Iwe Ọhụhị Imosiisi ana aa hị́ Ọyịvatụrọda 3 - IWE ỌNỊNỊ

Anisirẹrị ộ nyị ẹbẹẹba ohinọyị Ọgị

¹ Ịrẹma ọnị ẹ raà wụ̀ Isihoni ọnịrị aza anị, dị ẹ va ịrẹsụ ka ẹtẹ Ịbasanị, dị Ọgị ana vị ohinọyị ẹkụra ọnọọ ọnịrị aza jịnẹ tụ ẹhẹ gẹ ịrẹkụ tu wa ẹkụra ana gụrị Edireyi nị.

² Ama dị Ẹnẹyịmavara kà yị Imosiisi ka asị ẹnịnị hí angwa anị, ka ọnị aa sị ọnịrị aza anị ne beri ẹtẹ anị yị ẹnịnị nị. Dị ọ kà ẹnị ẹ mẹ̀ wa ịsị ẹnị mẹ̀ Isihoni ohinọyị Anamọrị ana ya Ịhẹsịbọnị.

³ Ịzẹyịza dị Ẹnẹyịmavara sị Ọgị ohinọyị Ịbasanị ọnịrị aza anị chire ẹnị ụvọ, dị ẹnị wụ̀ avaba ẹnịnị bemi-bemi nị.

⁴ Dị ẹnị dọ wa avaba ẹkụra ọbanyị-ọbanyị ẹnịnị ene tụ́ ẹbẹẹta nị. Avọọ ẹnị mẹ̀ dọ wa avaba ẹtẹ Arigobi ịzị Ọgị ohinọyị Ịbasanị ya aa mẹ̀ ịjọva anị nị.

⁵ Ẹnịnị ẹ̀ rị avaba ẹkụra ọbanyị-ọbanyị ẹnịnị ana aa jị ọvọ ana nẹba kara, ana sị a sị ọvọrịvọ enyusẹ za wa ịrẹma oze ẹkụra anị. Avọọ ẹ̀ mẹ rẹ rị ẹkụra eweyi-eweyi ọnị ọza ẹ yị jị ọvọ kara nị.

⁶ Ẹnị vị ana nyayịnẹ du ẹkụra ẹnẹẹ ha, dị ẹnị wụ́ anọrụ ọnịrị anẹẹ beri ezweyi anka ẹnị mẹ yị Isihoni ohinọyị Ịhẹsịbọnị.

⁷ Dị ẹnị kụ́ ịsụpa ọnịrị ọnya ẹnịnị nị.

⁸ Ẹtẹ ọnị Isihoni ọnịrị Ọgị vị ohinọyị anị vana kwẹẹtẹ hụrị ẹtẹ Anamọrị akẹnẹ Okuha Ịjọdanị ẹyị ịzị ọyịị̄ zị vẹ. Dị ọ gana hụrị upoporo Arinọnị eyi ụvẹtẹ na ngụ ataba Ihamọnị eyi ẹbẹẹba. Avaba ẹtẹ ọnọọ Anisirẹrị dọ wa nị.

⁹ (Anisirẹrị vana hị́ ataba Ihamọnị ọnị Anisidoni nịnịị̄ hị́ Isiriyọnị, dị Anamọrị nịnị ẹnị raa hị́ ọ Iseniri nị.)

¹⁰ Anisirẹrị ệ dọ avaba ẹtẹ ọnị Ọgị ohinọyị Anịbasanị nyị. Avaba ẹkụra ọbanyị ene hi ịrẹsụ ataba, avaba ẹtẹ Igiriyadi, ọnịrị Ịbasanị hùuu na ngụ Isareka ọnịrị Edireyi.

Ọgị, Ajịmasị ọdịrẹma

¹¹ Ọgị ohinọyị Ịbasanị ọ̀ vị ọdịrẹma ịnị evere ajịmasị anọrụ ana a hị́ Irehwayimi nị. Ịvẹẹdị anị vana a sị enyusẹ-enyusẹ mẹ̀. Ộ gọdọ ahụ ẹwụrẹta, dị ọ̀ gana ahụ ịhịnọnyị nị anka a mẹẹ mọ ụgọdọ ịjị ọnọọ. Ịvẹẹdị anị yị yịị ịnị ẹkụra Ịraba pooro tu ajịnị.

 ga ẹtẹ ana ya eyi ịzị ọyịị̄ zịị hụrẹ

¹² Ịjị Anisirẹrị raa dọ avaba ẹtẹ ta, dị Imosiisi ka evere Irubẹnị ọnịrị Igadi ẹ sị ẹtẹ hụrẹ ẹbẹẹba ẹkụra ana a hị́ Aroyeri ana gụrị irehu Arinọnị ọnịrị achẹva ẹtẹ beri ẹkụra ẹbanyị Igiriyadi.

¹³ Ahẹva ẹtẹ Igiriyadi ana vọ ọnịrị avaba ẹtẹ Arigobi ọnị Ọgị vị ohinọyị anị vị ọnị ọ sị yị Ịmanasẹ. (Ịrẹha ọsa ana a rẹ hị́ Ịbasanị ọ vị Irehwayimi.)

