Iwe Ọhụhị Imosiisi ana aa hị́ Ọyịvatụrọda 28 - IWE ỌNỊNỊ

Aha enee tu ọza ana saasa ịrẹyị Ohomorihi

¹ Imosiisi ộ kà a yị Anisirẹrị nịnị ka, ọ̀ọ na vị ka wáa wụ́ chire Ẹnẹyịmavara Ohomorihi awụ nịnị, dị ụ sị ịzẹyịza aa saasa ọda anị ọnị maa sịị yị wụ nịnị ajịnị aanị nị, Ẹnẹyịmavara Ohomorihi awụ nịnị vaa mẹ ka we huna avaba anẹkụra ana vọ hi ẹhẹ.

² Wàa saasa ịrẹyị Ẹnẹyịmavara Ohomorihi, avaba ọyịza ọnọnị vaa vị awụ nịnị.

³ Vị o vee zee yị wụ wàa yà ịnị ẹkụra nị vị ọ vee zee yị wụ wàa yà ịnị aarẹ nị.

⁴ Ẹnẹyịmavara vaa mẹ ka ò ze yi ezi ewu. Ịsị ịnị aarẹ awụ vaa mẹ ẹtẹẹrẹ. Imaaru awụ ọnịrị atẹmẹ awụ vaa rụrụụ hu avọọ.

⁵ Ịsị ịnị aarẹ ọnị ụ kụ tẹ vaa vị ọyịza, ịsọyịrị awụ vaa vị ọyịza.

⁶ Wàa yà ini eehi, wàa yà ẹẹhẹ, ịsa tụra ịsa ọnị ụ wàa mẹ, vi o vee zee yị wụ nị.

⁷ Ọnịvị awụ nịnị ana àa kwẹẹtẹ tu wu nịnị, Ẹnẹyịmavara vee hú wa ẹtẹẹ yị wụ nịnị. Ẹ vaa zi oze ọnyaa kwẹẹtẹ tu wu nịnị, ama oze ịhịmba e vee zwèe zị nị.

⁸ Ẹnẹyịmavara vaa mẹ ka ò ze yị wụ nịnị ịnị ụkọrọ awụ nịnị. Ụ vaa kụ ịsaa hi ini ụhwọ awụ nịnị, dị o hí ọ vaa mẹ ka ò ze yị wụ nịnị ịnị ẹtẹ ana aa sịị yị wụ nịnị aanị nị.

⁹ Wàa wụ́ chire Ẹnẹyịmavara Ohomorihi awụ nịnị, dị ụ waa mẹ avaba ịsa ọnị ọ mẹ ọda anị yị wụ nịnị nị, ọ vaa mẹ wụ nịnị aza anị, anka ọ mẹ̀ vịdị kà a.

¹⁰ Avaba anẹhẹ vee re e ka, Ẹnẹyịmavara ọ nyị wụ nịnị ka wa vị aza anị nịnị nị. Ẹnịnị vee hí angwa awụ nịnị.

¹¹ Ẹnẹyịmavara vaa mẹ ka wa ma ezi rụrụ nịnị, dị imaaru awụ nịnị rẹ rụrụ. Ịsị ịnị aarẹ awụ nịnị vaa mẹ ẹtẹẹtẹrẹ ịnị ẹtẹ ọnị ọ wo oto anị yị ohiku awụ nịnị ka ọnị vaa sịị yị wụ nịnị.

¹² Ẹnẹyịmavara vaa na oze irehi ọnị ọ kụ ịsa hi ẹbẹẹba, dị ọ zụ̀ orihii yị wụ nịnị, ọ vaa mẹ ka ò ze yị wụ nịnị ịnị avaba ụkọrọ ọnị ụ waa mẹ nịnị, dị ụ wa zụụ sị ịsaa rèré anẹkụra ọrụrụ-ọrụrụ nịnị, ama wẹ yị vaa dọ ọza ọnyọọnyị ịsaa rèré nịnị.

