Iwe Ọhụhị Imosiisi ana aa hị́ Ọyịvatụrọda 12 - IWE ỌNỊNỊ

Ọda ọnị ẹ vaa sị ra ịnị Ikanaani

¹ Ẹsẹnị ẹ vị ọda ọnị ẹ vaa saasa ịnị ẹtẹ ọnị Ẹnẹyịmavara, Ohomorihi ohiku ẹnịnị raà sị yị wa ka ẹ ra a ịnị avaba ẹhẹ ẹnịnị ịrẹsụ ọnọnị.

² Anẹkụra irenyi-irenyi ana ra ịzọọ vị ana hẹkẹ ori ẹnịnị. Ịjị ẹ̀ẹ raa dọ ẹtẹ ọnọọ, e du avaba aha ana a yaa hẹkẹ ori ene hi ịrẹsụ ataba ọnịrị ịrẹsụ otutu irenyi-irenyi a vị iruvo ọchị ẹbanyị-ẹbanyị ịzị ẹẹ̄ mẹ ori.

³ Ệ gara ụta ori ẹnẹẹ va ha, dị ẹ chaka ịrẹta ẹnẹ sị jị ọhẹ, dị ẹ rị ọchị ana sị mẹ uyi ori ẹnịnị ana vị Asẹra ịra. Ê wú avaba irehi ori ẹnẹẹ va ha, dị asị a vana kụkụ wụ́ ịrẹha ẹnịnị vụrụ-vụrụ.

⁴ Asị hẹkẹ Ẹnẹyịmavara Ohomorihi ẹnịnị ịnị oze ọnị ẹẹ̄ hẹkẹ ori ẹnịnị.

⁵ Ama ẹnịnị e sì ịzị Ẹnẹyịmavara Ohomorihi vaa nyị ka ọ vị irehi anị ịnị avaba ịrẹsụ ẹnịnị, dị ẹẹ nọ ịzọọ na hẹkẹ ẹ.

⁶ Ịzọọ ẹ vaa sị ịsa ịsọvọ ọyịrịịra ọnịrị ịsa ana vọ, agẹẹwụ, ẹyịza, ịzẹzẹ, ẹyịza kẹnẹ, ọnịrị ozi ịpaapa ịsụpa ọnịrị imaaru ẹnịnị.

⁷ Agada Ẹnẹyịmavara Ohomorihi awụ nịnị ịzọọ, ẹwụrị ovwoovu awụ vaa rị ịsa ọnị ụ sị ụvọta awụ nịnị mẹ, dị ụ waa jị ịrajẹ

⁸ Ịjị ụmẹ ọnọọ òo tu, wẹ yị vaa nyayịnẹẹ mẹ ẹngụ ebira ọnị ụ waa mẹ nịnị aanị. Booro aanị, avaba ayị vị anaa mẹ o me ze yị eyi kẹnẹ.

⁹ Agụvị ka wẹẹ̀ yị va ngụ ịnị ẹtẹ ẹnẹ Ẹnẹyịmavara aa sịị wụ nịnị ka wa na tụ́ ụhwọ́ nịnị; wẹẹ̀ yị dọ ogu oni Ohomorihi ka ọnị aa sịị wụ nịnị.

¹⁰ Ịjị ụ wàa raà jịnẹ Okuha Ịjọdanị nịnị, Ẹnẹyịmavara vaa navọ ka wa ra ịzọọ nịnị. O vee sere wu nịnị, dị ẹ yị zẹẹ ka ọnịvị awụ nịnị ẹ̀ zụ mẹ wụ́ ịrẹyị. Ụ vaa ra ịnị ẹngwọọrọ nịnị.

¹¹ Ẹnẹyịmavara vaa nyị aha ọnya ịzị ụ vaa yaa hẹkẹ ẹ nịnị. Ịzọọ ụ vaa sị avaba ịsa ọnị mị mẹ ọda anịị wụ nịnị, vaa yị Ẹnẹyịmavara nịnị nị. Ịsị ẹnị ụ vaa sị vaa yọ nịnị yị: Ịsa ịsọvọ awụ nịnị ana a vaa rị ịra, ọnịrị ịsa ịsọvọ awụ nịnị ana vọ, achehi ẹẹwụ awụ nịnị ọnịrị ẹyịza ana vọ, beri ẹyịza oturenyi oni u wo oto ka ụ vaa sịị vaa yị Ẹnẹyịmavara nịnị.

