Iwe Ọhụhị Imosiisi ana aa hị́ Ọyịvatụrọda 31 - IWE ỌNỊNỊ

Ijosuwa ộ dọ Imosiisi ịrẹsụ

¹ Imosiisi ộ kà ịrẹyị yị avaba Anisirẹrị

² Ọ kà ọnị ọ sị gụ ịrayị ẹchẹhị tụra oohu. Ọnị ẹ yị kụkụ zụ vị ọdọvịdị ẹnịnị. Ẹnẹyịmavara ọ kà a yị ọnị ka ọnị ẹ yị vaa jịnẹ irehu Ijodani na akẹnẹ.

³ Ama Ẹnẹyịmavara ana vị Ohomorihi ẹnịnị vaa dọ ọvịdị ẹnịnị jịnẹ tụ akẹnẹ. Dị ọnị ụvọta vu avaba anẹkụra ana ra hi ịzọọ ẹtẹ agụvị dị ọ dọ wa ẹtẹ yị Anisirẹrị nịnị. Ijosuwa ana vị ọdọvịdị ẹnịnị ọwọọwa vaa dọ ọvịdị ẹnịnị jịnẹ tụ akẹnẹ enyi anka Ẹnẹyịmavara mẹ kà a.

⁴ Ẹnẹyịmavara vee vu anẹkụra ẹnẹẹ ẹtẹ anka ọ mẹ mẹ̀ Anamọrị nịnị ne beri Isihoni ọnịrị Ọgị ana vị ohinọyị ẹnịnị.

⁵ Ẹnẹyịmavara vaa sị wa nyị ẹbẹẹba ẹnịnị. Ọ kà e vee vu ọnịvị ẹnịnị ẹtẹ anka ọnị mẹ mẹ̀ ọda yị wa nị.

⁶ Ọ kà ẹ̀ nyị ọtụtụrụma, dị ẹ̀ sị ayị ẹnịnị vị ọnya ẹtẹẹtẹrẹ. Asị e hí angwa ọnịvị ẹnịnị agụvị ka ọnị ana vị Ohomorihi ẹnịnị vaa ya pe wa. Ọnị ẹ yị vaa hụrẹ wa ụvọ

⁷ Ịjọnọọ, dị Imosiisi hị́ Ijosuwa eyi avaba Anisirẹrị nịnị, dị ọ̀ kà yọ ka ọ̀ nyị ọtụtụrụma, dị ọ̀ sị ayị vị ọnya ẹtẹẹtẹrẹ; ka ọnị ọ vaa kụ Anisirẹrị nịnị na dọ ẹtẹ ọnị Ẹnẹyịmavara hị́ eku anị yị ohiku ẹnịnị nị.

⁸ Asị e hí angwa ọnịvị ẹnịnị agụvị ka Ẹnẹyịmavara vaa dọ ọvịdị ẹnịnị na ngụ ịzọọ. Ọ vaa ya pe wa, ọ̀ yị vaa hụrẹ wa ụvọ.

Ọyịkà iwe ọda ịnị ịnọyị

⁹ Dị Imosiisi chẹrẹ ọda ẹnẹnị tịtẹ, dị ọ̀ sị yị ohirẹsụ irehi Ohomorihi nịnị ana vị ezi Ireevi, ana sị eyi pe apoti oto Ẹnẹyịmavara ọnịrị ọdọvịdị Anisirẹrị nịnị.

¹⁰ Imosiisi ộ mẹ̀ ọda yị wa ka ọzẹtẹ ịrayị ịhịmba-ịhịmba ẹ va hụụnị ụta ọnị aa rị wa ịnị ụmẹ Eche Ajẹngụ.

¹¹ Za a ịrịka yị avaba Anisirẹrị ẹ̀ẹ va hẹkẹ Ẹnẹyịmavara Ohomorihi ẹnịnị ịzị a nyị ka aa ahẹkẹ ẹ.

¹² Hị́ avaba anọrụ, anẹẹ, ezweyi ọnịrị azọga ana ra ịnị ẹkụra ẹnịnị, agụvị avaba aza ẹ wụ́ ịrẹyị ọnọọ, dị ẹ yẹ a mẹẹ sị ụbanyị yị Ẹnẹyịmavara Ohomorihi ẹnịnị, dị ẹ sị ịzẹyịza saasa ịrẹyị anị.

¹³ Ịnị oze avọọ evere ẹnịnị ẹ yị vịdị wụ ọda Ẹnẹyịmavara Ohomorihi ẹnịnị vaa wụ, dị ẹ yẹ a mẹ vọrọ ka saasa a ịnị avaba ụmẹ ọnị ẹnịnị ẹ sị ra ịnị ẹtẹ ọnị ẹ yaa vaa jịnẹ tụ akẹnẹ Ijodani.

Ịrẹyị ọdịrẹma ọnị Ẹnẹyịmavara kà yị Imosiisi

¹⁴ Ẹnẹyịmavara ộ kà yị Imosiisi ka ẹ yị jẹẹ di o su. Agụvị avọọ ọ sị Ijosuwa vẹ ịnị ajẹngụ anị, dị ọnị ọ nyị ọ ọdọvịdị Anisirẹrị nịnị. Dị Imosiisi ọnịrị Ijosuwa ngụ ịnị ịnẹ ajẹngụ Ẹnẹyịmavara nị.

