Iwe Ọhụhị Imosiisi ana aa hị́ Ọyịvatụrọda 25 - IWE ỌNỊNỊ

Upono ọyị sị sị ụya rị ọza ana mẹ̀ ebira odivi

¹ Imosiisi ộ kà a yị Anisirẹrị nịnị ka, A kà a ka aza ẹnị ẹẹva ệ kụ́ ẹngụ tụ ini ikootu, dị ọmọkarẹyị ka ọza ịnyara ộ rị ịvị, dị ọsa rị ịhị nị.

² Ọ̀ọ mẹ̀ ọkarẹyị ka è ne tu ọza ana rị ịvị upono, ọmọkarẹyị ọnọọ ọ̀ mẹ ọda ka ọ̀ vayị ku ẹtẹ, di è tu ọ eyi anị. Ọpa ọchị ana a vọrọ ka è tu ọ agụvị ebira odivi ọnị ọ mẹ kẹnẹ, e vee tu ọ nị.

³ Ama a sị ụ zẹẹ ka è tu ọza ọchị huna ẹbẹẹva. Èe nee tu ọza ọchịị huna ẹbẹẹva, vị ụ waa mẹ ụhịị nyị ọnọhụva awụ eyi ịnọyị-ịnọyị avọọ nị.

Ịrẹyị ụnọ ana aa sịị mẹ̀ ụkọrọ

⁴ Wàa sị ụnọọ mẹ̀ ụkọrọ ịnị aarẹ, asị ụ sị ịsa ku ọ irenu ka asị ọ rị ịsa.

Ịrẹyị ọyịnyara ọza ẹnẹ yị ma ozi di o su

⁵ Ẹyịnyara ọnọrụ-ọnọrụ ẹ̀ẹ ra vabẹ, dị ọnyara ẹ̀ẹẹ̀ yị ma ozi di o su nị, à sị osoku anị na vá anaha ọsa. Ọyịnyara ọza ene su aanị ọ̀ nyị ọ.

⁶ Ozi ọnọrụ ịpaapa ẹnẹ ẹ̀ẹ ma, ọyịnyara anị ene su ọ vaa nyị nị. Ozi ọnọọ vaa rị ịrẹha ọza ene su aanị, agụvị a sị ịrẹha ọza ọnọọ vu hụụnị ẹtẹ Isirẹrị.

⁷ Ama ọyịnyara ọva ọnẹẹ ọnọọ è yi si ka ọnị ọ̀ nyị ose ọyịnyara anị, ọnẹẹ ọnọọ ò ne tu ọdọvịdị ẹkụra nịnị enoze ọbanyị ẹkụra, dị ọ̀ kà a ka: Ọyịnyara ọva amị ka ịrẹha ọyịnyara ò vu hụụnị ẹtẹ Isirẹrị o. Ô yi ka ọnị ẹ yị mẹ ịsị a vọrọ ka ọnị ọ̀ mẹ o.

⁸ Ọdọvịdị ẹkụra nịnị vaa tụ́ụ hị́ ọ, dị ẹ kà ịrẹyịị yọ ọ̀ọ kị ka ọnị ẹ yị nyị ọ,

⁹ osoku ọyịnyara anị ọnọọ ò ne tu ọ eyi avaba ọdọvịdị ẹkụra nịnị, dị ọ tụ adava anị ọnya, dị ọ̀ jị atẹ ku ọ. Ọ̀ọ sị atẹ jị ku ọ, dị ọ kà a yọ ka, aanị á mẹẹ mẹ ọza ana ka ovwoovu ọyịnyara anị ò vu ịnị ẹkụra nị.

¹⁰ A vaa yẹ ovwoovu ọza ọnọọ ịnị ẹtẹ Ísirẹrị, dị aa hị́ ọ ovwoovu ọza ana a tụ̀ adava hụrẹ ahụ.

Ọda ana za egidi

¹¹ Imosiisi ka: Aza ẹnị ẹẹva àa vụ̀ ịrẹvụ, di ose ọnyara vẹ ka ọnị ọ̀ gụ ọva anị ụvọ nị, ọnẹẹ ọ̀ọ sị ụvọ ngụ ọza ọnị ọnịrị ọva anị aa vụ̀ ịrẹvụ aha eenyisi,

¹² a sị ụ vayị anị nịnị. À dà a ụvọ kwooze.

Mẹ ịzẹyịza ịnị ohu ọyịsẹ̀

¹³ A sị ụ sị ịngọ irenyi-irenyi ẹẹva ngọ ịsa yị ọza, dị ụ waa nyị ọrata, dị ụ rẹ nyị ana hẹrẹ.

¹⁴ A sị ụ sị ẹnya irenyi-irenyi ẹẹva mọ ịsa yị ọza, dị ụ wàa nyị ẹnya ọgana, dị ụ rẹ nyị ene weyi.

¹⁵ Wa sị ịngọ obooro ngọ ịsa, dị ụ wa rẹẹ sị ẹnya ana a vọrọọ mọ ịsa, agụvị we zụ ku orubo ịnị ẹtẹ ẹnẹ Ẹnẹyịmavara Ohomorihi awụ aa sịị yị wụ aanị.

¹⁶ Ẹnẹyịmavara Ohomorihi awụ nịnị e yi sì ịrẹyị ọza anaā mẹ ọzaa rị.

Ọda ka à wụ Anamarẹkị nịnị

¹⁷ À sị ayị hi wu nịnị ịsị Anamarẹkị mẹ̀ wụ nịnị ụ mẹ̀ hụrẹ Ijipiti aa vẹ nịnị.

¹⁸ Ẹnịnị e yi hí angwa Ẹnẹyịmavara, ẹnịnị ệ zị oze ịrẹma kwẹẹtẹ tu wu nịnị. Ịjọnọọ ọ́ sị ngụ wụ nịnị ẹngụ, dị ẹnịnị wụ̀ avaba aza ana jị tụ ịrẹma ịnị awụ nịnị nị.

¹⁹ Agụvị avọọ, ịjị Ẹnẹyịmavara ọ̀ọ raà sị ẹtẹ oni o wo oto anị yị wụ nịnị, dị ọ raà sị ụhwọtụ yị wụ nịnị ịnị ụvọ ọnịvị awụ nịnị ana ra kara wụ nịnị; re ka waa wụ Anamarẹkị nịnị ha saka-saka. Dị a sị a kụkụ zụ tamayị ẹnịnị. A sị ayị hí wu nịnị o.