¹³ Ẹnẹyịmavara vaa mẹ wụ nịnị ọdọvịdị ịnị akakana anẹkụra ana vọ; wẹ yị vaa vị ọdịrẹma nịnị. Wàa sị ịzẹyịza saasa ọda Ẹnẹyịmavara ọnị maa sịị yị wụ nịnị ajịnị aanị, vị́ o vee zee yị wụ nịnị pooro nị, wẹ yị vaa hyẹdụ nịnị.

¹⁴ Ama a sị ụ na mẹ akamawụ, dị ụ wa ha hụụnị zi oze ọnyọọnyị ọsa, ọ̀ọ vị eyi ụvọrị, ọ̀ọ vị eyi ụvọha.

Ozirenu ana tụ́ hi anakamawụ

¹⁵ Ama wàa mẹ akamawụ hi Ẹnẹyịmavara Ohomorihi awụ nịnị, dị wẹ yị sị ịzẹyịza saasa ọda anị ẹnẹnị, ọnị maa mẹẹ yị wụ nịnị ajịnị aanị nị, avaba ozirenu ẹnẹnị vaa vẹ ịrẹsụ awụ nịnị.

¹⁶ E yi vee zozaa yị wụ nịnị wàa ya ịnị ẹkụra, e yi vee zozaa yị wụ nịnị ịnị aarẹ.

¹⁷ E yi vee zozaa yị ịsị ụ kụ́ tẹ nịnị ọnịrị ịsọyịrị awụ nịnị.

¹⁸ Ẹnẹyịmavara vaa sị ụyaa rị wụ nịnị, dị ọ mẹ ka a sị u re ozi ma puuru nịnị. Ịsị ịnị aarẹ awụ nịnị ẹ yị vaa mẹ puuru. Imaaru awụ nịnị ọnịrị atẹmẹ awụ nịnị e yi vee re ezii ma puuru.

¹⁹ Wàa yà ini eehi, wàa yị ẹhẹ, e yi vee zozaa yị wụ.

²⁰ Wèe yi Ẹnẹyịmavara tịtẹ, dị ụ waa me ịsa odivi nị, Ẹnẹyịmavara vaa kụ ẹngụkata odivii tu wụ, dị ọ và ẹhẹ awụ zi. Ẹngụkata u vee re ịnị avaba ịsị ụ wàa mẹ nị.

²¹ Ẹnẹyịmavara vaa kụ ụkụụ tù wu nịnị, dị ọ wụ̀ wụ nịnị ha hụụnị ẹtẹ ọnị ụ waa nọ naa ra nịnị aanị.

²² Ẹnẹyịmavara vaa sị ụyaa rị wụ nịnị, dị ọ mẹ ka ụkụ ọ̀ za wụ nịnị. Ẹngụ awụ nịnị vee wù, dị ọvanggoro za wụ nịnị. Ẹnẹyịmavara vaa mẹ ka ọyị ọ̀ jị, dị ahị ịrịịra aa tụ, dị o vu avaba ịsa ịnị aarẹ awụ nịnị ẹtẹ. Avọọ ẹngụkata odivi ọnọnị mẹ vaa yàrị ẹwụ nịnị pooro, di u sú va ha nịnị nị.

²³ Orihi ẹ yị vaa zụ̀ụ yị wụ nịnị, eteesu awụ nịnị vaa katẹngụ anka enyusẹ.

²⁴ Asị chọmọ oni orihi vaa zụ̀, Ẹnẹyịmavara vaa mẹ ka edudu oo chire. Avọọ edudu ọnọọ mè vee chire ku wu nịnị hụụnị eguhi pooro di o vu wu nịnị ẹtẹ nị.

²⁵ Ẹnẹyịmavara vaa mẹ ka ọnịvị awụ nịnị ẹ̀ nyị ẹbẹẹba awụ. Ụ vaa zi oze ọnya nọ ịrẹkụ ọnịvị awụ, ama dị ẹ dụ wụ zi oze ịhịmba. Avaba anẹhẹ vee re ịsị ẹ mẹ tù wu nịnị, dị angwa hi wa.

