Iwe Ọhụhị Imosiisi ana aa hị́ Ọyịvatụrọda 26 - IWE ỌNỊNỊ

Ẹyịza ịsa ịnị aarẹ ịpaapa

¹ Ịjị wàa raà dọ ẹtẹ ọnị Ẹnẹyịmavara, Ohomorihi awụ nịnị aa sị wụ nịnị, dị ụ sị yaatụ nị.

² Ọzọza ọ̀ sị ịsa ịpaapa ịsa ịnị aarẹ irenyi-irenyi ana mẹ̀ tụ́ ini uji, dị ẹnịrị uji ọnọọ nọ ịzị Ẹnẹyịmavara Ohomorihi awụ nịnị nyị ka aa hẹkẹ ọnị.

³ Ne tu ohirẹsụ irehi Ohomorihi ana ya oze ụkọrọ ịzọọ ịnị ụmẹ ọnọọ. Kà a yọ ka wâ sị yẹ ka wa raà ngụ ịnị ẹtẹ ọnị Ẹnẹyịmavara Ohomorihi awụ nịnị wo oto anị yị ohiku awụ nịnị ka ọnị a sị wụ nịnị.

⁴ Dị ohirẹsụ irehi Ohomorihi ọnọọ dọ wụ nịnị uji ọnịrị ịsa tụ́ ọvịdị ụta ịsọvọ Ẹnẹyịmavara Ohomorihi awụ nịnị.

⁵ Vatụra ịrẹyị ẹnẹnị ọvịdị Ẹnẹyịmavara: Ohiku amị vị Anarami ana aa doodo zị, ẹ yị nyị irehi. Ộ kụ́ aza nọ ẹtẹ Ijipiti. Ẹnị chee ẹ vị ẹ mẹ ngụ ẹkụra ọnọọ nị. Ama ẹ vaa sị rụrụ, dị ẹ vị Anẹkụra ana nyị ụkata nị.

⁶ Anijipiti nịnị ệ chamayị yị, dị ẹ sị ụkata za ayị mẹ̀ ụkọrọ anka ọrịhị ẹnịnị avọọ nị.

⁷ Ệ mẹ̀ nowu hí Ẹnẹyịmavara Ohomorihi ohiku ayị ka ọ gụ yị ụvọ. Ộ wù, di o re ẹngụkata ọnịrị ụya beri ayodu ayị nị.

⁸ Dị ọ sị ụkata anị dọ yị ha hụrẹ Ijipiti nị. Ộ mẹ̀ ịvọpa ọnịrị ohyọzirenu. Ộ mẹ̀ ịsa ọkatẹngụ-ọkatẹngụ ene chire ọza angwa.

⁹ Ộ sị yị vẹ ịzẹnị, dị ọ sị ẹtẹ ozoza ọnọnị yị nị.

¹⁰ Agụvị avọọ mị sị ịsa ịnị aarẹ ịpaapa ọnị Ẹnẹyịmavara sị yị mị va yọ aanị nị. Wàa vavọọ sị ka a, dị ụ sị uji tịtẹ ọvịdị Ẹnẹyịmavara dị ụ hẹkẹ ẹ nịnị.

¹¹ Kụ́ Ẹnẹyịmavara Ohomorihi awụ avọ agụvị ọyịza-ọyịza ọnị ọ mẹ̀ yị ẹwụrị ovwoovu awụ nịnị. Anireevi ẹnịrị azọga ana ra beri wụ nịnị è beri wụ nịnị jị ịrajẹ.

Ịrẹyị agẹẹwụ ịsa ịnị aarẹ

¹² Ịrayị ẹtẹẹta waā sị agẹẹwụ ịsa ịnị aarẹ awụ nịnị na yị Anireevi nịnị, azọga, ezi-oku, esoku agụvị ọzọza ọọ nyị ịsa ana aa rị. Wàa raà mẹ̀ ọsọnị,

¹³ kà a yị Ẹnẹyịmavara kà ẹ yị nyị agẹẹwụ anị ana vọ tụ́ wụ irehi. Wa raà sị yị Anireevi nịnị, azọga, ezi-oku ọnịrị esoku anka ọda ana za ịrẹyị ịsa agẹẹwụ.

¹⁴ Ẹ yị nyị ọnị mị rị mmi maa ba arụwẹ: Ẹ yị nyị ọnị mị sị jịnẹ hụụnị eehi amị, dị mị vaa za ido. Ẹ yị nyị ọnị mị sị mẹ̀ ịsọvọ yị oku. Mâ wụ́ chire wụ Ẹnẹyịmavara. Mâ mè avaba ịsa ọnị ụ mẹ̀ ọda anị yị mị.

¹⁵ Kana eyi hụrị aha ọnịnị awụ ẹbẹẹba dị wa mẹ̀ aduwa yị aza awụ Isirẹrị. Sị ụvọ pe ẹtẹ ozoza ọnị ụ sị yị anka u me wo oto yị ohiku ayị nịnị.

Aza Ẹnẹyịmavara

¹⁶ Ajịnị Ẹnẹyịmavara Ohomorihi awụ nịnị kà a wa saasa avaba ọda anị. Agụvị avọọ sị avaba ayị awụ nịnị sị ịzẹyịza saasa a.

¹⁷ Ajịnị wa raà dọ beri Ẹnẹyịmavara ana vị Ohomorihi awụ nịnị; dị ụ wo oto ka ụ vaa wụ́ chire, dị ụ sị ụvọ za avaba ọda anị, dị ụ mẹ avaba ịsa ọnị ọ mẹ̀ ọda anị yị wụ nịnị.

¹⁸ Ajịnị Ẹnẹyịmavara ọ raà dọ wụ nịnị ka ụ vị aza anị anka ọ me wo oto yị wụ nịnị. Ộ mẹ ọda ka wa saasa avaba ịrẹyị anị.

¹⁹ Ọ vaa mẹ̀ wụ nịnị banyị hụụnị Anẹkụra ọnyọọnyị ọnị ộ tụ́. Ụ vaa sị ụga ọnịrị ụbanyị yị ịrẹha anị. Aza anị ụ vaa vị anka ô me wo oto nị.