¹⁴ Abara Ija ana vị evere Ịmanasẹ ệ si avaba ẹtẹ Arigobi huu na ngụ ẹgẹ Igesu ọnịrị Imaakati. Ịzị ẹ̀ ra ịnị Ịbasanị anaā hi Ihavoti Ịjarị vị ẹnẹ ẹ̀ sị ịrẹha ada ẹnịnị Ịja yị. Avọọ a kụkụ aa hị́ ịzọọ pooro ve tụ́ ajịnị nị.

¹⁵ Imosiisi ộ sị Igiriyadi yị aza Imakiri.

¹⁶ Ịzị ẹ vọ ịnị ẹtẹ Igiriyadi hụrẹ upoporo Arinọnị (ana ịnị akakana anị vị ẹgẹ) na ngụ ẹkụra anaā hị́ Ịjabọkị ana vị ẹgẹ Amọnị vị ọnị Imosiisi sị yị Ịrẹsụ Irubẹnị ọnịrị Ịgadị.

¹⁷ Ẹtẹ ẹnịnị ọ za inozi ana kara Ijodani. Ẹgẹ anị eyi ịzị ọyịị̄ ngụ ẹtẹ vị Òkū Igariri na ngụ Òkū Anọ ana gụrị ataba Ipisiga eyi ịzị ọyịị̄ kwẹẹtẹ.

¹⁸ Imosiisi me re jị uwe ẹtẹ ọnọọ ta, dị ộ ka yị evere Irubẹnị ọnịrị Igadi ne beri achẹva Ịmanasẹ ka: Ẹnẹyịmavara ana vị Ohomorihi ẹnịnị ộ raa sị ẹtẹ ọnọnị yị wa. Avaba Isoja ẹnịnị e tenyi ẹngụ zi ịrẹkụ ẹnịnị ẹ jịnẹ irehu Ijodani, Isoja nịnị e hi ọvịdị.

¹⁹ Imosiisi ka ọnị ọ yẹ ka ịsụpa ẹnịnị ọ rụrụ. Agụvị avọọ, ese ẹnịnị ọnịrị ezi ẹnịnị ne beri ịsụpa ẹnịnị e hi ịnị ẹkụra ẹbanyị-ẹbanyị ọnị ọnị vaa sị yị wa.

²⁰ Isoja ẹnịnị vaa saasa Anisirẹrị ana vọ pooro dị ẹnịnị ẹ dọ avaba ẹtẹ ọnị Ẹnẹyịmavara ana vị Ohomorihi ẹnịnị àa sị yị wa akẹnẹ irehu Ijodani eyi ọsa. Ịrẹsụ ọzọza ọ sị ẹtẹ nyị, dị isoja ọzọza vavẹ ịnị ẹtẹ anị.

²¹ Dị Imosiisi kà Ijosuwa ọnị ụvọta anị ò re avaba ịsị Ẹnẹyịmavara mẹ ohinọyị ẹẹva ẹnẹẹ. Avọọ ọ mẹ rẹ vaa mẹ Anẹkụra ana vọ ene hi akẹnẹ Ijodani ịzị ẹ ya nọ nị.

²² Asị ẹ hí angwa ẹnịnị agụvị ka Ẹnẹyịmavara ana vị Ohomorihi ẹnịnị vaa kụ́ ịrẹkụ yị wa.

Ohomorihi ệ yị zẹ ka Imosiisi ọ ngụ Ịkanaanị

²³ Ịnị ụmẹ ọnọọ ộ dà ịpẹ yị Ẹnẹyịmavara, dị ọ kà,

²⁴ Taarụ! Ẹnẹyịmavara Ohomorihi, ozi ahụ awụ ộ yẹ ka u nyima kẹnẹ aa sị ọnị ịsa ọbanyị-ọbanyị ọnịrị ohyozirenu ọnị u vaa mẹ zụ̀ ọnị aanị nị. Ẹ yị nyị ori ọnyọọnyị ẹbẹẹba a vị ịrẹsụ ẹtẹ ana zụ mẹ avaba ịsa avụna-avụna ọnị ọ raà mẹ.

²⁵ Ọ kà Ohomorihi ọ navọ ọnị ọ jịnẹ nọ akẹnẹ irehu Ijodani ne re ẹtẹ ozoza ene hi ịrẹsụ Ịrẹbanọnị ẹnẹnị.

²⁶ Ẹnẹyịmavara ộ kụ́ ayị hi ọnị agụvị ẹnịnị, di ô yi nị. Dị Ẹnẹyịmavara kà yị ọnị ka ó zee, asị ọnị vene họ̀ use.

²⁷ Di Ohomorihi kà a yị Imosiisi ka ọ hịrẹ nọ ịrẹsụ ataba Ipisiga, di o re eyi ẹbẹẹba, eyi ụvẹtẹ, eyi ịzị ọyịị̄ zị hụrẹ vẹ ọnịrị eyi ịzị ọyịị̄ zị ngụ ẹtẹ. Ọ nyayịnẹ re e ẹtẹẹrẹ agụvị ka ẹ yị vaa jịnẹ tụ́ akẹnẹ enyi ọnọọ.

²⁸ Ọ kà yị Ijosuwa, dị ọ tụ́ ọ ọtụtụrụma agụvị ka ọnị vaa kụ́ aza jịnẹ irehu Ijodani naa dọ ẹtẹ ọnị Imosiisi ee re avọọ nị.

²⁹ Avọọ, Imosiisi ọ jẹẹ ana va eyi ka ẹkụra ana hị́ Ịbẹtị Ịpẹyọ.