Emọsị 3 - IWE ỌNỊNỊ

Ẹnẹyịmavara ộ sị ụya ebira odivi Anisirẹrị nịnị rị wa

¹ Ẹnẹyịmavara ọ hị́ Anisirẹrị ka e batọ ịrẹyị ọnị ọnị vaa ka yị wa. Ịrẹyị ọnọọ ọ za avaba ẹnịnị ọnị ọ kụ̀ hụrị ẹtẹ Ijipiti vẹ.

² Ẹnẹyịmavara kà Anisirẹrị nịnị kẹnẹ ọnị nyị ịnị avaba Anẹkụra ene hi ịrẹsụ ẹtẹ nị. Agụvị avọọ ọnị vaa sị ụya ebira odivi ẹnịnị rị wa nị.

Ụkọrọ Ọnịsẹ

³ Dị ọ họ̀ wa ka aza ẹnị ẹẹva ẹ́ẹ́ zụ rị vabẹ, dị asị ẹ dọ yị ẹngụ?

⁴ Idu o mē na owu kẹnẹ ịnị iruku ẹ̀ẹ vị ọ sị uye za. Avọọ ozi idu ọnị e mere na owu kẹnẹ ẹ̀ẹ vị aa rị ịsa.

⁵ Ịrẹpa ọ yị mā za inomi kẹnẹ ẹ̀ẹ vị a sị ịsa ọnị inomiī rị va ịrẹpa zi ọ. Avọọ ịrẹpa o mē ne kẹnẹ ẹ yị vị a nyị ịsa ẹ jị ahụ ngụ ọ

⁶ Ọpanyị ịrẹkụ ọ́ọ́ zụ sụ́ ịrẹyị ịnị ẹkụra, di asị ọza hí angwa? Odivi óó zu tu ẹkụra dị asị Ẹnẹyịmavara nyị ụvọ tụ̀ ọ.

⁷ Ịzẹyịza Ananyị yi Ẹnẹyịmavara ọ mā mẹ̀ ịrẹyị dị asị ọ sị iruvo anị zụ ezi ahụ anị ana vị ọnụtụ anị.

⁸ Idu òo na owu, ene éé yi vee hí angwa? Ẹnẹyịmavara Ohomorihi ọ̀ọ kà ịrẹyị, ẹnẹ zụ za ka ọnị ẹ yị ka ụtụ ọnọọ?

Evwẹtẹ Ịsamarịya

⁹ Ẹnẹyịmavara kà Emosi ọ kà yị ohinọyị Anasiriya ọnịrị ohinọyị Anijipiti ka ẹnịnị ẹ jịnẹ nọ ịrẹsụ ataba Isamariya di e vee re ebira odivi Anisirẹrị nịnị nị.

¹⁰ Ọ kà ẹnịnị ẹ yị yẹ a mẹẹ̄ mè ịsa ana vọrọ. Ẹnịnị vị ana sị àko kụ ogu aza hi irehi ẹnịnị.

¹¹ Agụvị avọọ Ẹnẹyịmavara Ohomorihi kà ọnị a hụrẹ wa ụvọ yị ọnịvị ẹnịnị. Di ọnịvị ẹnịnị kara wa hi, dị ẹ tụ wa ọkụmị, dị ẹ dọ wa ogu ẹnịnị.

¹² Ẹnẹyịmavara kà anka oseratẹmẹ mẹẹ̄ sịị vụrị dọ ẹpẹẹpẹrẹ uye ahụ ọnịrị ụtọ atẹmẹ ana vọ hụụnị irenu idu avọọ, avọọ ọnị mẹ vaa dọ Anisirẹrị nịnị chee ene hi Ịsamarịya ha hụụnị ụvọ ọnịvị ẹnịnị nị. Dị a tụ̀ wa avosusu, dị ahịka ọkansẹsẹ ụvẹnẹ ẹnịnị ọnịrị operẹsụ ana ku hẹ̀ kẹnẹ ọ vọ tụ wa ụvọ nị.

¹³ Ananyị yi Ẹnẹyịmavara Ohomorihi, Ochẹtẹẹngụ kà Emọsị ọ wụ́ ịrẹyị anị dị ọ ka enube yị Anisirẹrị nịnị.

¹⁴ Ọ kà ịhị ọnị aa sị ụya rị wa agụvị ebira odivi ẹnịnị aanị ye. Dị ọnị wú ụta ori ẹnị e hi tụ Ịbẹtẹrị. Dị ọnị da ọgọọgọ ụta ẹnẹẹ va hi eteesu.

¹⁵ Ẹnẹyịmavara kà ọnị re vee wu irehi ẹbanyị-ẹbanyị ẹnẹ ẹ dà hi aha ụhwọtụ ịnị ụmẹ ahị ọnịrị ẹhị. Avaba ọpanyị ọdọba ẹnị ẹ sị mẹ̀ ọvị hị́ ịnị irehi ẹnịnị vị ọnị vaa chaka ha.