Iwe Ọhụhị Imosiisi ana aa hị́ Ọyịvatụrọda 4 - IWE ỌNỊNỊ

Anisirẹrị nịnị ẹ̀ bẹdọ saasa ịrẹyị Ẹnẹyịmavara

¹ Ụmẹ ọnọọ Imosiisi ộ hị́ Anisirẹrị, dị ọ̀ ka, Ẹwụ nịnị Anisirẹrị navọ wa saasa avaba ọda Ẹnẹyịmavara ọnị maa sị zụ wụ nịnị aanị, wàa dọ ọ, eyi awụ Ẹnẹyịmavara ana vị Ohomorihi ohiku awụ nịnị aa sị ẹtẹ ọnọnị yị wụ, dị ọ̀ vị awụ nịnị nị.

² Asị ụ da tụ́ ịnị ọda ọnọọ, asị ụ da hụụnị anị, saasa avaba ọda anị ọnị mị ra ka yị wụ.

³ Ẹwụnị ụvọta ò re ịsị ọnị Ẹnẹyịmavara mẹ̀ Ịbaarị-Ịpẹyọ. Avaba aza anaa mẹ̀ ori ịzọọ ô vú ẹtẹ nị.

⁴ Ẹwụ nịnị ana sị ịzẹyịza saasa a kẹnẹ ọ̀ yara ve tù ịhị ọnọọ nị.

⁵ Imosiisi ka, ọnị ọ̀ ra sị avaba ọda zụ wa anka Ẹnẹyịmavara Ohomorihi anị mẹ ka yị ọnị. Ẹnịnị ẹ̀ saasa a ịzị ẹ̀ yaa va dọ dị ọ vị ẹ̀nịnị aanị.

⁶ Ẹnịnị mẹmẹ sị ịzẹyịza saasa a ọ̀ vaa sị zụ anẹkụra ana vọ ka ẹnịnị ẹ yẹ ịrẹyị nị. Anẹkụra ẹnẹnị ẹ̀ wụ́ ịrẹyị ọda, dị ẹ yaa ga wa ka ẹ̀ nyị ịrẹyọyẹ ẹnẹmẹhị.

⁷ Nyị anẹkụra ọsa ana nyị ori ana gụrị wa anka Ẹnẹyịmavara Ohomorihi mẹ gụrị ẹnị. Ụmẹ tụra ụmẹ ọnị ẹnị ẹ̀ hị́ ọ kẹnẹ ọọ̄ wụ ẹnị nị.

⁸ Nyị anẹkụra ẹnyẹnyị ana maanị nyị ọda ana vọrọ anka ọda ọnị ọnị aa sị zụ wa ajịnị.

⁹ Ẹnịnị ẹ sị eyi pe ẹngụ ẹnịnị, dị asị a nyị ụmẹ ọnị ẹ sị hi ayị ịsị ẹ sị eyi ẹnịnị re. Ẹ pa ịta zụ ezi ọnịrị aazị ẹnịnị.

¹⁰ Ẹ̀ẹ tamayị ịhị ọnị ẹ jẹẹ ọvịdị Ẹnẹyịmavara ịnị ataba Ịhọrẹbị avọọ? Ịhị ọnọọ vị ọnị Ẹnẹyịmavara kà yị Imosiisi ka ọ hị́ ịragụ vẹ ọvịdị anị, dị ẹẹ wụ́ ịrẹyị anị. Ẹ̀ẹ sị wụ, ẹ vaa nyị angwahi anị ịnị avaba ẹhẹ ẹnịnịị. Ẹnịnị ẹ na sị ịrẹyị ẹnẹẹ zụ ezi ẹnịnị, dị ẹẹ mẹ̀ ẹ.

¹¹ Anisirẹrị ẹ ka ẹ yị ezi ẹnịnị ẹnị mẹmẹ jẹẹ iruvo ataba ene eguhi chire ku, dị o hozi ruma-ruma anka areyi dị ịra aa za na ngụ ẹbẹẹba.

¹² Ka yị wa Ẹnẹyịmavara mẹ̀ pe ẹwụ nịnị ka ịrẹyị, hụụnị ịra, dị waa wụ ọngwẹ anị kẹnẹ, dị ẹ yị nyị ịsị ụ re nịnị.

