Iwe Ọhụhị Imosiisi ana aa hị́ Ọyịvatụrọda 8 - IWE ỌNỊNỊ

Ẹnẹyịmavara ọọ tẹsị awụ nịnị

¹ “Re ka wa sị ụvọ za avaba ọda anaa ka yị wụ aanị agụvị dị wa zụ ra, dị waa rụrụ hu avọọ, dị wa na dọ ẹtẹ ọnị Ẹnẹyịmavara raa hị́ eku anị ka ọnị ọ sị yị ohiku ẹnịnị.

² Tamayị Ẹnẹyịmavara Ohomorihi awụ nịnị mẹmẹ zụ wụ oze ịnị ụnọmị ịrayị ẹbẹẹva. Ọ sị ẹngụkata ọrụrụ zama ẹnịnị re agụvị dị e ka ịrẹsụ hi yị ọnị, dị ọ rẹ yẹ wee yị hi ayị nịnị ọnịrị waa saasa ọda ọnị ộ mẹ̀.

³ Ộ mẹ ka ụngwẹ ọ̀ kụ̀ wụ nịnị, dị ọ̀ rẹ sị ịsọyịrị ana a hị́ Imana yị wụ nịnị. Ohiku ẹnịnị ẹ yị vịdị rị ẹngụ ịsa ọnọọ daa Ẹnẹyịmavara vene si ka ẹ yẹ ka ịsọyịrị kẹnẹ ọ zụ sị ọza vị ọza ayị vị avaba ịrẹyị ọnị ọnị ka.

⁴ Ịnị ịrayị ẹbẹẹva ọnọọ achị ẹnịnị yị re wu.

⁵ Tamayị ka Ẹnẹyịmavara ana vị Ohomorihi awụ nịnị vị anaā tụ ọza ohuvọ anka aza ana ma ọza avọọ.

⁶ Avọọ sị ụvọ za ọda ọnị ộ mẹ̀, hí angwa anị dị wa saasa avaba ịsa ọda ka.

⁷ Ẹnẹyịmavara Ohomorihi awụ nịnị vaa sị wụ nịnị va ngụ ịnị ẹtẹ ozoza ịzị irehu, okuha ọnịrị orosi ne beri enyi iruvo ẹtẹ e si ịnị ịnozi ọnịrị ịnị ataba.

⁸ Ẹtẹ anaā mẹ̀ ihwiti, ibaari, ịvayịnị ọnịrị Ipomegiraneti, ọchị orivi ne beri ẹhụ.

⁹ Ịnị ẹtẹ ọnọọ, ẹ yị vaa nyị ụngwẹ, ịsa ẹ yị vaa zwọ́. Ịrẹta ene hi ịzọọ vị ịrẹta enyusẹ, dị otutu ẹnịnị vị ẹtẹ Enyusẹ Ịkọpa nị.

Asị u hí ayị Ẹnẹyịmavara

¹⁰ “Ụ vaa rị ịsa, dị ịnẹ ha wụ, dị waa kụ Ẹnẹyịmavara Ohomorihi awụ avọ ka ọ sị ẹtẹ ozoza yị wụ nị.

¹¹ Ama sị eyi pe ẹtẹ asị u hi ayị Ẹnẹyịmavara Ohomorihi awụ. Asị a nyị ka wẹ yị saasa ọda anị ọnị aa sị wụ aanị.

¹² Ịjị wee re rị, dị u ra da irehi ozoza ọnị ụ ra ịnị anị,

¹³ ịjị imaaru ọnịrị atẹmẹ awụ ẹ sị rụrụ, dị ụ sị ẹkẹhị ọnịrị ogu nyị nị,

¹⁴ ịjọnọọ dị wee wụ, dị ụ hị́ ayị Ẹnẹyịmavara, Ohomorihi ana kụ wu nịnị hụrị ẹtẹ Ijipiti ịzị a za wụ nịnị ọrịhị.

¹⁵ Ẹnẹyịmavara ộ zụ nịnị oze jịnẹ ụnọmị odivi ịzị ẹ́wụ́ odivi, ọnịrị uku hi nị, ịnị ẹtẹ ọyịwụ ịzị ẹ yị nyị enyi, ộ mẹ̀ ka enyi o si hụụnị ịda yị wụ nịnị nị.

¹⁶ Ọnị ọ sị ịsọyịrị ọnị ohiku ẹnịnị ẹ yị rị dị yị wa ịnị ụnọmị nị. Ọnị ọ̀ ku ẹngụkata tu wa dị ọ sị zama wa re nị. Ọvavẹ ịrẹma vị ọnị ọ vana sị ịsa ọyịza-ọyịza yị wa.

¹⁷ Ama asị ụ ne rò ka ụkata ẹngụ awụ ụ sị nyị ogu ẹnẹẹ nị.

¹⁸ Tamayị ka Ẹnẹyịmavara Ohomorihi awụ nịnị ọ̀ sị ụkata yị wụ nịnị ọnị u sị nyị ẹkẹhị awụ nịnị nị. Ọ vavọọ mẹẹ ịsa ẹnẹnị agụvị ka ọ̀ vịdị ka tịtẹ dị ọ hị́ eku tụ ọ yị ohiku ẹnịnị nị.

¹⁹ Wèe ne hi ayị Ẹnẹyịmavara naa dụ ori zị, mee hu wu ụvọ ọyaanị ka we yị vaa rị ọ.

²⁰ Wẹ̀ẹ yị wụ́ ịrẹyị Ẹnẹyịmavara, ẹwụ nyẹmba vene vee vú ẹtẹ anka anẹkụra ọnị ọ vịdị vú ẹtẹ avọọ.