¹⁵ Ẹnẹyịmavara ộ sị ẹngụ anị zụ ịnị eguhi ọdẹngụ ịrẹsụ oze ana aā zịị ngụ ajẹngụ anị.

¹⁶ Dị ọ kà yị Imosiisi ka ẹ yị jẹẹ di ohiku ẹnịnị ẹ dọ ọzọga. Ịrẹma ọnị o wusu, Anisirẹrị nịnị vaa va ịrẹma anị na hẹkẹ ori anẹkụra ịnị ẹ yaa va ngụ. Dị ẹnịnị ẹ yị mẹ ịzẹyịza hi ọnị, dị ẹ sị ahụ jịnẹ oto ọnịrị wa mẹ yị ẹngụ nị.

¹⁷ Ẹnịnị ẹ̀ẹ vavọọ mẹ, Ẹnẹyịmavara kà ọnị vee du ayị hi wa, di o yi wa tịtẹ, di e vu wa ẹtẹ. Ịrẹyị odivi-odivi vee tu wa, dị ẹ vaa yẹ ka ịsa ẹnẹnị vị enee tu ẹnị agụvị ka ọnị ọ sị va ịrẹma ẹnịnị.

¹⁸ Ọnị ẹ yị vaa gụ wa ụvọ agụvị ka ẹ raà mẹ̀ ebira odivi, dị ẹ yaa hẹkẹ ori anẹkụra ẹtẹ ẹnẹẹ.

¹⁹ Chẹrẹ ahẹ ọnọnị tịtẹ, zụ yị Anisirẹrị nịnị, dị ẹẹ jị ọ. Ahẹ ọnọnị vaa vị ivenu anị tụra wa ịrẹsụ.

²⁰ Ẹnẹyịmavara kà ọnị vaa kụ́ wa nọ ịnị ẹtẹ ozoza ọnị ọnị wo oto anị yị ohiku ẹnịnị. Ịzọọ ẹ vaa nyị avaba ịsọyịrị ọnị e yee si. Ẹ vaa ra ẹhẹ ana rọ wa ẹngụ. Ama ẹ vaa sị eyi wụ́ ọnị, di e yi oto ọnị ọnịrị wa mẹ̀, dị ẹ varẹma na hẹkẹ ori nịnị.

²¹ Ịjị ọnị ịrẹyị odivi-odivi ee tù wa, a vaa jị ahẹ ọnọnị ana vaa vị ivenu tụra wa ịrẹsụ. Evere ẹnịnị e yi vee hi ayị anị, Ẹnẹyịmavara kà ọnị ọ yẹ ịsị ẹ sị ayị tụ́ ka ẹnị vaa mẹ̀, dị ọnị hyakụ vaa kụ wa vẹ ịnị ẹtẹ ọnị ọnị wo oto anị ka ọnị aa sị yị wa.

²² Ịhyọnịhyọnọọ, Imosiisi chẹrẹ ahẹ ọnọọ tịtẹ, dị ọ zụ ọ yị avaba Anisirẹrị nịnị nị.

²³ Ẹnẹyịmavara ộ kà a Ijosuwa ozi Inuni ka, ọ nyị ọtụtụrụma, ayị anị ọ vị agụvị ka ọnị ọ vaa Anisirẹrị nịnị nọ ịnị ẹtẹ ọnị ọnị wo oto anị yị wa. Ọ kà ọnị vaa ya pe Ijosuwa.

²⁴ Imosiisi ộ chẹrẹ avaba ọda Ẹnẹyịmavara bemi-bemi tụ́ ịnị iwe.

²⁵ Ịjị ọ̀ọ raà chẹrẹ ẹ ta, dị ọ kà yị Anireevi nịnị ene si eyi pe apoti oto Ẹnẹyịmavara kà,

²⁶ ẹ sị iwe ọda Ohomorihi ọnọnị dị ẹ sị tụ́ akaha apoti oto Ẹnẹyịmavara Ohomorihi ẹnịnị, agụvị ọ vị ịrẹyị ivenu tụra aza anị ịrẹsụ.

²⁷ Imosiisi kà ọnị ọ̀ yẹ ayị ọkatẹngụ ẹnịnị. Ẹnịnị ệ mẹ̀ akamawụ hi Ẹnẹyịmavara eyi anị. Ọnị ọ yẹ ka ịrẹma ọnị ọnị wusu o ve divi huu nị.

²⁸ Imosiisi kà a hị́ avaba ọdọvịdị ịrẹsụ-ịrẹsụ ọnịrị ọdọvịdị ẹkụra nịnị gụ, ọvịdị anị dị ọnị ọ ka ịrẹyị ẹnẹnị yị wa. Ọnị vaa sị ẹbẹẹba ọnịrị ẹtẹ mẹ ivenu yị wa.

²⁹ Ọnị ọ yẹ ka ịrẹma ọnị ọnị wusu, ẹnịnị vee divi, di e yi avaba ịrẹyị ọnị ọnị ka yị wa tịtẹ. Ọ vavẹ ịrẹma ẹngụkata vee tù wa agụvị ka ệ mẹ̀ ịsa ana vị enyisi ana kụ́ Ẹnẹyịmavara ayị.

Ahẹ Imosiisi

³⁰ Ịjị avaba aza sị gụ, dị Imosiisi vatụra ahẹ ọnọọ jị́, di e batọ, dị ẹ wụ́ nị.