²⁶ Inomi nịnị ẹnịrị uye ịnị avị ẹ vaa rị oku awụ nịnị nị. Ẹ yị vaa nyị ọza ana vaa dụ wa kwooze.

²⁷ Ẹnẹyịmavara vaa mẹ ka ịtahụ ọ̀ tụra wụ nịnị anka ọ mẹ̀ mẹ Anijipiti nịnị ịrayị ọnọọ. Ọ vaa mẹ ka ẹngụ awụ nịnị ọ̀ vị ịtahụ-ịtahụ. Ịtahụ vaa chakaa ku wu ẹngụ nịnị, dị ẹngụ aa hụ́ wụ nịnị. Ịtahụ awụ nịnị ẹ yị vaa nyị ahọnọ.

²⁸ Ẹnẹyịmavara vaa tụ wụ nịnị ụ̀rà; o vee gu wu nịnị eyi, dị ọ và wụ nịnị zi.

²⁹ Ọọdụ goro-goro vị ọnị ụ vaa sị ụvọ si oze nịnị anka ogweyi avọọ. Avaba ịsị ụ wàa mẹ, e yi vee zozaa yị wụ. Aza vị ana vaa mẹ ẹvayaa yị wụ, dị ẹyaa sị ụkata-ụkataa dọ wụ ịsa. We yi vee re ọzaa gụ wụ ụvọ nịnị.

³⁰ U vee re ọnẹẹ ka waa nyị ọ, dị ọza ẹnẹsa sị ụkata-ụkata pe e sụ̀. Ụ vaa dà irehi, ama wẹ yị vaa ra ịnị anị. U vee chire ọchị ịvayịnị, ama wẹ yị vaa rị ẹtụtụ anị.

³¹ A vaa wụ̀ imaaru awụ eyi awụ, ama wẹ yị vaa rị ini uye anị. A vaa yà eyi awụ dị a sị ịkẹrịkẹtẹ awụ, dị ọza ẹ́ ma vana và a ịrẹma va wụ. Ọnịvị awụ nịnị vaa kụ atẹmẹ awụ di u we yi re ọza gụ wụ ụvọ.

³² Aanị ụ me vee re ẹtẹ dị a za ezi anọrụ awụ ọnịrị anẹẹ ọrịhị aa nọ ẹkụra ọsa nị. U vee zi wa eyi eyinị-eyinị, di o du wu eyi, ama ẹ yị nyị ịsị ụ vaa zụ mẹ ka a sị a kụ wa na.

³³ Ụ vaa kụ ịrụkụ nịnị ẹtẹẹtẹrẹ, ama anẹkụra ọsa ẹ vaa rị avaba ịsa ọnị ụ mẹ hụụnị aarẹ awụ nịnị. Ẹnịnị vị ana vaa mẹ ẹvayaa yị wụ nịnị, dị ẹyaa chamayịị wụ pooro.

³⁴ Ụya ọnọnị ọnị ụ vaa rị nịnị vaa mẹ ka à sị ụ kụkụ yẹ ịsị ụ waa mẹ nịnị.

³⁵ Ẹnẹyịmavara vaa mẹ ka ahụ awụ nịnị ẹ̀ jị ikenebe anaā zị ọza ẹtẹẹtẹrẹ, dị ọza ẹ yị zụ mẹ̀ ẹ. Ịtahụ vaa tụraa hi wu nịnị ẹngụ hụụnị ịrẹsụ va ngụ ịnị ahụ.

³⁶ Ẹnẹyịmavara vaa dụ ẹwụrị ohinọyị awụ nịnị nee hi ẹkụra ọsa, ịzị ẹwụrị ohiku awụ nịnị ẹ̀ yị vịdị ra da. Ụ vaa yà ịzọọ, dị ụ wa hẹkẹ ori ana a sị ọchị ọnịrị ịrẹta bẹ.

