Emọsị 9 - IWE ỌNỊNỊ

Emọsị ô re re Ẹnẹyịmavara ịrẹsụ ụta ịsọvọ.

¹ Emọsị kà ọnị ô rẹ Ananyị yị ka ò jẹẹ akaha ụta ịsọvọ. Dị ọ ka yị Emọsị ka o va ịsa hi ịrẹsụ irehi Ohomorihi ẹnẹẹ ẹtẹẹtẹrẹ, di ohyẹtẹ ẹnịnị e ziizi. Dị ọọ chaka a, dị ọ wu za aza ene hi uruvo anị. Àa na nyị aza ana ha, dị ọnị wụ́ wa eyi ịrẹkụ, vaa nyị ọza ana va ha.

² Ẹnẹyịmavara kà ẹnịnị ẹ daka chị ẹtẹ dị ẹ ngụ ọ na yaa nị, ọnị vaa tụ́ wa hị́ ẹhẹ. Ẹnịnị ẹ hịrẹ na ẹbẹẹba, ọnị vaa tura wa chi vẹ ẹtẹ.

³ Ẹnịnị ẹ̀ẹ na tẹ̀ ịrẹsụ ataba Ịkamẹrị, ọnị vaa sị wa hụụ ịzọọ. Ẹnịnị ẹ̀ẹ hyakụ na tẹ̀ iruvo òkū, di ọnị ka yị ẹ́wụ́ ka ọ̀ mẹ wa.

⁴ Ọnịrị ẹnịnị ẹ daka za wa ọrịhị ne hi ẹtẹ Anikinami ọnị va mẹ ọda ka a wụ̀ wa ịzọọ. Ẹnẹyịmavara kà ọnị o tenyi ẹngụ ka ọnị e vu wa ẹtẹ, ọnị ẹ yị vaa gụ wa ụvọ.

⁵ Ẹnẹyịmavara Ochẹtẹẹngụ Ananyị yị, Ọ sị ụvọ kanyị ẹtẹ kẹnẹ dị o su enyi, dị avaba aza aa zị ẹngụ nị. Ẹtẹ va sị mẹẹ́ irehu Ịnayịrị Ijipiti enee hi dị ọ hụ avọọ nị.

⁶ Ẹnẹyịmavara vị ana da irehi anị tụ ẹbẹẹba dị ọ sị eteesu mẹ ohyẹtẹ anị. Ọnị o tura enyi hịrẹ hụrẹ ịnị oku, dị ọ vara eyi zụ ọ orihi hi ẹtẹ nị.

⁷ Ẹnẹyịmavara kà aro ọnị ọnị nyị Anisirẹrị ọnị rẹ nyị yị Anetiyopiya nị. Ọnị ọ kụ Anihwirisiti hụrẹ ẹtẹ Ikiriti ọnịrị Anisiriya hụrẹ ẹtẹ Ikiri nị. Avọọ ọnị mẹ rẹ kụ Anisirẹrị hụrẹ Ijipiti nị.

⁸ Ẹnẹyịmavara, Ochẹtẹẹngụ ka ọnị ô re avaba udivi Anisirẹrị nịnị. Agụvị avọọ ọnị vee vu wa ẹtẹ dị ahịka aza chee ẹnịnị kẹnẹ ọnị navọ tụ́ ẹhẹ nị.

⁹ Ọ kà ọnị vaa mẹ̀ ọda, dị ọnị ziizi Anisirẹrị nịnị beri avaba anẹkụra ana vọ anka aā mẹ sị ọbanyịsa banyị ịsa avọọ. Ẹ yị vaa nyị ọza ọyịza ikonya ene ve che ne ta.

¹⁰ Aza ẹnyị ịnị ẹngụ ẹnịnị anaā mẹ̀ odivi ka ụvọ e yị vee kú ẹnị vị ana vee su usu ụhwọ.

Ọyị va Isisrẹrị na Udi

¹¹ Ẹnẹyịmavara kà ụmẹ aa vẹ ọnị vaa varẹma tenyi ẹkụra Idevidi ene du. Ọ kà ọnị vee tenyi eburu irehi anị ene wú. Ọnị vee tenyi ọ̀ da, anka ọ mẹ vịdị yaa ịyẹẹyẹ

¹² Ọ kà Anisirẹrị nịnị vaa dọ Anedomi ẹtẹ ọnịrị avaba ẹtẹ Anẹkụra ana vọ ana vị anị. Ọ kà ọnị Ẹnẹyịmavara vaa mẹ̀ ọnị mẹ ka avọọ.

¹³ Ẹnẹyịmavara kà ụmẹ aa vẹ ịnị ụmẹ ọnọọ, dị aza ana kụ ịsọyịna gụ aa dọ aza ana jị ịrụkụ oro dị ọza anaa kwọrọ ẹtụtụ igirepi ọnịrị aza anaa ha a aa dọ ẹngụ oro. Ụbazị ịvayịnị ene hi ịrẹsụ ataba ọnịrị ịrẹsụ otutu vaa tụ́ hyọvọ-hyọvọ dị eche gwẹẹtẹ.

¹⁴ Ẹnẹyịmavara kà ọnị vaa kụ aza anị anaa za ọrịhị hi ikinamị vaa vẹ eehi. Ẹnịnị vee tenyi eburu ẹkụra ẹnịnị da, dị ẹ̀ ra hi ịnị anị. Ẹ vaa kụ ụbazị ịvayịnị, dị e yee hu eche anị, ẹ vaa da ụbazị, dị ẹ yaa rị ịsa anị.

¹⁵ Ẹnẹyịmavara Ohomorihi ẹnịnị ka, ọnị vaa sị wa ahụ hi ẹtẹ geri-geri ịnị ẹtẹ ọnị ọnị sị yi wa. Ọza e yi me vene hu wa ahụ hụrẹ ịzị ẹ ya paa.