Ayịsaya 9 - IWE ỌNỊNỊ

Ohinọyị anaa vẹ

¹ Aza ana aa rị ụya booro aanị, ẹ yị vị avọọ ẹnịnị mè vee hi ịnị ịrahụ pooro. Ịyẹẹyẹ Ohomorihi ộ vịdị za Anizeburuni ọnịrị Aninahwitari dị ọ tẹ wa nị. Ama ịnị ụmẹ ọdịrẹma, ọ vaa sị ụbanyịị yị anokokooro ọnọọ hụrẹ Òkū Imeditareniya na ngụ akẹnẹ Ijodani. Ụbanyị ọnọọ vee tù Igariri bẹẹ ịzị azọga ra hi.

² Aza ene hi ịnị ịrahụ e reè ẹtohweyi ọbanyị ọnya. Ẹtẹ ene vịdị hozi kara wa ama ẹ sị ẹtohweyi re.

³ Wa raà mẹ ka aza ẹnẹẹ ẹ̀ rụrụ, avọọ ụ mẹ̀ rẹ mẹ ka inohine ẹnịnị ọ̀ rẹ dẹngụ nị. Ayị ẹnịnị ô hine é mè re ịsị ụ mẹ̀, ẹ yaa jẹ anka aza ana aa kụ ịsa ọyịna ịnị aarẹ gụ avọọ. Ịnẹ ẹnịnị ee hine anka aza ana nyị ẹbẹẹba ịrẹkụ dị ẹ yaa gà ogu ẹnị ẹ kụ́ ózee eyi ịrẹkụ avọọ.

⁴ Aza ana vịdị aa mẹ ẹchakaa yị wa, wa kụ́ aza ẹnẹẹ gara ha. Wa raà tụ̀ ọkẹẹkẹrẹ ana a vịdị sị tụ́ wa, dị a sịị sị ụyaa rị wa. Wa raà nyị ẹbẹẹba anẹkụra ọnọọ ana mẹ̀ ẹvaya, dị ẹ yaa kụ ogu ẹnịnị Wâ mẹ ka ẹ̀ nyị ehuna anka a mẹ̀ nyị ehuna Animidiya ịyẹẹyẹ avọọ.

⁵ Adava oku isoja nịnị ana ngụ tu wa ọnịrị awuru anya-anya ẹnịnị vị ana vaa rị ịra vaa ha.

 sị ozi ma

⁶ A sị ozi ọnya ma yị! A raà sị ozi ọnọrụ ọnya yị! Ozi ọnọọ ọ vaa nyị ịjọva nị. A vaa hị́ ọ Ohyozirenu, Ọpọzajuwe, Ohomorihi Ochẹtẹẹngụ, Ada ana yà ịzọọ pooro zịna-zịna, Ohinọyị ẹngwọọrọ.

⁷ Ụkata Ịjọva anị vị ana vaa hịrẹ ūna hu avọọ, Ẹngwọọrọ ọnị ọ vaa sị vẹ ọ ma vana ta pàá zịna-zịna. Ọnị ọ vaa vị ohinọyị dọ Idevidi ịrẹsụ nị. Ịzẹyịza ọnịrị ebira ana vọrọ ọ vaa sị sị ịjọva anịị jẹẹ pooro nị. Ẹnẹyịmavara Ochẹtẹẹngụ ọ sị ẹngụ tenyi ka avọọ ọnị maa mẹ̀ ẹ nị.

Ohomorihi vaa sị ụyaa rị Anisirẹrị

⁸ Ananyị yị ọ sị ọkarẹyị mẹ yị Ijekọvụ. Mị ka ịrẹyị ô tù Anisirẹrị.

⁹ Avaba aza vaa yẹ, Anehwireemi ọnịrị Anịsamarịya vi ene ee wuu zị dị ẹ ka

¹⁰ ọvọ ẹnịnị ene wú aanị ụvụ ẹnị vịdị sị tụra a. Ẹ rẹ ka ọchị ẹnịnị ana aā hị́ ihwigi a sị wa ma. Ẹ ka ọchị ọbanyị ana nyị ụkata hu avọọ ana aā hị́ Isida ẹnị vanaa hị́ dọ ihwigi ẹnẹẹ ịrẹsụ nị.

