Iwe Ọhụhị Imosiisi ana aa hị́ Ọyịvatụrọda 6 - IWE ỌNỊNỊ

Ọda ene huu kere-kere

¹ “Imosiisi ka Ẹnẹyịmavara ana vị Ohomorihi Ansirẹrị ka ọnị ọ̀ sị ọda anị zụ wa, agụvị dị e saasa a ẹ̀ẹ naa sị ngụ ịnị ẹtẹ ọnị ọnị vaa sị yị wa.

² Ẹnịrị ezi anị, ne beri aazị ne chire ẹmaazị ẹ̀ẹ ka enee ku orubo, àa nyị ka e hị́ angwa Ẹnẹyịmavara, dị ẹ rẹ saasa ọda anị pooro.

³ Batọ, wàa sị vụrị dị u saasa ọda ọnọọ nị, ẹhẹ awụ e zoza, dị wáa yara ịnị ẹtẹ ozoza ọnị Ẹnẹyịmavara ana vị Ohomorihi ohiku awụ nịnị hị́ eku anị yị wa.

⁴ Batọ ẹwụ nịnị Anisirẹrị, Ẹnẹyịmavara ana vị Ohomorihi vị ọnyara.

⁵ Sị avaba ayị awụ sì ịrẹyị Ẹnẹyịmavara ana vị Ohomorihi awụ, beri avaba ivehu ọnịrị avaba ụkata awụ.

⁶ Asị ụ hi ayị avaba ịrẹyị ana a ka yị wụ nịnị ajịnị aanị o.

⁷ Tangwa sị ịrẹyị ẹnẹẹ zụ ezi ewu, waa ka yị wa ẹ̀ẹ yaayịtẹ, ịnị eehi, ẹnịnị àa zị ụsẹ oze, ẹnịnị ẹ hụ tịtẹ ọnịrị ẹ̀ẹ ha kwẹẹtẹ.

⁸ Chẹrẹ ẹ tịtẹ sụ́ ọ kara ụvọ, sị mẹ amu kú, agụvị dị oō tama wa ayị.

⁹ Chẹrẹ ẹ tụ́ ịnị ọchị oze ịnị eehi ọnịrị oze ọbanyị.

Ẹnẹyịmavara ộ kà ọ̀nọ̀ akamawụ

¹⁰ “Ẹnẹyịmavara vaa sị ụ vẹ ịnị ẹtẹ ọnị ọ hị́ eku anị yị ohiku awụ nịnị Abụrahamị ọnịrị Ayiziiki ne beri Ijekọvụ. Ẹtẹ ọnọọ vaa nyị ẹkụra ẹbanyị-ẹbanyị ọnị we yị sị ụvọta awụ nịnị da.

¹¹ Irehi awụ nịnị vee hi yị ịsa irenyi-irenyi ọnị ikangga ọnị wẹ yị chị. Ụbazị awụ vee hi yị ọchị ịvayịnị ọnịrị orivi ọnị ẹ yị chire.

¹² Asị ụ hi ayị Ẹnẹyịmavara ana tụ wụ hụụnị irehi ọrịhị ịnị Ijipiti.

¹³ Hi angwa Ẹnẹyịmavara ana vị Ohomorihi awụ, dị wa hẹkẹ ẹ, dị wa sị ịrẹha kẹnẹ hị́ eku.

¹⁴ Asị ụ hẹkẹ ori ọnị aza ana kara wụ aa hẹkẹ.

¹⁵ Wàa vavọọ mẹ Ẹnẹyịmavara ana vị Ohomorihi awụ vaa kụ́ ayị hi wu ẹtẹẹtẹrẹ. Ọ vaa vu wu hụrẹ ịrẹsụ ẹtẹ agụvị ka ọnị ana ya pe wu vị Ohomorihi anaā kụ́ ụhị.

¹⁶ Asị ụ zama Ẹnẹyịmavara re anka ụ mẹ mẹ Umasa.

¹⁷ Re ka, waa saasa ọda Ẹnẹyịmavara ana vị Ohomorihi sị yị wụ.

¹⁸ Mẹ ịsa ana vọrọ dị o zoza eyi Ẹnẹyịmavara waa vavọọ aa mẹ̀ ẹ o vee zee yị wụ, dị ụ dọ ẹtẹ ozoza ọnị Ẹnẹyịmavara hị́ eku anị yị ohiku awụ nịnị.

¹⁹ Eyi awụ Ẹnẹyịmavara aa dụ ọnịvị awụ anka ọ mẹ ka a.

²⁰ Ụmẹ vaa vẹ ọnị ezi ewu nịnị vaa họ̀ wụ ụsẹ ka ịsị ẹ vị uruvo ọda ọnị Ẹnẹyịmavara ana vị Ohomorihi aanị vị.

²¹ Ka yị wa ka ọrịhị ohinọyị Anijipiti ụ vịdị vị nị, dị Ẹnẹyịmavara va sị ụkata anị tụ́ wụ nịnị hụụ ịzọọ nị.

²² Eyi awụ nịnị Ẹnẹyịmavara mẹ̀ ịvọpa ene hi ọza irenu ene chire Anijipiti ọnịrị Uhwarawo ne beri ovwoovu anị angwa.

²³ Ẹnẹyịmavara ọ kú wụ nịnị jịnẹ hụụ ịzọọ vaa ngụ ịzẹnị, ọnị ộ wo oto anị yị ohiku awụ nịnị nị.

²⁴ Dị Imosiisi ka Ẹnẹyịmavara ana vị Ohomorihi ẹnịnị ộ kà a ka ẹnị saasa ọda ọnọọ, dị ẹnị nyị angwahi anị nị, ọda ẹnẹẹ vị anaa mẹ ka o sere ẹnị. Avọọ ọ mẹ ya pooro tu ajịnị nị.

²⁵ Yaà sị ịzẹyịza saasa avaba ọda ọnị Ẹnẹyịmavara mẹ ẹhẹ ayị vị ana va hine Ohomorihi ayị.