Iwe Ọhụhị Imosiisi ana aa hị́ Ọyịvatụrọda 16 - IWE ỌNỊNỊ

Eche Ọyịparahu

¹ Sị ụbanyị yị Ẹnẹyịmavara Ohomorihi awụ nịnị, dị ụ wa rị eche ọyịparahu ịnị ụhwẹ Abibu nịnị. Ịrahụ ọnya ịnị ụhwẹ ọnọọ Ẹnẹyịmavara dọ wụ nịnị hụrẹ ụvọ Anijipiti nịnị nị.

² Nọ aha ọnya ọnị Ẹnẹyịmavara kà à yaa hẹkẹ ọnị, dị ụ wụ̀ ọnya ịnị atẹmẹ awụ àa vị imaaru. Sị mẹ̀ ịsa eche ọyịparahu ọnọọ, dị ụ wa sị sị ụbanyị yị Ẹnẹyịmavara Ohomorihi awụ nịnị.

³ A sị ụ rị ịsa ọnyọọnyị ana sị òwù tụ. Pooro dị ọ mẹ ẹkụhị ịhịmba, ịsa ọnị ọza ẹ̀ yị sị òwù tụ ụ vaa rị nịnị beri uye ọnọọ nị. Ịsọyịrị ụya ọ vị nị. Ụ́ maa hụrị Ijipiti nịnị, eyiha-eyiha ụ sị hụụ ịzọọ nịnị nị. Pooro ịnị ẹhẹ awụ nịnị, avọọ u mẹ̀ vaa tamayị ẹkụhị ọnị ụ sị hụrị Ijipiti, ịzị ụ ya rị ụya nịnị nị.

⁴ Dị ẹkụhị ịhịmba ọ gụ, a sị a nyị ọza ịnị ẹngụ awụ nịnị ene e re òwù ịnị ụva anị ẹkụra awụ nịnị. A sị ụ zẹ ka uye ịsụpa ọnị ụ wụ oruva ẹkụhị ịpaapa ọ̀ vẹtẹ nẹẹhẹ nịnị.

⁵ Ohomorihi ẹ yị si oze wụ nịnị ka wa wụ̀ uye ịsọvọ eche ọyịparahu ọnọọ aha ọnyọọnyị ọsa ịnị ẹkụra-ẹkụra oni Ohomorihi vaa sịị wụ nịnị.

⁶ Ama aha ọnị Ẹnẹyịmavara Ohomorihi awụ nịnị vaa nyị ka à yaa hẹkẹ ọnị kẹnẹ ụ vaa yaa mẹ̀ ịsọvọ eche ọyịparahu ọnọọ nị. Oruva, ọyị ọ̀ọ maanị aa ngụ ẹtẹ kẹnẹ ụ vaa mẹ̀ ẹ nịnị nị. Ụmẹ avọọ ụ sị hụrị Ijipiti nịnị nị.

⁷ Ịzị Ohomorihi vaa nyị ka à yaa hẹkẹ ọnị ụ vaa yaa chịnẹ ẹ, dị ụ rị ọ nịnị ịzọọ nị. Ẹnẹnẹ eyinẹhẹ anị, wa nyẹngụ va nọ ịnị ajẹngụ awụ nịnị.

⁸ Ụ vaa rị ịsọyịrị ọnị ọza ẹ̀ yị sị òwù tụ mẹ ẹkụhị nịnị. Ịhị ẹ tụ ẹkụhị ịhịmba, avaba awụ nịnị vaa kụ ẹngụụ gụụ yị Ẹnẹyịmavara Ohomorihi awụ nịnị. Wẹ yị vaa mẹ̀ ụkọrọ nịnị ịhị ọnọọ.

Eche ịsa ọyịkụ gụ

⁹ Ụ vaa za ọsẹ ịhịmba ịrịka. Ẹkụhị ịpaapa ene e nyima aa sẹ akụ ụ vaa za a ịrịkaa hụrẹ nịnị nị.

¹⁰ Dị ụ va rị eche ịsa ọyịkụ gụ nịnị, ọyịsị ụbanyị yị Ẹnẹyịmavara Ohomorihi awụ nịnị, dị ụ wa sị ẹyịza va yị Ẹnẹyịmavaraa anka ọpa ọyịza ọnị ọ mẹ wụ nịnị.

