Iwe Ọhụhị Imosiisi ana aa hị́ Ọyịvatụrọda 32 - IWE ỌNỊNỊ

Ahẹ ọnị Imosiisi jị.

¹ Imosiisi kà ẹbẹẹba ọnịrị ẹtẹ e batọ ịsị ọnị a vaa kà.

² Ọ kà ọnị vaa zụ́ Anisirẹrị nịnị ịsa. Ịrẹyị anị vị ana vaa ngụ wụ ẹngụ anka orihi ana banyị ku avị ohwoohu avọọ nị. Ọ rẹ vaa sị mẹẹ anka eguhi ene chire kú avị avọọ nị.

³ Ọ kà ọnị vaa ka a ịzị Ẹnẹyịmavara nyị ụbanyị na za, dị ọzọza ọ ka ohyozirenu ana aa mẹ.

⁴ Ẹnẹyịmavara aa sị ụkata anị dọ ọnị tụ nị. Avaba oze ọnị ọ zị mẹ ịrẹyị anị vana gụ dị ọ vọrọ. Ọnịzẹyịza ene mee cheeche ọ̀ vị nị.

⁵ Ama ẹwụ nịnị ọ raa rị ịvị Ẹnẹyịmavara nịnị, ebira odivi awụ nịnị wẹ yị kụkụ vị ezi anị nịnị. Ụ me divi avọọ ụ mẹ vị enevene nịnị nị.

⁶ Ẹwụ nịnị ọnụra ẹnẹ ẹ yị yẹ ịrẹyị, Aanị ụ mẹ vee sị Ẹnẹyịmavara ụta nị? Aa vị ọnị ọ vị ada awụ nịnị, dị ọ tụ́ wụ nịnị vẹ ẹhẹ? Ọnị ọ vara awụ nịnị ẹkụra nị.

⁷ Tamayị ịrẹma, ịsa ana mẹ ịnị ịyẹẹyẹ. Họ̀ aza ana ma wụ nịnị ọnịrị azọkụ use ịrẹyị. Ẹ vaa pa ịta ịsa ana mệ ịnị ịyẹẹyẹ yị wụ.

⁸ Ẹnẹyịmavara ana nẹba hu keekere ộ sị ẹtẹ ọzọza yị wa nị ọnị ộ ka a ịzị anẹkụra irenyi-irenyi vaa ya ọnịrị ori ọnị ọzọza vaa kụ yị.

⁹ Ama Ẹnẹyịmavara ụvọta anị ọ vị Ohomorihi aza anị Isirẹrị nị.

¹⁰ Anisirẹrị nịnị vị Ẹnẹyịmavara hee ịnị ụnọmị ịzị aza ẹ yị ra hi. Ẹnẹyịmavara o sere wu nịnị, dị ọ tẹsị awụ nịnị anka ọza mē sị eyi pe igoreyi avọọ.

¹¹ Ẹnẹyịmavara vene sere wụ nịnị anka ọkasịmẹ mẹẹ sere ịrẹngwẹ ezi anị avọọ nị. Dị a jị ọkẹrẹpẹ kara wa. Ẹnẹyịmavara vene tenyi ẹngụ ọyị gana avaka anị ku aza, dị ọ za wa ẹnịnị aa va hyẹdụ.

¹² Ẹnẹyịmavara ọnị ịnya ộ zụ aza anị oze nị. Ẹ yị nyị ori ana gụ ọ ụvọ.

¹³ Ọnị ộ mẹ̀ ka ẹnịnị ẹ vị ohinọyị tụra anẹkụra ene hi ịrẹsụ ataba. Dị ệ rị ịsa ịnị aarẹ anị nị. Dị ệ rị ẹhụ hụụnị ịnị akakana ịrẹka, dị ọchị angwẹ orivi nịnị aa hụ ịnị ịrẹta-ịrẹta akaha ataba nị.

¹⁴ Dị Ẹnẹyịmavara ộ mẹ̀ ka ịrẹva Imaaru ọnịrị ẹvụ ẹnịnị ọ nyị enyi ẹtẹẹtẹrẹ. Dị ụ nyị atẹmẹ ọnịrị ẹvụ beri imaaru ene zoza hu nị. Avọọ ọ mẹ rẹ sị Ihwiti ozoza ọnịrị eche ene hu yị wụ nịnị nị.

¹⁵ Ẹwụ nịnị Anisirẹrị, ẹhẹ ộ sị mẹ yị wụ nịnị, dị ụ kụkụ aa mẹ̀ akamawụ hị́ Ẹnẹyịmavara, dị ụ hi ayị ọza ana tụ̀ vẹ ẹhẹ, di u yi Ẹnẹdọha ọbanyị.

¹⁶ Ori ọnị ẹ yaa hẹkẹ vị ana mẹ Ẹnẹyịmavara kụ ụhị, di ebira odivi ẹnịnị ee du Ohomorihi ayị nị.

¹⁷ Ệ mẹ̀ ịsọvọ yị ori ẹnị ẹ yị vị Ohomorihi, ori ọwọọwa nịnị ẹnị ohiku ẹnịnị ẹ yị yẹ. Anisirẹrị nịnị ẹ yị vịdị saasa ori ẹnẹẹ daa.