³⁷ Anẹkụra ana vọ èe re ịsị ẹ mẹ wụ nịnị, ọ vaa za waa zizi ẹtẹẹtẹrẹ. Ẹnịnị vị ana vaa kụ́ wụ isiya, di e yee nyị wu nini unyi.

³⁸ U vee chire ịsa tatarata tụ ịnị aarẹ ama dị a hịka ịsa kiiki aanị u re hụụnị anị nị; agụvị ka akụvarịva vị ene vee du waa ha.

³⁹ Ụ vee chire ọchị ịvayịnị di u tenyi hi ọ, ama we yi vee re ẹtụtụ ẹnịnị kụụ gụ, dị ụ wa va sị me eche hú; agụvị ka ukukurumi vị ana vaa rị ẹtụtụ anị.

⁴⁰ Ọchị orivi vaa hụụ hi ịnị avaba ẹtẹ awụ nịnị, ama wẹ yị vaa nyị angwẹ orivi nịnị, agụvị ka avaba ẹtụtụ anị vị ana vaa wọ̀rọ̀ ọ vaa ha.

⁴¹ Ụ vaa ma ezi ọnọrụ ọnịrị anẹẹ nịnị, avaba ẹnịnị vaa jị wụ ụvọ, agụvị ka vị a vaa kụ́ ịrẹkụụ vẹ, dị a za wa ọrịhị ne hi ẹkụra ọsa nị.

⁴² Akụvarịva nịnị vị ana vaa rị avaba ọchị awụ nịnị ọnịrị ịsa ọnị ụ mẹ tụ ịnị aarẹ nịnị.

⁴³ Anẹkụra ọsa ana ra ịnị akakana awụ nịnị vị ana va nyị ụkataa hu avọọ hu avọọ, ama dị ẹwụ nịnị tangwa aa tụ ọkụmị.

⁴⁴ Ẹnị ẹ vaa nyị ẹkẹhị ene e vee sii rere wu nị. Wẹ yị vaa nyịị rere wa. Ọ̀vavịrẹma anị, dị ụ kụkụ vị ozi ahụ ẹnịnị.

⁴⁵ Agụvị ka wẹ yị wụ́ chire Ẹnẹyịmavara Ohomorihi awụ nịnị, dị ụ waa saasa avaba ọda ọnị ọ sị yị wụ nịnị. Aanị avaba ozirenu ẹnẹnị mẹ̀ vaa vẹ ịrẹsụ awụ nịnị, dị ẹwụrị ọ aa zịị pooro di u we vu ẹtẹ nịnị nị.

⁴⁶ Ẹnị ẹ vaa sị zụ ka Ohomorihi ọ sị ọkarẹyị mẹ yị ẹwụrị ezi ewu nịnị pooro zịna nị.

⁴⁷ Ẹnẹyịmavara ộ zị avaba oze mẹ ka ò ze yị wụ nịnị, ama wẹ yị zẹẹ ka wa sị ayohine ọnịrị ịrajẹ hẹkẹ ẹ nịnị.

⁴⁸ Agụvị avọọ, ụ vanaa hẹkẹ ọnịvị awụ nịnị ọnị Ẹnẹyịmavara vaa và eyirazịị ka wụ nịnị. Avaba ịsa vị ana vaa zwọ wụ nịnị; ụngwẹ ọnịrị onyi vaa kụ wụ nịnị, di u waa zị ahwaahụ nịnị. Ẹnẹyịmavara vaa sị ụyaa rị wụ divi-divi pooro di ọ̀ vu wu nịnị ẹtẹ.

⁴⁹ Ẹnẹyịmavara vaa hị́ anẹkụra ọnya hụrẹ aha ẹnẹẹnẹ vẹ, dị ẹ va eyirazị kà wụ nịnị. Anẹkụra ọnị wẹ̀ yị wụ ẹkụra ẹnịnị ẹ vị nị. Ẹ vaa ngụ wụ nịnị chire anka ọkasịmẹ mee che uye obonobono avọọ.