¹² Ụ vaa yà ọvịdị Ẹnẹyịmavara Ohomorihi awụ nịnị, dị ụ waa jẹ ịrajẹ. Ẹwụrị ezi ọnọrụ awụ nịnị ọnịrị anẹẹ. Ẹwụrị ọrịhị awụ nịnị anọrụ ọnịrị anẹẹ, beri Anireevi ana ra ẹkụra awụ nịnị; tamayị nịnị ka Anireevi nịnị ẹ yị nyị ẹtẹ yị ẹngụ ẹnịnị ụvọta.

¹³ Re ka wẹ yị na mẹ̀ ịsọvọ awụ nịnị ịzị u wee re nịnị kẹnẹ o.

¹⁴ Ama aha ọnya ọnị Ẹnẹyịmavara vaa nyị kẹnẹ ịnị ẹkụra ovwoovu awụ nịnị ọnya, ụ vaa yaa mẹ̀ ịsọvọ nịnị nị. Ịzọọ kẹnẹ ụ vaa yaa mẹ̀ ịsọvọ awụ nịnị ana a vaa rị ịra, dị ụ wa rẹẹ mẹ avaba ịsa ana vọ ọnị mị mẹ ọda anịị wụ nịnị nị.

¹⁵ Ama ụmẹ oni òo ze wu nịnị eyi, wa zụ wụ̀ uye ịzị ụ ra nịnị dị ụ wa rị ọ. Ọpa ịsa oni Ohomorihi ọ̀ọ sị wụ nịnị, wa zụ rị ọ nịnị. Aza anị zị oze ahẹkẹ ọnịrị aza ẹnẹ ẹ̀ yị nị ẹ zụ rị ọ, anka ụ mẹẹ̄ rị uye ùnè ọnịrị ẹdọ nịnị.

¹⁶ Ama à sị ụ rị anya ẹnịnị kẹnẹ o. Ụ vaa và a hi ẹtẹ anka enyi avọọ nị.

¹⁷ Àsị u ya ịzị ụ ra nịnị rị ịsa ụ sị yị Ẹnẹyịmavara nịnị. Àsị u rị achehi ẹẹwụ apaapa, ọ̀ọ vị akụ awụ nịnị; ọ̀ọ vị achehi ẹẹwụ eche ọ̀ọ vị angwẹ awụ nịnị. Àsị u rị ozi ịpaapa imaaru ọnịrị ozi ịpaapa atẹmẹ awụ nịnị. A sị ụ rị ẹyịza oni u wo oto ka waa sịị yị Ẹnẹyịmavara nịnị, ẹyịza ọnị ụ sị kẹnẹ nịnị, ọ̀ọ vị ẹyịza ọsa ọnị ụ sị yị Ẹnẹyịmavara nịnị.

¹⁸ Ọvịdị Ẹnẹyịmavara Ohomorihi awụ nịnị ụ vaa yaa rị ẹngụ ịsa ẹnẹnị ịzị Ẹnẹyịmavara Ohomorihi awụ nịnị vaa nyị nị. Ẹwụrị ezi ọnọrụ awụ ọnịrị anẹẹ, beri ọrịhị awụ anọrụ ọnịrị anẹẹ, ọnịrị Anireevi nịnị ana ra ẹkụra awụ nịnị e dudu vaa rị ịsa ẹnẹnị nị. Dị ụ yà ọvịdị Ẹnẹyịmavara Ohomorihi awụ nịnị aa jẹ ịrajẹ tụ́ ịrẹsụ avaba ịsa ọnị ụ mẹ nịnị.

¹⁹ Ịrẹma ọnị ụ yị ra ịnị ẹtẹ awụ nịnị, si eyi pe ẹtẹ, dị à sị ụ na sị eyi oweyi re Anireevi nịnị o.

²⁰ Ẹnẹyịmavara Ohomorihi awụ nịnị ô wo oto ka ọnị vaa dàa tụ ịnị ẹtẹ awụ nịnị yị wụ, ịjị ọ̀ọ sị ọ mẹ, dị ụ ka wee si ka wa rị ịsa nịnị nị, wa nyẹngụ rị ọ nịnị o mè ze wu nini eyi.

