Iwe Ọhụhị Imosiisi ana aa hị́ Ọyịvatụrọda 7 - IWE ỌNỊNỊ

Aza ọnị Ẹnẹyịmavara nyị

¹ “Imosiisi ka, Ẹnẹyịmavara Ohomorihi ẹnịnị vaa sị wa na ngụ ịnị ẹtẹ ana vaa vị ẹnịnị. Ọ vaa dụ anẹkụra ọrụrụ-ọrụrụ ana ra ịzọọ jịnẹ kwooze yị wa. Eyi ẹnịnị ọ vaa dụ Anẹkụra ẹbanyị-ẹbanyị ana nyị ụkata huna wa ịhịmba. Anẹkụra ẹnẹẹ ẹ vị Anihiti, Anigirigasi, Anamọrị, Anikenaani, Aniperizi, ọnịrị Anihivi ne beri Anijebusi.

² Ịjị Ẹnẹyịmavara Ohomorihi ẹnịnị ọ̀ọ sị anẹkụra ẹnẹẹ yị wa, dị ẹ nyị ẹbẹẹba ẹnịnị, ẹ wụ̀ avaba ẹnịnị ha bemi-bemi. Asị a nyị ọza ọnị ẹ vayị anị, dị asị a nyị oto ọnị ẹnịrị wa mẹ̀ yị ẹngụ.

³ Asị ẹ nyị ezi anẹẹ ẹnịnị, dị asị ẹ rẹ sị ezi anẹẹ ga ọza ẹnyẹẹnyị ẹnịnị.

⁴ Asị ẹnịnị kụ́ ezi ẹwụ nịnị na hẹkẹ ori. Ọ̀ọ vavọọ ya Ẹnẹyịmavara vaa kụ ayị, dị ọ wụ ẹnịnị obobooro ọnọọ.

⁵ Èe tu ịzọọ, e wu ụta ori ẹnịnị ha, ẹ chaka ịrẹta ori ẹnịnị rugurugu va ha, ẹ dà ọchị ana a sị mẹ uyi yị ori Asẹra, dị ẹ rị wa ịra.

Aza ẹnẹ Ẹnẹyịmavara nyị

⁶ “Wa vavọọ mẹ̀ ẹ agụvị ka wa sị vị Ẹnẹyịmavara ana vị Ohomorihi awụ nịnị. Ọnị ọ nyị wụ nịnị ka wa vị anị hụụnị akakana aza ene hi ịnị ẹhẹ nị.

⁷ Ẹnẹyịmavara sì ịrẹyị wụ nịnị kẹnẹ, dị ọ nyị wụ ka wa vị aza anị nị. Ẹ yị vị agụvị ka ẹwụ nịnị ọ rụrụ hụụnị anẹkụra ana vọ nị. Ẹwụ nịnị ọ hyakụ weyi hu nị.

⁸ Ama Ẹnẹyịmavara o sì ịrẹyị awụ nịnị, dị o si ka ọnị ọ sị ahụ ku ịrẹyị ọnị ọ hị́ eku anị yị ohiku awụ nịnị nị. Agụvị avọọ ọ sị ụkata anị dọ wụ nịnị ha, dị ọ tụ̀ wụ nịnị hụụnị udi ọrịhị ọnị ohinọyị Ijipiti sị wụ nịnị tụ.

⁹ Tamayị ka Ẹnẹyịmavara Ohomorihi awụ nịnị ọnị ịnya ọ vị ọnịzẹyịza nị. Ọ vaa sị ụvọ za oto ọnị ọ wo, dị aa sị oyisì anị zụ evere awụ ịrẹmị-ịrẹma oze akahị.

¹⁰ Ama Ẹnẹyịmavara ẹ yị zụ mẹ ka ẹ yị sị ụya rị aza ene è yi sì ịrẹyị anị.

¹¹ Agụvị avọọ, booro aanị, wa na saasa ịsị a kọ wụ nịnị aanị; saasa avaba ọda ọnị mị mẹ yị wụ nịnị ajịnị aanị.

Aha ana ya ịnị ọyịwụ chire

¹² “Wàa wụ ọda ẹnẹnị nịnị, dị ụ sị ịzẹyịza aa saasa wa nịnị nị, ịjọnọọ, Ẹnẹyịmavara, Ohomorihi awụ nịnị vaa jẹẹ ịrẹsụ oto oni o wo yị wụ nịnị. O vee sì ịrẹyị awụ nịnị pooro anka ọ́ mẹ̀ wo oto yi ohiku awụ nịnị.

