Iwe Ọhụhị Imosiisi ana aa hị́ Ọyịvatụrọda 24 - IWE ỌNỊNỊ

Ọda ịrẹyị ẹhahi ẹvarose

¹ Ọnyẹnẹẹ ọnị ọva ịpaapa jị ịjẹvụ agụvị ka ọ mẹ̀ ebira ene e yi ze eyi. Dị ộ sị iwe ẹnẹ ẹ sị ha ẹngụ hi yọ, dị ộ dụ ọ hụụnị eehi anị, vị ụhị yọ.

² Ịrẹma anị, ọ̀ọ na nyị ọnọrụ ọsa

³ ana rẹ jị ọ ịjẹvụ, a vị di o su nị.

⁴ Ọva anị ịpaapa e yi re oze varẹma nyị ọ. Enyisi ọ vị ka ọ varẹma nyị ọ ịrẹma ọnị o re du ẹngụ anị ha. Ebira odivi ọ vị eyi Ẹnẹyịmavara nị. Ẹ̀ẹ varẹma nyị ẹngụ e yee du ẹtẹ ọnị Ẹnẹyịmavara aa sị yị wụ nịnị ka ọ vị ogu awụ nịnị nị.

Ọda ana za ẹvarose ọwọọwa

⁵ Ọnọrụ ọ̀ọ nyị ọnẹẹ ọwọọwa, asị a sị ọ nọ ịrẹkụ, a vị ka a sị ụkata za ka ọ mẹ̀ ụkọrọ yị ịjọva. A navọ ịrayị ọnya dị ọ ya ini eehi pe ose anị, dị ọnịrị ose anị e hine ẹngụ ayị.

Ẹkẹhị ọyị rere

⁶ Wàa sị ẹkẹhị rere ọza, asị ụ dọ ịrẹta ana aā sịị kụ ayị jẹẹ. Ọsọnị vaa mẹ ka asị anovwoovu re ịrẹta mẹ̀ ịsa rị.

Ọyị za ọza

⁷ Ọza tụra ọza anaa za Anisirẹrị ana vị ọnọhụva anị ọrịhị a vị dị ọ na ọrịhị vị ana vaa wụ̀ agụvị udivi ọ hụrẹ ẹtẹ.

Ụkụ ịnị ọchẹngụ

⁸ Aza ana àa nyị ụkụ ịnị ọchẹngụ ana katẹngụ, e re ka ẹnị ẹ mẹ ịsị ohirẹsụ irehi Ohomorihi nịnị ẹẹ ka yị wa. Ẹ saasa ịrẹyị ọnị Ẹnẹyịmavara mẹ ọda anị yị wa.

⁹ Tamayị ịsị Ẹnẹyịmavara Ohomorihi awụ nịnị mẹ̀ Imeriyamị ẹnịnị mẹ hụrẹ Ijipiti aa vẹ.

Ẹkẹhị ụkọrọ onosiye

¹⁰ Wàa sị ẹkẹhị rere ọza, asị ụ ngụ irehi anị na dọ awuru ọnị ọ ka ọnị a sị jẹẹ agụvị ẹkẹhị ọnọọ.

¹¹ Jẹẹ ẹhẹ dị ọnị ụvọta ọ na sị ọ va yị wụ.

¹² Àa vị onosiye ọ vị nị, asị awuru anị ya ịda awụ mẹ eyinẹhẹ.

¹³ Va a ịrẹma na yọ oruva-oruva agụvị o re achị ku ẹngụ na sụ. Ayị anị vee hine, dị ayị Ẹnẹyịmavara vee hine tu wu.

¹⁴ Asị ụ mẹ onosiye a vị ọza ọnị ụ dọ ụkọrọ rị, ọ̀ọ daka vị Anisirẹrị, a vị ọzọga ana ra ịnị ọnya ịnị ẹkụra awụ nịnị.

¹⁵ Sì anụkọrọ awụ ụta dị ẹtẹ o vee hozi agụvị ka ọnị ẹ sị eyi tụra ka ẹnị ẹ sị mẹ ẹhẹ nị. Ẹ yị vị avọọ èe jị òrèrè hị́ Ẹnẹyịmavara ẹngụ ụ wa rị ịvị.

Ọkarẹyị usu

¹⁶ Ọza ẹ yị vaa wụ̀ aza ana ma ezi agụvị ebira odivi ẹnịnị, ọza ẹ yị rẹ vaa wụ̀ ezi agụvị ebira odivi aza ana ma wa. Ọzọza vi ene vee su usu ebira odivi anị.

Asị ọza mẹ ẹvaya yị ọkụmị

¹⁷ Asị ụ zẹ ka a mẹ azọga a vị ezi-oku rị. Asị ụ dọ osoku achị jẹẹ yị erere ọnị ọ dọ wụ.

¹⁸ Tamayị ka ẹwụ nịnị rẹ vịdị vị ọrịhị ịnị ẹtẹ Ijipiti dị Ẹnẹyịmavara Ohomorihi awụ nịnị vaa dọ wụ nịnị ha. Ẹnẹyịmavara kà agụvị avọọ ọnị mẹ ọda ọnọnị yị wa nị.

Navọ ịsa ịnị aarẹ ana vọ ẹtẹ yị onosiye nịnị

¹⁹ Wàa kụ́ ịsa ịnị aarẹ gụ, àa nyị akụ ọnị ụ jị tịtẹ dị ụ sị eyi jịnẹ ẹ nị, asị ụ kụkụ varẹma na kụ́ ọ. Naavọ yị azọga ọnịrị ezi-oku ne beri esoku nịnị. Agụvị avọọ Ẹnẹyịmavara vaa mẹ ka o ze yị wụ ịnị ịsa tụra ịsa ọnị waa mẹ nị.

²⁰ Wàa ra ha ẹtụtụ orivi ụpọnya hụụnị ọchị anị, asị ụ kụkụ varẹma na ha ana vọ; Ana vọ vị azọga ọnịrị ezi-oku ne beri esoku nịnị.

²¹ Wàa ra ha ẹtụtụ igirepi ụpọnya hụụnị ụbazị anị, asị ụ kụkụ varẹma na ha ana vọ; Ana vọ vị azọga ọnịrị ezi-oku ne beri esoku nịnị.

²² Tamayị ka ẹwụ nịnị rẹ vịdị vị ọrịhị ịnị ẹtẹ Ijipiti; agụvị avọọ Ẹnẹyịmavara Ohomorihi awụ nịnị mẹ ọda ọnọnị yị wụ nịnị nị.