Emọsị 5 - IWE ỌNỊNỊ

Ohomorihi ô hị́ Anisirẹrị ka e ro ịnẹ.

¹ Ẹnẹyịmavara, ô hị́ Anisirẹrị, dị ọ ka e batọ ahẹ ọnị ọnị aa sị zị ẹngụ yi wa.

² Isirẹrị sị mẹ anka ozwoorihi ana hyẹdụ, dị ẹ yị vana zụ kwẹẹtẹ avọọ nị. Dị aa hụrẹ ẹ ụvọ tụ ịzị ọ ya nị. Ẹ yị nyị ọza ana sị ọ kwẹẹtẹ

³ Ẹnẹyịmavara ana vị Ohomorihi ka, Anisirẹrị ẹ tụ aza ẹnị akahị jịnẹ nọ ịrẹkụ, aza ẹnị ẹchẹhị kẹnẹ aa vọ vaa vẹ eehi nị. Ẹ tụ́ aza ẹnị ẹchẹhị jịnẹ, aza ẹẹwụ aa vọ vaa vẹ eehi nị.

⁴ Ẹnẹyịmavara kà Anisirẹrị ẹ va ka ọnị vẹ dị ẹ zụ yara.

⁵ Ọ kà asị ẹ nọ Ịbẹẹsẹba na mẹ ahẹkẹ. Asị e ne si ọnị Ịbẹtẹrị. Ịbẹtẹrị vị ene vee vu ẹtẹ. Asị ẹ nọ Igirigari agụvị ka aza ene hi Igirigari vị ana vaa za ọrịhị na ẹkụra ọsa.

⁶ Ẹnẹyịmavara kà Isirẹrị ẹ varẹma ka ọnị vẹ. Agụvị avọọ ọnị vee hị́ wa hụrẹ ẹtẹ anka ịra mẹ rị ịsa avọọ nị. Ịbẹtẹrị ẹ yị vee re ọza ana vọrọ ka ọ dọ ọ tụ

⁷ Ẹnịnị ẹ ree jesi ịzẹyịza, dị ẹ yaa mẹ̀ ẹvaya yị ọnịzẹyịza nịnị, dị ẹ kụ́ ọ ka wa ụhwẹ nị.

⁸ Ẹnẹyịmavara ọnị ọ mẹ̀ ụzọmị nịnị nị. Ọnị ọ mẹ oserụhwẹ ọnịrị ụhwaazị nị, ọnị ọọ̄ vara etohozi eyọnị, dị ẹtohweyi vara ịrahụ nị. Ọnị o tụra enyi hụụnị oku vaa hịrẹ, dị ọ zwọ ọ orihi chi vẹ hi ẹtẹ nị.

⁹ Ẹnẹyịmavara ọ nyị ụkata ana ahịka vee kẹnẹ dị ọ wụ̀ avaba ọnụkata va ha, dị ọ jị aha ụkata ẹnịnị eburu

¹⁰ Anisirẹrị nịnị vi ana nyị ịhyẹrẹ aza ana sị ịzẹyịza mẹ̀ ọkarẹyị, dị ê sị ẹyị wụ̀ aza ana ka ịzẹyịza.

¹¹ Ẹnịnị vị anaa sị ụvọ hi onosiye za ẹtẹ, dị ẹ yaa ba wa uchuvọta dọ ẹkẹhị irehi, dị ẹ ne ẹkẹhị irehi na hịrẹ. Agụvị avọọ ẹnịnị ẹ yị vaa ra ịnị irehi ẹnị ẹ da. Ẹnịnị ẹ yị rẹ vị hú eche hụụnị ụbazị ịvayịnị ẹnị ẹ kụ́ ụrụkụ anị.

¹² Ẹnẹyịmavara kà ọnị ọ yẹ ebira odivi ọdẹngụ ọnị ẹ yaa mẹ̀. Ẹ yaa mẹ̀ ọnịzẹyịza rị, dị ẹ yaa dọ ochirerenu, dị ẹ yaa mẹ̀ ọkarẹyị irikiti yị onosiye nịnị nị.

¹³ Aza ana yẹ ịrẹyị vị ana sị irenu ẹnịnị za agụvị ka ụmẹ odivi yọ nị.