¹¹ Yà ọvịdị Ẹnẹyịmavara Ohomorihi awụ nịnị, dị ụ waa jẹ ịrajẹ nịnị. Ẹwụrị ezi ọnọrụ ọnịrị anẹẹ, Anireevi ana ra pe wu nịnị beri azọga awụ nịnị, ezi-oku ọnịrị esoku ana ra ịnị ẹkụra awụ nịnị. Ịzị Ẹnẹyịmavara Ohomorihi awụ nịnị vaa nyị ka àa hẹkẹ ọnị ụ vaa ya maanị mẹ̀ ẹ nị.

¹² Tamayị nịnị ka ọrịhị ụ vịdị vị ịnị ẹtẹ Ijipiti nị, dị ụ we re ka waa saasa avaba ọda ẹnẹnị nịnị.

Eche anaā rị ịnị Ajẹngụ

¹³ Wàa sị avaba akụ awụ nịnị kụ gụ hụụnị ịda ọnị ụ yà tụ́ ọ nịnị ọnịrị eche awụ nịnị, ụ vaa rị eche ịnị ajẹngụ ẹkụhị ịhịmba.

¹⁴ Waa jẹ ịrajẹ wàa rị eche ọnọnị nịnị. Ẹwụrị ezi ọnọrụ awụ ọnịrị anẹẹ, ọrịhị awụ anọrụ ọnịrị anẹẹ, Anireevi nịnị, azọga, ezi-oku, ẹnịrị esoku ana ra ẹkụra awụ nịnị.

¹⁵ Ẹkụhị ịhịmba ụ vaa rị eche ọnọrụ, dị ụ wa sị sị ụbanyị yị Ẹnẹyịmavara Ohomorihi awụ nịnị aha ọnị ọ ka à yaa hẹkẹ ọnị nị. Agụvị ka Ẹnẹyịmavara Ohomorihi awụ nịnị vaa mẹ ka ò ze wụ nịnị ịnị avaba ịsa ọnị ụ kụ gụ ọnịrị ịnị ụkọrọ awụ nịnị. Ịzẹyịza, ụ vaa rị eche nịnị.

Eche oze ẹẹta aha ahẹkẹ

¹⁶ Ụpẹ ẹẹta ịnị ịrayị avaba ọnọrụ awụ nịnị vaa kụụ gụ ọ̀yị hẹkẹ Ẹnẹyịmavara Ohomorihi awụ nịnị ịzị ọ kà à yaa hẹkẹ ọnị nị. Ẹ vavọọ waraa gụ ụmẹ Eche Ọyịparahu, ụmẹ Eche ịsa ọyịkụ gụ, ọnịrị ụmẹ Eche ịnị Ajẹngụ. Ẹ yị ọza ana vaa sị ụvọ osusuu vẹ ọvịdị Ẹnẹyịmavara o.

¹⁷ Avaba awụ nịnị vị ana vaa sị ẹyịza vẹ anka ọpa ọyịza oni Ohomorihi mẹ yọ.

Mẹ ịzẹyịza ka aza na

¹⁸ Re ka waa nyị ọmọkarẹyị nịnị ọnịrị ọdọvịdị nịnị hi ẹkụra-ẹkụra ẹnẹ Ẹnẹyịmavara Ohomorihi awụ aa sịị wụ nịnị. Ịzẹyịza ẹ vaa sịị mẹ̀ ọkarẹyị yị avaba aza nị.

¹⁹ A sị u sima ịrẹyị ka waa mẹ̀ ọkarẹyị nịnị. A sị ụ nyị ọza remeyi nịnị, dị a sị ụ dọ ochirerenu o. Agụvị ka ochirerenu vi eneē gù ọza eyi, ẹ yị nyị ọza mẹ ye ịrẹyị dị ọ nyị ịzẹyịza na za.

²⁰ Re ka waa mẹ ịzẹyịza pooro kẹnẹ, agụvị dị ụ wa zụ ra nịnị ịnị ẹtẹ ẹnẹ Ẹnẹyịmavara Ohomorihi awụ nịnị aa sịị yị wụ nịnị aanị.

Asị ọza hì ọchị àa vị kụ ịrẹta gụ hẹkẹ ẹ

²¹ Wèe hì ụta ịsọvọ yị Ẹnẹyịmavara Ohomorihi awụ nịnị, wẹ yị nyayịnẹ hi ọchị jẹ akaha anị yị ori ọnẹẹ ana aā hị́ Asera.

²² A sị ụ sị ịrẹta tụra ọhẹ jẹẹ dị wa jị ọ ori nịnị. Ẹnẹyịmavara Ohomorihi ộ nyị ịhyẹrẹ ẹngụ ịsa ẹnẹnị.