¹¹ Ama Ẹnẹyịmavara ọ raà tụ́ ọnịvị Irezini ịrẹyị ka ẹ̀ kụ́ ịrẹkụ ne tù Anisirẹrị.

¹² Anisiriya ene hi oze ọnị ọyịị̄ zịị vẹ ọnịrị Anihwirisiti ene hi oze ọnị ọyịị̄ zịị naa ngụ ẹtẹ vaa za Anisirẹrị dị ẹ wụ̀ wa va ha. Ẹ maanị sị ụya rị, Ohomorihi ọ yị vị vaa vàa hụụnị ọyịkụ anị. Vị aa tịị tana ụvọọ za wa hu avọọ nị.

¹³ Dị Ẹnẹyịmavara daka maanị sị sị ụya rị Anisirẹrị aanị, ẹnịnị e yi ji jesi ebira ẹnịnị. Ẹnịnị ẹ yị va ve ịda Ẹnẹyịmavara Ochẹtẹẹngụ.

¹⁴ Ịnị ẹkụhị ọnya chọ̀chọ̀chọ̀, Ẹnẹyịmavara vaa sị ụya rị avaba Anisirẹrị ọnịrị ọdọvịdị ẹnịnị Ịrẹsụ ne beri omu ọ vaa kụ́ụ kwooze nị.

¹⁵ Azọkụ ana aza aa sị ụbanyị yị ẹ vị ịrẹsụ ọnọọ nị, dị ọnịsẹ ana aa sị ịrẹyị ireche kọ aza ẹnị vị omuta nị.

¹⁶ Aza ana ka vị ẹnị aa sị oze zụ̀ aza ẹnẹẹ nị vị ana aa kụ́ waa nyeeyi. Aza ana a ka vị a zụ̀ oze zi nị vi ana a kụ́ nyeeyi.

¹⁷ Ẹsẹnị Ananyị yị ọ yị vaa zẹẹ ka à nyị ọpa ozweyi ana ha. Ọ yị rẹ vaa vayị ozi oku ọnịrị osoku nịnị. Avaba ẹnịnị vị ana aa mẹ̀ ebira odivi, dị ahịka ịrẹyị odivi ẹ rẹẹ̄ kà nị. Agụvị avọọ Ẹnẹyịmavara ọ yị vaa vàa hụụnị ọyịkụ anị. Vị aa tịị tana ụvọọ za wa nị.

¹⁸ Ebira edivi aza ẹnẹẹ vị ana aa za anka ọrịra mẹ̀ẹ rị avaba avị ịra avọọ. Areyi vị ana maanị aa dà dụụmẹ aanị.

¹⁹ Ẹnẹyịmavara Ochẹtẹẹngụ vị ana nyayịnẹ aa kụ́ ayịị hi aza ẹnẹẹ. Ọyịkụ vaa ngụraa za aza ẹnẹẹ, dị ẹ yaa rị ịra anka ọkụ avọọ, ọzọza ọnịrị ọhụva anị vị ana vaa và eyii kà ẹngụ.

²⁰ Avaba ịzị aza ẹ̀ẹ ya re ịsọyịrị ịnị ẹkụra ọnọọ vị ene vee zunee rị, ama dị ụngwẹ aa kịị kụ̀ wa. Ẹ hyakụ vaa wụ̀ ozi ẹnịnịị rị bẹẹ.

²¹ Anịmanasẹ ọnịrị Anehwireemi vaa wụ̀ ẹngụụ rị. Ẹ rẹ vaa vabẹ tù Anijuda. Dị ẹ daka maanị aa rịị rị ụya, Ẹnẹyịmavara ọ yị vaa vàa hụụnị ọyịkụ anị, vị aa tịị tana ụvọọ za wa nị.