¹⁴ Ẹnẹyịmavara kà ẹnịnị ée si ka ẹnị ẹ ra, ẹ na za avọ hi ịnị ebira odivi di ẹ nyima ẹẹ mẹ̀ ebira ọyịza. Ẹnẹyịmavara, Ohomorihi Ochẹtẹẹngụ vaa jẹẹ pe wa anka ẹnịnị mẹ ka a.

¹⁵ Ọ kà ẹnịnị ẹ nyị ịhyẹrẹ odivi, dị ẹ sì ịrẹyị ebira ọyịza dị ẹ mẹ ịzẹyịza ịnị ikootu ẹnịnị. Ẹnẹ yẹ ẹyịyara Ẹnẹyịmavara vaa vagu aza anaa vọ ẹtẹ.

¹⁶ Ananyị yi Ẹnẹyịmavara ọ ka yị wa, ẹ vaa wụ́ owu ọnịrị ùnè ịnị avaba ụpatẹsị ọnịrị inorere ẹnịnị. Avaba ọgẹrẹva ẹnịnị ẹ sụ ùnè, dị ẹ dọ aza ene beri wa jị òrèrè

¹⁷ Ẹ vaa wụ́ owu ịnị avaba ụbazị ịvayịnị ẹnịnị, agụvị ka Ẹnẹyịmavara ká ọnị vaa che ụbazị parahu dị ọnị o du ịsa ene hi ịnị anị va ha.

¹⁸ Oogwoo ẹwụ nịnị ana va ụva ka ịhị Ẹnẹyịmavara aa va si zụ̀ ka ọnị ọhụna avaba Anẹhẹ nị. Sị u sị o hí ka ẹkụhị Ẹnẹyịmavara ọnọọ ọ vị nịnị? Wáá yẹ ka ẹkụhị ọnọọ vị ẹkụhị ayodu. A yi vi ẹkụhị ịrajẹ ọ vị.

¹⁹ Ịhị ọnọọ vaa sị mẹẹ anka ọza òo zwe yi idu na gẹrẹ ọdụmị avọọ nị. Ô zwe na tẹ̀ ịnị eehi, dị ọ sị ụvọ tụra ugene, dị ẹ́wụ́ jị ọ ịrẹrụ nị.

²⁰ Ịzẹyịza, ẹkụhị Ẹnẹyịmavara ọnọọ vaa nyị ẹngụ anị. A yi nyị ọza ana vaa ha ịnị ẹnịnị.

²¹ Ẹnẹyịmavara kà eche ahẹkẹ ẹnịnị vi ana nyị ọnị ịhyẹrẹ. Ẹyị nyị ịsị ọnị a sị mẹ̀.

²² Ọ kà ọnị ẹ yị vaa dọ ịsọvọ ọnị ẹ yaa mẹ̀ ọnị ẹ yị va kana eyi si ịsọvọ ẹngwọọrọ ẹnịnị

²³ Ọ kà a sị ahẹ ụya ẹnịnị kana kwooze ka ịrẹka kẹnẹ-kẹnẹ ọ vị ịnị ụtọ anị. Ọnị ẹ yị vee batọ aahẹ ẹnịnị, ọkangga ẹnịnị ọ daka hine huu ịsọnyịsọnyị.

²⁴ Ama dị Ẹnẹyịmavara kà ẹ̀ navọ aa sị ịzẹyịzaa mẹ̀ ọkarẹyị avaba aha.

²⁵ Ẹnẹyịmavara kà ịrayị ẹbẹẹva ọnị Anisirẹrị mẹ ịnị ụnọmị ẹ yị nyị ịsọvọ ẹnyẹnyị ẹnẹ mẹ yị ọnị

²⁶ Ama Anisirẹrị nịnị vaa sị ori ẹyịva ọnị ẹ mẹ̀. Ọnya ịnị ẹnịnị Isakuti, ọnị ẹ yaa hị́ ohinọyị ẹnịnị. Dị ẹ rẹ hi ụta yị ori ọsa oni ẹ mẹ̀ vene ụzọmị ẹbẹẹba ana aā hị́ Ịkayịwanị nị;

²⁷ avọọ Ẹnẹyịmavara ana vị Ohomorihi ọga isoja vaa navọ ka aa za wa ọrịhị na aha ana para Ịdamasịkọsị huu.