⁵⁰ Aza edivi hangụ-hangụ anẹkụra ẹnẹẹ vị nị. Ẹnịnị ẹ yị vaa sị ụbanyịị yị azọkụ; ẹnịnị ẹ yị vaa vayịị yị ezweyi.

⁵¹ Ẹnịnị vaa kụ avaba ịsụpa awụ nịnị ọnịrị ịsa ịnị aarẹ awụ nịnị, dị ụngwẹ wụ̀ wụ nịnị va ha.

⁵² Ẹnịnị vaa kụ́ ịrẹkụụ ngụ avaba ẹkụra awụ nịnị, di e wú avaba ọvọ ana a jị kara awụ nịnị. Ọvọ ẹnẹẹ ụ sị ayị tụra ka ẹ yị vaa zẹẹ ka à nyị ịsị ẹ mẹ̀ wụ nịnị nị. A vaa kụ́ ịrẹkụụ ngụ avaba ẹkụra ene hi ịnị ẹtẹ ọnị Ẹnẹyịmavara aa sị wụ nịnị aanị.

⁵³ Ịjị ọnịvị awụ nịnị ẹ̀ẹ maanị kụ́ ịrẹkụ vẹ, dị ẹ ta kara awụ nịnị okiri-okiri nị, u vee sì ịsọyịrị nịnị pooro nee tu ka wa kụkụụ rị ezi ẹnẹ Ẹnẹyịmavara Ohomorihi awụ sị yị wụ nịnị.

⁵⁴ Ọza hẹẹ anaā ngụ ayị ọzaa hu ịnị ẹngụ awụ nịnị ẹ yị hyakụ vaa dọ ka ọnị ọ̀ da ịsọyịrị yị ọyịnyara anị, ọ̀ọ vị ose, àa vị ezi anị ana vọ.

⁵⁵ Ẹ yị vaa da uye ezi anị ọnị ọ wụ aa rịị ọzọnyị-ọzọnyị ẹnịnị, agụvị ka ẹ yị nyị ịsị ẹ kụkụ vọ yọ ọnị ọ vaa rị. Ịrẹkụ ọnị ọnịvị kụ va ta kara wụ nịnị ọ vavọọ mẹ̀ ẹ nị.

⁵⁶ Ọnẹẹ ana nyị ebira hẹẹ, dị ọọ̄ ngụ ayị ọzaa hu ịnị ẹngụ awụ nịnị, ne tu ka ẹ yị hyakụ nyayịnẹ sị ahụ hí ihine, ẹ yị hyakụ vaa dọ ka ọnị ọ da ịsọyịrị yị ọva anị. Ẹ yị hyakụ va dà ịsaa yị ozi ọnọrụ anị ọnịrị ozi ọnẹẹ anị.

⁵⁷ Ó vee weree rị ụvị oze anị ọnịrị ezi ọnị ọ ma dị ẹ yị dà yị ọza agụvị ka ẹ yị nyị ịsị ọsa ọnị ọ kụkụ nyị. Aanị iruwa ọngwọọngụ mẹ va za wụ nịnị agụvị ọnịvị awụ nịnị ana va kara wụ nịnị okiri-okiri nị.

⁵⁸ Wẹ̀ẹ yị sị ịzẹyịza saasa avaba ọda ọnọnị ana chẹrẹ tụ ini iwe ọnọnị aanị, di u wẹ̀ yị sị ụbanyị yị ịrẹha Ẹnẹyịmavara Ohomorihi awụ nịnị nị, Ịrẹha anị ộ nyị ụbanyị ẹtẹẹtẹrẹ.

