Iwe Ọhụhị Imosiisi ana aa hị́ Ọyịvatụrọda 23 - IWE ỌNỊNỊ

Aza ẹnẹ ẹ̀ yị bẹ tụ ịnị aza Ẹnẹyịmavara

¹ Ọza ọ̀ọ ya, dị a nị ọ, à vị ka vị a kụ aha ọnọrụ anị kwooze nị, a sị dọ ọ beri aza Ẹnẹyịmavara.

² Ozi ọnị ọnyị anị ọnịrị ada anị ẹ̀ yị nyị ẹngụ anka ẹvarose obooro dị a ma a, a sị a za a ịrịka tụ ịnị aza Ẹnẹyịmavara. Asị a rẹ za evere ezi anị ịrẹma-ịrẹma vaka aza Ẹnẹyịmavara.

³ Ọza ọ̀ọ vị Anaamọnị ọ̀ọ vị Animowabi, a sị dọ ọ tụ ịnị aza Ẹnẹyịmavara. Asị a nyị evere ezi ịrẹma-ịrẹma ana a dọ tụ ịnị aza Ẹnẹyịmavara.

⁴ Ẹnịnị ê yii, ẹ yị da ịsọyịrị yị wụ nịnị ụ mẹ hụrẹ Ijipiti aa vẹ nịnị. Ẹnịnị ẹ yị ká enyi yị wụ nịnị hú. Vị́ ẹnịnị na hị́ ọnọrụ ana aā hị́ Ịbaraamị ozi Ịbẹyọ hụrị Ipetiho ka ò ve chì hi wu nịnị nị. Ipetiho vị ana ya ịnị ẹtẹ Imesopotamiya.

⁵ Ama Ẹnẹyịmavara Ohomorihi awụ nịnị ẹ yị dọ ịrẹyị Ịbaraamị. Ohomorihi awụ nịnị ộ vara ozirenu ọnị Ịbaraamị tụ́ hi wu nịnị tụ ịnị ọyịza yị wụ nịnị, agụvị ka ô sì ịrẹyị awụ nịnị.

⁶ A sị ụ mẹ̀ ịsa ọnyọọnyị ana vaa gụ wa ụvọ, à vị ịsị ẹ vaa mẹ ka ò ze yị wa pooro ịnị ẹhẹ awụ nịnị.

⁷ A sị ụ sị eyi wụ Anedomi nịnị, agụvị ka anda awụ nịnị ẹ vị nị. Dị a sị ụ rẹ sị eyi wụ Anijipiti nịnị, agụvị ka azọga ana vịdị ra ịnị ẹtẹ ẹnịnị ụ vị nịnị nị.

⁸ Hụụnị anụmẹ ọhụta daa vana, wa zụ dọ ezi ẹnịnị tụ ịnị aza Ẹnẹyịmavara.

Tenyi udi ọnị isoja nini hi, dị ọ̀ nị

⁹ Imosiisi ộ kà a yị Anisirẹrị nịnị ka: Wàa nọ ịrẹkụ ọnịvị awụ nịnị, re ka udi ọnị u hi nịnị ọọ nị; a sị nyị ọza ana mẹ̀ ebira ịdọtị ịzọọ.

¹⁰ Ọza ộ ha ara ve tu ka ọnị ộ va enyi hi ẹngụ, ọza ọnọọ ẹ yị kụkụ nị. Ọza ọnọọ ọ̀ jịnẹ hụrẹ udi ọnọọ na ra ẹhẹ.

¹¹ Oruva ọ̀ọ maanị ee vee tù, ọza ọnọọ nyịna ẹngụ anị. Ọyị ọ̀ọ sị ngụ ẹtẹ, dị ọ̀ vavẹ.

¹² Dà aha tụ ịrẹma udi awụ nịnị ịzị aza venee he ehe.

¹³ Kụ ẹnya nịnị ọnịrị ẹdụ, dị ụ wa sị chị́ ụsị ịhyẹrẹ nịnị. Ọza òo ne he ehe, di à sị ịsa ku ọ.

