Iwe Ọhụhị Imosiisi ana aa hị́ Ọyịvatụrọda 1 - IWE ỌNỊNỊ

Imosiisi ô pe Anisirẹrị ka Ịrẹyị

¹ Â nyị ụmẹ ọ nya aanị ọnị Anisirẹrị nịnị sị jẹẹ tụ́ ụhwọ́ inozi ụnọmị Araba akẹnẹ irehu Ijodani. Ịzọọ ọ̀ gụrị Isuhwi ana ya ịnị akakana Iparani ọnịrị Ịtọhwẹrị. Ẹkụra ẹsa ana gụrị ịzọọ ẹ vị Ịrabanị, Ihazeroti ọnịrị Idizahabi. Ịzọọ Imosiisi ya pe Anisirẹrị nịnị kà ịrẹyị nị.

² Ẹkụhị ẹwụrọnya ọza a sị zị ụsẹ hụrẹ Ataba Ịhọrẹbị oze ịnị ataba Ịsẹyị va ngụ Ịkẹdẹsị Ibaneya nị.

³ Ịnị ẹkụhị ịpaapa ịnị ụhwẹ ẹwụrọnya ịrayị ana tụ́ ọ ịrayị ẹbẹẹva ọnị ẹ sị kwẹẹtẹ hụrẹ Ijipiti, Imosiisi maanị ka avaba ịrẹyị ọnị Ẹnẹyịmavara mẹ̀ ọda yị ọ ka ọ̀ ka yị Anisirẹrị wa nị.

⁴ Dị ịhị ọnọọ ve tu, Ẹnẹyịmavara ộ vịdị raà sị Anisirẹrị nịnị nyị ẹbẹẹba Isihoni, ohinọyị Anamọrị ana ra Ịhẹsịbọnị ọnịrị Ọgị, ohinọyị Ịbasanị ana ra Asịtarọtị ọnịrị Edireyi.

⁵ Anisirẹrị nịnị vi ene hi akẹnẹ Ijodani eyi ịzị ọyịị̄ zị vẹ ịnị ẹtẹ Imowabi, Ịzọọ Imosiisi yà mẹ ẹhahi avaba ọda Ẹnẹyịmavara mẹ̀ yị wa nị. Imosiisi kà,

⁶ Ẹnẹyịmavara Ohomorihi ka ẹhụ ụmẹ ọnị ẹnị sị jẹẹ Ịrẹsụ ataba Ịhọrẹbị avọọ ò zee.

⁷ Dị ọ ka ẹnịnị ẹ kara ajẹngụ ẹnịnị, dị ẹẹ nọ ẹkụra Anamọrị ene hi ịrẹsụ ataba. Ẹ ngụ ẹkụra ene hi inozi, ọnịrị ịrẹsụ ataba ne beri iruvo ataba ne tu Ịnẹgẹvị ọnịrị avaba ẹkụra eni hi utenyi ana vị ẹtẹ Anikenaani. E avọọ va hịrẹ na ngụ Ịrẹbanọnị dị ẹ̀ hi ịzọọ na ngụ irehu Iyuhwuretisi.

⁸ Ọ kà ọnị aa sị ẹtẹ ọnọọ yị ẹnị. Ọnị ọ̀ vịdị raà hị́ eku anị yị ohiku ẹnịnị Abụrahamị ọnịrị Ayiziiki ne beri Ijekọvụ. Ẹnịrị ezi ịrẹma ẹnịnị ana aa vẹ ẹ̀ nyị ẹtẹ ọnọọ nị.

Imosiisi ộ nyị ọdọvịdị nịnị

⁹ Ụmẹ ọnọọ Imosiisi ộ ka yị wa ka, ọnị Ịnyara ẹ yị za ẹnya ẹnịnị.

¹⁰ Ẹnẹyịmavara ana vị Ohomorihi ẹnịnị, ộ raa mẹ̀ wa rụrụ anka ụzọmị ịnị eguhi.

¹¹ Dị ọ ka ọ maa navọ Ẹnẹyịmavara ana vị Ohomorihi ohiku ẹnịnị ọ̀ vaa mẹ̀ ẹnị rụrụ oze akahị-akahị, dị o zee yị ẹnị anka ọ̀ mẹ vịdị ka a.

¹² Dị Imosiisi ka ọnị ịnyara ẹ yị zụ mẹ̀ ọkarẹyị ịrẹyị ana yị ịnị akakana ẹnịnị.

¹³ Avọọ, dị ọ ka ịrẹsụ ọzọza ọ̀ nyị ọza ana yẹ ịrẹyị ene eyi anị hweyi ana aza sị ụbanyị yị. Ẹngụ aza ẹnẹẹ ọnị vaa sị mẹ̀ ọdọvịdị ẹnịnị nị.

¹⁴ Dị ẹnịnị dọ ka ịrẹyị ọnị Imosiisi kà o zoza nị.

