Ayịsaya 7 - IWE ỌNỊNỊ

Ịrẹyị ana Ayịsaya kà yị Ahazi ohinọyị

¹ Â nyị ụmẹ ọnya ana Ahazi sị vị ohinọyị Ijuda. Ahazi ọnọọ vị ozi Ijotami ana ada anị rị Uzaya. Di ohinọyị Aniroomi ana aā hị́ Irezini ọnịrị ohinọyị Anisirẹrị ana aā hị́ Ịpẹka ana vi ozi Iremaraya na vabẹ dị ẹ kụ́ ịrẹkụ ne tù Ijerusarẹmị nị. Ama e rè vee zuu huna Anijerusarẹmị.

² Dị a vana kà a yị anovwoovu Idevidi, dị a ka Aramị ọnịrị Ehwireemi ẹ sị vabẹ o. Ahazi ọnịrị aza anị mẹ̀ wụ́ ọ, ẹnịnị aa da ẹgahị angwa mèe hí wa, dị ẹ yaa banyị anka ahị mèe henyi ọchị ene hi ini iriku avọọ nị.

³ Dị Ẹnẹyịmavara va kà a yị Ayịsaya dị ọ ka ọnịrị ozi anị ana aā hị́ Ịsịyẹ-Ijasubi e ne tu Ahazi. Ọ kà e ve re e oze ana gụrị ịzị aza yaā mẹ̀ ịta uru. Ịzọọ ọ vị ọtaha ụsị ene enyi ana hụrẹ ini imisi ẹbẹẹba vaa tụra vẹ nị.

⁴ Ọ kà òo ne si tụ̀ ọ dị ọ̀ kà a yọ ka ò si eyi pè ẹtẹ dị ọ̀ vayị nẹtẹ. Kà a ka asị o hí angwa. Kà a ka asị ayị hụrẹ ẹ ịnẹ agụvị ịrẹyị Irezini ọnịrị Aramị ana vi Iremaraya ana aa kụ́ ayịị hi wu. Ẹnịnị vị ana sị mẹẹ ẹjịjị ịra ẹẹva ana aa tụ́ areyi avọọ.

⁵ Aramị ọnịrị Ehwireemi ne beri ozi Iremariya ẹ raà gẹ eyi ka ẹnị ẹ̀ va gara awụ nịnị ha.

⁶ Ẹ ka ẹnị aa kụ́ ịrẹkụ nee tù Ijuda dị ẹnị ẹ gara a ha chẹchẹchẹchẹ. Ẹ ka ẹnị aa gà a hi ẹngụ ụvọ dị ẹnị ẹ̀ na sị ozi Itabeeri va vị ohinọyị tụ́ ịzọọ.

⁷ Ireche eyee che nị, ẹ yị vavọọ va zụụ mẹ. Ọnị Ẹnẹyịmavara ọ ka avọọ nị.

⁸ Wâ yẹ ka Ịdamasịkọsị ọ vị ohirẹsụ Aramị nị, dị ahịka Irezini ọ vị ohinọyị anị nị. Ọ̀ọ na mẹ ịrayị ẹbẹẹta tụra ẹẹhị, a kụ́ Ehwireemi gara ha dị ẹ yị kụkụ nyị aza ịnị anị.

⁹ Isamariya aa vịị vị ohirẹsụ Ehwireemi nị, dị ahịka ozi Iremaraya ọ vị vị ohinọyị anị nị. À yị vị ụ sị sị ayị tụra Ẹnẹyịmavara, wẹ yị va zụụ jẹẹ.

 sị Ẹmanụwẹrị mẹ apọtẹrẹwa

¹⁰ Dị Ẹnẹyịmavara rẹ kà a yị Ahazi dị ọ ka

¹¹ ò họ̀ use ka ọnị ọ̀ sị zụ̀ ọ ịsị ọ vaa sị yẹ ka ịrẹyị ọnọnị vị ịzẹyịza. Ọ kà òo zee e eyi ò họ̀ use ka ọnị ọ̀ sị ịsa hụrẹ uruvo ẹtẹ àa vị ẹbẹẹba keekere mẹ apọtẹrẹwa ka ịrẹyị ẹnẹnị vaa mẹ.

