Iwe Ọhụhị Imosiisi ana aa hị́ Ọyịvatụrọda 14 - IWE ỌNỊNỊ

Asị ẹ zị ẹngụ oku anka anẹkụra ana vọ

¹ Ẹwụ nịnị Anisirẹrị vị ezi Ẹnẹyịmavara Ohomorihi awụ nịnị. Agụvị avọọ, ẹnịnị aa zị ẹngụ oku, asị ẹ sị ịsa da ẹngụ ẹnịnị, a vị dị ẹ hara ẹyị ịnị ịrẹsụ ẹnịnị yị oku.

² Ka aza ana a sị tụ́ irenyi yị Ẹnẹyịmavara Ohomorihi ẹnịnị ẹ vị nị. Ẹnị Ẹnẹyịmavara nyị yị ẹngụ anị hụụnị avaba aza ene hi ịnị ẹhẹ nị.

Uye ana vọrọ ka aa rị

³ Asị ẹ rị uye ọnị Ẹnẹyịmavara nyị enyisi anị.

⁴ Ẹngụ uye ẹnẹnị ẹ zụ rị nị; ụnọ, atẹmẹ, ẹvụ,

⁵ akọnọ, epeni ọnịrị ẹvụ ịnị avị irenyi-irenyi.

⁶ Ẹnịnị ẹ zụ rị uye tụra uye ọnị ẹtụpa anị ga hi, dị ọọ̄ tọmọ ịsa rị.

⁷ Ama asị ẹ rị uye ọnị ẹtụpa anị ẹ yị ga hi, dị ọ yị re mā tọmọ ịsa rị anka ịnyaakụmị, adeji, epeni. Enyisi ọ vị ka ẹ rị ẹngụ uye ẹnẹẹ nị.

⁸ Asị ẹ rị ụra agụvị ka ọ nyị ẹtụpa ana ga hi ama ọ yị mā tọmọ ịsa rị. Asị ẹ hyakụ sị ụvọ kanyị oku anị.

⁹ Ịnị avaba ịsa ene hi ini enyi, Ẹnịnị ẹ zụ rị uye ana nyị apara ịrẹma anka ivovo.

¹⁰ Enyisi ọ vị nị ka ẹ rị uye ini enyi ẹnẹ ẹ yị nyị apara ịrẹma.

¹¹ Ẹnịnị ẹ zụ rị inomi ọnị aa za ido yị wa.

¹² Ama ẹnịnị ẹ yị vaa rị inomi ẹnẹnị; ọkasịmẹ, ụba, ọgọdọbẹ,

¹³ ọrụ, ukokoro irenyi-irenyi,

¹⁴ ọrụ irenyi-irenyi

¹⁵ ọgọdọbẹ, ogugu, ịpẹpẹyẹ ịnị enyi, ukokoro irenyi-irenyi.

¹⁶ Ogugu oweyi, ogugu ọbanyị, ogugu ọvwọọvụ,

¹⁷ ogugu ịnị avị, inomi ini ókụ̄ ọbanyị, irepe ọrivovo,

¹⁸ irepe ọrivovo ọgọdọ, ịpẹpẹyẹ ịnị enyi ẹnyẹẹnyị, inomi ana nyị okoni kọrọdọ, ọnịrị arịga.

¹⁹ Avaba Ukukurumi ene hira vị ịsa enyisi, agụvị avọọ asị a rị wa.

²⁰ Ama ẹ zụ rị avaba ịsa ana nyị avaka ana vị nị.

²¹ Asị ụ rị uye ene su, ama wa zụ navọ ka anikinami ana ra va hura wụ nịnị ẹ rị ọ. Òo ze u eyi wa zụ na yị azọga. Ẹwụ nịnị vị́ Ẹnẹyịmavara Ohomorihi awụ nịnị. Aanị ụ vị nịnị.

Sị agẹẹwụ awụ yị Ẹnẹyịmavara

²² Sị agẹẹwụ awụ tụ aha irenyi. Agẹẹwụ avaba ịsa ịnị aarẹ awụ ịnị ịrayị.

²³ Na ọvịdị Ẹnẹyịmavara Ohomorihi awụ ịzị ọ̀ nyị ka a hẹkẹ ọnị, dị wa rị agẹẹwụ akụ awụ, ozi ịpaapa imaaru awụ ọnịrị atẹmẹ, di e hu agẹẹwụ eche ọnịrị angwẹ orivi. Mẹ ẹ agụvị dị ụ wa nyị angwahi Ẹnẹyịmavara Ohomorihi awụ pooro.

²⁴ Ịzị a yaa mẹ hẹkẹ òo si noze hi irehi awụ ọyịkụ agẹẹwụ ịsa ịnị aarẹ ọnị Ẹnẹyịmavara Ohomorihi awụ sị yị wụ vẹ ịzọọ, ịsị ụ vaa mẹ yị:

²⁵ Na a dị ụ wa sị ẹkẹhị anị vẹ ịzị a yaa hẹkẹ Ohomorihi.

²⁶ Sị ẹkẹhị anị hị́ ịsa tụra ịsa ọnị wee sì. Ọ zụ vị uye, ịdẹba, eche, eche ọkatẹngụ. Ẹwụrị anovwoovu awụ ẹ rị ịsa ẹnẹnị vabẹ, di u wee hine ẹngụ ayị nịnị.

²⁷ Asị ụ hi ayị ohirẹsụ irehi Ohomorihi nịnị ana ra ịnị ẹkụra awụ nịnị agụvị ka ẹnịnị ẹyị nyị ẹtẹ ẹnịnị ụvọta.

²⁸ Ọzẹtẹ ịrayị ẹtẹẹta, a sị agẹẹwụ avaba ịsa ịnị aarẹ awụ nịnị va tụ ịnị irehi ịsọyịrị ana ya ịnị ẹkụra.

²⁹ Ịsọyịrị ọnọnị vị Aanireevi nịnị ẹnị ẹ yị nyị ogu ụvọta ẹnịnị, ọnịrị azọga, ozi oku beri osoku, ana ra ini ẹkụra awụ nịnị. Ẹnịnị vị anaā va dọ ịsọyịrị hụrị ịzọọ. Wàa sị agẹẹwụ awụ nịnị vẹ, Ẹnẹyịmavara Ohomorihi awụ nịnị vaa mẹ ka o ze yị wụ nịnị ịnị ịsa tụra ịsa ọnị u waa mẹ.