Iwe Ọhụhị Imosiisi ana aa hị́ Ọyịvatụrọda 29 - IWE ỌNỊNỊ

Oto ọnị Ẹnẹyịmavara mẹ̀ beri Anisirẹrị ịnị ẹtẹ Imowabi

¹ Ẹsẹnị ẹ vị ebira ọnị Ẹnẹyịmavaraa kà yị Imosiisi ka Anisirẹrị ẹ̀ mẹ agụvị ọta ọnị ọnịrị wa mẹ yị ẹngụ ịnị ẹtẹ Imowabi nị. Ịrẹyị ẹnẹnị vị irenyi ịsa ọnị ọ vịdị kà yị wa ịrẹsụ ataba Ịhọrẹbị.

² Imosiisi ô hị́ Anisirẹrị nịnị gụ, dị ọ kà; Eyi ẹnịnị ê re ịsị ọnị Ẹnẹyịmavara mẹ ohinọyị Anijipiti ọnịrị ọdọvịdị ẹnịnị ne beri avaba Ẹkụra ọnọọ.

³ Ẹnịnị ê re ẹngụkata odivi-odivi ọnịrị ịvọpa beri ohyozirenu ọbanyị-ọbanyị ọnị Ẹnẹyịmavara mẹ̀.

⁴ Booro ve tu ajịnị, Ẹnẹyịmavara ẹ yị zẹ ka eyi ẹnịnị o hweyi tu ọ.

⁵ Ịrayị ẹbẹẹva Ẹnẹyịmavara zụ ẹnịnị oze ịnị ụnọmị nị. Ịnị avaba ụmẹ ọnọọ achị ẹnịnị ọnịrị adava ẹnịnị e yi re vee bó za wa ẹngụ.

⁶ Ẹnịnị ẹ yị nyị ịbụrẹdị ana vọrọ ka ẹ rị a vị eche ana vọrọ ka e hu, ama Ẹnẹyịmavara ộ ọnẹẹ avaba ịsa ọnị ẹ yee si yị wa agụvị dị ẹ kọsẹ ka Ẹnẹyịmavara ọ vị Ohomorihi ẹnịnị nị.

⁷ Ịjị ọnị ẹ va ngụ ẹtẹ Imowabi, Isihoni ana vị ohinọyị Ịhẹsịbọnị ọnịrị Ọgị ohinọyị Anịbasanị ẹẹ gẹ ịrẹkụ tu ẹnị. Ama dị ẹnị nyị ẹbẹẹba ẹnịnị,

⁸ dị ẹnị dọ wa ẹtẹ ẹnịnị, dị ẹnị ga yị Evere Iruveni ọnịrị Igadi ne beri Ịmanasẹ nị.

⁹ Avọọ ẹnịnị ẹ saasa avaba ịrẹyị oto ọnọọ, dị ò zee yị wa ịnị ịsa tụra ịsa ọnị ẹ yaa mẹ̀.

¹⁰ Ajịnị avaba awụ nịnị ọ jẹẹ ọvịdị Ẹnẹyịmavara Ohomorihi ẹnịnị, avaba ẹnịnị azọkụ ọnịrị ọdọvịdị ne beri avaba anọrụ.

¹¹ Ezweyi, anẹẹ ọnịrị azọga ana ra vahụra wa. Azọga ẹnẹẹ aa da ọkụ, dị ẹ yaa da enyi yị wa nị.

¹² Ụ ya ịzẹnị ajịnị ka ẹwụrị Ẹnẹyịmavara Ohomorihi ọ mẹ ọkatịtẹ, dị wa hị́ eku tụ ọ ya ẹngụ.

¹³ Ẹnẹyịmavara vaa dọ ka aza anị ẹ vị nị, dị ọnị vị Ohomorihi ẹnịnị nị anka ọnị mẹ wo oto yị ohiku ẹnịnị, Abụrahamị, Ayiziiki, ọnịrị Ijekọvụ.

¹⁴ Imosiisi kà, ẹ yị vị Anisirẹrị nịnị ịnya Ẹnẹyịmavara aa mẹ̀ oto ọnịrị ịzẹzẹ ọnọnị yị.

¹⁵ Ẹ yị vị ẹnị ene hi ịzẹnị ajịnị kẹnẹ ịrẹyị ọnọọ za. Ọ za ezi a vana ma.

Ẹrị, Ajịnị ọnịrị ụhwọ Isirẹrị

¹⁶ Wâ yẹ ẹngụ ẹhẹ ọnị ị ra Ijipiti ọnịrị ị mẹmẹ para ẹkụra irenyi-irenyi hu va ngụ ịzị ị ya aanị.