¹⁸ Ê hi ayị Ohomorihi ẹnịnị, ọdọzaha ọbanyị ẹnịnị ana sị ụhwẹ yị wa.

¹⁹ Ịjị Ohomorihi vavọọ re e, dị ayị kụ, di o yi wu ana vị ezi anị nị.

²⁰ Agụvị akamawụ awụ nịnị ọnịrị arịmanyị ịzẹyịza awụ nịnị Ẹnẹyịmavara sị yi wu nịnị tịtẹ, di e re ịsa ene vee tu wu nịnị nị.

²¹ Ẹnẹyịmavara kà ẹnịnị ệ mẹ̀ ọnị kụ̀ ụhịị ori ẹnẹ ẹ yị nyị ịsị ọ vị, di e du ọnị ayị tụ ịnị ahẹkẹ ori osusu kẹnẹ-kẹnẹ ọnị ẹ yaa mẹ. Agụvị avọọ, ọnị vaa mẹ wa ka ẹ kụ̀ ụhị anẹkụra ẹnẹ ẹ yị nyị ịsị ẹ vị. Ọnị rẹẹ̀ vaa mẹ wa ka ẹ kụ̀ ayị hi anẹkụra nịnị ana aa mẹ ụra.

²² Ọ kà, ọyịkụ anị vaa sị mẹẹ anka ịra ana za giri-giri avọọ nị. Avaba ịsa ene hi ịrẹsụ ẹtẹ vi ana rị ịra na ngụ ini eku. Avọọ avaba iruvo ataba mẹ vaa rị ịra bemi-bemi nị.

²³ Ẹnẹyịmavara kà ọnị vaa tụ̀ ezigi ọnyị ọsa hi wa pooro, di e che wa anka ọpa avọọ.

²⁴ Ụngwẹ vị ana vaa wụ̀ wa ha, dị ụkụ edivi-edivi za wa. Uye ịnị avị vị ana vaa va eyi ịrazị ka wa, Dị ẹwụ ẹnẹ ẹchịpa divi ẹ yaa mẹ wa.

²⁵ Ịrẹkụ vaa mẹ ka a wụ̀ aza avaba oze ene hi ini ẹkụra, di angwa ee hi wa, di ivóvó za wa tụ ini eehi. Ezwọọmụha ọnịrị ezwoorihi Ẹnịnị su va ha. Avọọ ezinụvọ ọnịrị azọkụ ẹnịnị ẹnị mẹ rẹ yịị vee su nị.

²⁶ Ẹnẹyịmavara kà ịjị ọnọ ọ̀ọ sị wa wụ̀ va ha bemi-bemi, aza ẹ yị kụkụ vaa tamayị ẹnịnị.

²⁷ Ama ọnị ẹ yị vaa zẹ ka ọnịvị ẹnịnị e wo oto ka ẹnị e reè huna wa; agụvị ka ọnị ụvọta ộ vavọọ sị wa siisi ẹtẹ nị.

²⁸ Ẹnịnị ẹ yị yẹ ịrẹyị. Ẹnịnị ẹ yị nyị ịrẹyọyẹ vụrụ-vụrụ.

²⁹ Eyi ẹnịnị òo hweyi, ẹ yaanị yẹ ịsa aa gụ wa hyẹdụ. Ẹ yaanị ịsị ẹ vaa vị ọvavẹ ịrẹma.

³⁰ Sị ẹ vẹ dị ọza ịnya aa dụ aza ẹnị akahị, dị aza ẹnị ẹẹva aa dụ aza ẹnị akawụ-akawụ oze ẹẹhị? Ẹnẹyịmavara Ohomorihi ẹnịnị ộ hụrẹ wa ụvọ ana mẹ ka e huna wa nị.

³¹ Ọnịvị ẹnịnị ẹ dọ ka ori ẹnịnị ẹ yị nyị ụkata anka Ohomorihi Anisirẹrị nịnị.

³² Ọnịvị ẹnịnị ee du ha anka Anisodọmị ọnịrị Igomora. Ẹ sị mẹ anka ọchị ịvayịnị anaa tụ ẹtụtụ ọnyịrẹyị, a vị igirepi ene divi huu ẹchịpa.

³³ Eche ẹnịnị ẹ nyị ịrẹyị hụụnị ẹchịpa ẹwụ ana hị́ ụhị.

³⁴ Ẹnẹyịmavara o yi hi ayị avaba ịsị ọnịvị ẹnịnị mẹ̀ wa. Ee zi ka ụmẹ ọnị ọ vaa sị ụya rị ọnịvị ẹnịnị nị.

³⁵ Ẹnẹyịmavara vaa họ̀ oponu, dị ọ sị ụya rị wa. Ụmẹ aa vẹ ọnị ọnịvị ẹnịnị vaa hyẹdụ; ụmẹ ọnị ịrẹyị odivi vee si tu wa ọ sị gụrị ẹtẹ.

