Iwe Ọhụhị Imosiisi ana aa hị́ Ọyịvatụrọda 13 - IWE ỌNỊNỊ

Asị a hẹkẹ ori ọnyọọnyị

¹ Àa nyị Ọnịsẹ, a vị ọza anaā kà etore ana kwẹẹtẹ ịnị ẹngụ awụ nịnị di o wo oto ịvọpa a vị apọtẹrẹwa ohyozirenu.

² Ịrẹyị ọnị ọ kà ọ̀ọ sị sẹ, dị ọ kụkụ ee tụra wụ na hẹkẹ ori nịnị ọnị wẹ yị vịdị hẹkẹ da.

³ Asị ụ dọ ịrẹyị anị tụ ịzọọ agụvị ka Ẹnẹyịmavara vị ana aa sị zama wụ re ka ọnị ọ yẹ wàa sị avaba ayị wụ sì ịrẹyị anị.

⁴ Saasa Ẹnẹyịmavara Ohomorihi awụ, di we hí angwa anị. Wụ́ chire e, dị ụ wa sị ụvọ za avaba ọda anị, dị ụ wa hẹkẹ ẹ, dị ụ wa jẹẹ gere-gere pe e.

⁵ Wụ̀ ọnịsẹ ọnọọ ana ka wa mẹ akamawụ hi Ẹnẹyịmavara Ohomorihi ana dọ wụ ha hụrị Ijipiti ịzị a ya za wụ nịnị ọrịhị. Ẹngụ ọza ọnọọ vị ọza ọhịmị ana a sị vụrị ka ọnị ọ mẹ wụ nịnị nyeeyi hụụnị ẹhẹ ana vọrọ ọnị Ẹnẹyịmavara kà wa ra. Wụ̀ ọ agụvị wa kụ udivi hụrẹ ẹtẹ.

⁶ Ọ daka vị ọnyara awụ, ọ vị ozi ewu ọnọrụ a vị ọnẹẹ, ọ vị ose ewu ọnị u sì ịrẹyị a vị ọta awụ òo were-were aa tụ wụ ụka ka wa hẹkẹ ori nịnị ọnị ẹwụrị ohiku awụ nịnị ẹ yị hẹkẹ da nị,

⁷ ọ vị ori aza ọnị ẹwụrị ra va hura, a vị ori aza ana ra aha onoze.

⁸ Asị ụ zẹ ka o vene wụ. Asị ụ sị ụtọ pe ịrẹyị ẹnịnị vụrụ-vụrụ. Asị ụ vayị ẹnịnị, asị ụ sị wa tẹ̀.

⁹ Wụ̀ wa! Vị ọnịpaapa ene vịdị ee ne wa ịrẹta, dị aza ana vọ ẹnẹ ẹ rẹ kụ ịrẹta hi wa.

¹⁰ Sị ịrẹta-ịrẹta wụ̀ wa agụvị ka ẹnị e si ka ẹnị kụ wụ nịnị nyeeyi hụụ ịdị Ẹnẹyịmavara Ohomorihi awụ nịnị ana kụ wụ nịnị hụrẹ Ijipiti ịzị ụ vị ọrịhị nịnị.

¹¹ Ịjọnọọ avaba Anisirẹrị vaa wụ́ ịsa ana mẹ̀; dị angwa vee hi wa, dị ẹ yị nyị ọza ana nyayịnẹ mẹ ẹngụ ebira odivi ọnọọ.

¹² Wàa na sị ra ịnị ẹkụra ọnị Ẹnẹyịmavara Ohomorihi awụ nịnị sị yị wụ nịnị, ụ vaa wụ́

¹³ ka aza kẹnẹ ẹnyị ịnị awụ nịnị ẹ raà kụ aza nyeeyi na hẹkẹ ori nịnị ẹnị wẹ yị mā hẹkẹ vịdị vẹ.

¹⁴ Wàa vavọọ hụ́ uhuhu, sì iruvo anị ẹtẹẹtẹrẹ; Àa vị ịzẹyịza ẹ mẹ̀ ebira odivi ọnọọ nị,

¹⁵ wụ̀ avaba aza ana ra ịnị ẹkụra ọnọọ ẹnịrị avaba ịsụpa ẹnịnị. Vu avaba ẹkụra ọnọọ ẹtẹ saka-saka.

¹⁶ Kụ́ avaba ogu anẹkụra ọnọọ gụ ịnị orere, dị a rị ẹkụra ọnọọ ịra anka ịsa ịsọvọ yị Ẹnẹyịmavara Ohomorihi awụ nịnị. A vavọọ na eburu tịtẹ pooro, asị e tenyi ọ da.

¹⁷ Asị a nyị ọza ana sị̀ hụụnị ogu ene chi hi aanị, agụvị Ẹnẹyịmavara ọ vaa hụụnị ọyịkụ anị, dị ọ vayị awụ nịnị. Ọ vaa vayị awụ nịnị, dị ọ mẹ ka wa rụrụ hu avọọ anka ọ mẹ hị́ eku yị ohiku awụ nịnị,

¹⁸ ẹ̀ẹ saasa avaba ọda Ẹnẹyịmavara ọnị ọnị sị yị wa ajịnị, dị ẹnịnị sị ụvọ za a nị.