²¹ Ịzị Ẹnẹyịmavara nyị ka à yaa hẹkẹ ọnị òo sị noze rịrị ẹwụ, dị ụ wụ̀ ịsụpa ọnị Ẹnẹyịmavara sị yị wụ anka m mẹ mẹ̀ ẹ ọda yị wụ nịnị, ọ̀ọ vị imaaru awụ ọ̀ọ vị atẹmẹ, wa zụ wụ ọ rị ẹkụra awụ ụmẹ ene ee ze wu eyi.

²² Ọza ana nị zi oze ịnị ahẹkẹ ọnịrị ọza ẹnẹ ẹ̀ yị nị ẹ zụ rị uye ọnọọ anka ẹ mẹẹ̄ rị uye ùnè ọnịrị uye ẹdọ.

²³ Re kẹnẹ ka wẹ yị anya anị, agụvị ka ịnị anya ẹhẹ yà nị. Agụvị avọọ a sị ụ rị uye beri ẹhẹ anị.

²⁴ A sị ụ rị anya uye, và a hi ẹtẹ anka enyi avọọ.

²⁵ A sị ụ rị ọ agụvị dị avaba ẹhẹ awụ ò zoza yị wụ, di ò re zoza yi ezi ewu ịrẹma awụ. Ọ vavọọ vee zozaa yị wụ agụvị ka waa mẹ̀ ịsa ana vọrọ ini eyi Ẹnẹyịmavara.

²⁶ Ama sị ẹyịza Ohomorihi ọnịrị ẹyịza oni u wo oto ka waa sịị yọ nọ aha ọnị ọ nyị ka à yaa hẹkẹ ọnị.

²⁷ Yà ịzọọ mẹ̀ ịsọvọ ana a vaa rị ịra bemi-bemi ịrẹsụ ụta ịsọvọ Ẹnẹyịmavara. Ama anya ịsa ịsọvọ ana vọ vị ọnị ụ vaa vàa hi ẹtẹ akaha ụta ịsọvọ Ẹnẹyịmavara Ohomorihi awụ. Wa zụ rị uye anị.

²⁸ Sị eyi pe ẹtẹ dị ụ wa saasa avaba ịrẹyị ọnị mị mẹ ọda yị wụ aanị, agụvị dị ò ze yị ẹwụrị ezi pooro zịna. Ọ vavọọ vee zee yị wụ agụvị ka waa mẹ̀ ịsa ene zoza, dị ọ rẹ vọrọ ini eyi Ẹnẹyịmavara Ohomorihi awụ.

 kà ọ̀nọ̀ ka asị a hẹkẹ ori.

²⁹ Ẹnẹyịmavara Ohomorihi awụ nịnị vee vu anẹkụra ọnị ụ waa naa ngụ nịnị ẹtẹ, dị ụ dọ wa ẹtẹ, dị ụ ra ịzọọ nịnị.

³⁰ Sị eyi pe ẹtẹ, a sị ụ na hama wa mẹ ahẹkẹ ẹnịnị o. Àa sị wa vu ẹtẹ, a si u ne sì iruvo ka wa yẹ ẹ́ mẹmẹẹ̄ hẹkẹ ori ẹnịnị, dị ụ wa vanaa hama wa nịnị. Wàa vavọọ mẹ, u wee re ịrẹyị odivi nịnị nị.

³¹ A sị ụ hẹkẹ Ẹnẹyịmavara Ohomorihi awụ nịnị anka ẹ mẹẹ hẹkẹ ori ẹnịnị. Ẹ̀ẹ yaa hẹkẹ ori ẹnịnị, ịsa ọhịmị-ọhịmị anaā nyị Ẹnẹyịmavara ịhyẹrẹ ẹẹ mẹ nị. Ezi ọnọrụ ẹnịnị ọnịrị anẹẹ vị ẹnẹẹ rị ịraa yị ori ẹnịnị.

³² Re ka wa tangwa saasa avaba ịsa ọnị mẹ ọda yị wụ nịnị aanị. A sị ụ dà tụ ọ, dị a sị ụ rẹ da hụụnị anị nịnị.