¹⁴ Agụvị ka Ẹnẹyịmavara Ohomorihi awụ ya avaba aha udi ọnọnị, di e sere wu, dị ọ dọ ha hụụnị ụvọ ọnịvị awụ. Navọ ịzị ụ kụ́ udi aanị ọ vị aha ọnịnị, agụvị dị asị o re ebira odivi ịnị akakana awụ nịnị dị ọ va varẹma wụ nịnị.

Ọrịhị ene zwè hụrị ẹkụra ọsa

¹⁵ Ọrịhị òo zwè hụụ ịdị ọza ana nyị ọ ve tù wu nịnị, à sị ụ dụ ọ varẹma nịnị.

¹⁶ Ịzị ee ze e eyi ịnị ẹkụra awụ nịnị dị ọ ka ọnị aà ra ịzọọ, naavọ ọ̀ ra pe wu nịnị. A sị ụ chamayị yọ nịnị.

¹⁷ Imosiisi ka: A sị a nyị Anisirẹrị ọnyọọnyị, ọ̀ọ vị ọnọrụ, ọ̀ọ vị ọnẹẹ, anaa sẹ̀ ịrẹka ini irehi Ohomorihi.

¹⁸ Ọza ọ̀ọ na sẹ̀ ịrẹka, ọ̀ọ vị ọnẹẹ, ọ̀ọ vị ọnọrụ, dị ọ dọ ẹkẹhị ịnị anị nị, a sị ụ sị ẹngụ ẹkẹhị ọnọọ vẹ ini irehi Ẹnẹyịmavara Ohomorihi awụ. A sị ụ sị ve sí ụta ịsa ọnị ụ vịdị wo oto ka ụ vaa mẹ. Ẹnẹyịmavara ộ nyị ịhyẹrẹ ọsẹrẹka ini irehi Ohomorihi.

¹⁹ Wàa sị ẹkẹhị, àa vị ịsọyịrị, àa vị ịsa ọnyọọnyị ọsa rere Anisirẹrị ọhụva awụ, à sị ụ dọ ọtụrọsarẹsụ tụ ịnị anị.

²⁰ Wàa vavọọ sị ịsa rere anẹkụra ọsa, wa zụ dọ ọtụrọsarẹsụ tụ ọ. Ama àa vị Anisirẹrị yọ nị a sị ụ dọ ọtụrọsarẹsụ, saasa ọda ọnọnị, ka Ẹnẹyịmavara Ohomorihi awụ vaa mẹ ọyịzaa yị wụ ịnị avaba ịsa ọnị ụ vaa mẹ ịnị ẹtẹ ọnị ụ waa naa ra nịnị aanị.

²¹ Wèe wo oto ka ụ vaa mẹ̀ ịsaa yị Ẹnẹyịmavara Ohomorihi awụ, re ka ụmẹ anị òo sì tu, waa mẹ̀ ẹ. Ẹnẹyịmavara vaa họ̀ wụ use ịsa oni u wo oto anịị yọ. Wẹ̀ yị mẹ̀ ẹ, ịvị ọ vị yị wụ nị.

²² Wẹ yị rị ịvị Ẹnẹyịmavara wè yi wo otoo ịsa ọnyọọnyịị yọ.

²³ Ama ịsa tụra ịsa ọnị ụ wàa ha irenu wo oto anị, re ka waa mẹ̀ ẹ, anka ọ me ze wu eyi, dị u sị irenu awụ wo oto anị yị Ẹnẹyịmavara Ohomorihi awụ.

²⁴ Wàa ngụ ịnị aarẹ ọnọhụva awụ ọnị o chire ịvayịnị hi, wa zụ rị avaba ẹtụtụ ịvayịnị o mè ze wu eyi. Ama wẹ yị nyayịnẹ ha a hi ịnị ẹnya, dị ụ wa sị ọ hụụ ịzọọ.

²⁵ Wàa zị oze ịnị aarẹ ọnọhụva awụ ọnị ọ mẹ akụ tụ, wa zụ sị ụvọ wọrọ akụ dị ụ wa rị ọ. Ama wẹ yị nyayịnẹ sị ọ̀kụ́ nọ ịnị aarẹ ọnọhụva awụ na kụ́ akụ ọnị ọ mẹ jẹẹ.