¹³ Ẹnẹyịmavara ộ ka yị wụ nịnị ịsị waa mẹ dị wa sị ụvọ za oto ọnịrị ọ mẹ̀; Dị waa mẹ̀ ịsị ọda ẹẹwụ ana a chẹrẹ tụ́ ịnị ịrẹta ụvọta ẹẹva ka.

¹⁴ Imosiisi ka ộ ka yị ọnị ka ọnị ọ zụ wa avaba ọda agụvị dị ẹ saasa ịzị ẹnịnị aa va dọ dị ọ vị ẹnịnị.

Imosiisi ộ kà aza ọnọ ka asị ẹ hẹkẹ ori

¹⁵ Ẹnẹyịmavara mẹ̀ beri ẹwụ nịnị ka ịrẹyị hụụnị ịra ịrẹsụ ataba Ịsịnayị ẹ yị nyị ịsọnyịsọnyị ọnị ụ rẹ. Ẹnịnị ee sị ọyịza yị ẹngụ ẹnịnị, ẹ sị eyi pe ẹngụ ẹnịnị.

¹⁶ Asị ẹnịnị mẹ̀ ebira odivi na ku ịsa ẹnyẹnyị jẹẹ dị ọ vị ori ẹnịnị, dị ọ hyakụ ve vene ọnọrụ a vị ọnẹẹ,

¹⁷ a vị uye, a vị inomi,

¹⁸ a vị ẹwụ, a vị ivovo.

¹⁹ Asị ẹ zẹ ka ayị ẹnịnị o vene ẹnị dị ẹẹ hẹkẹ ọyị a vị ụhwẹ ọnịrị ụzọmị ene e yee re ịnị ihinẹba. Ẹnẹyịmavara ana vị Ohomorihi ẹnịnị vị ana navọ anẹhẹ ana vọ ka ẹẹ hẹkẹ ẹ.

²⁰ Ama Ẹnẹyịmavara vị ana dọ ẹnịnị ha hụrị Ijipiti ana sị mẹ anka ịra avọọ. Ọ kụ wụ nịnị jịnẹ hụụ ịzọọ ka ẹnịnị ẹ vị aza anị anka ẹ mẹ ya ajịnị aanị.

²¹ Imosiisi ka, agụvị ẹnịnị Ẹnẹyịmavara Ohomorihi ẹnịnị sị du ayị hi ọnị, dị ộ hị́ eku ka ọnị ẹ yị vaa jịnẹ irehu Ijodani na ngụ ẹtẹ ozoza ọnị ọnị aa sị yị wụ nịnị.

²² Ọnị ẹ yị vaa jịnẹ irehu Ijodani naa ngụ akẹnẹ, ịzẹnị ọnị vee su tụ nị. Ama booro aanị, ẹ ya vaa jịnẹ enyi na dọ ẹtẹ ozoza ọnọọ.

²³ Avọọ, ọnị e su ịnị ẹtẹ ọnọnị, dị asị e hi ayị oto ọnị ẹnịrị Ẹnẹyịmavara Ohomorihi ẹnịnị mẹ. Ẹ saasa ọda, dị asị ẹ mẹ̀ ori ẹnyẹẹnyị,

²⁴ agụvị ka Ẹnẹyịmavara Ohomorihi ẹnịnị sị mẹ anka ịra akịna avọọ. Ọọ kụ ụhị nị.

²⁵ Ịjị wàa na raà ma ezi, dị ụ kụ aazị dọ nị, di u si ku ịnị ẹtẹ ọnọọ nị, asị ụ na mẹ ori ẹnyẹẹnyị ene vee du u nịnị ẹngụ. Ebira odivi ọ vị eyi Ẹnẹyịmavara nị. O vee du ọ ayị nị.

²⁶ Imosiisi ka ọnị ọ sị ẹbẹẹba ọnịrị ẹtẹ mẹ ivenu yị wa ka ẹnịnị ẹ̀ẹ mẹ akamawụ hi ọnị, ịjjịjọo e ye vu ẹtẹ nị. Ẹnịnị ẹ̀ yị vaa ra gọdọ ịnị ẹtẹ ana ya akẹnẹ irehu Ijodani ọnị ẹ yaa vaa dọ, dị ẹ ra ini anị. Ẹnịnị vi ene vee vu ẹtẹ saka-saka.