¹⁵ Dị Imosiisi sị aza ẹnẹ ẹ nyị aanị mẹ ọdọvịdị ẹnịnị nị. Aza ẹnyị ịnị ẹnịnị vị ọga tụra aza akahị ịrẹsụ nị, ẹnyị aza ẹchẹhị, a vị ẹvarẹwụ, a vị aza ẹnị ẹẹwụ.

¹⁶ Dị ộ ka yị wa, ka ẹnịnị ẹ vịdị wụ́ irenu aza daa, dị ẹ vaa mẹ̀ ọkarẹyị a mẹ vọrọ. Ẹẹ sị ịzẹyịza tụ́ ohi ịrẹyị, ọ̀ọ daka sụ́ Anisirẹrị ọnịrị anikinami, ọ̀ọ rẹ va vị ẹnẹẹnị.

¹⁷ Asị ẹ gụ ọza ẹnyị yị ọsa. Ẹ sị eyi ẹbẹẹbẹ re ọnyẹkẹhị ọnịrị ọnụzọngwa. Ẹ sị oze yị ọzọza ẹ kụ́ irenu ẹnịnị. Asị e hí angwa ọza ẹnyị-ẹnyị agụvị ka ịrẹyị Ohomorihi ẹ vaa sị mẹ̀ ọkarẹyị yị aza nị. Ịrẹyị anaaa da wa ụvọ dị ẹ kụ̀ ọ vee tu ọnị.

¹⁸ Ụmẹ ọnọọ, dị Imosiisi re si ịsa irenyi-irenyi ẹnị ẹ vaa mẹ zụ wa nị.

¹⁹ Ịjị Anisirẹrị nịnị raà mẹ̀ ịsa ọnị Ẹnẹyịmavara Ohomorihi ka yị wa, dị ẹ hụrị ataba Ịhọrẹbị zị oze ịrẹsụ ataba ẹkụra Anamọrị ịnị ẹtẹ vansa ene chire ọza angwa na ngụ Ịkẹdẹsị Ibaneya nị.

²⁰ Ịjị ẹnịnị tu ịzọọ, dị Imosiisi ka yị wa ka ẹ sị ngụ ẹkụra Anamọrị ana ya ịrẹsụ ataba. Ịzọọ Ẹnẹyịmavara, Ohomorihi ohiku ẹnịnị ra sị yị ẹnịnị nị.

²¹ Dị Imosiisi ka yị wa, Ẹnẹyịmavara Ohomorihi ẹnịnị ọ raa sị ẹtẹ ọnọọ yị wa. Ẹnịnị ẹ na na dọ ẹtẹ asị e hí angwa.

²² Dị avaba Anisirẹrị kụ́ ẹngụ ne tu Imosiisi, dị ẹ ka ọ tụ aza ne re ẹtẹ ọnọọ va ka yị ẹnị agụvị ẹnị ẹ yẹ ẹkụra ene hi ịzọọ ọnịrị avaba oze ana ngụ wa.

²³ Òo me re ka ajuwe ẹnịnị ọọ gẹ dị ộ nyị ọnọrụ ọnyọọnya hụụnị ịrẹsụ ọzọza, dị ẹ vị ẹwụrẹva nị.

²⁴ Dị aza ẹnẹẹ ngụ ẹkụra ẹnẹẹ di e re ẹtẹ huu na ngụ Esikori nị.

²⁵ Ẹ mẹ vẹ, dị ẹ kụ́ ẹtụtụ ọchị ene e re ịzọọ va zụ. Dị ẹ ka ẹtẹ ọnị Ẹnẹyịmavara Ohomorihi ẹnịnị sị yị ẹnị aanị vana nyayịnẹ zoza ẹtẹẹtẹrẹ.

²⁶ Ama ẹnịnị ệ mẹ akamawụ hi Ẹnẹyịmavara Ohomorihi, dị ẹ ka ẹnị ẹ yị vaa ngụ ẹtẹ ọnọọ nị.

²⁷ Dị ẹnịnị aa rị uhuhu hi Ẹnẹyịmavara nị. Dị ẹ ka ọ nyị ịhyẹrẹ ẹnịnị dị ộ kụ́ ẹnị hụrẹ Ijipiti va yị Anamọrị ka ẹ wụ ẹnị va ha nị.

²⁸ Ịzị Imosiisi ka ẹnị ẹ nọ daa! Aza ene re ẹtẹ ọnọọ ka ajịmasị anọrụ ana a hị́ Anakimi e hi ẹkụra ẹnẹẹ nị. Ẹkụra ẹnịnị vana jị ọvọ ana gọdọ na ka ihinẹba kara ẹkụra ẹnịnị.

²⁹ Ama dị Imosiisi ka yị wa ka asị ẹnịnị hí angwa aza ẹnẹẹ.

