Ẹsịta 3 - IWE ỌNỊNỊ

Ịhamanị o gẹ eyi ka à wụ̀ Aniju nịnị va ha

¹ Â nyị ụmẹ ọnyara aanị, ịrẹyị ose Ahasẹrọsị mẹ̀ sị para hu. Â nyị ọnọrụ ọnya aanị ana aā hụ́ Ịhamanị ana vị ozi Ihamedata. Anagagi ọ vị nị. Ịnị ụmẹ ọnọọ, ohinọyị Ahasẹrọsị ộ kà udi anị hịrẹ. Dị ahịka ọnị ọ kụkụ sị irenu tụra ohinọyị nị.

² Dị ohinọyị mẹ ọda ka avaba ezi ahụ anị ene ee sere oze ọbanyị ẹ̀ẹ vàa kú ẹtẹẹ kụ́ ọ nị. Ịzẹyịza di avaba ezi ahụ ẹnẹẹ aa vàa kú ẹtẹẹ kụ́ ọ nị. Ama Imodekaya ẹ yị dọ ka ọnị ọ̀ và ku ẹtẹ yị ọ, ụ ọnya aanị.

³ Dị ezi ahụ ohinọyị ene eē sere oze ọbanyị va hị́ Imodekaya dị ẹ ka sị ẹ vẹ dị ọ̀ yi saasa ọda ọnị ohinọyị mẹ nị?

⁴ Ụmẹ tụra ụmẹ ọnị Ịhamanị àaa parahu dị ẹ yaa tụ́ ọ irenu ka ọ̀ và kú ẹtẹ kụ́ ọ. Ama dị Imodekaya yi. Ịjị ene re ka Imodekaya ọ yị dọ ịrẹyị ẹnịnị tụ́ ịzọọ, dị ẹ kà a yị Ịhamanị nị, di e yee zi ịsị Ịhamanị vaa mẹ Imodekaya nị. Eyee ro o ka Ịhamanị waa va zụụ sị ẹngụ dọ ịrẹyị Imodekaya. Imodekaya ộ vịdị sị ọ kà yị wa ka Aniju ọnị vị nị.

⁵ Ịjị Ịhamanị re ka ịzẹyịza Imodekaya e yi sì ka ọnị ọ̀ và kú ẹtẹ yị ọnị, dị ayị anị aa dà ọva ẹtẹẹtẹrẹ nị.

⁶ Ọ mẹ̀ va yẹ ka Aniju Imodekaya vị nị. Di o ro o ka Imodekaya ọnịnya ọ yị hụ́ ọnị wụ̀ nị. Dị ọ kụkụ ee si oze ọnị ọ zụ zị di ọ̀ wụ̀ avaba Aniju nịnị ẹnẹ hi ịnị ẹtẹ Ahasẹrọsị nị.

⁷ Ịnị ụhwẹ ana aā hị́ Inisanị ana vị ụhwẹ ịpaapa ịrayị, Ahasẹrọsị gụ ịrayị ẹwụrẹva ọnị ọ rị ohinọyị nị. Ịnị ụhwẹ ọnọọ ẹ há ẹva ka ẹnị ẹ yẹ ẹkụhị ọnịrị ụhwẹ ana a vọrọ ka à sị wụ̀ Aniju nịnị nị. Eyi Ịhamanị a há ẹva ọnọọ nị. Dị ẹva ọnọọ za ụhwẹ ana aā hị́ Ada ana vị ụhwẹ ẹwụrẹva ịrayị nị.

⁸ Di Ịhamanị kà a yị ohinọyị ka â nyị azọga ene che hi ịnị ẹtẹ awụ ọnọnị ẹnẹ ẹ̀ yị mā và hura aza ayị mẹ ịsọnyị-ịsọnyị. Ebira ẹnịnị vị irenyi yị aza ana vọ. Ẹnịnị ẹ yị saasa ọda ọnị ohinọyị mẹ tụ́ ịnị ẹkụra. Taarụ! Me yi ro ka ộ vọrọ ka wa vavọọ re wa kẹnẹ.

⁹ Taarụ! Wàa dọ, mẹ ọda ka à wụ̀ aza ẹnịnị va ha. Mị vaa sị ẹkẹhị isiriva akawụ-akawụ oze ẹẹhị tụ́ ịzị aā sị ẹkẹhị ohinọyị tụ́, dị à sị mẹ̀ ụkọrọ ọnọọ.

¹⁰ Ịjị ohinọyị wụ́ ịrẹyị ọnọnị dị ọ tụ̀ ochirigege anị dị ọ sị yị Ịhamanị nị. Ịhamanị ọnọnị vị ozi Ihamedata ana vi Anagagi. Anagagi nịnị vị ọnịvị Aniju nịnị.

¹¹ Dị ohinọyị kà a yi Ịhamanị ka ọ̀ navọ ẹkẹhị anị, dị ọ̀ na mẹ ịsị èe sì ka ọnị ọ mẹ aza ẹnẹẹ nị.

¹² Ana tụ́ ọ ẹkụhị ẹwụrẹta ịnị ụhwẹ ịpaapa ịrayị ọnọọ, dị a hị́ ọchẹrịsa ohinọyị nịnị gụ nị. Dị ẹ chẹrẹ ọda ọnị Ịhamanị mẹ tụ́ ịnị ẹkụra irenyi-irenyi ene hi ịnị ẹtẹ ọnọọ nị. Dị ẹ sị ọda ọnọọ tụ́ hi avaba ọdọvịdị nịnị, Ịgọvọnọ nịnị, ọnịrị aza ọkọọka nịnị ene hi ịnị ẹtẹ ọnọọ nị. Ịrẹha ohinọyị asị chẹrẹ ọda ọnọọ, dị a sị ochirigege anị sị ụvọ tụ́ ọ nị.

¹³ Ệ kú iwe ẹnẹẹ tụ́ ọnụtụ ohinọyị nịnị ka ẹ̀ ga a zịịzị yị ọdọvịdị ẹkụra nịnị ịnị ẹtẹ ọnọọ nị. Dị a ka à wụ̀ avaba Aniju nịnị ịnị ẹkụhị ọnya nị. Ẹkụhị ọnọọ ọ vị ẹkụhị ẹwụrẹta ịnị ụhwẹ ẹwụrẹva ana aā hị́ Ada nị. Ọda ọnọọ vị ana a mẹ ka è vú Aniju nịnị ẹtẹ saka-saka. Asị a nyị aza ana vọ ẹtẹ ịnị ẹnịnị vụrụ-vụrụ.

¹⁴ Ịrẹyị ana a chẹrẹ tụ́ ịnị iwe ọnọọ ọ sị vara ọda. Dị a nọ́ ọ yị avaba aza ene hi ini ẹtẹ ọnọọ nị. Dị a kà a yị aza ka è tenyi ẹngụ zi ẹkụhị ọnọọ nị.

¹⁵ Agụvị ka ohinọyị ọ tụ́ wa ụtụ nị, ọnụtụ nịnị ệ jịnẹ eyiha-eyiha na kà a ịnị ẹkụra Isusa ana vị ohi ẹtẹ ẹkụra nị. Di ohinọyị ọnịrị Ịhamanị yaayịtẹ di eyee hú eche nị, dị anẹkụra Isusa ẹnị aa jị òrèrè nị.