Iwe Ọhụhị Imosiisi ana aa hị́ Ọyịvatụrọda 19 - IWE ỌNỊNỊ

Ọda ana kara ẹkụra aha ọyịtẹ̀

¹ Ịrẹma ọnị Ẹnẹyịmavara Ohomorihi awụ nịnị raà wụ̀ aza ana nyị ẹtẹ ọnị aa sị yị wụ nịnị, dị ụ raà dọ avaba ẹkụra ọnịrị irehi ẹnịnị, dị ụ sị ra ịzọọ nị,

² nyị ẹkụra ẹbanyị-ẹbanyị ẹẹta ana ya ịnị akakana ẹtẹ ọnị Ẹnẹyịmavara Ohomorihi awụ nịnị sị yị wụ nịnị.

³ Che ẹtẹ ọnọọ hi uche ẹẹta, dị ẹkụra ana vaa vi aha ọyịtẹ̀ aanị ọ̀ ya ịnị akakana ọnyọọnya, dị a tụ oze na ngụ wa agụvị àa nyị ọza ene nyeeyi wụ̀ ọsa dị ò zwe na tẹ̀ ịnị ọnyara ịnị ẹkụra ẹnẹẹ.

⁴ Àa nyị ọza ene nyeeyi wụ̀ ọza ọnị ọnịrị ọ ẹ yị vị ọnịvị ẹngụ, ò zwe na tẹ̀ aha ọyịtẹ̀ ịnị ọnyara ịnị ẹkụra ẹnẹẹ.

⁵ Ẹhụ anọrụ ẹẹva ẹ̀ẹ ngụ iruku ka ẹnị aa na da ọchị, ịraga ọnyara ọ̀ọ swẹ na ka ọsa ịrẹsụ dị ọ wụ̀ ọ nị, ọza ọnọọ o zwe na tẹ̀ ịnị ọnyara ịnị ẹkụra ẹyịta ẹnẹnị.

⁶ Àa vị ẹkụra ọnya kẹnẹ ọ vị nị, o vee noze baaba, dị anda ọza ene su aanị vara gẹrị ọza ene nyeeyi wụ̀ ọnọhụva aanị dị ọ sị ọyịkụ-ọyịkụ wụ̀ tụ ịrẹsụ ịrẹyị ọhẹ.

⁷ Agụvị avọọ Ẹnẹyịmavara kà ẹ nyị ẹkụra ẹẹta nị.

⁸ Ụmẹ ọnị Ẹnẹyịmavara Ohomorihi awụ nịnị ọ̀ọ sị gana ẹtẹ awụ nịnị anka ọ mẹ vịdị wo oto anị yị ohiku awụ nịnị ka ọnị vaa sị avaba ẹtẹ ọnọọ yị wụ nịnị.

⁹ Nyị ẹkụra ẹẹta ọsa tụ ịnị ana vịdị nyị. Ama sị ụvọ za avaba ọda Ẹnẹyịmavara Ohomorihi awụ nịnị ajịnị. Sì ịrẹyị anị, dị ụ vatụra oze anị pooro.

¹⁰ Vavọọ mẹ̀ ẹ agụvị asị a rẹ wụ̀ aza ẹnẹ ẹ yị nyị ịsị ẹ mẹ̀ va ha kẹnẹ-kẹnẹ, dị ịvị anị ọ vaa ẹnya tụra awụ nịnị ịrẹsụ ịnị ogu ẹtẹ ọnị Ohomorihi sị yị wụ nịnị.

¹¹ Ama ọza ọ̀ọ yẹ wụ̀ ọnịvị anị, di o zwe na tẹ̀ ịnị ọnya ịnị ẹkụra ẹnẹẹ nị,

¹² Azọkụ ene hi ịnị ẹkụra ọza ana wụ̀ ọza aanị, ẹ za a chire anda ọza ọnị ọ wụ̀, dị ẹnị ẹ rẹ wụ̀ ọ.

¹³ Asị ụ vayị anị. Dọ Isirẹrị tịtẹ hụụnị ụvọ ọwọza agụvị ẹkụra ọ nyị ẹngwọọrọ.

Ọtẹhwị ẹtẹ ịyẹẹyẹ

¹⁴ Asị u hu ọtẹhwị ẹtẹ ọnọhụva awụ hụrẹ udi anị ọnị anịyẹẹyẹ sị tẹ ẹhwị ẹtẹ ọnị Ẹnẹyịmavara Ohomorihi awụ nịnị aa sị yị wụ ka ọ vị awụ nịnị.

Ọda ana kara ivenu

¹⁵ Onivenu ikonya ẹ yị hụ jị ịvị ebira odivi yị ọza. A nyị ka a nyị onivenu ẹẹva ana sị zụ ka ọ rị ịvị.

¹⁶ Ọza ọ̀ọ sị ayamụkụ dọ ivenu ireche kụ ọza ka ọnị ọ sị kụ ẹngụkata tu ọ,

¹⁷ ẹnị ẹyịva ẹ nọ ịnị irehi Ohomorihi ịzị ohirẹsụ irehi Ohomorihi nịnị ẹnịrị ọmọkarẹyị nịnị ana ya udi ụmẹ ọnọọ ọ mẹ̀ ọkarẹyị yị wa.

¹⁸ Ọmọkarẹyị nịnị vee si iruvo ịrẹyị ọnọọ hwịnị-hwịnị. Àa vị onivenu cheeche ku ọnọhụva anị nị,

¹⁹ dị aa mè ẹ ịsị o si ka ọnị ọ mẹ ọnọhụva anị. Ịnị oze ọnọnị a zụ sị kụ odivi hụrẹ ẹtẹ hụụnị akakana awụ nịnị nị.

²⁰ Aza ana vọ vaa wụ́ dị angwa hi wa, dị a sị ebira ọhịmị ọnọnị ba ẹtẹ chire.

²¹ Asị a vayị ọza. Ọza ọ̀ọ wụ̀ ọza, à rẹ wụ̀ ọnị. Ọza ọ̀ọ tụ̀ ọza eyi, à rẹ tù ọnị eyi. Ọza ò hu ọza anyị, à rẹ hu ọnị anyị. Ọza ọ̀ọ dà ọza ụvọ, à rẹ dà ọnị ụvọ. Ọza ọ̀ọ dà ọza ahụ, a rẹ dà ọnị ahụ.