¹² Dị Ahazi ka ẹ yị nyị ịsị ọnị ee họ̀ use anị. Ọ kà oni o yi sì ka ọnị ọ̀ zama Ẹnẹyịmavara re.

¹³ Dị Ayịsaya va ka, “Ẹwụ anovwoovu Idevidi, batọ o! Ọza rị ẹyị ịrẹsụ ọ̀ọ nyị isuuru pooro dị ụ raà kụ́ ọ dụ ọ eyi nị, o yi zoza. Ama wa kụkụ raà mẹ ka Ohomorihi ana maanị nyị isuuru ọ̀ hyakụ du ọnị ịnyẹmba eyi.

¹⁴ Ananyị yị ọnị ụvọta vaa sị apọtẹrẹwa ọnya yị wụ dị wa yẹ ka ịrẹyị ẹnẹnị vị ịzẹyịza. Ozwoorihi ọnya vee zyẹẹ, dị ọ ma ozi ọnọrụ ọnya aanị. Ẹmanụwẹrị ụ vaa hị́ ịrẹha anị nị.

¹⁵ Ịrẹva ụnọ ọnịrị ẹhụ ozi ọnọọ vaa rị pooro dị ọ̀ va yẹ ka â nyị irenyi ini ebira odivi ọnịrị ebira ozoza.

¹⁶ Ama dị ọ̀ vavọọ va vịra, ẹtẹ ohinọyị ẹyịva oni u maanị ee hí angwa anị aanị sị tụ́ osusu.

¹⁷ “Ama ẹwụ Ahazi, Ẹnẹyịmavara vaa sị ụyaa rị ẹwụrị aza awụ ne beri ovwoovu ada awụ. Aza ẹ yị vịdị vavọọ rị ụya hụrẹ ụmẹ oni Ehwireemi sị hụrẹ ha hụrẹ ẹngụ Ijuda. Aa sị ohinọyị Anasiriyaa vẹ.”

¹⁸ Ịhị ụmẹ ọnọọ òo si tù, Ẹnẹyịmavara vee hú ohi hị́ Anijipiti dị ẹ hara vẹ anka ịsị avọọ, dị ọ rẹ hị́ Anasiriya dị ẹnị kọmị vẹ anka ẹhụ avọọ.

¹⁹ Ẹ vavẹ dị ẹ va gara hi ini ozi ọnịrị ịnị ụtẹha. Dị ẹ vavọọ chaka kú avaba avị ene hi ịzọọ.

²⁰ Ịhị ọnọọ dị Ananyị yị tụ́ na hị́ ohinọyị Anasiriya. Wâ yẹ ka ịrẹkụ ẹnịnị ệ rẹ́ ẹnẹmẹhị. Ẹ vaa vẹ dị ẹ va kụ́ wụ nịnị ịrẹsụ nyọọnyọrọ, dị ẹ rẹ kụ́ ịrẹwa ne beri ịrẹta awụ nịnị.

²¹ Aza vaa pa imaaru ọnya ọnịrị ẹvụ ẹẹva pere ịnị ụmẹ ọnọọ

²² dị ahịka vi ee hú ịrẹva ẹnịnị pooro kẹnẹ ẹ́ mẹ̀ gwẹtẹ. Avaba aza ana vọ hi ịnị ẹtẹ ọnọọ vi ene vee hú ịrẹva ụnọ dị ẹ yaa rị ẹhụ.

²³ Ịnị ụmẹ ọnọọ ịzị ọchị ana aā hị́ ịvayịnị akahị vịdị hi, dị ẹkẹhị tụ̀ ẹkẹhị enyusẹ-enyusẹ ẹnya ịrẹsụ ẹvarẹwụ, ikeyi-ikeyi kẹnẹ e kuku vee hi ịzọọ nị.

²⁴ Ịzọọ vavọọ vee hi pooro dị aza kuku ee nee zù ube ịzọọ.

²⁵ Ọza ọ yị kụkụ vaa nyayịnẹ ngụ avaba ịzị a vịdị kụ́ ịrịkụ tụ́ óòo mè hí pooro. Vị ẹ kụkụ vaa yà anka ịzị a navọ ịsụpa nịnị hi ka ẹ̀ẹ rị nị.