¹³ O vee sì ịrẹyị awụ nịnị, dị ọ mẹ ka ò ze wụ nịnị. Ụ vaa ma ozi nịnị, dị ụ waa rụrụụ hu avọọ nịnị. Ọ va mẹ ka ò ze yị aarẹ awụ nịnị, dị akụ awụ nịnị, eche ọnịrị angwẹ orivi awụ nịnị aa mẹ; ọ vaa mẹ ka ò ze wu nịnị, dị ọ sị ịsụpa ọnịrị atẹmẹ tatarataa wụ nịnị. Ọ vaa mẹ avaba ize ẹnẹnịị yị wụ nịnị ịnị ẹtẹ oni o wo oto yị ohiku awụ nịnị ka ọnị vaa sịị yị wụ nịnị.

¹⁴ Ẹ yị nyị aza ịnị ẹhẹ oni o vee zee yị anka ẹngụ awụ nịnị. Ẹ yị nyị ọza ịnị awụ nịnị à vị ịsụpa awụ nịnị ene vee kù ọbọrị.

¹⁵ Ẹnẹyịmavara ẹ yị vaa zẹẹ ka ụkụ ọnyọọnyị ọ̀ za wụ nịnị. Ẹ yị vaa kụ́ ụkụ odivi oni u re nini ịnị ẹtẹ Ijipitii tu wu nịnị, ama ọ vaa kụ waa tu ọnịvị awụ nịnị.

Ẹnẹyịmavara kà è vu anẹkụra ẹnẹẹ ẹnịrị ori ẹnịnị ẹtẹ

¹⁶ “Re ka avaba anẹkụra ọnị Ẹnẹyịmavara Ohomorihi awụ nịnị ọ̀ọ sị ụkata wụ ka we vu ẹtẹ, wee vu wa ẹtẹ nịnị; à sị ụ vayị ẹnịnị. Àsị u hẹkẹ ori ẹnịnị, agụvị ka ọ va vị ẹngụkata odivi yị wụ nịnị.

¹⁷ A sị ụ kà a yị ẹngụ awụ nịnị ka aza ẹnẹnị ẹ rụrụ hu wu nịnị nị, agụvị avọọ, wẹ yị nyẹngụ dụ wa nịnị.

¹⁸ À sị u hí angwa ẹnịnị; tamayị ịsị Ẹnẹyịmavara Ohomorihi awụ nịnị mẹ ohinọyị Ijipiti ọnịrị aza anị.

¹⁹ Tamayị ụya edivi-edivi ẹnẹ ẹ rị, dị ụ sị eyi awụ nịnị re e. Tamayị ịvọpa ọnịrị ohyozirenu, ọnịrị ụkata ọbanyị ọnị Ẹnẹyịmavara Ohomorihi awụ nịnị sị ngwara wụ nịnị tịtẹ. Ọ́ mẹmẹ vu Anijipiti nịnị ẹtẹ gẹdẹ-gẹdẹ avọọ, avọọ ọ́ mẹ̀ rẹ vee vu aza ọnị u wee hí angwa anị nịnị aanị ẹtẹ nị.

²⁰ Ẹnịnị vaa sị vụrị ka ene e zwe na tẹ̀, ama Ẹnẹyịmavara Ohomorihi vee chire wa angwa, di o vu wa ẹtẹ.

²¹ Agụvị avọọ asị ụ hí angwa aza ẹnẹnị agụvị ka Ẹnẹyịmavara Ohomorihi awụ nịnị ya pe wụ nịnị. Ọnị ọ banyị ana vọrọ ka eē hí angwa anị nị.

²² Ẹnẹyịmavara Ohomorihi awụ nịnị vaa dụ anẹkụra ẹnẹnị cheeche kwooze eyi awụ nịnị nị. Ọ yị vaa vu wa ụpẹ ọnya wumi agụvị ka uye ịnị avị vaa sị rụrụ kara wụ nịnị.

²³ Ọ vaa sị ọnịvị awụ nịnị chere ẹwụnị ụvọ, dị ọ tụ wa angwahi ne tu ụmẹ ọnị ụ vaa sị wụ̀ wa ha.

²⁴ Ọ rẹ vaa sị ohinọyị ẹnịnị chere wụ ụvọ, dị ụ wụ̀ wa, dị ayị ẹnịnị hi ịnị ẹhẹ.

²⁵ Ụ vaa rị ọnyọọnọkụmị ori ẹnịnị ịra. Asị eyi awụ nọ ịnị igooru ọnịrị isiriva ene hi ini ori ẹnịnị. Asị kụ wa mẹ awụ agụvị ka ẹ vaa ịrẹpa za wụ. Ịsa enyisi ẹ vị yị Ẹnẹyịmavara Ohomorihi awụ nị.

²⁶ Asị ụ sị ịsa enyisi ẹnẹẹ va ngụ ịnị irehi awụ nịnị, ẹ vị ụ ka ẹwụrị irehi awụ o vu ẹtẹ. Nyị ịhyẹrẹ ori ọnịrị ịsa ẹnịnị. Asị ụ kanyị wa agụvị ka Ẹnẹyịmavara ọ raà chi hi wa.