Iwe Ọhụhị Imosiisi ana aa hị́ Ọyịvatụrọda 10 - IWE ỌNỊNỊ

Imosiisi ộ varẹma dọ ọda ịnị ịrẹta ọsa.

¹ “Imosiisi ka Ẹnẹyịmavara ọ̀ ka yị ọnị ka, ọnị ọ bẹ ịrẹta patapata ẹẹva ẹngụ ọnị ọnị vịdị chakaa. Dị ọnị ọ mẹ apoti ana vaa kụ wa hi. Dị ọnị kụ wa ve tu ọnị ịrẹsụ ataba anị.

² Ẹnẹyịmavara kà ọnị e tenyi ọda anị chẹrẹ tụ ịnị ịrẹta ẹnẹẹ anka ẹngụ ọnị Imosiisi vịdị chaka. Dị a kụ wa hị́ ịnị apoti ọnọọ.

³ Ịzẹyịza dị Imosiisi sị ọchị akesiya mẹ̀ apoti dị ọ bẹ ịrẹta patapata ẹẹva, dị ọ kụ ọ nọ ịrẹsụ ataba Ẹnẹyịmavara nị.

⁴ Dị Ẹnẹyịmavara tenyi ọda ọnọọ chẹrẹ tụ ịnị ịrẹta ẹnẹẹ nị. Ọda ẹẹwụ ọnọnị vị ọnị ọ ka hụụnị ịnị akakana ịra yị ịragụ Anisirẹrị ana gụ ịnị ataba ịsịnayị, dị ọ̀ rẹ sị ịrẹta ụvọta ẹẹva ana a chẹrẹ ọda ẹnẹẹ yị Imosiisi.

⁵ Ịjị Imosiisi chi hụrẹ ịrẹsụ ataba vẹ, dị ọ kụ ịrẹta ẹnẹẹ hi ịnị apoti anka a mẹẹ mẹ ọda yọ nị. Hụrẹ ịhị ọnọọ ịrẹta ẹnẹẹ vene hi ini apoti ọnọọ pooro tu ajịnị nị.”

Usu Eerọnị

⁶ (Anisirẹrị mẹ hụrẹ ịzị ịkangga Anijaakanị hị́ na ngụ Imosiisi ra, dị Eerọnị su dị e nee tụ ịzọọ nị. Dị Eriyaza dọ ada anị ịrẹsụ ohirẹsụ ọbanyị irehi Ohomorihi.

⁷ Dị ẹnịnị hụrẹ ịzọọ na ngụ Igudigoda. Dị ẹ rẹ hụrẹ ịzọọ na ngụ Ijotebata ana vị ẹtẹ apasị nị.

 nyị Anireevi nịnị ka za apoti oto

⁸ Ịrẹsụ ataba, Ẹnẹyịmavara ya nị Anireevi nịnị ka e si eyi pe apoti oto anị nị. Ẹnịnị ọ̀ nyị ka ẹ vị ohirẹsụ irehi anị nị. Ẹnị ẹ zụ mẹ̀ aduwa ka o zee yị aza dị ọ dọ rị nị ụkọrọ anaa sị yị wa pooro tu ajịnị ọ vị ọnọọ nị.

⁹ Avọ Anireevi ệ yị nyị ẹtẹ ụvọta ẹnịnị anka aza ana vọ. Ẹnẹyịmavara ộ ka yị wa ka ọnị Ohomorihi ọ vị ogu ẹnịnị nị.)

Ẹnẹyịmavara ộ wụ̀ aduwa Imosiisi

¹⁰ Imosiisi ka ọnị ộ ya ịrẹsụ ataba ọnọọ ọọdụ ọnịrị ịrahụ ẹkụhị ẹbẹẹba, anka ọnị mẹ vịdị mẹ̀ ịpaapa. Ịzẹyịza, dị Ẹnẹyịmavara wụ ịpọda anị dị ẹ yị vu Anisirẹrị ẹtẹ nị.

¹¹ Dị Ẹnẹyịmavara kà yị Imosiisi ka ọ̀ kwẹẹtẹ, dị ọ nyima ụsẹ, dị ọ kụ aza nọ ịnị ẹtẹ ọnị ọnị hị́ eku anị ka ọnị aa sị yị ohiku ẹnịnị, dị ẹ na dọ ẹtẹ ọnọọ.

Ịsị Ẹnẹyịmavara ee sì

¹² Booro aanị, ẹwụ nịnị Anisirẹrị batọ, dị waa wụ̀ ịsị ọnị Ẹnẹyịmavara Ohomorihi ee si hụụnị ụvọ awụ nịnị. Hi angwa Ẹnẹyịmavara Ohomorihi awụ nịnị kẹnẹ, zị ụsẹ ịnị avaba oze anị, sì ịrẹyị anị, sị avaba ayị awụ ọnịrị ivehu awụ hẹkẹ Ẹnẹyịmavara Ohomorihi awụ.

¹³ Imosiisi kà ẹnịnị ẹ saasa avaba ọda Ẹnẹyịmavara ọnị ọnị aa sị yị wa ajịnị agụvị o zoza yị wa.

¹⁴ Ẹnẹyịmavara ọ nyị avaba ẹbẹẹba ọnịrị ẹtẹ beri avaba ịsa ene hi ịnị anị.

¹⁵ Ọ nyayịnẹ sì ịrẹyị ohiku ẹnịnị, dị ọ nyị wa dị ọ navọ avaba Anẹkụra nịnị ana vọ nị. Avọọ ọ mẹ yị nyị wa pooro ve tu ajịnị nị.

¹⁶ Agụvị avọọ, wụ̀ chire Ẹnẹyịmavara, dị asị ụ mẹ̀ ayị ọkatẹngụ hụrị ụmẹ tụ ọvịdị na.

¹⁷ Ẹnẹyịmavara Ohomorihi awụ nịnị o hụụnị avaba ori nịnị ọnịrị avaba ụkata irenyi-irenyi. Ọ́ banyị, di o chi ẹtẹ ẹngụ nị. Ọnị a vọrọ ka ee hí angwa anị nị. Ọ yị mā nyị ọza re eyi, dị ọ yi mā dọ ochirerenu nị.

¹⁸ Ọọ̄ mẹ ịzẹyịza ka ozi oku ọnịrị osoku na, di o sì ịrẹyị azọga ana ra beri aza. Aa sị ịsọyịrị ọnịrị achị yị wa.

¹⁹ Ẹnịnị e sì ịrẹyị azọga ẹnẹẹ agụvị ka azọga ẹnị rẹ vịdị vị ịnị ẹtẹ Ijipiti nị.

²⁰ Wụ̀ chire Ẹnẹyịmavara Ohomorihi awụ nịnị, dị ụ waa hẹkẹ ọnị ịnya kẹnẹ. Mẹ ịzẹyịza ka a na, dị u wee wo oto ịnị ịrẹha anị.

²¹ Ga a ọnị ọ vị Ohomorihi awụ nịnị nị. Ọnị ọ mẹ̀ ịsa ọbanyị-ọbanyị ọnịrị ohyozirenu ẹnẹnị yị wụ nịnị ọnị ụ wee re nịnị aanị.

²² Ohiku awụ nịnị ana nọ Ijipiti vị ẹnị ẹtarẹwụ. Ama booro anị, Ẹnẹyịmavara ọ raà mẹ̀ wa rụrụ ẹtẹẹtẹrẹ anka ụzọmị ịnị eguhi.