³⁰ Ẹnẹyịmavara Ohomorihi ẹnịnị ya ọvịdị ẹnịnị aa na ịzọọ, ọ vaa vụ ịrẹvụ yị wa anka ẹnịnị me ree ịsị ọ mẹ ẹtẹ Ijipiti,

³¹ ọnịrị ịnị ụnọmị. Ẹnẹyịmavara Ohomorihi awụ nịnị vị ana sị wa anka ọnyị mẹẹ̄ sị ozi avọọ. Avọọ ọ mẹ sị wa ve tu ụmẹ ọnọọ nị.

³² Ama ẹnịnị ẹ yị sị ayị tụra Ẹnẹyịmavara, Ohomorihi ẹnịnị.

³³ Ohomorihi vana dọ ọvịdị ẹnịnị nee si aha ịzị ẹ vaa jị udi tụ́. Ọnị ọ vị ịra ọbanyị yị wa ịrahụ, dị ọ vị eguhi yị wa ọọdụ, dị aa zụ wa oze ẹnẹ vaa zị.

Ẹnẹyịmavara ộ sị ụya rị Anisirẹrị nịnị

³⁴ Ịjị Ẹnẹyịmavara wụ ịsị ẹ kà, dị ayị kụ́ ọ, dị hị́ eku,

³⁵ dị ọ ka ẹ yị nyị ọza ịnị ẹngụ aza edivi ẹnẹnị ana vaa sị eyi re ọyịza ịnị ẹtẹ ọnị ọnị raà hị́ eku anị yị ohiku ẹnịnị.

³⁶ Ịkarẹbị ozi Ijehwụnẹ kẹnẹ o vee re ịzọọ nị. Ẹnẹyịmavara kà avaba ịzị ọọ ngụ ịnị ẹtẹ ọnọọ kẹnẹ ọnị vaa sị yị ọnịrị evere anị agụvị ka ộ sị ayị ọnya saasa ọnị.

³⁷ Agụvị ẹnịnị Ẹnẹyịmavara dụ ayị hi Imosiisi, dị ọ̀ ka Imosiisi ọnị ẹ yị rẹ vaa ngụ ẹtẹ ọnọọ nị.

³⁸ Ama Ijosuwa ozi Inuni ana vị ọnọgụvọ anị ọ vaa ngụ ịzọọ nị. Dị ọ ka Imosiisi ọ̀ tụ́ Ijosuwa ọtụtụrụma agụvị ka ọnị ọ vaa kụ Anisirẹrị na dọ ẹtẹ ọnọọ nị.

³⁹ Ẹnẹyịmavara ộ kà a yị wa ka, ezweyi ẹnịnị ẹnị ẹ yị yẹ ọyịza hi odivi, ọnị e ro ka aa vaa za ọrịhị ịrẹkụ, ẹ vaa ngụ ẹtẹ ọnọọ nị. Ẹnị ọnị vaa sị ẹtẹ ọnọọ yị dị ahịka ẹnị ẹ dọ ọ nị.

⁴⁰ Dị ọ ka ẹnịnị ẹ vara eyi, ẹẹ ngụ ụnọmị na. Ẹ vara ịrẹsụ ka oze ana na ngụ oku Ịkịịkẹ.

⁴¹ Ẹnịnị ê tụ́ Imosiisi ohi ka, ẹnị ẹ raà mẹ̀ ebira odivi hi Ẹnẹyịmavara. Ama booro aanị ẹnị kụkụ aa nọ ịrẹkụ aza ẹnẹẹ anka Ẹnẹyịmavara Ohomorihi ẹnịnị mẹ ka yị ẹnị. Ẹnịnị ê ro ka ẹ yị vaa tụ ẹnị akanya dị ẹnị ẹ nyị ẹbẹẹba ọnịvị ẹnịnị ene hi ịrẹsụ ataba.

⁴² Ama dị Ẹnẹyịmavara kà yị Imosiisi ka asị ẹ nọ ịrẹkụ agụvị ka ọnị ẹ yị vaa saasa wa, ọnịvị ẹnịnị vi ana vaa nyị ẹbẹẹba ẹnịnị.

⁴³ Imosiisi ka, ọnị ộ ka yị wa ịsị Ẹnẹyịmavara kà, ama dị ẹ mẹ akamawụ hị́ ọ, dị ẹ nọ ịrẹkụ nị.

⁴⁴ Dị Anamọrị ana ra ịrẹsụ ataba jịnẹ tu wa, dị ẹ dụ wa anka ẹhụ mẹẹ̄ dụ ọza avọọ nị. Dị ẹ dụ wa hụrị ataba Ịsẹyị chi vẹ va ngụ Ịhọma nị.

⁴⁵ Ịjị ẹ vaa vẹ, dị e vee sụ ùnè hi Ẹnẹyịmavara ẹngụ. Ama o yị tụ wa ohi.

Anisirẹrị nịnị ệ ra ịnị ụnọmị gọdọ

⁴⁶ Avọọ ẹnịnị me ku Ịkẹdẹsị Ibaneya nị.