Iwe Ọhụhị Imosiisi ana aa hị́ Ọyịvatụrọda 15 - IWE ỌNỊNỊ

Ọda ana za ẹkẹhị ọyị dọ rere

¹ Ịrayị ịhịmba-ịhịmba ẹ̀ vaa sị eyi hụụnị ụta ana aa rị wa.

² Aanị a mẹ vaa mẹ̀ ẹ nị. Ọza tụra ọza anaa sị ẹkẹhị rere Anisirẹrị ọnọhụva anị vaa sị ayị hụụnị anị yọ. Asị ọ kụkụ varẹma na họ̀ ọ ụta. Ẹnẹyịmavara ọnị ụvọta ọ raà kụ ọ kwooze.

³ Anikinami ana rị wa ụta kẹnẹ ẹ nyẹngụ dọ ẹkẹhị nị. Ama ẹnịnị ẹ yị nyayịnẹ dọ ọnọhụva ẹnịnị ana rị wa ụta.

⁴ Ẹ yị vọrọ ka a nyị onosiye ịnị akakana ẹnịnị agụvị ka Ẹnẹyịmavara Ohomorihi ẹnịnị vaa mẹ̀ ka o zee yị wa ịnị ẹtẹ ọnị aa sị yị wa.

⁵ Ẹnịnị ẹ̀ẹ saasa avaba ọda Ẹnẹyịmavara ọnị ọnị aa mẹ̀ ọda anị yị wa ajịnị,

⁶ Ẹnẹyịmavara vaa mẹ̀ ka o zee yị wa anka o me wo oto anị yị wa. Ẹ vaa sị ẹkẹhị rere ẹkụra ọrụrụ ama ẹnị ẹ yị vaa dọ erere hụụnị ụvọ ọza. Ẹnị ẹ vaa mẹ̀ ohinọyị tụra ịrẹsụ ẹkụra ọrụrụ-ọrụrụ ama ẹ yị nyị ẹkụra ana vaa mẹ̀ ịjọva tụra ịrẹsụ.

⁷ Ịjị ẹnịnị ẹ̀ na ngụ ẹtẹ ọnị Ẹnẹyịmavara aa sị yị wa, àa nyị ọza ịnị ẹngụ ẹnịnị ene re osiye ịnị ẹkụra ọnyọọnyị, asị ẹ̀ sị ụvọ kwoku yọ.

⁸ Ẹ sị ẹhụ ẹkẹhị ana hụ wa mẹ̀ ọyịnẹngụ ẹnịnị rèré wa.

⁹ Asị e rò ka ịrayị ịhịmba anaā sịị sị eyi hụụnị ụta yị ọza ọ sị gụrị ẹtẹ, agụvị avọọ wẹ yị sị. Onosiye ọnọọ òo na owu hị́ Ẹnẹyịmavara, ọza ọnọọ aa mẹ̀ ịvị.

¹⁰ Ha ụvọ ha yị onosiye, asị ọza rị uhuhu tụ́ ịnị ịsa ana aa sị yị wa. Ọza ọ vavọọ a mẹ̀, Ẹnẹyịmavara vaa mẹ̀ ka o zee yọ ịnị ịsa tụra ịsa ọnị aa mẹ̀.

¹¹ A mẹ hịka ẹ yị nyị ụmẹ ọnị anarịmanyị ẹ̀ vaa ya ịnị ẹhẹ, agụvị avọọ ọnị mẹ̀ ọda yị wa ka ẹ ha ụvọ tụ́ yị onosiye ọnịrị ọnụzọngwa nịnị.

Ọda ana za ọyị hụrẹ ọrịhị ụvọ

¹² Àa nyị Anihiburu, ọ̀ọ vị ọnọrụ, ọ̀ọ vị ọnẹẹ ana na ẹngụ anị ọrịhị yị ọza, ịrayị ịhịnọnyị kẹnẹ a sị ya ahụ ọza ọnọọ dị ọ nyị ẹngụ varẹma nị.

¹³ Asị ọga anị hụrẹ ẹ ụvọ ka ọọ na ịnị osusu.

¹⁴ Ọ nyị ịnị atẹmẹ anị ọnịrị ẹvụ anị yọ. Dị ọ rẹ ka akụ ọnịrị eche yọ. Ẹnẹyịmavara vaa mẹ̀ ka o zee yọ huu avọọ nị.

¹⁵ Ẹnịnị tamayị ka ọrịhị ẹnị rẹẹ̀ vịdị vị ịnị ẹtẹ Ijipiti, dị Ẹnẹyịmavara va dọ wa ha nị. Agụvị avọọ ọnị mẹ̀ ọda yị wa ajịnị nị.

¹⁶ Ama ọrịhị ọ̀ọ ka ọnị ẹ yị hụrẹ ịda ọga agụvị ka ọnị o sì ịrẹyị ọga anị ọnịrị ovwoovu anị, dị ọ rọ̀ ọnị ẹngụ nị.

¹⁷ Ọ vavọọ kà a, dị ọga anị sị ọ na oze irehi anị, dị ọ sị osi jị ọ ụtọ ro, dị ọ kụkụ vị ọrịhị pooro.

¹⁸ Asị ọza re ẹngụkata ụmẹ ọnị aa sị hụrẹ ọrịhị anị ụvọ agụvị ka ọ raà mẹ̀ ụkọrọ ene huna ọnịbaro yọ ịrayị ịhịnọnyị. Ẹnẹyịmavara Ohomorihi vaa mẹ̀ ka o zee yọ ịnị ịsa tụra ịsa ana aa mẹ̀ nị.

Ọda ana za ozi ịpaapa ịsụpa

¹⁹ Ẹ sị ezi ịpaapa ịsụpa ẹnịnị ana vị araka tụ irenyi yị Ẹnẹyịmavara. Asị a kụ wa mẹ̀ ụkọrọ, dị asị rẹ kụ ẹyị ịsụpa ẹnẹẹ.

²⁰ Ịrayị-ịrayị, dị a kụ wa na aha ọnị Ẹnẹyịmavara Ohomorihi nyị ka a ya hẹkẹ ọnị. Dị a wụ̀ wa ịsa ịsọvọ yị Ẹnẹyịmavara, dị ọzọza ọnịrị ovwoovu anị rị ọ.

²¹ Ama àa nyị ịsụpa ene che ahụ, a vị dị o gu eyi nị, a vị dị a nyị ịsa ọsa ana mẹ̀ ẹ nị, asị ẹ sị ẹngụ ịsụpa ẹnẹẹ mẹ̀ ịsọvọ yị Ẹnẹyịmavara Ohomorihi

²² Ẹnịnị ẹ zụ wa ịzị ẹ ra, dị ẹ rị ọ anka uye epeni, a vị akọnọ ana wụ́ ịnị ube. Aza kẹnẹ ẹ zụ rị ọ.

²³ Ama asị a nyị ọza ana rị anya anị. A va a hi ẹtẹ anka enyi.