Iwe Ọhụhị Imosiisi ana aa hị́ Ọyịvatụrọda 17 - IWE ỌNỊNỊ

Ẹngụ ịsa ịsọvọ ọnị Ẹnẹyịmavara nyị ịhyẹrẹ anị.

¹ Wàa mẹ̀ ịsọvọ, asị ụ sị imaaru a vị atẹmẹ ana nyị ẹngụkata na mẹ̀ ịsọvọ yị Ẹnẹyịmavara ana vị Ohomorihi awụ nịnị. Ọọ̀ nyị ịhyẹrẹ ẹngụ ịsa ịsọvọ ẹnẹẹ.

Ẹnẹyịmavara kà a wụ̀ aza ana hẹkẹ ori

² Wàa wụ́ ka a nyị ọnọrụ a vị ọnẹẹ ọnya ịnị ọnya ịnị ẹkụra awụ nịnị ana aa mẹ akamawụ hi Ẹnẹyịmavara, dị ọ sị ahụ jịnẹ ọkatịtẹ Ohomorihi

³ naa hẹkẹ ori, a vị ọyị, a vị ụhwẹ, a vị ụzọmị nịnị nị.

⁴ Wàa wụ́ ẹngụ enube ọnọnị, sị ahụ sì iruvo ịrẹyị ọnọọ hwịnị-hwịnị. Àa vị ịzẹyịza ọza ana ka ịrẹyị anị mẹ̀ ebira odivi ana vị enyisi ịnị ẹtẹ Isirẹrị nị,

⁵ a sị ọ jịnẹ nọ ịrẹma ẹkụra, dị a sị ịrẹta-ịrẹta wụ̀ ọ.

⁶ Di o vee tu ka a wụ̀ ọza ọnyọọnyị, a nyị ka a nyị onivenu ẹẹva, a vị aza ẹnị ẹẹta ana vaa dọ ivenu. Àa vị ọza ịnya kẹnẹ ọ dọ ivenu, ọza ẹ yị nyayịnẹ wụ̀ ọ.

⁷ Onivenu nini ẹ vịdị ee ne ịrẹta nya a, dị aza ana vọ ẹ va sị ịrẹta nya a nị. Aa vavọọ a mẹ̀ ọkarẹyị yị aza edivi, udivi vaa hụrẹ ẹtẹ.

Ịrẹyị ọkatẹngụ

⁸ Àa nyị ịrẹyị ọkatẹngụ ọnị ọmọkarẹyị okokooro ẹ yị zụ ka, anka ẹhụ ịrẹyị ogu oyizune, ụnava ịnị ọchẹngụ, a vị ẹhahi ọza ọyị wụ̀ ọnịrị ọza ọyị nyeeyi wụ̀. Ẹngụ ịrẹyị ẹnẹnị vị ana vaa kụ nọ ịzị Ẹnẹyịmavara Ohomorihi nyị ka aa hẹkẹ ọnị.

⁹ Sị ịrẹyị awụ tụ ọvịdị ohirẹsụ irehi Ohomorihi ọnịrị ọmọkarẹyị ana ya ịrẹsụ ode ịnị ụmẹ ọnọọ. Navọ wa ẹ tụ ohi tụ ịnị ịrẹyị ọnọọ.

¹⁰ Ẹnịnị vaa mẹ̀ ọkarẹyị ama ẹwụ vaa mẹ anka a mẹ ọkarẹyị ịrẹyị ọnọọ.

¹¹ Dọ ọkarẹyị ọnị ẹ mẹ, dị ụ waa saasa avaba ịrẹyị ọnị ẹ ka tu ẹtẹ.

¹² Ọza tụra ọza ene ro ka ọnị ọ zụ mẹ akamawụ hi ọmọkarẹyị, a vị ohirẹsụ irehi Ohomorihi nịnị, vị ana vaa wụ̀; agụvị ebira odivi ọ hụrẹ ẹtẹ Isirẹrị.

¹³ Ọza tụra ọza ana àa wụ́ ọkarẹyị ebira odivi vee hí angwa, dị ẹ yị nyayịnẹ mẹ ịrẹyị ọhịmị.

Ịrẹyị ọnị Ẹnẹyịmavara kà yị ohinọyị.

¹⁴ Ịrẹma ọnị Anisirẹrị raà dọ ẹtẹ ọnị Ẹnẹyịmavara Ohomorihi ẹnịnị sị yị wa, dị ẹ ra, e vee sì ka ẹnị ẹ rẹ nyị ohinọyị anka anẹkụra nịnị ana kara wa.

¹⁵ Re ka ọza ọnị wa nyị ka ọ vị ohinọyị awụ nịnị vị ọza ọnị Ẹnẹyịmavara ọnị ụvọta sị nyị. Ẹngụ ọza ọnọọ ọ vị ọza ịnị ẹngụ awụ nịnị, asị ọ vị anikinami.

¹⁶ Ohinọyị ẹ yị vaa nyị umaata rụrụ yị isoja anị, dị ẹ yị vaa tụ aza nọ Ijipiti na hị́ umaata agụvị ka Ẹnẹyịmavara ộ raà kà a ka asị aza anị varẹma nọ Ijipiti.

¹⁷ Ohinọyị ẹ yị vaa nyị ọnẹẹ ọrụrụ agụvị asị ẹ mẹ̀ ẹ ka ọ va hụrẹ ịrẹma Ẹnẹyịmavara. Asị ọ rẹ kụ isiriva ọnịrị igooru ahaahara mẹ aanị.

¹⁸ Ọ̀ọ sị rị, a nyị ka ọ nyị iwe ọda Ohomorihi ana a chẹrẹ eyi Anireevi ana vị ohirẹsụ irehi Ohomorihi.

¹⁹ Ohinọyị ọ sị iwe ọda ọnọnị pe ẹngụ, dị ọọ ka a ịnị avaba ẹhẹ anị agụvị ọ kọsẹ a mẹ vọrọ ka ọ nyị angwahi Ẹnẹyịmavara, dị ọ saasa avaba ịsa ana kà tụ ịnị iwe ọnọọ.

²⁰ Ọsọnị ọ vaa mẹ ka asị o ro ka ọnị o huna anda ẹnịnị ana vọ.