Iwe Ọhụhị Imosiisi ana aa hị́ Ọyịvatụrọda 34 - IWE ỌNỊNỊ

Usu Imosiisi

¹ Imosiisi ộ hụrẹ inozi Imowabi hịrẹ nọ ịrẹsụ ataba Inebo na ngụ ịrẹsụ ataba Ipisiga ana va eyi ka ẹkụra ana aā hị́ Ijeriko. Ịzọọ Ẹnẹyịmavara ya sị avaba ẹtẹ Anisirẹrị zụ ọ nị Ẹtẹ ọnọọ ọ kwẹẹtẹ hụrị Igiriyadi va hịrẹ na ngụ ẹkụra ana aā hị́ Ịdaanị,

² avaba ẹtẹ Inahwitari, avaba ẹtẹ Ehwireemi ọnịrị ẹtẹ Ịmanasẹ ne beri avaba ẹtẹ Ijuda na ngụ oku Imeditareniya.

³ Ávọọ ọ mẹ na ngụ Ịnẹgẹvị ụvẹtẹ Ijuda huu ne tu inozi Ijeriko na ngụ Izowa.

⁴ Dị Ẹnẹyịmavara kà yị Imosiisi ka, ẹtẹ ọnọnị ọnị hị́ eku anị ka ọnị vaa sị yị evere Abụrahamị, Ayiziiki ọnịrị Ijekọvụ. Ọnị ọ̀ navọ ka Imosiisi o re e ama ẹ yị vaa ngụ ịzọọ.

⁵ Ịzẹyịza, dị Imosiisi ozi ahụ Ẹnẹyịmavara su ịnị ẹtẹ Imowabi anka Ẹnẹyịmavara vịdị kà a ọnị vaa mẹ.

⁶ Ímosiisi me su, di o ne oku anị tụ ịnị upoporo ẹtẹ Imowabi o va eyi ka ẹkụra ana a hị́ Ịbẹtị-Ipo. Ama ẹ yị nyị ọza ịpa ọnị o ne e tụ pooro tu ajịnị.

⁷ Imosiisi vị ịrayị ẹchẹhị tụra oohu dị o vee su. Ẹ yị nyị ụmẹ ọnị ọchẹngụ anị sị pẹkẹ a vị eyi anị sị hozi vụrụ-vụrụ.

⁸ Dị avaba Anisirẹrị sị ẹkụhị ohurẹẹwụ tịtẹ zị ẹngụ anị ịnị inozi Imowabi ịzọọ nị.

⁹ Ẹnẹyịmavara ộ sị ịrẹyọyẹ yị Ijosuwa ana vị ozi Inuni ọnị Imosiisi nyị dọ ẹngụ aanị ịrẹsụ. Dị avaba Anisirẹrị sị ịrẹsụ yọ dị ẹ saasa ọda ọnị Ẹnẹyịmavara vịdị sị tụ́ Imosiisi hì wa.

¹⁰ Ẹ yị vana nyị ọnịsẹ ịnị Isirẹrị anka Imosiisi. Ọnịrị Ẹnẹyịmavara vana gẹ ka ịrẹyị eyi-eyi.

¹¹ Ẹ yị vana nyị ọnịsẹ ana mẹ̀ ịvọpa anka ọnị Ẹnẹyịmavara tụ́ Imosiisi na mẹ hi ohinọyị Ijipiti ọnịrị ezi ahụ anị ne beri avaba Anijipiti.

¹² Ẹ yị vana nyị ọnịsẹ ana nyị ụkata mẹ̀ ịsa ẹbanyị-ẹbanyị ene chire ọza angwa anka ịsị Imosiisi mẹ̀ eyi avaba Anisirẹrị.