²⁷ Ẹnẹyịmavara vị ana vaa gara wa hi ịrẹsụ ẹhẹ, dị ahịka aza chee ẹnịnị kẹnẹ ọ ha nị.

²⁸ Ẹnị ene hi ẹhẹ vị ana vaa hẹkẹ ori nịnị ọnị ọzarẹyịrẹsụ sị ụvọ anị mẹ̀, ọchị ọnịrị ịrẹta. Ori ẹnịnị ẹ yị zụ re ẹtẹ, ẹ yị zụ wụ̀ ịrẹyị, ẹ yị zụ rị ịsa, dị ẹ hyakụ zụ wụ̀ agụ ịsa.

²⁹ Ịnị ẹkụra ẹnẹẹ, ẹnịnị vee si Ẹnẹyịmavara Ohomorihi ẹnịnị, ẹ̀ ẹ sị avaba ayị ẹnịnị si ọ, e vee re e.

³⁰ Ụmẹ ọnị ụya aa rị wa, dị ẹngụkata ẹnẹnị ee tù wa nị, ịjọnọọ ẹ vaa varẹma ka Ẹnẹyịmavara na, dị ẹ wụ̀ chire e.

³¹ Agụvị ka Ẹnẹyịmavara Ohomorihi ẹnịnị vị anayamva, ọ yị vaa yi wa tịtẹ, a vị ka o vu wa ẹtẹ. Ọ yị vee hi ayị oto oni o wo yi ohiku ẹnịnị, dị ọ hị́ eku tụra a ịrẹsụ.

³² Ọ kà e họ̀ use ịsa ana mẹ̀ ịyẹẹyẹ, dị a va yẹ ka â ma wa, e họ̀ use nee tu ụmẹ ọnị Ohomorihi sị tụ́ ọza vẹ ẹhẹ. Ẹ sị avaba ẹhẹ họ̀ use ka áá nyị ịsa ọbanyị ana vịdị maanị mẹ da? Áá nyị ọza ana vịdị wụ̀ ẹngụ ịrẹyị ọnọnị da?

³³ Áá nyị aza ana wụ̀ ọngwẹ Ohomorihi hụụnị ịnị akakana ịra anka ẹwụ nịnị ana ra da?

³⁴ Áá nyị ori ana nyayịnẹ nọ ẹkụra ọsa na kụ aza, dị ọ mẹ wa aza anị anka Ẹnẹyịmavara Ohomorihi ẹnịnị mẹẹ mẹ wa ịnị ẹtẹ Ijipiti? Imosiisi kà a eyi ẹnịnị Ohomorihi sị kụ akanya ọnịrị ịrẹkụ tu Anijipiti nị. Ộ sị ụkata ọbanyị anị mẹ ịvọpa beri apọtẹrẹwa ọrụrụ-ọrụrụ ene chire aza angwa.

³⁵ Ẹnẹyịmavara ộ maanị sị ịsa ẹnịnị zụ wa agụvị dị ẹ yẹ ka ọnị ịnya kẹnẹ ọ vị Ohomorihi. Ẹ yị nyị Ohomorihi ọsa ịrẹma anị.

³⁶ Ọnị ọ mẹ ka ẹ wụ̀ ọngwẹ hụrẹ ẹbẹẹba dị zụ wa ịrẹyị, di e reè re ịra anị ịnị ẹhẹ ọnọnị, ịzị ọ ya pe wa kà ịrẹyị.

³⁷ Agụvị ka o sì ịrẹyị ohiku ẹnịnị, ọ sị nyị ezi ẹnịnị, dị ọ sị ụkata anị kụ wa jịnẹ hụrẹ Ijipiti nị.

³⁸ Dị ọ dụ anẹkụra nịnị ana banyị dị ẹ nyị ụkata hu wa jịnẹ hụụnị ẹtẹ ẹnịnị agụvị ọnị ọ sị ẹtẹ ọnọọ ọnị ẹ yịị ra aanị yị wa nị.

