Iwe Ọhụhị Imosiisi ana aa hị́ Ọyịvatụrọda 5 - IWE ỌNỊNỊ

Ọda ẹẹwụ

¹ Imosiisi ộ hị́ avaba Anisirẹrị dị ọ̀ ka, “Ẹwụ nịnị Anisirẹrị batọ dị wa wụ́ ọda ọnị maa ka yị wụ nị ajịnị, kọsẹ anị dị wa sị ayị ọnya saasa a.

² Ẹnẹyịmavara ana vị Ohomorihi awụ nị ộ wo oto yị ịnị ataba Ịsịnayị.

³ Ệ yị wo oto yị ohiku ayị ama ẹyị ana yàra ene hi ịzẹnị ajịnị.

⁴ Ẹnẹyịmavara ô pe ẹwụ nị ụvọta ka ịrẹyị hụụnị ịnị akakana ịra ịnị ataba.

⁵ Imosiisi ka ọnị ọ jẹẹ ịnị akakana ẹnịrị Ẹnẹyịmavara, dị ọnị dọ Ẹnẹyịmavara ịrẹyị ka yị wa nị. Ẹnịnị ẹ yị nyayịnẹ hịrẹ nọ ịrẹsụ ataba agụvị ka e yee hí angwa ịra.

⁶ Ẹnẹyịmavara kà ọnị ọ vị Ohomorihi ẹnịnị ana tù wa hụrẹ Ijipiti ịzị ẹ vịdị vị ọrịhị tụ́ nị.

⁷ Ẹnịnị ẹ yị nyayịnẹ mẹ ori ọnyọọnyị.

⁸ Asị ẹ na bẹ ịsa ene vene ịsa ọnyọọnyị ana yà ẹbẹẹba, a vị ịsa ana ya uruvo ẹtẹ, àa vị ịnị ẹnyị;

⁹ ẹ̀ yị mẹ̀ ori agụvị ka Ẹnẹyịmavara ana vị Ohomorihi ẹnịnị vị anaā kụ́ ụhị, Ọza àa nyị anaa maanị mẹ̀ ebira ọnọnị vị ọnị vaa sị ụya anịị rị ọ ne beri ezi ịrẹma-ịrẹma anị nị.

¹⁰ Ama ọza ene èe sì ịrẹyị anị, dị ọ sị ụvọ za ọda anị nị, ọnị re vee sì ịrẹyị ọza ọnọọ ọnịrị ezi ana vana a hụrẹ ịpa anịị vẹ pooro-pooro.

¹¹ Ẹnịnị ẹ̀ yị nyayịnẹ sị ịrẹha Ẹnẹyịmavara ana vị Ohomorihi ẹnịnị hị́ eku ireche, Ẹnẹyịmavara kà a yẹ ka ọza ọnọọ ọọ rị.

¹² Ẹ za ido ẹkụhị ụhwọtụ, Ẹnẹyịmavara ana vị Ohomorihi ẹnịnị ọ̀ mẹ ọda ọnọnị yị wa nị.

¹³ Ịnị akakana ẹkụhị ịhịnọnyị mẹ avaba ụkọrọ ọnị wàa nyị.

¹⁴ Ịhị ẹ tụ́ ọ ẹkụhị ịhịmba vị ọnị Ẹnẹyịmavara nyị ka ọ̀ vị ẹkụhị ụhwọtụ, ịhị ọnọọ ọza ẹ yị nyayịnẹ mẹ̀ ụkọrọ ọnyọọnyị. Ẹwụ ụvọta ọ yị nyayịnẹ mẹ. Ozi ewu ọnọrụ àa vị ọnẹẹ ẹ yị nyayịnẹ mẹ̀ ụkọrọ ịhị ọnọọ. Ozi ahụ awụ ọnọrụ ọnịrị ọnẹẹ ne beri ụnọ awụ ne chire ịkẹrịkẹtẹ ọnịrị avaba ịsụpa awụ ẹ yị nyayịnẹ mẹ̀ ụkọrọ ịhị ọnọọ. Ezi ahụ awụ ọnịrị azọga ene hi ịda awụ ẹ yị nyayịnẹ mẹ̀ ụkọrọ ịhị ọnọọ.

¹⁵ Tamayị ka ọrịhị ụ vịdị vị ịnị Ijipiti nịnị, dị Ẹnẹyịmavara Ohomorihi vaa sị ụkata anị tụ jịnẹ tụ́ ẹhẹ hụrị ịzọọ; avọọ Ẹnẹyịmavara mẹ ọda ka aa sị ẹkụhị ọnọọ hẹkẹ ọnị nị.