³⁶ Ẹnẹyịmavara vaa dọ aza anị ha ụmẹ ọnị òo re ka ụkata ẹnịnị ọ̀ọ ta. Ọ vaa vayị aza ana hẹkẹ ẹ, òo re ẹ mẹmẹ tụ̀ ọkụmị. Ẹ yị nyị ọza ana vaa vọ, ọ vị ọrịhị a vị ọza obooro.

³⁷ Ịjọnọọ Ẹnẹyịmavara vaa họ̀ aza anị use ka ịzị ori ẹbanyị-ẹbanyị ọnị ệ vavọọ sị ayị tụra ya?

³⁸ Ệ sị ụ̀hị̀ ịsọvọ pa wa, dị ẹ sị eche yị ori ẹnẹnị. Ẹ hị́ wa ẹ jịnẹ tụ ẹhẹ, dị ẹ gụ wa ụvọ booro aanị. Ẹnịnị e zwe vaa gụ wa ụvọ.

³⁹ Aanị ka wẹ yị yẹ ka ẹmị ịnyara ọ vị Ohomorihi? Ẹ yị nyị Ohomorihi ọsa ịrẹma amị. Ẹ maa sị ụhwẹ yọ ọza, ẹmaa rẹ dọ ọza ụhwẹ nị. Ẹmaa tọ ọza ụnava, dị mị rẹ mẹ ụkụ nị. Ẹ yị nyị ọza ana hụụ za mị jẹẹ.

⁴⁰ Ọ tana ụvọ tụ ẹba dị ọ hị́ eku ka a vị ọnị ọ vị Ohomorihi ana yara pooro zịna-zịna nị,

⁴¹ ọnị e ne ụhwọ anị dị ọ za nyoonyo anka ịnyaanya avọọ, dị ọnị ọ mẹ̀ ọkarẹyị. Ọnị aa họ̀ oponu ịrẹsụ ọnịvị anị, dị ọnị sị ụya rị aza ana nyị ịhyẹrẹ anị.

⁴² Ọpa anị vee hú anyị ọnịvị anị, dị ụhwọ anị vaa wụ̀ avaba aza ana va eyi ịrazị ka ọnị. Ẹ yị nyị ọza ana va eyi ịrazị ka ọnị ana vaa ha Ọnị vee vu aza ana tọ̀ ụnava ọnịrị anịnẹngwa nịnị ẹtẹ.

⁴³ Ẹwụ nịnị anẹhẹ wee beri Anisirẹrị aza anị jẹ ịrajẹ agụvị ka ọnị vaa sị ụya rị anaa wụ̀ wa. Ọnị e si ọnịvị atọ, dị ọnị jị eyi ve hụụnị ịvị aza anị.

⁴⁴ Imosiisi ọnịrị Ijosuwa ệ vatụra avaba ịrẹyị ahị ẹnẹẹ agụvị dị avaba aza ẹ wụ́.

Ịrẹyị ọdịrẹma ọnị Imosiisi kà

⁴⁵ Ịjị Imosiisi raà vatụra ịrẹyị ẹnẹẹ ta yị avaba Anisirẹrị nịnị,

⁴⁶ dị ọ kà yị wa ka ẹ tamayị avaba ịrẹyị ọnị ọnị ka yị wa ajịnị. Ẹẹ vatụra a yị ezi ẹnịnị agụvị dị ẹ saasa avaba ọda Ohomorihi ẹnẹnị hwịnị-hwịnị.

⁴⁷ Ọda ẹnịnị ẹ yị vị ịrẹyị aahị ọ vị. Ọnị ọ vị ụkata ẹnẹ ẹ vaa sị ra ẹhẹ ẹnịnị nị. Ọnị ọ zụ mẹ ka e ku orubo ịnị ẹtẹ ọnị ẹ vaa jịnẹ Okuha Ịjọdanị na dọ aanị nị.

Imosiisi ô re ẹtẹ Ikanaani

⁴⁸ Ịhị ọnọọ gẹdẹ-gẹdẹ, Ẹnẹyịmavara kà yị Imosiisi ka,

⁴⁹ ọ na ịrẹsụ ataba Avarimi ịnị ẹtẹ Imowabi ana va eyi ka Ijeriko. Ọ hịrẹ nọ ịrẹsụ ataba Inebo, di o re ẹtẹ Ikanaani ọnị ọnị vaa sị yị Anisirẹrị nịnị.

⁵⁰ Ịrẹsụ ataba ọnọọ Imosiisi vee su tụ́ anka ọhụva anị Eerọnị me su, di e ne e tụ́ ịrẹsụ ataba Ịhọrị.

⁵¹ Ẹnẹyịmavara kà ọnị ọ vavọọ mẹ̀ wa agụvị ka ẹ jị ọnị ịrẹka aha enyi Imeribaana gụrị Ịkẹdẹsị ịnị ụnọmị Izini. Ẹnịnị ẹ yị sị ụbanyị yị ọnị eyi aza.

⁵² Aha ẹnẹẹnẹ Imosiisi vaa ya re ẹtẹ ọnọọ nị. Ọ yị vaa ngụ ịzị ọnị aa sị yị Anisirẹrị nịnị.