Ayịsaya 66 - IWE ỌNỊNỊ

Ahẹkẹ ọnị Ohomorihi ee sì

¹ Ẹnẹyịmavara kà a, ẹbẹẹba vị aha ọyị yaatụ ohinọyị anị, dị ẹhẹ vị ịrẹhụ ọnị ọnị aa kụ́ ahụ hi nị. Ẹngụ irehi si è ro ka ẹnị ẹ zụ da yị ọnị kẹ? Ịzị ẹ vị aha ẹnẹ zụ da ka ọnị ọ ra kẹ?

² Ọ kà ọnị ọ mẹ ẹbẹẹba ọnịrị ẹtẹ nị. Avaba ẹhẹ vị anị. Ayị anị o hine tù aza anaā ka ẹngụ ẹnịnị chi, dị ẹ sị ayị tụra ọnị kẹnẹ, di e hí angwa anị ọ̀ọ ka ịrẹyị.

³ Ama a raà chi hi aza ana mẹ̀ ene zee wa eyi kẹnẹ, ebira vi ene hine wa. Agụvị avọọ, Ẹnẹyịmavara ẹ̀ yị dọ ịsọvọ ẹnịnị. Ịsọvọ ụnọ ẹnịnị vị ọnị o re anka ọza ọ̀ọ wụ̀ ọza avọọ nị. Ịsọvọ ozi atẹmẹ ẹnịnị vị ana ya anka ọza ana wụ irezi gụ ori avọọ. Ịsọvọ akụ ẹnịnị sị mẹ anka ọza ọ̀ọ sị ụra mẹ̀ ịsọvọ yị ori avọọ nị. Eturare ọnị ẹ̀ẹ rị ịra vaa sị mẹẹ anka ọza o rere aa ma aduwa yị ori avọọ nị.

⁴ Ẹnẹyịmavara kà ọnị ộ hị́ wa, ẹnịnị è yi tụ́ ohi, ọnị ộ ka ịrẹyị, ẹnịnị ẹ̀ yị wụ́, ebira odivi ọnịrị akamawụ ẹ yaa mẹ hi ọnị nị. Agụvị avọọ, ọnị aa kụ̀ akanya tụ́ wa, odivi ọnị e yee hí angwa gẹdẹ-gẹdẹ ọnị aa kụ́ tù wa nị.

⁵ Batọ ịrẹyị Ẹnẹyịmavara ẹwụ nịnị ene hí angwa anị: Aza awụ nịnị ana nyị ịhyẹrẹ awụ di e yi wụ tịtẹ agụvị anị vaa sị wụ nịnị mẹ enyi ini. Dị ẹ ka, Ẹnẹyịmavara ọ́ sị ụkata anị zụ dị ẹnị e re kẹ. Ama ẹnị a vaa mẹ̀ ụhị nyị nị.

⁶ Ẹnẹyịmavara kà ẹnị ẹ wụ́ ẹtẹ ana sụ ịrẹyị ịnị ẹkụra ọnịrị ịnị irehi anị, Ọnị aa sị ụya rị ọnịvị ẹnịnị ọnị ẹtẹ vavọọ aa sụ̀ ịrẹyị nị.

⁷ Ọ kà ẹnịnị ẹ́ẹ́ wụ́ da ka ọnẹẹ o ma ozi da dị ịrẹẹ ọ vaa zị ọ.

⁸ Ẹnẹ maanị wụ́ ẹngụ ịrẹyị ọnọnị da? Ẹnẹ vavọọ re e da? Áá zụ ma ẹkụra ịnị ẹkụhị ọnya? A vị ọza ọ zụ dọ ẹkụra ha ịnị aba ọnyọọnya?

⁹ Ẹnẹyịmavara kà, éé ro ka ọnị vaa kụ́ aza anị na ngụ ụmẹ ọyị ma ozi, dị ọnị ẹ yị zẹ ka a maa?

¹⁰ Ọ kà ẹnịnị ee beri Ijerusarẹmị jẹ, avọọ aza ene sì ịrẹyị ẹkụra ọnọọ, ee hine ayị beri wa booro aanị. Avaba aza ana vịdị raà jị òrèrè yị Ijerusarẹmị.

¹¹ Vee hine ayị ka aa ka tụ ọvịdị anka ozi ene hu ịrẹva ọnyị anị.

¹² Ẹnẹyịmavara kà ọnị vaa mẹ ka ize ẹnịnị ọ nọ ịrẹma. Ogu anẹkụra nịnị vaa ngụ tu wa anka irehu meē si dị ẹ yị wụ́ avọọ. Ẹ vaa sị mẹẹ anka ozi ọnị ọnyị anị sị rị ụvọ aa ka ịrẹva, dị ọ sị eyi pe ẹtẹẹtẹrẹ agụvị ka o sì ịrẹyị anị avọọ nị.