⁵⁹ Ẹnẹyịmavara vaa kụ ụkụ ẹnẹ ẹ̀ yị ma wụ ahọnọ ọnịrị ụkụ edivi-edivi anaā daa gẹ ọzaa tu ẹwụrị ezi ewu nịnị. Ọza ẹ yị va zụụ za a jẹẹ.

⁶⁰ Ọ vaa mẹ ka ụkụ edivi-edivi oni u re nịnị ịnị ẹtẹ Ijipiti ẹ̀ za wụ nịnị. Ẹwụrị ọ, ọ vaa vị nịnị paa nị.

⁶¹ Ọ vaa mẹ ka ụkụ irenyi-irenyi ọnịrị ụkụ anaā daa gẹ ọza ọnị ọza ẹ yị chẹrẹ tụ ini iwe ọda ọnọnị ẹ̀ za wụ nịnị. Avọọ Ẹnẹyịmavara mẹ̀ vaa sị ụyaa rị wụ nịnị pooro di u we su ha nịnị nị.

⁶² Ọ̀ọ daka vị ka wâ vịdị rụrụ nịnị anka ụzọmị nịnị, aza chee ọ̀ vanaa vẹtẹ ịnị awụ nịnị nị, agụvị ka wẹ yị wụ́ chire Ẹnẹyịmavara Ohomorihi awụ nịnị.

⁶³ Ó mè hine Ẹnẹyịmavara dị ọ mẹ ka ò ze wụ nịnị, dị ụ wa rụrụ nịnị, avọọ gẹdẹ-gẹdẹ o mè re vee hine e ọyị vu wu nịnị ẹtẹ, dị ọ wụ̀ wụ nịnị va ha nị. Vị e vee hu wu nịnị hụrẹ ẹtẹ ọnị ụ waa naa ra ịnị anị nịnị aanị anka a meē hu ọchị ọnịrị ẹpaa hụrẹ ẹtẹ avọọ nị.

⁶⁴ Ẹnẹyịmavara vaa gara wụ nịnịị hi ịnị akakana avaba anẹkụra ana vọ hi avaba ẹhẹ. Ụ vaa yà ịzọọ dị ụ waa hẹkẹ ori ana a sị ịrẹta ọnị ọchị mẹ. Ẹ yị nyị ọza awụ nịnị, àa vị ohiku awụ nịnị ana vịdị yẹ ori ẹnẹẹ da.

⁶⁵ Wẹ yị vaa nyị ẹngwọọrọ nịnị aha ọnyọọnyị ịnị akakana anẹkụra ẹnẹẹ. We yi vee re aha yaa tụ́ ụhwọ́ nịnị. Ẹnẹyịmavara vị ana vaa mẹ ayịị hụrẹ wụ ịnẹ nịnị. Wẹ yị kụkụ vaa nyị ọyịtụreyi nịnị, dị ẹhẹ awụ nịnị kuku du wu eyi.

⁶⁶ U vee hí angwa ka aza aa vaa wụ̀ wụ nịnị pooro kẹnẹ nị. Ayị vị ana vaa hụrẹ wụ ịnẹ nịnị ọọdụ ọnịrị ịrahụ. Ẹwụrị ayịhụrịnẹ isu ọ vaa vị nị pooro kẹnẹ nị.

⁶⁷ Ẹnẹnẹ, dị ụ ka aayẹ oruva ò tù, oruva, dị ụ ka, aayẹ ahịka ẹnẹnẹ yị. Ayị awụ nịnị vị ene vee jị bii-bii angwa òo mee hí wu, agụvị ịsa oni u wee re.

⁶⁸ Ẹnẹyịmavara ộ vịdị kà a ka, a sị ụ kụkụ va nọ Ijipiti nịnị. Ama ọ vaa mẹ ka a sị ẹpa ọbanyị kụ́ wụ nịnị varẹma nọ Ijipiti. U vee si ka wa ná ẹngụ awụ ọrịhị yị aza ịzọọ, ama ẹ yị nyị ọza ana vaa dọ ka ọnị ọ̀ hị́ wụ nịnị.