnị. Oze ọnyara chọ̀chọ̀chọ̀ ọ ọza zụ zi ha hụụnị ọda ọnọnị nị. Oze ọnọọ ọ vị ka ohinọyị ọ̀ tana okutẹ Igooru anị hi ọza ana àa vavọọ ngụ ne tù ọ nị.

¹² Ịjị Imodekaya wụ́ ohi Ẹsịta,

¹³ dị ọ tụ varẹma ka a kà a yị Ẹsịta ka asị o ro ka ọnị ịnyara ọ sị ha ịnị Aniju nịnị agụvị ka ọ mẹhị yà ịda ohinọyị.

¹⁴ Ọ kà à kà a yọ ka òo sị irenu anị kú oku, dị ẹ yị tụ́ ohi nị, ọnọgụmvọ vaa hụrẹ aha ọsa vẹ, dị ọ va dọ Aniju nịnị tụ́. Ama ọ̀ yẹ ka ọnịrị ovwoovu ada anị vi ene vee vú ẹtẹ. Ọ rẹ ka ẹnẹ yẹ ẹyịyara ahịka agụvị ụmẹ ẹngụkata ọnọnị a sị sị Ẹsịta tụ́ udi ọnọnị ịdị ohinọyị nị.

¹⁵ Di Ẹsịta ka à na kà a yị Imodekaya ka,

¹⁶ ọ̀ kụ́ avaba Aniju ọnị òo re gụ ẹkụra Isusa. Dị à kà yị wa ka asị ẹ rị ịsa, dị asị e hú enyi pooro na ngụ ẹkụhị ẹẹta. Ọ kà avọọ gẹdẹ-gẹdẹ ọnịrị ezi ahụ anị mẹ̀ rẹ vaa mẹ nị. Ịrẹma ẹsẹnị ọnị ve nee tù ohinọyị. Ọ kà ọnị ọ daka yẹ ka ọda ọ yi vavọọ zẹẹ; ọnị ọ̀ọ daka hụvị avọọ su, ọnị ọọ dọ.

¹⁷ Di Imodekaya hụụ ịzọọ na mẹ avaba ịsa ọnị Ẹsịta kà yọ nị.