¹³ Ẹnẹyịmavara kà ọnị vaa sị ayị ẹnịnị ene hi Ijerusarẹmị nẹtẹ anka ọnyị ozi mẹẹ̄ sị ayị ozi anị nẹtẹ avọọ.

¹⁴ Ịjị wèe re ka ịsa ẹnẹnị aa mẹ̀, ayị awụ vee hine. Ọ vaa vị ụkata ọnịrị ẹngwọnịya yị wụ. Ịjọnọọ ụ vaa yẹ ka ọnị Ẹnẹyịmavara gụ aza ana wụ́ chire e, dị ọ kụ́ ayị hi ọnịvị anị nị.

¹⁵ Ẹnẹyịmavara vaa sị ịra hụrẹ ẹbẹẹba chi vẹ anka opomi avọọ. Ọ vaa sị ọyịkụ-ọyịkụ si atọ ayodu anị, dị ọ sị ịra rị aza ana aa kụ́ ayị hi.

¹⁶ Ịra ọnịrị ụhwọ ọ vaa sị sị ụya rị avaba anẹhẹ ana rị ịvị anị. Aza ọrụrụ vị ene vee su.

¹⁷ Ẹnẹyịmavara kà, ẹzẹtẹ aza ana jị ẹngụ ẹnịnị yị ori ọyị hẹkẹ aa gụrị ẹtẹ. Ẹnịnị va ọkọnị na ngụ ụbazị ori nịnị, dị ẹ rị uye ụra ọnịrị ụsụ beri ịsa enyisi ana vọ.

¹⁸ Ẹnẹyịmavara kà ọnị ọ yẹ ịsa ọnị e yee ro ọnịrị ebira ẹnịnị. Ọnị aa vẹ vaa kụ avaba anẹhẹ gụ. Ịjị ẹ̀ẹ sị gụ, ẹ vaa yẹ ụkata anị za.

¹⁹ Ẹ vaa yẹ ka ọnị ọ vị ọza anaa sị ụya rị wa nị. Ama, ọnị vaa navọ aza ẹnyị ẹnịnị, dị ọnị tụ́ wa nọ ẹkụra irenyi-irenyi aha onoze ịzị ọza ẹ yị wụ́ ịrẹyị anị, dị ẹ hyakụ ve re ụkata. Ẹnịrị aza ana yara ne ọpa vaa nọ Isipeni, Iribiya ọnịrị Iridiya, Itubari beri Igiriisi. Ẹ vaa sị ụbanyị anị zụ ịnị ẹkụra ẹnịnị.

²⁰ Ẹ vaa kụ anda ẹnịnị ene hi ẹhẹ vaa vẹ eehi va yị Ẹnẹyịmavara anka ọza o rere sị va yị ọ avọọ. Ẹ vaa kụ wa vẹ ịrẹsụ ataba ọnịnị anị Ijerusarẹmị ịrẹsụ umaata, ịkẹrịkẹtẹ, ịnyaakụmị, ịkẹkẹ ịrẹkụ ọnịrị aha ẹnya anị. Ẹ́ vaa kụ wa vẹ anka a mẹẹ̄ kụ ẹyịza ọyị sị mẹ̀ ịsọvọ ịnị ẹnya ana nị vẹ ịnị irehi Ohomorihi avọọ nị.

²¹ Ẹnẹyịmavara kà ọnị vaa sị aza ẹnyị ẹnịnị ka ẹ vị ohirẹsụ irehi anị, dị ẹnyị vị Anireevi ana mẹ ọgụvọ.

²² Anka ẹtẹ ọwọọwa ọnịrị ẹbẹẹba mẹ vaa ya ịzọọ pooro, avọọ evere ẹnịnị ọnịrị ịrẹha anị ẹ yị vu pooro nị.

²³ Ẹnẹyịmavara kà, ẹkụhị ịpaapa ịnị ụhwẹ ọnịrị ẹkụhị ụhwọtụ vị ọnị avaba aza vaa sị hẹkẹ ọnị.

²⁴ Ẹnịnị maa jịnẹ tụ ẹhẹ, e vee re oku aza ana mẹ̀ akamawụ hi ọnị. Ikukurumi ana aa rị wa ẹ yị vee su, dị ịra ana aa rị wa ẹ yị vee mi. Oyn re wa vị ana vaa nyị aza ịhyẹrẹ.