³⁹ Agụvị avọọ, ẹ tamayị ajịnị, asị ayị hi wa ka Ẹnẹyịmavara ọ vị Ohomorihi ana nyị ẹbẹẹba ọnịrị ẹtẹ nị. Ẹ yị nyị ọsa.

⁴⁰ Imosiisi ka ẹ saasa avaba ọda anị ọnị ọnị raà sị yị wa ajịnị agụvị o ze yị wa ẹnịrị ezi ịrẹma-ịrẹma ẹnịnị. Ẹ vaa ra ịnị ẹtẹ ọnị Ẹnẹyịmavara Ohomorihi ẹnịnị aa sị yị wa ka ọ vị ẹẹnịnị pooro zịna-zịna.

Ẹkụra aha ọyịtẹ̀ ene hi eyi ịzị ọyịị̄ zịị vẹ akẹnẹ Ijodani

⁴¹ Imosiisi ộ sị ẹkụra ẹẹta ene hi eyi ịzị ọyịị̄ zịị vẹ akẹnẹ Ijodani tịtẹ

⁴² ka ẹ vị aha ọyịtẹ̀ yị ọza ene nyeeyi wụ̀ ọza ẹnẹ ẹ yị vị ọnị ịvị anị. Ọ̀ọ zụ zwe na tẹ̀ ịnị ọnya ịnị ẹnịnị, ẹ yị nyị ọza ana nyayịnẹ ngụ ịzọọ na wụ̀ ọ.

⁴³ Ẹkụra ẹnẹ ẹ vị: Ibezeri ẹtẹ Irubẹnị ana ya ịnị ụnọmị ana ya ịrẹsụ ataba, Ịramọtị ịnị ẹtẹ Igiriyadi ana vị ẹtẹ Igadi ọnịrị Igoranị ịnị ẹtẹ Ịbasanị ana vị ẹtẹ Anịmanasẹ nịnị.

Ịrẹyị Ọhụva ọnị Imosiisi kà: Ộ kà a ịsị Ẹnẹyịmavara sì Anisirẹrị ịnị ẹtẹ Ịbẹtị-Ipo

⁴⁴ Imosiisi ộ sị ọda Ohomorihi ọnịrị ịrẹyị anị zụ Anisirẹrị.

⁴⁵ Ẹsẹnị ẹ vị ọda Ohomorihi ọnị Imosiisi kà yị Anisirẹrị nịnị ẹ mẹ sị jịnẹ hụụnị ẹtẹ Ijipiti

⁴⁶ na ngụ ịnị upoporo ana gụrị Ịbẹtịpowa eyi ịzị ọyịị̄ zịị vẹ akẹnẹ Ijodani, ịnị Isihoni ohinọyị Anamọrị ana ya Ịhẹsịbọnị aa mẹ̀ ịjọva. Imosiisi ọnịrị Anisirẹrị nịnị ẹ nyị ẹbẹẹba ẹnịnị ẹ mẹ jịnẹ tụ ẹhẹ hụrị Ijipiti.

⁴⁷ Ẹnịnị ệ ra ịnị ẹtẹ anị, ọnịrị ịnị ẹtẹ Oogi, ohinọyị Ịbasanị. Oogi vị ohinọyị Anamọrị ọsa ana ra eyi ọnị ọyịị̄ zịị vẹ Íjodanị.

⁴⁸ Ẹtẹ ọnọnị ộ hụrẹ ẹkụra ana aā hị́ Aroyeri, ana ya ụtọ irehu Arinọnị. Dị ọ na huuu na ngụ eyi ẹbẹẹba Ataba Isiriyoni nị, ọnị ọ vị ka, Ataba Ihamọnị.

⁴⁹ Ẹtẹ ana ya eyi ọnị ọyịị̄ zịị vẹ okuha Ijodani huuu na ngụ eyi ụvẹtẹ oku anọ-anọ ọnịrị eyi ọnị ọyịị̄ zịị vẹ akẹtẹ Ataba Ipisiga vị ana rẹ ya ịnị ẹtẹ ọnọọ.