¹⁶ Sị ụbanyị yị ọnyị awụ ọnịrị ada awụ anka Ẹnẹyịmavara ana vị Ohomorihi awụ agụvị dị we zụ kú orubo, dị o zee yị wụ ịnị ẹtẹ ọnị Ẹnẹyịmavara ana vị Ohomorihi sịị yị wụ.

¹⁷ Wẹ yị nyayịnẹ wụ̀ ọza

¹⁸ Wẹ yị nyayịnẹ sè ịrẹka.

¹⁹ Wẹ yị nyayịnẹ yị oyi

²⁰ Wẹ yị nyayịnẹ dọ ivenu ireche kú ọza.

²¹ Asị ụ mẹ eyọhụrẹ dị waa dọ ose ọza nyị. Asị ụ mẹ eyọhụrẹ hi irehi ọza, aa vị aarẹ ọza. Asị ụ mẹ eyọhụrẹ hi ozi ahụ ọnọrụ àa vị ọnẹẹ ọza. Asị ụ mẹ eyọhụrẹ hi imaaru, àa vị ịkẹrịkẹtẹ. Asị ụ mẹ eyọhụrẹ hi ịsa tụra ịsa ọnị ọza ọ̀ọ nyị.

²² Ọda ẹnẹnị Ẹnẹyịmavara kà yị avaba ịragụ awụ nịnị ịnị ataba Ịsịnayị. Ô na owu ka ịnị akakana ịra, ọnịrị eguhi ne beri etohozi nị. Ịjị ịrẹyị anị taa ka, dị ọ̀ chẹrẹ tụ ịnị ịrẹta ẹẹva ọnị ộ sị yị Imosiisi ụvọta nị. Imosiisi ka.

Aza ê hí angwa

²³ “Ịjị e maanị wụ ọngwẹ hụụnị etohozi jijiji, dị ịnyanya rị ịnị ataba, dị avaba ọdọvịdị ọnịrị ohi ịrẹsụ-ịrẹsụ ẹnịnị ve tụ́ ọnị nị.

²⁴ Dị ẹ̀ ka, Ẹnẹyịmavara ana vị Ohomorihi ẹnịnị ọ̀ raa zẹ ka eni e re ọ mẹmẹ nyị ụbanyị. Ẹnị ẹ raa wụ́ ọngwẹ hụụnị ịra. Ajịnị eni e ree re ka Ohomorihi ọ̀ zụ pe ọza ka ịrẹyị dị ọ yị su.

²⁵ Sị ẹ zụ mẹ̀ ka asị ẹnị su, dị asị ịra ọbanyị rị ẹnị? Ẹnị ẹ kụkụ ka ẹnị aa wụ ọngwẹ anị hu avọ, eni e su nị.

²⁶ Ẹnẹ nyẹngụ wụ Ohomorihi ana yara ịrẹyị hụụnị ịra, dị ọ yara?

²⁷ Dị ẹ ka, Imosiisi ọ na wụ̀ avaba ịrẹyị ọnị Ẹnẹyịmavara ana vị Ohomorihi ẹnịnị ọ̀ọ ka dị ọ̀ ka enube yị ẹnị. Ẹnị vaa wụ dị ẹnị saasa a.

²⁸ Ịjị Ẹnẹyịmavara maanị wụ ịsị ẹ ka yị, Imosiisi dị ọ ka ịrẹyị ẹnẹ ka o zoza, ọnị ọ wụ.

²⁹ Dị Ẹnẹyịmavara kà, àa vị ịzẹyịza ẹnịnị hí angwa anị, dị ẹ saasa avaba ọda anị nị, o vee zee yị wa ọnịrị evere anị pooro-pooro zịna-zịna nị.

³⁰ Dị ọ ka, ẹnịnị ẹẹ na ịnị ajẹngụ ẹnịnị nị.

³¹ Ama Imosiisi ọ jẹẹ pe ọnị, dị ọọ dọ avaba ọda ọnị ọ vaa sị zụ wa ịnị ẹtẹ ọnị ọnị vaa sị yị wa.

³² Sị eyi pe ẹtẹ dị ụ wa mẹ ịsị Ẹnẹyịmavara raa mẹ ọda yị wa. Asị ẹ mẹ akamawụ.

³³ Saasa avaba ọda ọnị Ẹnẹyịmavara ana vị Ohomorihi awụ mẹ agụvị dị oze yị wụ, dị waa kú orubo ịnị ẹtẹ ọnị Ẹnẹyịmavara ana vị Ohomorihi awụ vaa sị yị wụ.