¹⁷ Wê re ori ẹnịnị ẹnẹ ẹ sị ọchị ọnịrị ịrẹta bẹ̀, dị ệ sị isiriva ọnịrị igooru tu mẹ nyị ọza ịhyẹrẹ.

¹⁸ Re ka ẹ yị nyị ọnọrụ, a vị ọnyẹnẹẹ, a vị ovwoovu ọnyọọnyị, a vị ịrẹsụ ana ya ịzẹnị ajịnị ana va hụrẹ ịrẹma Ẹnẹyịmavara Ohomorihi ayị na hẹkẹ ori anẹkụra ẹnẹẹ. Re ka ẹ yị nyị ọza awụ nịnị ana vị ẹchịpa ọnyịrẹyị.

¹⁹ Re ka, asị a nyị ọza ịzẹnị ana wụ́ ịrẹyị ana za oto ọnọnị ajịnị, ene ro ka ọnị vaa ha ọnị ọ̀ọ sị ayị ọkatẹngụ aa mẹ ịsị ene ze e eyi udivi anị vaa mẹ ka aza ọyịza ọnịrị aza edivi e vu ẹtẹ vabẹ.

²⁰ Ẹnẹyịmavara ẹ yị vaa vagu ẹngụ ọza ọnọọ. Ọ nyayịnẹ vee du ayị hi ọ nị. Avaba odivi ana chẹrẹ tụ́ ịnị iwe ọnọnị vị ana vaa nọ ịrẹsụ anị pooro di o vu ẹtẹ saka-saka.

²¹ Ẹnẹyịmavara vaa sị ọ mẹ̀ apojuwe yị avaba ịrẹsụ ene hi Isirẹrị. Ọ vaa kụ́ akanya tu ọ anka avaba ozirenu ana saasa oto ana chẹrẹ tụ́ ịnị iwe Ẹnẹyịmavara anaa sị ịrẹyị anị zụ.

²² Ezi ịrẹma awụ nịnị ọnịrị anikinami ene hi aha ene noze vee re akanya ọnịrị ụya ọnị Ẹnẹyịmavara kụ́ tu ẹtẹ awụ nịnị.

²³ Ẹnẹyịmavara vaa sị ohuuru ọnịrị anọ du ẹtẹ awụ nịnị ha. Ẹ yị nyị ịsa ana zụ chire, dị ọ hyakụ va chị. Ẹ yị nyị avị ọnị ọza vee re ịzọọ. Ịzọọ vaa tụ́ osusu anka Isodọmị ọnịrị Igomora ne beri Adima ọnịrị Izeboyimi ọnị Ẹnẹyịmavara sị ọyịkụ-ọyịkụ vu ẹtẹ.

²⁴ Ịjọnọọ avaba anẹkụra ana vọ ịnị ẹhẹ vee họ̀ use ka sị ẹ vẹ dị Ẹnẹyịmavara maanị mẹ ẹtẹ awụ nịnị? Sị ẹ vẹ dị ọ maanị nyayịnẹ kụ́ ayị?

²⁵ Ohi anị vaa vị ka agụvị ka ẹnịnị ệ sị ahụ jịnẹ oto ọnị ẹnịrị Ohomorihi ohiku ẹnịnị mẹ̀ yị ẹngụ ịnị ụmẹ ọnị ộ sị kụ́ wa hụrẹ Ijipiti.

²⁶ Ệ hẹkẹ ori ọnị ẹnịnị ẹ yị vịdị hẹkẹ da. Ẹnẹyịmavara ô gu wa ka asị ẹ hẹkẹ ori ẹnẹẹ.

²⁷ Agụvị avọọ ayị kụ́ Ẹnẹyịmavara tu aza anị, dị ọ kụ́ akanya ana ya ịnị iwe ọnọnị tu ẹtẹ ẹnịnị nị.

²⁸ Ẹnẹyịmavara ô du ayị ẹtẹẹtẹrẹ hi wa, dị ọ kụ́ wa hụrẹ ẹtẹ ẹnịnị ne hi ikinamị ịzị ẹ ya va ngụ ajịnị nị.

²⁹ A nyị ịsa ẹnyị ọnị Ẹnẹyịmavara Ohomorihi sị tẹ̀ yị ẹyị aza: Ama ộ sị ọda anị zụ yị ka ẹnịrị evere ayị ẹ saasa pooro zịna-zịna.